ከህዳር 17 ጀምሮ የወረዳ የምርጫ ጽ/ቤቶች ተከፍተው ስራ እንደሚጀምሩና ሚያዚያ 17 ቀን 2005 ዓ.ም ምርጫው እንደሚደረግ የጠቀሱት አቶ አስራት፤ ከጊዜ ሰሌዳ በፊት መቅደም ያሉባቸው ጉዳዮች እንዳሉ ጠቁመው፤ አጃቢ እና አሯሯጭ ሳይሆን ነፃ፣ ፍትሃዊና ተዓማኒ ምርጫ ላይ መሳተፍ እንፈልጋለን ብለዋል፡፡ የፖለቲካ ምህዳሩ ከሰፋና ሌሎች ችግሮች ከተፈቱ አንድነትና መድረክ በአካባቢ ምርጫ እንደሚሳተፉ ገልፀዋል፡፡
የኢዴፓ የድርጅት ጉዳይ ሃላፊ አቶ ወንድወሰን ተሾመ በበኩላቸው፤ ከጊዜ ሰሌዳው በፊት የምርጫው ሜዳ መስተካከል አለበት ብለዋል - “የመራጮች ምዝገባ እና የፓርቲዎቹ የምርጫ ክርክር ጊዜ የተጣጣመ አይደለም” በማለት፡፡ ገዢው ፓርቲና ምርጫ ቦርድ ያሉትን ችግሮች አጽድቶ የተመቻቸ የምርጫ ሜዳ እንዲፈጠር ጠይቀዋል - አቶ ወንድወሰን፡፡