Saturday, 11 March 2017 12:32

የሃሪ ፖተር ቲያትር በ11 ዘርፎች ለሽልማት ታጭቷል

Written by 
Rate this item
(0 votes)

ሃሪ ፖተር ኤንድ ዘ ከርስድ ቻይልድ” የተሰኘው የታዋቂዋ እንግሊዛዊት ደራሲ ጄ ኬ ሮውሊንግ እጅግ ተወዳጅ ቲያትር ለአመታዊው የለንደን ኦሊቨር የቲያትር ሽልማት በ11 ዘርፎች መታጨቱን ቢቢሲ ዘግቧል፡፡
በሽልማቱ ታሪክ በበርካታ ዘርፎች በመታጨት ቀዳሚነቱን የያዘውና ከመጽሃፍ ወደ ቲያትርነት የተቀየረው “ሃሪ ፖተር ኤንድ ዘ ከርስድ ቻይልድ”፣ ምርጥ ዳይሬክተርና ምርጥ አዲስ ቲያትርን ጨምሮ በድምሩ በ11 ዘርፎች ለዘንድሮው ሽልማት ታጭቷል፡፡
ቲያትሩ በዘንድሮው የኦሊቨር ሽልማት በዕጩነት ከቀረበባቸው ሌሎች ዘርፎች መካከልም፣ የምርጥ የመድረክ ገጽ ዲዛይን፣ የምርጥ የብርሃን ዲዛይን፣ የምርጥ ድምጽ ግብዓትና የምርጥ አልባሳት ዘርፎች እንደሚገኝባቸው ዘገባው አስታውቋል፡፡
በመጽሃፍ መልክ ለገበያ የቀረበው “ሃሪ ፖተር ኤንድ ዘ ከርስድ ቻይልድ” ባለፈው የፈረንጆች አመት 2016 አማዞን በተባለው ታዋቂ የድረ ገጽ ሽያጭ ተቋም በኩል በህጻናትም ሆነ በአዋቂዎች መጽሃፍት ዘርፍ በብዛት በአለማቀፍ ገበያ በመሸጥ ቀዳሚነቱን መያዙ ይታወሳል፡፡
የኦሊቨር ሽልማት ዋና ፕሮዲዩሰር ጁሊያን በርድ፤ በዕጩነት የቀረቡት ቲያትሮች የለንደን ቲያትሮች አለማቀፍ ለውጥ በተስተናገደበት አመትም የማዝናናትና አመለካከታችንን የመቀየር ብቃት እንዳላቸው ማሳያ ናቸው ማለታቸውን የጠቆመው ዘገባው፤ የሽልማት ስነስርዓቱ በመጪው ሚያዝያ ወር ለንደን በሚገኘው ሮያል አልበርት አዳራሽ እንደሚከናወንም አክሎ ገልጧል፡፡

Read 976 times