የፖም ጭማቂዎች ፓስቸራይዝድ መሆናቸውን አረጋግጡ
የመርሳት በሽታን (አልዛሂመር) ይከላከላል
ፖም የሚመገቡ ሰዎች ሸንቃጣ ናቸው  

አትክልትና ፍራፍሬ አዘውትሮ መመገብ ከፍተኛ የጤና ጥቅም እንዳለው ተመራማሪዎች ይናገራሉ፤ ይመክራሉ፡፡ የእኔም አነሳስ ይህንኑ ሐሳብ የሚያጠናክር ነው - አመጋገብን በማስተካከል ማለትም አትክልትና ፍራፍሬ በብዛት፣ ፕሮቲንና ካርቦሃይድሬት በመጠኑ በመመገብ ጤናማ ሕይወት ይምሩ የሚል፡፡
አንዲት ልጅ አውቃለሁ፡፡ - “ሀበሻና ቢላዋ የሰባ ይወዳል” የሚለውን አባባል የምትደግፍ ናት፡፡ በሳምንት አንድ ጊዜ፣ ከተመቻቸላት ሁለትና ሦስት ጊዜ ጥሬ ሥጋ ትበላለች፤ ቢጠፋ ቢጠፋ በ15 ቀን አንዴ ሳትበላ አትቀርም፡፡ የዚህቹ ልጅ የጨው አጠቃቀም የሚገርም ነው፡፡
ምግብ ውስጥ ለሌላ ሰው “ኖርማል” የሆነው የጨው መጠን፣ እሷ ጋ ሲደርስ ባዶ ይሆንባታል። ስለዚህ ጨው ነስንሳ ነው የምትበላው፡፡ ስኳርም እንደዚያው ነው፡፡ እሷን ባየሁ ቁጥር ከበርካታ ዓመታት በፊት ብሪቲሽ ካውንስል ላይብረሪ ያነበብኩት Women’s weekly የተባለ መጽሔት ትዝ ይለኛል፡፡
መጽሔቱ፣ “መርዝ እንደምትፈሩ ሦስቱን ነጮች (ጨው፣ ስኳር፣ ጮማ) ፍሩ” ይላል። ታዲያ፤ እነዚህን የጤና ጠንቅ የሆኑትን ምግቦች የምትወደው እሷ ብቻ አይደለችም፣ ብዙ ሰዎች እነዚህን ምግቦች ይወዳሉ፡፡ ይህ ጉዳይ፣ በሌሎች ጥናቶችም ስለተረጋገጠ አደጋ አለው!
የዛሬው ትኩረቴ፣ የፍራፍሬ ወገን በሆነው ቱፋህ ፖም ወይም አፕል የሕክምና ጥቅምና ጥንቃቄ ላይ ያተኮረ ነው፡፡
ፖም፣ ከፍተኛ የጤና ጥቅም እንዳለው ብዙ ጊዜ ሰምታችኋል ብዬ እገምታለሁ። እኔም የምለው ይኼው ነው፡፡ ነገር ግን በርካታ ጥቅሞች እንዳሉት ብናምንም፣ “ጠርጥር፣ ከገንፎ ውስጥ ይገኛል ስንጥር” እንደሚባለው ጥንቃቄም ማድረግ እንዳለብን ማወቅ ይገባናል፡፡

የፖም ጥቅም
አልዛሂመርን ይዋጋል - ይህ፤ በዕድሜ የገፉ ሰዎች በሕይወታቸው ሙሉ የሚያውቁትን ነገር እንዲረሱ የሚያደርግ የአንጐል በሽታ ነው፡፡ በሽታው የያዛቸው ሰዎች፣ ከጥቂት ደቂቃ በፊት ያደረጉትን ነገር እንዲሁም እናታቸውን ጭምር ሊዘነጉ ይችላሉ።
ፖም፣ የአንጐል ሴሎች እንዳያረጁ የሚያደርግ ከርሰቲን (quercetin) የተባለ ኃይለኛ ፀረ - ኦክሲደንት (ኦክሲጅን ከሌላ ንጥረ - ነገር ጋር ሲዋሃድ የሚፈጠር ቅሪት ወይም ዝቃጭ) ኬሚካል አለው፡፡
ይህ ኬሚካል፣ በአይጦች ላይ ተሞክሮ ጥሩ ውጤት ስላስገኘ፣ ሳይንቲስቶች ለሰው ልጅም ሳይጠቅም አይቀርም የሚል እምነት አላቸው፡፡
የቱፋህ ቆዳ መመገብ ብዙ በሽታ ተዋጊ ውህድ ያስገኛል ብሏል Reader’s digest USA በኦክቶበር 2013 እትሙ፡፡ ስለዚህ ለምግብነት ትናንሽ ፖሞችን ይምረጡ፡፡ ምክንያቱም ትላልቆቹ ፈጥነው ስለሚበስሉ የጤና ጥቅማቸው እያበቃ ሊሆን ይችላል፡፡
የደንዳኔ (colon) ካንሰር ይከላከላል - በቅርቡ በጀርመን የተደረገ አንድ ጥናት፤ ተፈጥሯዊው የፖም አሰር (Fiber) በደንዳኔ ውስጥ ሲብላላ ወይም ፈርመንት ሲያደርግ የካንሰር ሴሎች እንዳይፈጠሩ የሚያደርጉ ኬሚካሎች እንደሚፈጠሩ አመልክቷል።
ሌሎች ጥናቶች ደግሞ በፖም ውስጥ የሚገኘው ፕሮካአዲያን (Procyanidins) የተባለ ፀረ ኦክሲደንት፣ የካንሰር ሴሎችን የሚገድሉ በርከት ያሉ ሴሎች እንዲነቃቁ እንደሚያደርግ አረጋግጠዋል፡፡
የደም ስኳር እንዳይዋዥቅ ያደርጋል - ፖም፤ በሟሚ አሰር የተሞላ በመሆኑ፤ የምግብ ስልቀጣና ጉሉኮስ ከደም ጋር የሚቀላቀልበትን ፍጥነት ያዘገያል።
አንድ የተመራማሪዎች ቡድን፣ በቀን ቢያንስ አንድ ፖም የሚበሉ ሴቶች ከማይበሉት ጋር ሲነፃፀር፤ በስኳር ሕመም የመያዝ ስጋታቸው 28 በመቶ መቀነሱን ደርሶበታል፡፡
የድድን ጤና ከፍ ያደርጋል - ፖም ተፈጥሯዊ የጥርስ ማጽጃ መሆኑ ከታወቀ ብዙ ዓመታት ተቆጥረዋል፡፡ ፖም መብላት ጥርስ ማጽዳት ባይሆንም፤ ፖም ገምጦ ማኘክ ድድ እንዲነቃቃ ያደርጋል፡፡
ጣፋጭነቱ ደግሞ የምራቅ ምርት እንዲጨምር ያደርጋል፡፡ ይህ ሁኔታም፣ በአፍ ውስጥ የሚኖሩትን ባክቴሪያዎች መጠን ዝቅ በማድረግ፣ የጥርስ መበስበስ እንዲቀንስ ያደርጋል፡፡
ከፍተኛ የደም ግፊትን ይከላከላል - በቅርቡ በተደረገ ጥናት መሠረት፣ ፖም የተመገቡ አዋቂ ሰዎች በደም ግፊት የመያዝ ዕጣቸው 37 በመቶ ቀንሶ ተገኝቷል፡፡ ሸንቃጣ ያደርጋል - ፖም በፋይበርና በውሃ የተሞላ ነው፡፡ ፖም ከበሉ፣ ሆድ ለመጥገብ የሚፈልገው አነስተኛ ምግብ ስለሆነ ብዙ አይመገቡም፡፡
ከዚህም በተጨማሪ በቀን ቢያንስ ሦስት ፖምና (ሥዕላዊ መዝገበ ቃላት ሸክኒት ይለዋል - ሞለል ያለ አረንጔዴ ወይም ቢጫ የሆነ ውስጡ ነጭ ጣፋጭ ፍሬ) የሚበሉ ሰዎች፣ ክብደት እንደሚቀንሱ ከዋሽንግተን ስቴትና ከብራዚል የወጡ ጥናቶች አመልክተዋል፡፡
ከፍተኛ ኮሌስትሮልን ይዋጋል - የፖም ካሎሪ (ኃይል ሰጪነት) ዝቅተኛ ሲሆን ፐክቲን (Pectin) የተባለው ሟሚ አሰር (Fiber) መጠን ከፍተኛ ነው፡፡ ይህ ሁኔታም፣ የደም ስሮችን (አርተሪስ) የሚጐዳውን ኤል ዲኤል (LDL)  የተባለ የደም ኮሌስትሮል መጠን እንዲቀንስ ያደርጋል፡፡

ፖም ያለው የጤና ስጋት
ፀረ - ነፍሳት መድሃኒት - ፖም፤ ለትላትሎች፣ ቆዳውን ለሚጐዱና Scale ለተባሉ የተለያዩ ነፍሳት የተጋለጠ ነው፡፡ ይሄን ለመከላከል በርካታ የፖም ዝርያዎች ፀረ - ነፍሳት መድሃኒት ይረጭባቸዋል። ስለዚህ ፖም ከመግመጥዎ በፊት ይጠቡት፡፡ እንዲሁም፤ የሚረጨው ፀረ - ነፍሳት ወደ ውስጥ እንዳይገባ፣ ፖሙ ሰም ተቀብቶ ይሆናል፡፡ ስለዚህ ሰም የተቀባ ፖም ካጋጠምዎት፣ ቆዳውን ልጠው ይመገቡ፡፡
አለርጂ - የደረቀ ፖም፤ እርጥበቱንና ቀለሙን እንደያዘ እንዲቆይ፣ ብዙ ጊዜ ሰልፈርዳይኦክሳይድ ይጨመርበታል፡፡ ይሄ ደግሞ አለርጂ ያለባቸውን ሰዎች ሊቀሰቅስባቸው ስለሚችል መጠንቀቅ ያስፈልጋል፡፡
የባክቴሪያ ኢንፌክሽን - ሕፃናት፣ እርጉዝ ሴቶች፣ በዕድሜ የገፉና የበሽታ መከላከል አቅማቸው ደካማ የሆነ ሰዎች ፓስቸራይዝድ ያልሆነ የታሸገ የፖምና የሲደር (cider) ጭማቂ ሲጠጡ ኢ.ኮሊ (E.cole) እና ክሪፕቶስፓርዲየም (Cryptosporidium) የተባሉት ባክቴሪያዎች፣ ለአደገኛ በሽታ ያጋልጣሉ።
ስለዚህ የተጠቀሱት ሰዎች የታሸገ የፖምና የሲደር ጭማቂ ከማግዛታችን ወይም ከመጠጣታችን በፊት ፓኮው ላይ ፓስቸራይዝድ መደረጋቸውን ማረጋገጥ አለብን፡፡