* 20ሺ እስረኞችን ነጻ አውጥቷል

«አብዛኞቹ እዚያ የታሰሩት ወንጀል ሠርተው አይደለም» የሚለው የዱባዩ ነጋዴ ፊሮዝ መርቻንት፤ «የታሰሩት ሊከፍሉት ያልቻሉት ዕዳ ስላለባቸው ብቻ ነው» ሲል ያስረዳል፡፡

ፊሮዝ መርቻንት እነዚህን ዕዳዎች እየከፈለ ሰዎችን ከእስር ነጻ ያወጣል፡፡ ነጋዴው ይህንን በጎ ተግባር ላለፉት 18 ዓመታት በኤምሬቶች ውስጥ እያከናወነ የቆየ ሲሆን፣ እስከ ባለፈው የካቲት ወር ድረስ ከ20,000 በላይ ሰዎችን ከእስር ታድጓል።

በአንድ ዓመት ውስጥ ብቻ ከ50 በላይ አገራት የመጡ 2,972 ሰዎችን ዕዳ ከፍሎ ከእስር ያስፈታ ሲሆን፤ በዚህ ዓመት የካቲት መጨረሻ ደግሞ ተጨማሪ 497 ሰዎች በነፃነት ወደ ቤታቸው እንዲመለሱ አድርጓል።

ፊሮዝ መርቻንት ስለነዚህ ሰዎች ሲናገር፡ «እነዚህ ሰዎች ጨካኝ ወንጀለኞች አይደሉም፤ አብዛኞቹ የሁኔታዎች ሰለባ የሆኑ ምስኪኖች ናቸው» ይላል።

በዚያ አንድ ዓመት ውስጥ ብቻ የከፈለው ዕዳ 2.4 ሚሊዮን ዲርሃም (653,506 ዶላር ገደማ) ይደርሳል። በተጨማሪም ለ11 ታካሚዎች የኩላሊት እጥበትና የሕክምና ወጪ የሚሆን 1 ሚሊዮን ዲርሃም አውጥቷል።

የእርሱ መልካምነት ከእስር ቤት በማስወጣት ብቻ ግን አያበቃም፡፡ ከእስር የተፈቱት ሰዎች ወደ አገራቸው የሚመለሱበት የቪዛና የአየር መንገድ ትኬት ወጪም ይሸፈንላቸዋል።

ነጋዴው ይህን በጎ ተግባሩን የሚከውነው በጁሜራ ሌክስ ታወርስ ሕንፃ 39ኛ ፎቅ ላይ በሚገኘው ቢሮው ውስጥ ሆኖ ነው።

«አንድ ሰው ዕዳው ተከፍሎለት ወደ ቤተሰቡና ወደ አገሩ ከተመለሰ፣ ለእኔ ያ ትልቅ ነገር ነው» ይላል ፊሮዝ።

ለካስ ደግነትም መሰጠትን ይጠይቃል፡፡

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…
https://t.me/AdissAdmas

የዓለም የጤና ድርጅት ዋና ዳይሬክተር ዶክተር ቴዎድሮስ አድሃኖም ዓለም አቀፉን የሴት ልጆች ቀን በማስመልከት በማህበራዊ ትስስር ገጻቸው ባስተላለፉት መልዕክት፣ የዓለም ማህበረሰብ ለሴት ልጆች ጤና፣ ደህንነትና መብት መከበር ቁርጠኝነቱን እንዲያድስ ጥሪ አቀረቡ።

ዶክተር ቴዎድሮስ ባስተላለፉት መልዕክት፡

“እንደ አባትና እንደ አያት፣ ለገዛ ሴት ልጆቼ እና የልጅ ልጆቼ የምመኘውን መልካም ነገር ሁሉ ለእያንዳንዷ ሴት ልጅ እመኛለሁ፤ ይኸውም በጤና፣ በደህንነትና ህልሞቻቸውን በነጻነት የመከተል መብታቸው ተከብሮ እንዲያድጉ ነው።

ነገር ግን የብዙ ሚሊዮን ሴት ልጆች እውነታ ከዚህ እጅግ የተለየ ነው።

በየዓመቱ ዝቅተኛና መካከለኛ ገቢ ባላቸው ሀገራት ውስጥ የሚገኙ ወደ 21 ሚሊዮን የሚጠጉ ታዳጊ ሴት ልጆች ለእርግዝና ይጋለጣሉ። የፍቅር አጋር ካላቸው አራት ሴት ልጆች መካከል አንዷ የአካል ወይም የፆታዊ ጥቃት ይደርስባታል። በተጨማሪም በርካታ ሴት ልጆች በኋለኛ ዕድሜአቸው ከማህፀን በር ካንሰር ሊጠብቃቸው የሚችለውን ክትባት አሁንም አያገኙም።

እነዚህ ቁጥሮች ብቻ አይደሉም። ከእያንዳንዱ ቁጥር ጀርባ ጤናዋ፣ ምርጫዋና የወደፊት ዕጣ ፈንታዋ አደጋ ላይ የወደቀ ሴት ልጅ አለች።

የሴቶች ልጆች ቀንን ስናከብር፣ እያንዳንዷ ሴት ልጅ ጤናማ ህይወት እንድትኖርና አቅሟን ሙሉ በሙሉ እንድታወጣ እድል ለመስጠት ቃል እንግባ። ምንም አይነት ልዩነት ሳይደረግ!”