Monday, 13 November 2017 09:33

የብሄራዊ ደህንነት ም/ቤት፤ የፀጥታ ችግር የሚፈታበት እቅድ አዘጋጅቷል

Written by  አለማየሁ አንበሴ
Rate this item
(13 votes)

  - የሀገሪቱ የጦር ጀነራሎችና የደህንነት ኃላፊዎች ትላንት ከጠ/ሚኒስትሩ ጋር ተወያይተዋል፡፡
          - በግጭት የተሳተፉ ከፍተኛ አመራሮች በቁጥጥር ስር መዋል ይጀመራል ተብሏል፡፡

    መንግስት በሀገሪቱ ተፈጥረው የነበሩ ግጭቶችን መቆጣጠር መቻሉንና የብሄራዊ ደህንነት ም/ቤት የፀጥታ ችግርን በዘላቂነት የሚፈታበት አዲስ እቅድ አዘጋጅቶ ተግባራዊ እንቅስቃሴ መጀመሩን ጠ/ሚኒስትር ኃይለማርያም ደሳለኝ ሰሞኑን በሰጡት መግለጫ ያስታወቁ ሲሆን ከፍተኛ አመራሮች ጨምረው በግጭት የተሳተፉ አካላትን በቁጥጥር ስር ማዋል ሊጀመር መሆኑን ተናግረዋል፡፡
በሌላ በኩል ትናንት በጠቅላይ ሚኒስትሩ ጽ/ቤት የመሰብሰቢያ አዳራሽ የሀገሪቱ መከላከያ ኤታማዦር ሹም ጀነራል ሳሞራ የኑስን ጨምሮ የፌደራል ፖሊስ፣ የክልል ፖሊስ ኃይል አመራሮች፣ የክልሎች ርዕሰ መስተዳደሮችና የደህንነት ተቋማት ኃላፊዎች አዲስ በወጣው የብሔራዊ ደህንነት እቅድ ላይ ከጠ/ሚኒስትሩ እና የመከላከያ ሚኒስትሩ ሲራጅ ፈጌሣ ጋር ውይይት አድርገዋል፡፡
አብዛኛውን የሀገሪቱ ክፍል መንግስታቸው ማረጋጋት መቻሉን በመግለጫቸው የጠቆሙት ጠ/ሚኒስትር ኃይለማርያም ደሳለኝ፤ ለአንዴና ለመጨረሻ ጊዜ የሀገሪቱን ሰላምና ፀጥታ ለማረጋገጥ መጠነ ሰፊ የፀጥታና የደህንነት ስራ ማከናወን ያስፈልጋል በሚል እቅድ ወጥቶ ከሰሞኑ ተግባራዊ እንደሚደረግ ጠቁመዋል፡፡
በግጭቶች ተሳታፊ ናቸው ተብለው የተጠረጠሩ ግለሰቦች በፖሊስ ቁጥጥር ስር እየዋሉ መሆኑም በመግለጫ የተጠቀሰ ሲሆን በአዲሱ እቅድም በግጭቶች የተሳተፉ አመራሮችም በቁጥጥር ስር እንደሚውሉ ጠ/ሚኒስትሩ አስታውቀዋል፡፡
በኦሮሚያ ሶማሌ ግጭት የተፈናቀሉ በመቶ ሺዎች የሚቆጠሩ ዜጎችን በዘላቂነት ለማቋቋም መንግስት ግብረ ኃይል አቋቁሟል ያሉት ጠ/ሚኒስትሩ፤ በቀጣዩ ሳምንትም በሚቋቋሙበት ሁኔታ ላይ ከተፈናቃዮች ጋር ውይይት ይደረጋል ብለዋል፡፡
ምንም እንኳ የተለያዩ አይነት ግጭቶች ቢፈጠሩም በሀገሪቱ ወደከፋ ሁኔታ እንደማይወስዳት ከተፈተጠሩት አስከፊ ግጭቶች መነሻነት ማረጋገጥ እንደሚቻል ጠ/ሚኒስትሩ አብራርተዋል፡፡
ለጠቅላይ ሚኒስትሩ ከጋዜጠኞች ከቀረቡላቸው ጥያቄዎች መካከል በኢህአዴግ አባል ድርጅቶች መሃል ያለውን ግንኙነት የተመለከተ ሲሆን ጠቅላይ ሚኒስትሩም፤ “ድርጅት ለድርጅት ባለው ግንኙነት ላይ ምንም ችግር የለም፤ ችግር ያጋጠመን በአመራሮችና በፀጥታ ተቋማት ውስጥ ያለ የአመለካከት ልዩነት ነው” ብለዋል፡፡
በኢህአዴግ ድርጅቶች ውስጥ የተለያዩ የሃሳብ ክርክሮች እንደሚደረጉ ያወሱት ጠ/ሚኒስትሩ፤ “በነዚህ ክርክሮች አብዛኛው የተቀበለውን ሃሳብ ይዘን የመሄድ ልምድ አለን፤ በማህበራዊ ድረገፆች የሚሰራጩ የመከፋፈል መረጃዎችም ሃሰተኛ ናቸው” ብለዋል፡፡
የኢህአዴግ አባል ድርጅቶች ተመሳሳይ የፖለቲካ ፕሮግራሞች እንዳለቸው የጠቀሱት ጠ/ሚኒስትሩ አራቱ ድርጅቶች የሚያደርጉት ኮንፈረንስና ውጤቱም ተመሳሳይ ነው፤ የተለያየ አይደለም ብለዋል፡፡
ከፌዴራል መንግስቱ ይልቅ የክልል መንግስታት እየጠነከሩ ነው የሚል ጥያቄ የቀረበላቸው ጠ/ሚኒስትሩ፤ ፌደራል መንግስትና ክልሎች በህገ መንግስቱ ተዘርዝሮ የተሰጣቸው የየራሳቸው የስልጣን እርከንና ተግባርና እንዳለ በመጥቀስ፣ አሁንም እየተራመደ ያለነው በዚህ ህገ መንግስታዊ መርህ ነው ብለዋል፡፡ ነገር ግን የክልሎች መጠናከር የፌዴራል መንግስቱ ያጠናከረዋል ተብሎ ስለሚታሰብ መጠናከራቸውን መንግስት ይፈልገዋል ብለዋል፡፡

Read 1838 times