Error
  • JUser: :_load: Unable to load user with ID: 62
Tuesday, 01 November 2011 14:02

የጋዳፊ ቤተሰብና ሊቢያ ለሆሊውድም አልተመቹም ነበር

Written by 
Rate this item
(1 Vote)

በጋዳፊ የሥልጣን ዘመን ቤተሰባቸው ሊቢያ ለሆሊውድ ሳይመቹ መቆየታቸውን የተለያዩ ዘገባዎች አመለከቱ፡፡ ዘገባዎቹ በሆሊውድ ፊልሞች ታሪክ በሊቢያ የገጠሙ ውጣ ውረዶችን በማስታወስና የጋዳፊ ቤተሰብ በሆሊውድ የነበራቸው ኢንቨስትመንት እጅግም ያልተሳካ እንደነበር አመልክተዋል፡፡ በ1977 እ.ኤ.አ “ዘ ሜሰጅ” በሚል ርዕስ በነብዩ መሃመድ የህይወት ታሪክ ላይ የሚያተኩርና በአንቶኒ ኪዊን ሊተወን የነበረ ፊልም በበጀት እጥረት ሳይሰራ ቀርቷል፡፡

እግር ኳስ ተጨዋች የነበረውና የቀድሞው የሊቢያ መሪ ሙአመር ጋዳፊ ልጅ የሆነው ሳኢዲ ጋዳፊ ሆሊውድን ባልተተገበሩ ፕሮጀክቶቹ መበደሉን የገለፀው ቫራይቲ መፅሄት፤ ከ2 ዓመት በፊት “ናቹራል ሴሌክሽን” በሚል በመሰረተው ኩባንያ በ100 ሚሊዮን ዶላር በጀት ቢንቀሳቀስም አንድ ፊልም ብቻ እንደሰራ አውስቷል፡፡ ኩባንያው በጋዳፊ ልጅ ሲቋቋም በአምስት ዓመት ውስጥ 20 ፊልሞችን ለመስራት አቅዶ የነበረ ሲሆን፤ በ2009 ፎረስት ዊቴከር እና አድራያን ብሮዲ የሚተውኑበትን ‹ዘ ኤክስፐርመንት› የተባለ ፊልም በ12 ሚሊዮን ዶላር በጀት ፕሮዲውስ ቢያደርግም በ3 ሚሊዮን ዶላር በጀት ‹አይሶሌሽን› የተባለ ፊልምን ሳይጨርስ ትቶታል፡፡ ሚኪ ሮኪ፣ ፎረስት ዊትቴከር እና አድራያን ብሮዲ ከሳኢዲ ጋዳፊ ጋር የስራ ውል ከነበራቸው የሆሊውድ ምርጥ ተዋናዮች መሀል ይጠቀሳሉ፡፡ ላለፉት ሁለት ዓመታት በሆሊውድ የፊልም ስራ ሲንቀሳቀስ የቆየው ይህ ኩባንያ፤ በሊቢያ የህዝብ አመፅ ከተቀሰቀሰ ወዲህ ሙሉ ለሙሉ ስራ አቁሟል፡፡ የ38 ዓመቱ ሳኢዲ የጋዳፊ ትንሹ ልጅ ነው፡፡ በተቃዋሚ ሃይሎች በቁጥጥር ስር ከዋሉ ሁለት የጋዳፊ ልጆች አንዱ የሆነው ሳኡዲ፤ በንፁሃን ላይ የግድያ ትዕዛዝ ሰጥቷል በሚል በኢንተርፖል ይፈለጋል፡፡ ባለፉት ዓመታት የጋዳፊን ቤተሰብ በማዝናናት ከሰሩ ምርጥ ሙዚቀኞች መካከል ቢዮንሴ፤ 50 ሴንት፤ ኤነሪክ ኢግላስያስ፤ ሊዮኔል ሪቼ፤ ማርያ ኬሪና አሸር ከስመ ጥር ገናና ከያኒያን ዋነኞቹ ናቸው፡እነዚህ ዘፋኞች ለጋዳፊ ቤተሰብ መስራታቸው መጥፎ ዝና ቢፈጥርባቸውም በተለያዩ በዓላት በሚያቀርቡት መዝናኛ እስከ 2 ሚሊዮን ዶላር ይከፈላቸው ነበር፡፡

 

Read 1811 times Last modified on Tuesday, 01 November 2011 14:05