የአንድ አመት ከስምንት ወር እድሜ ያለውን ህፃን በማገት ሁለት ሚሊዮን ብር የጠየቁና በወንጀሉ ተባብረዋል የተባሉ አራት ተጠርጣሪዎች በቁጥጥር ስር መዋላቸዉን የአዲስ አበባ ፖሊስ ጠቅላይ መምሪያ አስታወቀ፡፡

ወንጀሉ የተፈፀመው ሀምሌ 30 ቀን 20017 ዓ.ም በግምት ከምሽቱ 1፡40 ሰዓት ገደማ በቂርቆስ ክፍለ ከተማ ወረዳ 5 ልዩ ቦታው አፍሪካ ህብረት ተብሎ በሚጠራው አካባቢ መሆኑን ፖሊስ አስታዉቋል፡፡

ተጠርጣሪዎቹ ፋኑኤል ብርሃነ የተባለን የ1 አመት ከ8 ወር ዕድሜ ያለውን ህፃን ከመኖሪያ ቤቱ በስውር በመውሰድ ወደ ወላጅ አባቱ ስልክ ደውለው ህፃኑን እንዳገቱት በመግለፅና ሁለት ሚሊዮን ብር በአካውንት ገቢ እንዲያደርጉ በመጠየቅ፣ በቤተሰብ ላይ ጭንቀትና ድንጋጤን ፈጥረዋል፡፡

አቶ ብርሃነ ገ/ፃዲቅ የተባሉት የህፃኑ ወላጅ አባትም ስለ ሁኔታው በአቅራቢያቸው ለሚገኝ ፖሊስ በወቅቱ አሳውቀዋል።

የህፃኑ መጥፋት ሪፖርት የደረሰው በቂርቆስ ክፍለ ከተማ ፖሊስ መምሪያ የቄራ አካባቢ ፖሊስ ጣቢያ የምርመራና የክትትል ክፍሉ ተቀናጅተው በተደረገ ከፍተኛ ጥረት ካህሳይ ተክላይ የተባለውንና ከህፃኑ ወላጅ አባት ጋር ዝምድና ያለውን ግለሰብ በቁጥጥር ስር ማዋል መቻሉን ፖሊስ አስታዉቋል፡፡

የወንጀሉ አቀነባባሪ ነው ተብሎ ተጠርጥሮ በተያዘው በካህሳይ ተክላይ ላይ በተከናወነ ምርመራ የማስፋት ስራ በህፃኑ እገታ ከሚገኝ ገንዘብ የጥቅም ተካፋይ ለመሆን በመስማማት ወንጀሉን የተባበሩ ፊሊሞን ገ/ማርያም፣ ተክሊት ህሉፍ እና ምህረት ዕድሉ የተባሉ ተጨማሪ ሶስት ተጠርጣሪዎችም በቁጥጥር ስር ውለዋል፡፡

እነዚህ ተጠርጣሪዎች የተያዙት ወንጀሉ በተፈፀመ በማግስቱ ሳሪስ አካባቢ በሚገኘው ማራኪ በተባለ ሆቴል ውስጥ አልጋ በመከራየት ህፃኑን ይዘው በተሸሸጉበት ወቅት ፖሊስ ባደረገው ክትትል መሆኑ ታውቋል፡፡

በአጠቃላይ በወንጀሉ የተጠረጠሩት አራት ግለሰቦች በአዲስ አበባ ፖሊስ ጠቅላይ መምሪያ ምርመራ እየተጣራባቸው እንደሚገኝ ፖሊስ ለአዲስ ሚዲያ ኔትዎርክ ዲጂታል ሚዲያ በላከዉ መረጃ አስታዉቋል፡፡

ቅዱስ ጳውሎስ ሆስፒታል በኢትዮጵያ የመጀመሪያውን የጉበት ንቅለ ተከላ ህክምና በቅርቡ እንደሚያካሂድ አስታውቋል።

የቅዱስ ጳውሎስ ሆስፒታል ሚሊኒየም የህክምና ኮሌጅ የኮሙኒኬሽን ኃላፊ አቶ ንዋይ ፀጋዬ፤ የሆስፒታሉ ከፍተኛ የህክምና ባለሙያዎች ልዑክ በጉበት ንቅለ ተከላ ህክምና ከፍተኛ ልምድ ባለው የካሊፎርኒያው ፓሲፊክ የህክምና ማዕከል ለሳምንታት የቆየ የምልከታስልጠና ሲያደርግ መቆየቱን ለአራዳ ኤፍ ኤም ገልፀዋል።

በትውልደ አትዮጵያዊቷ አሜሪካዊት የጉበት ንቅለ ተከላ የህክምና ባለሙያ ዶ/ር ቅድስት ኪዳነ ይልማ አመቻችነት የተካሄደው መርሐ ግብር፥ ኢትዮጵያ የመጀመሪያውን የጉበት ንቅለ ተከላ አገልግሎት ለማከናወን በምታደርገው ጥረት ውስጥ ትልቅ ምዕራፍ ነው ብለውታል።

የባለሙያዎች ቡድን አባላቱ በርካታ የጉበት ንቅለ ተከላ ሂደቶችን የተመለከቱ ሲሆን፤ ከዋነኛ የንቅለ ተከላ ቀዶ ጥገና ሐኪሞች የተግባር ስልጠና እና የዕለት ተዕለት ምክር ማግኘታቸውንም ነው የተናገሩት።

ቡድኑ በቆይታው ንቅለ ተከላ የሚያስፈልጋቸውን ታካሚዎች የጤና ደረጃ፣ የለጋሾች ልየታና በህክምናው ዙሪያ ያሉትን ስርዓቶች በተመለከተ አስፈላጊ እውቀት ማግኘቱን ጠቁመዋል።

ሆስፒታሉ በቅርብ ጊዜ ውስጥ በበቂ ዝግጅት ወደ ሥራ ሲገባ፣ ለጉበት ንቅለ ተከላ ህክምና ውጭ ሀገር መሄድን ያስቀራል መባሉን ጣቢያው ዘግቧል፡፡

"የአዲሱ ሎጎ ትርፍና ኪሣራው በሚገባ ታስቦበታል ወይ?"

የኢትዮጵያ ንግድ ባንክን ታዋቂ አርማ ዲዛይን ያደረጉት የቀድሞ የባንኩ ም/ፕሬዚዳንት አቶ ናሥር ሐሰን ናቸው፡፡

ይህን መረጃ የእርሳቸው ዘመድ ያደረሰኝ ሲሆን፤ እኔም አቶ ናስር ሐሰንን በስልክ አግኝቼ አውርቻቼዋለሁ። በአሁኑ ጊዜ ነዋሪነታቸው በአሜሪካ ነው ። ከሳምንት በኋላም እንደምንገናኝ ተቀጣጥረናል። እስከዛው ድረስ የባንኩ አርማ ሲሰራ የነበረውን ሂደት በተመለከተ ያላቸውን ትዝታ እንዲህ አካፍለውኛል፡፡

**

የቀድሞውን የኢትዮጵያ ንግድ ባንክ አርማ (ሎጎ) ሙያዬና ሥራዬ ባይሆንም፣ ማንም ሳይጠይቀኝና ሳያዘኝ በራሴ ተነሣሽነት አንዲት ሣንቲም ሳይከፈለኝ ዲዛይን አድርጌና ክሊሼውን እንግሊዝ ሀገር በነፃ አሰርቼ፣ ለወቅቱ የባንኩ ዋና ሥራ አስኪያጅ ፣ለአቶ አለሙ አበራ አቅርቤ ሥራ ላይ እንዲውል ተደርጎ ላለፋት 50 ዓመታት አገልግሏል።

በመሆኑም አርማው በቼኮች፣ በቁጠባ ሒሣብ ደብተሮችና በባንኩ የፅህፈት መሣሪያዎች ላይ እንዲታተም አስደረግኩ። በወቅቱ የባንኩ የሒሣብና የኢንቬስትሜንት (መዋዕለ ንዋይ) መምሪያ ሥራ አስኪያጅ ነበርኩ ።

በወቅቱ ለዚህ ሥራዬ የቃል ምስጋና እንኳን አላገኘሁም ነበር። አሁን ያን ወርቃማና ሽክርክር አርማ ለመተካት ግማሽ ቢሊዮን ብር ከማስወጣቱም በላይ በየሕንፃዎቹ ላይ ያሉትን አርማዎች አፍርሶ አዲሱን መተካት፤ ያሉትን የጽህፈት መሣሪያዎች፣ የቼክና የቁጠባ ደብተሮች ፣ የኮምፒዩተር ሶፍትዌሮችና ወዘተ ለመቀየር የሚወጣው ወጪ የትየሌሌ ነው።

በዚያ ላይ አዲሱን አርማ በመላ ዓለም ላሉ ባንኮች፣ የፋይናንስ ድርጅቶች፣ ለባንኩ ደንበኞች ሀ ብሎ ለማስተዋወቅ ሚሊዮኖች ያስወጣልና ትርፍና ኪሣራው በሚገባ ታስቦበታል ወይ ያሰኛል ?" በማለት ይገልጻሉ፤ አቶ ናሥር ሐሰን ፤የቀድሞው የባንኩ ም/ፕሬዚዳንት፡፡

***

አቶ ናሥር ሐሰን በትጋት በታማኝነት፣በቅንነት ከነበረባቸው ሃላፊነት በተጨማሪ ያሳዩት ትጋት የሚያስደንቅና የሚያስተምር ነው።

(አብዱረሂም አህመድ )

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…

የትግራይ ተቃዋሚ ፓርቲዎቹ ሳልሳዊ ወያነ ትግራይና የውድብ ናጽነት ትግራይ፣ በአገራዊ ምክክር ኮሚሽን የምክክር ሂደት መሳተፍ እንደማይፈልጉ መግለጻቸውን ሪፖርተር አስነብቧል።

ፓርቲዎቹ ለዚህ በምክንያትነት የጠቀሱት፣ ከምክክሩ በፊት የግጭት ማቆም ስምምነቱ ሙሉ በሙሉ መተግበር አለበት በማለት እንደሆነ ዘገባው ጠቅሷል።

ፓርቲዎቹ፣ የትግራይ ሕዝብ አሁን ያለበት ሁኔታ በምክክር ሂደቱ እንደማይፈታ ተናግረዋል ተብሏል።

ስምረት ፓርቲ በበኩሉ፤ የክልሉን ጥቅም ባስጠበቀ መንገድ በሂደቱ መሳተፍ እንደሚቀጥል መግለጡን ዘገባው አመልክቷል።

-ዋዜማ-

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…

‎«በረከትን ያገኘሁት በድሆች ፀሎት ነው» የሚለው ወጣቱ ባለፀጋ ምረትአብ፤ በተደጋጋሚ ለባቡልኸይር በጎ አድራጎት ድርጅት ድጋፍ በማድረግ ይታወቃል።

‎

‎ራሱንና ጓደኞቹን በማስተባበር ከገንዘብ ድጋፍ በተጨማሪ፤ በፆምም ሆነ በበዓል ወቅት አቅመ-ደካሞችን በመንከባከብና በአውዳመት ተደስተው እንዲውሉ ማድረግ የነፍስ እርካታ እንደሚሰጠው ይናገራል፡፡

‎በዛሬው ዕለትም አዲስ የገዛውን ማርቼዲስ ቤንዝ መኪና በአረጋውያን ለማስመረቅ በባቡልኸይር የተገኘው ወጣቱ ባለፀጋ፣ ድንገተኛ የአንድ ሚሊዮን ብር ስጦታ ለበጎ አድራጎት ድርጅቱ ለግሷል፡፡

‎ልገሳውን ወዲያውኑ በማስገባት ቃሉን የሞላው ምረትአብ፤ ለምስኪኖችና ረዳት ለሌላቸው ማድረግ ለራስ እንደማድረግ ነው ሲል ተናግሯል።

‎

‎ክስተቱ በተለይም የባቡልኸይር ተጠቃሚዎችን በደስታ እንባ ያራጨና እጅግ ልብ የሚነካ ነበር።

‎

‎የድርጅቱ መሥራችና ሥራ አስኪያጅ ወይዘሮ ሀናን ሙሀሙድንም፣ የወጣቱ ባለፀጋ ድንገተኛ ልግስና በደስታ አስለቅሷቸዋል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…