Administrator

Administrator

•    ኢህአዴግ ዲሞክራሲን የሚያየው በእውነተኛ ገፅታው ነው
•    ምርጫ በውጤት አይመዘንም፤ ዋናው ሂደቱ ነው
የግንቦቱን ምርጫ እየተቃረበ ነው፡፡ ተቃዋሚ ፓርቲዎች በምርጫ ሂደቱ ላይ የተለያዩ ቅሬዎችንና ተቃውሞዎችን እያቀረቡ ይገኛሉ፡፡ ገዢው ፓርቲ ኢህአዴግስ ምን ይላል? የአዲስ አድማስ ጋዜጠኛ አለማየሁ አንበሴ በኢህአዴግ ምክር ቤት ፅ/ቤት የህዝብና ውጭ ግንኙነት ዘርፍ ኃላፊ አቶ ደስታ ተስፋውን በምርጫው ዝግጅትና ሂደት ዙሪያ አነጋግሯቸዋል፡፡
እስካሁን ያለው የምርጫ ሂደት ምን ይመስላል?
በኛ በኩል የምርጫው ሂደት በተቀመጠለት አቅጣጫ መሠረት እየሄደ ነው፡፡ ቀድመን ስትራቴጂና እቅድ አዘጋጅተናል፡፡ ካለፉት ምርጫዎች በተሻለ ለመንቀሳቀስ ዝግጅት አድርገን ነው እየሰራን ያለነው፡፡ ሃገሪቱን እንደሚመራ ገዢ ፓርቲና ተወዳዳሪ ፓርቲ ሁለት ሚናዎች ነው ያሉት፡፡ በመንግስት በኩል (ሀገሪቱን የሚመራ ፓርቲ እንደመሆኑ) ምርጫውን ፍትሃዊ፣ ዲሞክራሲያዊና ሠላማዊ በማድረግ ረገድ እየተሠራ ነው፡፡ እንደ ተወዳዳሪ ፓርቲ ደግሞ አሸናፊ ሆነን የምንወጣበትን አጠቃላይ ዝግጅት እያደረግን ነው፡፡ እንደ ድርጅት፣ በስነምግባር ደንቡና በአጠቃላይ በምርጫ ህጐቹ ሂደት ላይ የአሠልጣኞች ስልጠና በከፍተኛ የአመራር ደረጃ ሰሞኑን ተሰጥቷል፡፡
በየደረጃው ለሌሎችም ስልጠናው ይሰጣል፡፡ ካለፉት ምርጫ ልምዶች ተነስተን 5ኛው ሃገራዊ ምርጫ ሠላማዊ ሆኖ እንዲጠናቀቅ፣ ወሳኙ ህዝብ ስለሆነ የህዝቡን ወሳኝነት ለማረጋገጥ እየተንቀሳቀስን ነው፡፡
ከህዝብ ታዛቢዎች ምርጫ ጋር ተያይዞ ተቃዋሚዎች፤ “ኢህአዴግ የ1ለ5 አደረጃጀቱን ተጠቅሞ አባላቱን አስመርጧል” ሲሉ ይወቅሣሉ፤ በዚህ ላይ የእናንተ ምላሽ ምንድን ነው?
የህዝብ ታዛቢዎች ምርጫን በተመለከተ አንዳንድ ፓርቲዎች መሠል አስተያየቶችን ሲያቀርቡ ሰምተናል፡፡ አንደኛው ወቀሳቸው፣ የታዛቢዎች ምርጫ የተካሄደው ለኛ ሣይነገረን ኢህአዴግ ብቻ ተነግሮት ነው የሚል ነው፤ ይሄ በጣም መሠረታዊ ስህተት ነው፤ ምክንያቱም ኢህአዴግም እነዚህ ፓርቲዎችም ባሉበት የምርጫ ጊዜ ሠሌዳው ቀርቦ ውይይት አድርገንበታል፡፡ ምርጫ ቦርድ ያወጣው የጊዜ ሠሌዳ ኢህአዴግን ጨምሮ ለእያንዳንዱ ፓርቲ አቅርቧል፡፡ ስለዚህ ታህሣሥ 12  የህዝብ ታዛቢዎች ምርጫ እንደነበር ይታወቃል፡፡ የምርጫ ቦርድ ሃላፊዎች በሚዲያም ቀርበው ታህሣሥ 12 የህዝብ ታዛቢዎች ምርጫ እንደሚካሄድ ተናግረዋል፡፡ ስለዚህ በሚስጥር የተደረገ ነው፤ የሚለው የተሣሣተ ነው፤ በይፋ በደብዳቤም በሚዲያም ተገልጿል፡፡
በእለቱም ኢህአዴግ አባሎቹ እንዳይመረጡ ጥንቃቄ አድርጓል፡፡ አንዳንድ ቦታ እንኳ አባሎቻችን ሲጠቆሙ “እኔ አባል ነኝ፤ አልችልም” ብለው ከምርጫው የወጡበት ሁኔታ አለ፡፡ ስለዚህ ይህ የተቃዋሚዎች ውንጀላ የተለመደ ሂደቱን ከጅምሩ ጥላሸት የመቀባት አካል ነው፡፡ የተመረጡት የህዝብ ታዛቢዎች ገለልተኛ አይደሉም ለማስባል የሚረዳ ተራ የስም ማጥፋት ሂደት ነው፡፡
1ለ5 የሚባለው ለመንግስት የልማት ስራ የተደራጀ ነው እንጂ የፓርቲው አደረጃጀት አይደለም፡፡ የተቃዋሚም የኢህአዴግም አባል የሆነ ሊኖር ይችላል፤ ስለዚህ የ1ለ5 አደረጃጀትን ሂዱና የህዝብ ታዛቢ ምረጡ ቢል ችግር የለውም ማለት ነው፡፡ ኢህአዴግን ምረጡ ወይም ደጋፊ የሆነን ሰው ምረጡ የሚባል ነገር የለም፡፡ ስለዚህ በ1ለ5 አደረጃጀት ላይ ብዥታ ሊኖር አይገባም፤ አደረጃጀቱ የልማት አደረጃጀት ነው፡፡ ይህን አደረጃጀት ሂዳችሁ ታዛቢ ምረጡ ወይም በምርጫው ተሳተፉ ቢል ነውር አይደለም፡፡ ከዚህ አንፃር ህዝቡ ገለልተኛ ናቸው ያላቸውን ታዛቢዎቹን መርጧል ማለት ነው፡፡ ስለዚህ እነዚህ ውንጀላዎች ተቀባይነት የሌላቸው፣ ሂደቱን ጥላሸት ለመቀባት ሆነ ተብሎ የሚደረጉ ናቸው፡፡ የኢህአዴግ አባል ተመርጧል የሚሉ ከሆነና የተመረጠበትን ቦታ ከጠቆሙ እኛም ለማጣራት  ዝግጁ ነን፡፡ ድንገት ሾልኮ የገባ ካለም እንዲወጣ እናደርጋለን፡፡ እስካሁን ግን እንዲህ ያለ ነገር ስለመኖሩ ምንም መረጃ የለንም፡፡ ህዝቡ  ምርጫውን ማካሄዱ መብቱን ማረጋገጫ መንገድ ነው፡፡
የምርጫ ስነ ምግባር ደንቡን ካልፈረሙ ፓርቲዎች ጋር ኢህአዴግ ለመወያየት የማይችልበት መሠረታዊ ምክንያት ምንድን ነው? ደንቡን መፈረምን እንደ ግዴታ ማስቀመጥ የውይይት በርን መዝጋት አይሆንም?  
ደንቡ ሲዘጋጅ ብዙ ሂደት አልፏል፡፡ በወቅቱ የነበሩት ፓርቲዎች በእርጋታ እየተወያዩ ያለፉበት ሂደት ነበር፤ በዚህ ሂደት መድረክ ሶስት ጊዜ ረግጦ ወጥቷል፡፡ መጀመሪያ ሂደቱ ሲጀመር ወደ ውይይቱ ተጋብዞ መጣ፤ ያኔ ከኢህአዴግ ጋር እንጂ ከሌሎች ተቃዋሚዎች ጋር መወያየት የለብኝም አለ፡፡ ኢህአዴግ ደግሞ ብዙ ፓርቲዎች ባሉበት ሃገር፣ የተናጥል ውይይት ከእያንዳንዱ ጋር ማድረግ አይችልም፡፡ መድረክ፤ ሌሎች ፓርቲዎች ተቃዋሚዎች አይደሉም የሚል አመለካከት ስለለው ወጣ፡፡ በሌላ ጊዜም ተጋበዘ፤ ሂደቱን ትቶ ወጣ፡፡ ለ3ኛ ጊዜ 65 ፓርቲዎች ሲወያዩ ገብቶ ሂደቱን ለመበተን ነው ጥረት ያደረገው፤ ግን መጨረሻ ላይ 65 ፓርቲዎቹ ተስማምተው ህግ ሆኖ ወጣ፡፡ ህግ ሆኖ ሲወጣ በህጉ ውስጥ የተቀመጠ ቅድመ ሁኔታ አለ፡፡
የጋራ ምክር ቤቱ አባል ሆኖ ለመቀጠል የፈለገ ፓርቲ ህጉን መፈረም አለበት፡፡ ይሄ ማለት የፖለቲካ ቁርጠኝነት ማረጋገጫ ነው፡፡ ስለዚህ የስነ ምግባር ደንቡ ህግ ሆኖ እንዲወጣ ፓርቲዎቹ በራሳቸው ሊገፉት ይገባል ማለት ነው፡፡ የፊርማ ቅድመ ሁኔታን ኢህአዴግ አላስቀመጠም፤ ራሱ ህጉ ያስቀመጠው ነው፡፡ እያንዳንዱ ፓርቲ በስነምግባር መመራቱን, የፖለቲካ ቁርጠኝነቱን ቀድሞ ማረጋገጥ አለበት ነው የሚለው ህጉ፡፡ ይህን ያረጋገጡ የጋራ ምክር ቤት ውስጥ እየሠሩ ነው፡፡ ከኢህአዴግ ጋር እነዚህ ፓርቲዎች በፕሮግራም የተለዩ ናቸው፡፡ በምርጫ ሂደቱ ላይ ግን በጠረጴዛ ዙሪያ ቁጭ ብለው የበሠለ ውይይት እያደረጉ ነው፡፡ ሌሎቹ ደግሞ ስነ ምግባሩ ያስረናል ብለው ስለሚያስቡና አመፅና ብጥብጥ ለማስነሳት ያግደናል ብለው ስለሚያስቡ ቁርጠኝነት ስላነሣቸው ነው እንጂ ኢህአዴግ በተናጥል አልደራደርም ስላለ አይደለም፡፡ ከዚህ አንፃር ተስማምተን ህግ ሆኖ በወጣ ጉዳይ ላይ lምንድን ነው ተመልሰን ወደ ድርድር የምንገባው? የሚለው ጥያቄ መመለስ አለበት፤ ስለዚህ ተመልሰን ወደ ድርድር የምንገባበት ምንም ምክንያት የለም፡፡ አሁንም ምርጫ ቦርድ በሚጠራቸው ስብሰባዎች ላይ አብረን እንሣተፋለን፤ የጋራ ምክር ቤት ውስጥ ለመግባት ግን ድርድር አያስፈልገውም፤ በስነምግባር ለመገዛት መስማማት ብቻ ነው፡፡ ኢህአዴግ ያለፈባቸውን ሂደቶች ስናይ ሁልጊዜም በድርድር የሚያምን መሆኑን እንገነዘባለን፡፡
ለምንድን ነው የአለማቀፍ መስፈርቶችን ያሟላ ስነምግባር ተገዥ ሆናችሁ፣ ለፍትሃዊና ሠላማዊ ምርጫ ውድድር ዝግጁ ያልሆናችሁት የሚለውን ጥያቄ ተቃዋሚዎች መመለስ አለባቸው፡፡ በስነምግባር እንመራ የሚል ውይይት ማካሄድ እንዴት ይቻላል፡፡
ደንቡን ያልፈረሙ መድረክን የመሣሠሉ ድርጅቶች ከኢህአዴግ ጋር መወያየት ቢፈልጉ እንዴት ነው የሚስተናገዱት?
በተቀመጡ ማዕቀፎች መሠረት ይስተናገዳሉ፡፡ ገለልተኛ የሆነው የምርጫ ቦርድ አለ፡፡ ያልተሟሉ ነገሮች ካሉ ለምርጫ ቦርድ እያቀረቡ ሊፈቱ ይችላሉ፡፡ ኢህአዴግ ደግሞ በተቋማዊ አሠራር የሚያምን ድርጅት ነው፡፡ የስነምግባር ደንቡ በሌለበትና የጋራ ምክር ቤቶች ባልተቋቋሙበት ሁኔታ ጥያቄው ቢቀርብ ትክክል ነው፡፡ ከእያንዳንዱ ፓርቲ ጋር ኢህአዴግ እየተወያየ ሊሄድ ይችላል፡፡ አሁን ግን የጋራ ማዕቀፍ  በተዘረጋበት ኢህአዴግ እንዴት ብሎ ነው ከ70 ፓርቲዎች ጋር በተናጠል መወያየት የሚችለው? አሁን ተቋዋሚ አሠራር ተዘርግቷል፡፡ ለመወያየት የፈለገ የጋራ ምክር ቤቱ ውስጥ መግባት አለበት፡፡ ችግሮች ሲፈጠሩ ምክር ቤቱ አጣሪ ኮሚቴ አቋቁሞ ያጣራል፤ መፍትሔ እንዲያገኙም ያደርጋል፡፡ ከዚህ ውጪ በተናጠል መወያየት አይቻልም፡፡ እነዚህ ፓርቲዎች በራሳቸው የሚፈጠረውን ችግር እንኳ ሣይቀር ኢህአዴግ ፈጠረው ነው የሚሉት፡፡ በአመራር እንኳ የተፈጠረባቸውን ችግር በኢህአዴግ የተፈጠረ ጥፋት አድርገው ይወስዱታል፡፡ ስለዚህ ይሄን መፍረድ ያለበት ህዝቡ ነው፡፡ ህዝቡ ሁሉንም ነገር ያያል፡፡ ማን ነው ጥፋተኛ? ኢህአዴግ ነው ለዲሞክራሲያዊ ስርአትና ፍትሃዊ ምርጫ ዝግጅ ያልሆነው ወይስ ሌላው? የሚለውን መፍረድ ያለበት ህዝቡ ነው፡፡
ኢህአዴግ የገዢነቱን ኃይል ተጠቅሞ በተቃዋሚ ፓርቲዎች የሚደረጉ ሰላማዊ ሰልፎችን ለማፈን ይጥራል የሚሉ ቅሬታዎች ይቀርባሉ፡፡ ኢህአዴግ እንደፓርቲ በሰላማዊ ሰልፍ ላይ ያለው አቋም ምንድን ነው?
ፓርቲያችን ሰላማዊ ሰልፍ ለዜጎች የተሰጠ ህገ መንግስታዊ መብት ነው ብሎ ያምናል፡፡ ይሄ መብት ተግባራዊ የሚሆንባቸው አሰራሮች እንደሚዘረጉ ህገ መንግስቱም አስቀምጧል፡፡ በህገ መንግስቱ ዜጎች በጋራ ሆነው ቅሬታ የማቅረብ፣ ሰላማዊ ሰልፍና ስብሰባ የማድረግ መብት አላቸው ይላል፡፡ ይሄን መብት ተግባራዊ ለማድረግ አሰራሮች ሊዘረጉ እንደሚችሉ ተቀምጧል፡፡ ሰላማዊ ሰልፍ አድራጊዎች የህዝቡን ሰላም፣ ክብርና የመሳሰሉ መብቶችን መጣስ እንደሌለባቸው ህገ መንግስቱ አስቀምጧል፡፡
አንድ ፓርቲ ሰላማዊ ሰልፍ ለማድረግ ማሳወቅ እንደሚጠበቅበትም ተቀምጧል፡፡ የእውቅናውን ጥያቄ የሚያየው አካል የተጠየቀበትን ቦታና ጊዜ ይመለከትና በእውቅና ጥያቄው ላይ ምላሽ ይሰጥበታል፡፡ ቦታ ቀይር ወይም ቀን ቀይር የሚል ምላሽ ይሰጥበታል ማለት ነው፡፡ ዘጠኙ ፓርቲዎች የጠየቁት ቦታ መስቀል አደባባይ ነው፡፡ መስቀል አደባባይ ደግሞ ትልቅ የልማት እንቅስቃሴ እየተደረገበት ያለ ቦታ ነው፡፡ ለ24 ሰዓት ቆመ ማለት ብዙ ነገር ያስተጓጉላል፡፡ ስለዚህ ቦታው ተገቢ አልነበረም ማለት ነው፡፡ በዚህ የተነሳ የተጠየቀው አካል አልተቀበለውም፡፡ እነዚህ ፓርቲዎች ዕቅዳቸው ልማትን ማደናቀፍ፣ ህዝብን ወደ አመፅ መንዳት እንደሆነ ከዚህ መረዳት ይቻላል፡፡ ኢህአዴግ እንደ ፓርቲ ግን ሰላማዊ ሰልፍ የዜጎች መብት ነው የሚል አቋም አለው፡፡
ኢህአዴግ ለምርጫው ያስቀመጠው ግብ ምንድን ነው? አንዳንድ ወገኖች ሙሉ ለሙሉ አሸናፊ እንዳይሆን ተጠንቅቆ እስከ 15 በመቶ ወንበሮችን ለተቃዋሚዎች ሊለቅ ይችላል የሚል አስተያየት ይሰነዝራሉ?
ኢህአዴግ መንግስት ለመመስረት የሚያስችለውን ወንበር ማግኘት ነው ግቡ፡፡ ይሄ ሲባል ድምፁ እንደ እጩ ቁጥራችንም ይወሰናል በአገሪቱ ባሉ የምርጫ ክልሎች ሁሉ እንወዳደራለን፡፡ በእያንዳንዱ የምርጫ ክልል ለማሸነፍ እንሰራለን ማለት ነው፡፡ ኢህአዴግ ዲሞክራሲን የሚያየው በእውነተኛ ገፅታው ነው፡፡ ዲሞክራሲ በአርቴፊሻል ገፅታ መታየት የለበትም፡፡ ዲሞክራሲ የህዝብ ወሳኝነትን ማረጋገጫ መሳሪያ ነው፡፡ በእያንዳንዱ የምርጫ ክልል ተወዳድረን ህዝቡ የሚመርጠን ከሆነ እሰየው ብለን እንወስዳለን፤ ባይመርጠንም እንቀበላለን፡፡ ከዚህ ውጭ አርቴፊሻል በሆነ መንገድ፣ የህዝብን ውሳኔ ባላከበረ መንገድ የተወሰነ ወንበር እንለቃለን የሚል ሃሳብ የለም፡፡ ወሳኙ ህዝብ ነው፡፡ ምርጫ በውጤት አይመዘንም፤ ዋናው ሂደቱ ነው፡፡ ሂደቱ ማማር አለበት፡፡
በየጊዜው በሚደረጉ ምርጫዎች ላይ የአለማቀፍ ታዛቢዎች ቁጥር እየቀነሰ ሄዶ ዘንድሮ የአውሮፓ ህብረትም ቀርቷል፡፡ አለማቀፍ ታዛቢዎች ከምርጫው ለምን ተገለሉ?
 የኛ ምርጫ ማንም ሊታዘበው የሚችል ምርጫ ነው፡፡ በድብቅ የሚካሄድ ምርጫ ሳይሆን ማንም ሊያየው የሚችል ምርጫ ነው፤ ነገር ግን ምርጫን የአውሮፓ ህብረት ካልታዘበው ችግር ይኖርበታል ብሎ ማሰብ በራሱ የምርጫው ወሳኝ ማን ነው የሚለውን ጥያቄ ውስጥ ያስገባዋል፡፡ ህብረቱ ምርጫውን ለመታዘብ የበጀት እጥረት አለብኝ የመሳሰሉ ምክንያቶችን ነው ያቀረበው፡፡ ስለዚህ ምርጫውን የአፍሪካ ህብረት ይታዘበዋል፣ ከሃገር ውስጥም የተለያዩ የሲቪል ማህበራት ይታዘቡታል፡፡ ዋናው ወሳኙ የኢትዮጵያ ህዝብ ነው፡፡ ይሄ ህዝብ ነው ውሳኔ የሚሰጠውም የሚታዘበውም፡፡
አለማቀፍ ታዛቢዎች የምርጫውን ገለልተኛነት ከማረጋገጥ አንጻር ምንም ዓይነት ሚና አይኖራቸውም እያሉን ነው?
 ሊታዘቡ ይችላሉ ግን ዋናው ሚና የህዝብ ነው፡፡ እያንዳንዱ ሂደት ከህዝብ ጋር የተገናኘ ነው አለማቀፍ ታዛቢ ተጨማሪ ነው፤ ወሳኝነት የለውም፡፡
ኢህአዴግ በዚህ ምርጫ ሊወዳደረኝ የሚችል ፓርቲ አለ ብሎ ያምናል?
ይሄን ህዝቡ ነው የሚመዝነው፡፡ ቀድመን ባንመዝነው እመርጣለሁ፡፡ ፓርቲዎች ምን እንደሚመስሉ የራሳችን ግምት አለን፡፡ የህዝብን ጥቅም ሊያስጠብቅ የሚችል ሌላ ይህች አገር የጀመረችውን ልማት፣ ዲሞክራሲ በቁርጠኝነት ይዞ ሊሄድ የሚችል ፓርቲ አለ ብለን አናምንም፡፡ በተለያዩ መንገዶች መመዘን እንችላለን፡፡ ከራሳቸው ባህሪ ተነስተን ማለት ነው፡፡ ፓርቲ ማለት የህዝብን ህይወትና ኑሮ ለመቀየር የሚሰራ ፓርቲ ነው፡፡ የትኛው ፓርቲ ነው ህዝቡ ለልማት ሲንቀሳቀስ ከጎኑ ተሰልፎ የሚሳተፈው? የትኛው ፓርቲ ነው ህዝቡ ተግዳሮቶች ሲያጋጥሙት አብሮ እየተንቀሳቀሰ ያለው? የትኛው ፓርቲ ነው ግልፅ የሆነ ሃገር የሚቀይር አማራጭ ፕሮግራም ያለው? የሚለው ስንጠይቅ፣ ሃገርን በዚህ መንገድ ወደፊት የሚያሻግር ጠንካራ ተቃዋሚ ፓርቲ የለም የሚል ድምዳሜ ላይ ያደርሰናል፡፡ ይሄን ግን ህዝቡ ነው ገምግሞ ሚዛን ላይ ማስቀመጥ ያለበት፡፡ አሁን ቅስቀሳ ባልተጀመረበት ሁኔታ በዚህ ጉዳይ ብዙ አስተያየት መስጠት አይቻልም፤ ግን ህዝብ ይታዘባል፡፡ እናሸንፋለን አናሸንፍም የሚለውም ቅስቀሳ ስለሚሆን የምረጡን ቅስቀሳ ሲካሄድ ብናየው የተሻለ ነው የሚሆነው፡፡
ኢህአዴግ በምርጫ ቦርድ ወይም በምርጫ ሂደቱ ላይ ቅሬታ አለው?
ምርጫ ቦርድ ጋ ቅሬታ የለንም፡፡ ቦርዱ በገለልተኝነት እየሰራ ያለ ተቋም ነው፡፡ ስብሰባ ሲጠራን አስተያየት እንሰጣለን፤ እስካሁን ግን ምንም ቅሬታ የለንም፡፡ ሌሎች ፓርቲዎች የሚያቀርቡትም አብዛኛው ቅሬታ ትክክል አይደለም ብለን እናምናለን፡፡ ፓርቲዎቹ ራሳቸው መጨረስ ያለባቸውን የቤት ስራ ሳይሰሩ፣ በቦርዱ ላይ የሚያቀርቡትን አብዛኞቹን ቅሬታዎች ስንገመግም፣ ቦርዱ ገለልተኛ አይደለም የሚል መልዕክት ለማስተላለፍ የሚያደርጉት ጥረት መሆኑን እንገነዘባለን ነው፡፡ ምርጫ ቦርድ ለኛ የሚያደላልን ነገር የለም፡፡

(ምር ያሜቴ የንግበከቤ ፏ አሚተኽ ባንዘነቤ)
(የጉራጊኛ ተረት )
      ከዕለታት አንድ ቀን ሁለት ሊቅ አዋቂ የተባሉ ሳይንቲስቶች ስለንጉሣቸው ሲወያዩ አንደኛው፤
“ንጉሦችና መሪዎች ብዙ ስራ ስለሚበዛባቸው ለዕውቀት ብዙ ቦታ አይሰጡምና ግኝቶቻችንን እንድናሳውቃቸው በየጊዜው እየቀረብን ንግግር እናድርግላቸው” ይላል፡፡
ሁለተኛው፤
“ወዳጄ ሞኝ አትሁን! ንጉሦችና መሪዎች የሚበልጣቸውን ሰው አይወዱም፡፡ ስለዚህም ከማዳመጥና ከመለወጥ ይልቅ አንተን ዝም የሚያሰኙበትን መንገድ ነው ሲያሰላስሉ የሚያድሩት፡፡ የሚሻለው አንተ ድምፅህን አጥፍተህ ምርምርህን መቀጠል ነው፡፡”
አንደኛው፤
“ግዴለህም እንሞክር፡፡ እስከዛሬ ያላወቁትን ነገር ስትነግራቸው በዚያ ይማረኩና፣ ንግግርህን በማድነቅ እንዲያውም ሽልማትና ሹመት ሁሉ ሊሰጡህ ይችላሉ፡፡”
ሁለተኛው፤ ትንሽ ከረር ብሎ፤
“ወዳጄ! ሳይንቲስት ሆነህ እንዴት ሽልማትና ሹመት ያምርሃል፡፡ ዓለም ካንተ ሥራ ውጤት በመጋራት የጥበብህ ተጠቃሚ ለመሆን እንዲችል ለማድረግ መጣጣርህን ትተህ ንጉሥ ንግግሬን ያዳምጡ በማለት እንዴት ልብህን ታወልቃለህ? ይልቁንስ ሊዮናርዶ ዳቬንቺ ያለውን አንድ ምሳሌ ልንገርህ፡-
አንደኛው፤ “ምን አለ?”
ሁለተኛው ቀጠለ:-
‹የባህር እንስሳት የሆኑት ኦይስተሮች ጨረቃ ሙሉ በሆነች ሰዓት አፋቸውን በሰፊው ሙሉ ለሙሉ ይከፍታሉ፡፡ የፈረስ ጫማ ቅርፅ ያላቸው የውሃ እንስሳት ክራቦች ደግሞ የተከፈተውን የኦይስተሮች አፍ ሲያዩ ጠጠር ወይም የባህር አረም ይወረውሩና እዚያ አፍ ውስጥ ይከታሉ፡፡ ኦይስተሮቹ አፋቸውን መግጠም ያቅታቸዋል፡፡ እንደዚያው አፋቸውን አንደከፈቱ ክራቦቹ ምግብ ያደርጓቸዋል፡፡ አፉን በብዛት የሚከፍት ሰው ዕጣ - ፈንታም እንደዚያው ነው፡፡ የሰሚው ሰለባ ይሆናል፡፡” አለው፡፡
* *  *
የምንናገረውን እንወቅ፡፡ የምናውቀውን መጥነን እንናገር፡፡ ለምንናገረው ቦታና ጊዜ እንምረጥ፡፡ የሰሚያችንን ስሜትና እንቅስቃሴ እናጢን፡፡ ቢያንስ በወጉ እንገምት፡፡ “ካፍ ከወጣ አፋፍ” የሚለውን ተረት ለደቂቃም ቢሆን አንዘንጋ!
መጥኖ ትንሽ መናገር ኃይልና አቅምን ማግኘት ነው፤ የሚለውን እንደሚባል ብዙ ፀሐፍት ይናገራሉ፡፡ አንዲ ዋርሆል የተባለው አርቲስት “በህይወቴ የተማርኩት ነገር ቢኖር ዝም ባልኩ ቁጥር የበለጠ ኃይል እንዳለኝ ነው፡፡ ለነገሩ ብዙ አለመናገር ጅል ንግግር ከመናገርም ያድናል” ይለናል፡፡
በሩሲያ የታህሣሣውያን አመፅ (Decemberist Uprising) በመባል የሚታወቀው ንቅንቄ መሪ የነበረውን ኮንድራቲ ራይሌዩቭ ንጉሥ ቀዳማዊ ኒኮላስ ሞት ይፈርድበትና አንገቱ ላይ ገመድ ይጠልቃል፡፡ ከስር የቆመበት ወንበር ሲነሳ ይሰቀላል ተብሎ ሲጠበቅ፤ ገመዱ ተበጠሰና ዳነ፡፡ በዚያን ጊዜ ዕምነት፤ እንዲህ ያለ ሁኔታ ሲከሰት አምላክ መሞቱን አልፈለገም ስለሚባል፤ በል የመጨረሻ ይቅርታ ጥያቄ አቅርብ ተባለ፡፡ ተሰቃዩ እንዲህ አለ፡- “አይ ራሺያ! ገመድ እንኳ በትክክል የማይገመድብሽ አገር!” ንጉሡ፤ “ምን አለ?” ብለው ጠየቁ፡፡ ያለውን ሲነግሯቸው፤ የይቅርታ ደብዳቤውን ቀደዱና “በሉ ጠንካራ ገመድ ሥሩና አሳዩት!” አሉ ይባላል፡፡ ጊዜና ቦታን ማወቅ ለሁሉ ነገር ቁልፍ ነው፡፡
ሀገራዊ ስሜትና ዲሞክራሲያዊ አመለካከት ካልተዋሃዱና፤ በዚያም ላይ ብስለት ካልታከለበት ሁነኛ ለውጥና ዕድገት ለማምጣት ብዙ ጊዜ አዳጋች ነው፡፡ ወቅታዊ ትኩሳት፣ ስሜታዊነት ወይም በፖለቲካዊ አጠራሩ አብዮታዊ ወኔ ብዙ ጊዜ፤ ከድርጊቱ ሞቅ ሞቁ፣ ከተግባሩ ፉከራው፣ መሬት ከረገጠ ለውጡ፤ አየር ባየር የሚሄድ የወሬ ንፋሱ፤ ይበረክታል፡፡ በዚህ ምክንያት ዕሙናዊና ተጨባጭ ለውጥ ከማግኘት ይልቅ እንደሳሙና አረፋ የሚኩረፈረፍ ስሜታዊነት ብቻ ይታያል፡፡ “ምን ያደርጋል ስላስገመገመ፣ ፏ ብሎ ካልዘነመ” የሚለው የጉራጊኛ ተረት የሚጠይቀን ይሄንኑ ነው፡፡

    እኤአ በ1995 በፊፋ የአለማችን ኮከብ እግር ኳስ ተጫዋች ተብሎ የተመረጠው ላይቤሪያዊ እግር ኳስ ተጫዋች ጆርጅ ዊሃ ሰሞኑን በተካሄደው የአገሪቱ የሴኔት ምርጫ ከፍተኛ ድምጽ በማግኜት አሸናፊ መሆኑን ቢቢሲ ዘገበ፡
በኢቦላ ወረርሽኝ ክፉኛ በተጎዳችዋ ላይቤሪያ ሰሞኑን በተካሄደው ምርጫ ሞንቴራዶ የተባለችውን ግዛት በመወከል የተወዳደረው ዊሃ፣ 78 በመቶ ድምጽ በማግኘት ማሸነፉን የጠቆመው ዘገባው፣ ግዛቲቱን ወክሎ የተወዳደረው ተፎካካሪው የአገሪቱ ፕሬዚዳንት ኤለን ጆንሰን ሰርሊፍ ልጅ ሮበርት ሰርሊፍ 11 በመቶ ድምጽ በማግኜት መሸነፉን አስታውቋል፡፡በምርጫው ካሸነፉት ተወዳዳሪዎች መካከል የቀድሞው የአገሪቱ ፕሬዚዳንት ቻርለስ ቴለር የቀድሞ የትዳር አጋር ጄዌል ሃዋርድ ቴለር አንዷ ናቸው፡፡
በ2005 በተካሄደው የአገሪቱ ፕሬዚዳንታዊ ምርጫ ተወዳድሮ የነበረው ዊሃ፣ በኤለን ጆንሰን ሰርሊፍ መሸነፉን ዘገባው አስታውሷል፡፡

ከ162 መንገደኞች እስካሁን የ7ቱ አስከሬን ተገኝቷል

ባለፈው እሁድ 162 ሰዎችን ይዞ በበረራ ቁጥር 8501 ከኢንዶኔዥያዋ ሱራያባ ከተማ ወደ ሲንጋፖር በመጓዝ ላይ እያለ ድንገት የተሰወረው ንብረትነቱ የኤርኤዥያ አየርመንገድ የሆነው ኤርባስ ኤ320-200 አውሮፕላን እጣ ፋንታ አለምን አሳዝኗል፡፡ ኢንዶኔዢያውያንም አዲሱን የፈረንጆች አመት በጥልቅ ሃዘንና በአስከሬን ፍለጋ ተቀብለውታል፡፡
አውሮፕላኑን መሰወሩን ተከትሎ ኢንዶኔዢያና ሌሎች አገራት በመርከብና በአውሮፕላን ታግዘው ለፍለጋ በተሰማሩ በሶስተኛው ቀን የተሰማው ነገር፣ አዲስ አመትን በደስታ ለማክበር ለተዘጋጁ ኢንዶኔዢያውያን ትልቅ መርዶ ሆኗል፡፡
137 አዋቂዎች፣ 17 ህጻናት አንድ ጨቅላ፣ ሁለት አብራሪዎችና አምስት የበረራ ሰራተኞች፣ ሁሉም የጃቫ ባህር ውስጥ ሰምጠው ለህልፈተ ህይወት ተዳርገዋል፡፡ በአውሮፕላኑ ውስጥ የነበሩት መንገደኞች 155 ኢንዶኔዢያውያን፣ 3 ደቡብ ኮርያውያን፣ አንድ እንግሊዛዊ፣ አንድ ፈረንሳዊ፣ አንድ ማሌዢያዊና አንድ ሲንጋፖራዊ ነበሩ ተብሏል፡፡
ለአውሮፕላኑ መከስከስ በሰበብነት የተጠቀሰው አስቸጋሪ የአየር ንብረት ሁኔታ ሲሆን፣ ሌሎች ምክንያቶች እንዳሉ የማጣራቱ ሂደትና የመንገደኞችን አስከሬን የማውጣቱ ሂደት እንደቀጠለ ነው፡፡ እስካለፈው ረቡዕ ድረስም የአራት ወንድ እና የሶስት ሴት መንገደኞች አስከሬን ከባህር መውጣቱንና በአካባቢው ያለው የአየር ንብረት ሁኔታ ፍለጋውን አስቸጋሪ እንዳደረገው ቢቢሲ ዘግቧል፡፡
የኢንዶኔዢያው ፕሬዚደንት ጆኮ ዊዶዶ ግን ምንም እንኳን አስቸጋሪ የአየር ንብረት ሁኔታው ፍለጋውን እጅግ አዳጋች ቢያደርገውም፣ አስከሬንና የአውሮፕላኑን ስብርባሪዎችን የማውጣቱ ስራ በመርከቦችና በሄሊኮፕተሮች በመታገዝ ተጠናክሮ እንደሚቀጥል ባለፈው ማክሰኞ አስታውቀዋል፡፡
በራዳር መረጃዎች ላይ በተደረገ ማጣራት፣ አውሮፕላኑ ከሚገባው የበረራ ከፍታ በላይ ወጥቶ እንደነበርና ይህም ለመከስከሱ ምክንያት እንደሆነው የሚያመላክቱ መረጃዎች ተገኝተዋል፡፡
ከዚህ ቀደም ጥሩ የሚባል የደህንነት ታሪክ እንደነበረው ያስታወሰው ዘገባው፣ በአውሮፕላኖቹ ላይም ይህ ነው የሚባል አስከፊ አደጋ ደርሶ እንደማያውቅ አክሎ ገልጧል፡፡

Monday, 05 January 2015 08:40

2014 አመቱን በቁጥር

55 በመቶ
ስኮትላንድ ከእንግሊዝ ተገንጥላ ራሷን ለመቻል ባካሄደችው ሪፈረንደም ከእንግሊዝ ጋር ብንቆይ ይሻላል ሲሉ ድምጻቸውን የሰጡ ስኮትላንዳውያን፡፡
3 ሺህ 400
በአመቱ ወደተለያዩ የአውሮፓ አገራት ለመግባት ሲሞክሩ በሜዲትራኒያን ባህር ሰጥመው የሞቱ ስደተኞች ቁጥር፡፡
529
በመጋቢት ወር በግብጽ ውስጥ በተካሄደ የፍርድ ሂደት የሞት ፍርድ የተወሰነባቸው የቀድሞው የአገሪቱ ፕሬዚዳንት ሞሃመድ ሙርሲ ደጋፊዎች፡፡

17.6 ትሪሊዮን ዶላር
በአመቱ የቻይና ኢኮኖሚ ከአሜሪካ በመብለጥ በአለማችን ቀዳሚነቱን የያዘበት፡፡

51 ቢሊዮን ዶላር
በኦሎምፒክ ታሪክ ከፍተኛ ወጪ እንደወጣበት የተነገረውና በአመቱ በሩስያ የተካሄደው የ2014 የሱሺ የዊንተር ኦሎምፒክ ውድድር አጠቃላይ ወጪ፡፡

44.4 ሚሊዮን ዶላር
ጂምሰን ዊድ/ ዋይት ፍላወር 1 የተሰኘውና በሴት ሰኣሊያን ከተሰሩ የስዕል ስራዎች በከፍተኛ ገንዘብ በመሸጥ ክብረወሰን ያስመዘገበው የሰዓሊ ጂዮርጂያ ኦኬፌ የስዕል ስራ ባለፈው ህዳር ወር የተሸጠበት ዋጋ፡፡

3 ሺህ
በሶርያና በኢራቅ የሚንቀሳቀሱ አክራሪ እስላማዊ ቡድኖችን በ2014 የተቀላቀሉ አውሮፓውያን ቁጥር፡፡

10 ሚሊዮን
ታዋቂው የቴክኖሎጂ ኩባንያ አፕል ባለፈው መስከረም ወር ለገበያ ያቀረባቸው አይፎን6 እና አይፎን6 ፕላስ ዘመናዊ የሞባይል ቀፎዎች በአንድ ሳምንት ጊዜ የተሸጡበት ቁጥር፡፡

7ሺህ 857
የዓለም የጤና ድርጅት እስከዚህ ሳምንት ድረስ በኢቦላ ሳቢያ ለህልፈተ ህይወት ተዳርገዋል ያላቸው ሰዎች ቁጥር፡፡
61 ሺህ ሴተኛ አዳሪዎች
የእንግሊዝ ብሄራዊ የስታስቲክስ ቢሮ መረጃ እንደሚለው በአገሪቱ በሴተኛ አዳሪነት ስራ ላይ ተሰማርተው የሚገኙ ሴቶች ቁጥር በተጠናቀቀው የፈረንጆች አመት 61 ሺህ ደርሷል፡፡
አንድ ሴተኛ አዳሪ ለአንድ ጊዜ ወሲባዊ ግንኙነት የምታስከፍለው ገንዘብ በ2014 በአማካይ 67 ፓውንድ መድረሱን የጠቆመው መረጃው፣ አንዲት ሴተኛ አዳሪ በሳምንት በአማካይ ከ23 ወንዶች ጋር ወሲባዊ ግንኙነት ትፈጽማለች ብሏል፡፡
814 ሚሊዮን
በታሪክ በርካታ ዜጎች ድምጽ የሰጡበት ቀዳሚው የፖለቲካ ምርጫ በተባለውና ባለፈው ሚያዝያ ወር በተከናወነው የህንድ ምርጫ ድምጽ የሰጡ የአገሪቱ ዜጎች ቁጥር፡፡
9223372036854775808 ወይም 9 ኩንቲሊዮን
ደቡብ ኮርያዊው ድምጻዊ ፒኤስዋይ ከሁለት አመታት በፊት የለቀቀው ጋንጋም ስታይል የተሰኘ የሙዚቃ ክሊፕ በዩቲዩብ ድረገጽ የታየበት ቁጥር፡፡
(ምንጭ፡- ፋይናንሺያል ታይምስና ሌሎች ድረገጾች)

Monday, 05 January 2015 08:41

የገና ስጦታ

የገና በዓል ለአንድ ሰው ትንሽ ተጨማሪ ደግነት የምናሳይበት ወቅት ነው፡፡
 ቻርልስ ሹልዝ
የገና ስጦታ ሃሳብ -
ለጠላት - ይቅርታን
ለተቀናቃኝ - መቻቻልን
ለወዳጅ - ልብን
ለደንበኛ - መስተንግዶን
ለህፃናት - መልካም አርአያነትን
ለሁሉም - ፍቅርን
ለራስ - አክብሮትን
            ኦሬን አርኖልድ
* ገና የደስታና የፍቅር ቀን ነው፡፡ ፈጣሪ በሁለቱም ያበልፅጋችሁ፡፡
ፊሊፕስ ብሩክስ
* በአሁኑ የልደት በዓል ልጆቻችሁን ሁለት ጥያቄዎች ጠይቋቸው
በመጀመሪያ - “በገና በዓል ለሰዎች ምን መስጠት ትፈልጋላችሁ?”
በመቀጠል - “ለገና እናንተ ምን ትፈልጋላችሁ?”
የመጀመሪያው ጥያቄ፤ የልብን ደግነትና ውጭያዊ አትኩሮትን ያዳብራል፡፡ ሁለተኛው ጥያቄ በመጀመሪያው ካልተገራ ራስ ወዳድነትን ይፈጥራል፡፡
ያልታወቀ ደራሲ
* የገና ሻማ ውብ ነው፡፡ ጨርሶ ሁካታ አያውቅም፡፡ ይልቁንም በዝምታ ለሌሎች ብርሃን በመሆን ራሱን ያቀልጣል፡፡
ኢቫ ሎጉ
* ለገና ሁሉም መንገዶች ወደ አገር ቤት ያመራሉ፡፡
ማርጆሪ ሆልመስ
* ገና በልቡ ውስጥ የሌለው ሰው፣ በዓሉን ጨርሶ ከገና ዛፍ ስር አያገኘውም፡፡
ቻርሎቴ ካርፔንተር

     በደራሲና ጋዜጠኛ አሸናፊ ደምሴ የተፃፈው “የኢህአዴግ የማሪያም መንገድ” የተሰኘ ትዝብት አዘል መፅሀፍ ከትላንት በስቲያ ገበያ ላይ ዋለ፡፡ የመፅሐፉን መጠሪያ ጨምሮ ከ20 በላይ በሚሆኑ ርዕሶች የተለያዩ ወጐችን ያካተተው መፅሀፉ፤ ከሶስቱ በቀር ሌሎቹ በየሳምንቱ ረቡዕ ለንባብ በሚበቃው “ሰንደቅ” ጋዜጣ ላይ የተስተናገዱ እንደሆኑ ታውቋል፡፡የመፅሃፉ አዘጋጅ በ “ሰንደቅ” ጋዜጣ ላይ በከፍተኛ ሪፖርተርነት እየሰራ ሲሆን በህትመት ደረጃ የአሁኑ መፅሃፍ የመጀመሪያ ስራው እንደሆነ ታውቋል፡፡ መፅሀፉ በ174 ገፆች የተቀነበበ ሲሆን በ40 ብር ይሸጣል፡፡  

በዚህ “አሸናፊ” በተባለው ድርሰት መጨረሻ አካባቢ በተካተተው “የሞኝ አንግስ” ቤቶች ወሬ እኔንና አያሌ የጓደኞቼን ቤተሰቦች  እጅግ አሳዝኗል። ዕውነታን መሠረት ባደረገም ይሁን በልብ ወለድ ትረካ ውስጥ ለሚጠቀስ የግለሰብ ስም አስፈላጊውን ጥንቃቄ ማድረግ የግድ ነበር፣ ምክንያቱም ስሙ የጎደፈበት ግለሰብ ራሱን ይከላከል ዘንድ በሕይወት ስለማይኖር።

     ታህሳስ 4 ቀን 2007 ዓ.ም በወጣው የአዲስ አድማስ ጋዜጣ “ነቄዎቹ የስድስት ኪሎ ልጆች” በሚል ርዕስ የተጻፈውን ድርሰት አነበብኩ። ይህ ድርሰት በድረ ገጽ በተደረገ ውድድር ያሸነፈና የአዳም ረታን “መረቅ” መጽሐፍ መሸለሙን አዲስ አድማስ እንደ መግቢያ ገልጾታል። እንደ ወትሮዬ የአዲስ አድማስ ጋዜጣን ሳገላብጥ ዓይኔን የሳበው ይህ ርዕስ ለማንኛውም ሰው አቅል ጎታች መሆኑ ግልጽ ነው። ከዚህም አንጻር ፍሰቱን ተከት የበአራድኛ ቋንቋ የተጠናቀሩትን አጫጭር ዓረፍተ ነገሮች በፈገግታ ረካሁባቸው። ደራሲው በሚመራኝ ሰፈሮች አብሬ በመጓዝ ላይ እያለሁ  አንድ የቅርብ ጓደኞቼን አባት ታሪክ እጅግ የሚያወርድ ትንታኔ ላይ ስደርስ  ግንባሬን አኮስኩሸ በትዕግስት ተከታተልኩት። በእርግጥ አዲስ አድማስ ይህን ጽሑፍ ላንባቢ ከማድረሱ በፊት መጠነኛ አርትዖት እንዳደረገበት ከጅምሩ ጠቁሞናል። አርትኦት ማለት የሰዋሰው፣ የቃላት አመራረጥ፣ ያገላለጽ ዘይቤ፣ ያጻጻፍ ሥነ-ምግባር፣ የታሪክ ወይም የሌላ ይሁን ግን ለእኔ ግልጽ አይደለም።
በዚህ “አሸናፊ” በተባለው ድርሰት መጨረሻ አካባቢ በተካተተው “የሞኝ አንግስ” ቤቶች ወሬ እኔንና አያሌ የጓደኞቼን ቤተሰቦች  እጅግ አሳዝኗል። ዕውነታን መሠረት ባደረገም ይሁን በልብ ወለድ ትረካ ውስጥ ለሚጠቀስ የግለሰብ ስም አስፈላጊውን ጥንቃቄ ማድረግ የግድ ነበር፣ ምክንያቱም ስሙ የጎደፈበት ግለሰብ ራሱን ይከላከል ዘንድ በሕይወት ስለማይኖር። የዚህ ስሙና ታሪኩ በጎደፈበት ሰው ልጆችና የልጅ ልጆች ላይም ብርቱ የሞራል መፋቅ ማስከተሉ አይቀርምና ድርሰቱ ኃላፊነት በጎደለው መልኩ ቀርቧል እላለሁ። በዚህ “በነቄ የስድስት ኪሎ” “የሞኝ አንግስ” ቤቶች ትረካ ከተካተቱት ወጎች አንዱ የጓደኞቼ አባት የነበሩት የአቶ አየለ ስብሐቱ ስም ነው። በተራኪው አቀራረብ ከተዘገበው የአየለ ስብሐቱ የትውልድ አገርና አስተዳደግ ሁኔታን አንብቤ የዕውቀት ማነስን ታዝቤያለሁ፣ እግረ መንገዴንም  የአቅም አድማሱን በስንዝር ለክቸዋለሁ። ያም ሆነ ይህ የማንኛውም ሰው ማንነት ከቤተሰቡ ይጀምራልና ለመጣጥፉ ባለቤትም ሆነ በዕለቱ የወጣውን የአዲስ አድማስ ጋዜጣ ላነበቡ ሁሉ የአየለ ስብሐትን እውነተኛ ታሪክና ተጋድሎ ማስተዋወቅ እሞክራለሁ።
የአየለ ስብሐት የትውልድ አገር ደራሲው እንደ ከተበው በሸዋ ክፍለሐገር በወይራ አምባ አይደለም። በቀድሞው የትግራይ ጠቅላይ ግዛት በአጋመ አውራጃ፣ በስሩክሶ ወረዳ ዓድ ዒሮብ ተብሎ በሚጠራው አካባቢ በዳልጌዳ መንደር ነው። (ወጣቱ ደራሲ ተከተለኝ)፦  ለትምህርት ካላቸው ከፍተኛ ፍቅርም በራሳቸው አነሳሽነት አሊቴና በሚገኘው የካቶሊክ ትምሕርት ቤት ነበር የገቡ። በአሊቴና የካቶሊክ ትምሕርት ቤት የሚሰጠውን ትምሕርት ካገባደዱ በኋላም አዲስ አበባ በሚገኘው የአላያንስ ፍራንሲ ትምህርት ቤት ቀጥለዋል።
የፈረንሳይኛ ቋንቋ ዕውቀታቸውን የተገነዘቡት ልጅ እያሱ፤ ትምሕርታቸውን ካጠናቀቁ በኋላ ከእርሳቸው ጋር ይሠሩ ዘንድ ሐሳብ አቅርበውላቸው ነበር። አቶ አየለ ግን ለትምሕርት ካላቸው ብርቱ ፍቅርና የውጭውን ዓለም ዕውቀት ለመቅሰም ከነበራቸው ጉጉት የተነሳ የልጅ እያሱን ሐሳብ አልተቀበሉም። ከዚህም አንጻር በራሳቸው ወጭ በባቡር ወደ ጅቡቲ ተጉዘው፣ በመርከብ ወደ አሌክሳንደሪያ ግብጽ ቀጠሉ። እንደ ገና  ወደ ፈረንሳይ ተሳፍረውም መጀመሪያ ማርሴይ ከዚያም ወደ ፓሪስ ሔደው በታዋቂው የሰርቦን ዩንቨርሲቲ የሕግ ትምሕርት ተከታትለዋል። እኒህ የሕግ ምሑር “ጃን ሜዳን ሽጠዋል” ብሎ የሚያስብ  የእኒህን ሰው የሕግ ዕውቀት ያላገናዘበ ሰው ብቻ ነው።
በዚያን ወቅት አልጋ ወራሽ የነበሩት ተፈሪ መኮንን ፈረንሳይን በጎበኙበት ወቅት በክብር ካስተናገዷቸው ኢትዮጵያዊያን ወጣቶች መካከል አየለ ስብሐት አንዱ ነበሩ። የኢትዮጵያ ኤምባሲ በፈረንሳይ ይቋቋም ዘንድ አንጋፋውን ሚና የተጫወቱ ብቻም ሳይሆን የመጀመሪያውን የኢትዮጵያዊያን ማሕበር “የኢትዮጵያ ልጅ”ን ከመሠረቱት አንዱና በፕሬዚደንትነትም የመሩ ሳተና ምሑርና አገር ወዳድ ሰው ነበሩ። ብዙ ኢትዮጵያዊያን ወጣቶች ትምሕርታቸውን በፈረንሳይ አገር ይከታተሉ ዘንድ ከፍተኛ ጥረትም አድርገዋል ( እነ አክሊሉ ሐብተወልድን የመሳሰሉ)። ትምሕርታቸውን ለመከታተል የገንዘብ እጥረት ለነበራቸው ኢትዮጵያዊያን ተማሪዎችም ለአልጋ ወራሽ ተፈሪ መኮንን በማመልከት በጀት ያስፈቀዱ አርቆ አሳቢ ሰው ነበሩ።
በ1928 ዓ.ም አጼ ኃይለሥላሴ በዙፋን ላይ እንደ ተቀመጡ ለዘመናዊ ሥልጣኔና ለሥርዓት መሻሻል በር ይከፍታሉ የሚል ዕምነት ካሳደሩ ወጣት ምሑራን መካከል አየለ ስብሐት አንዱ ናቸው። ከዚህም አንጻር ከእነ ሎሬንሶ ትዕዛዝና ከሐኪም ወርቅነህ ጋር ወደ አገራቸው ተመለሱ።( ዝክረ ነገር ገጽ 606፣ ተራ ቁጥር 85 ይመለከቱ) ። ከተመለሱ በኋላም በአገር ግዛት ሚንስትር በዳሬክተርነት አገልግለዋል። ብዙ ሳይቆይ ፋሽስቱ ኢጣሊያ ኢትዮጵያን በመውረሩ  ሥርዓተ- አገር ፈረሰ። በዚህ የጭንቅ ዘመን ባሕሉንና ቋንቋውን ወደ ተላመዱት ፈረንሳይ አልሸሹም። ወደ አገራቸው ወደ ዓዲ ዒሮብ በመዝመት አሲምባ በረሓ መሽገው ከነበሩ ኢትዮጵያዊያን አርበኞች ጋር በመሰለፍ አምስቱን የጠላት ወረራ ዓመታት በጽንዓት በመታገል አሳለፉ እንጅ።
ከነፃነት በኋላም አገራቸዉን በቅንነት ሲያገለግሉ ቆይተዋል። ወደ ኋላ ግን ከመሳፍንቱ ጋር በተፈጠረ አለመግባባት በፈቃዳቸው ራሳቸውን ከሥልጣን አግልለዋል። ይህ ውሳኔያቸው ንጉሠ ነገሥት ቀዳማዊ ኃይለሥላሴን በማስከፋቱ፣ በግዞት እንዲቆዩና በግል ሥራም እንዳይተዳደሩ ማዕቀብ ተጥሎባቸው ነበር። አዝማች አየለ ስብሐት (በአርበኝነት ዘመን ያስተባበሩት ያርበኛው ሕብረተሰብ  እንደሚጠሯቸው) ከላይ በተጠቀሰው ቅጣት አኩርፈው አገራቸውን በመጥላት መሰደድን አልመረጡም።“የአሸናፊው” ድርሰት ባለቤት አዲስ ዓለማየሁ እንዳቀረበው፤ አየለ ስብሐት  “አጥንተ ድሕነቱ የከበደውና የለበሰውን ቡትቶ አሽንቀጥሮ የጣለ” ሳይሆኑ በግል ጥረታቸው ወደ ከፍተኛ ደረጃ የደረሱ የኢትዮጵያ የክፉ ቀን ልጅና ምርጥ ምሑር ነበሩ። እንደ ምሳሌ ለመጥቀስ ያህልም፣ “የስድስት ኪሎ ነቄዎች” ድርሰት ጸሐፊን የስም ሞክሸነት የሚጋሩትና በዘመኑ የኢኮኖሚና የልማት ሚንስትር የነበሩ ታዋቂው ደራሲና አርበኛ ሐዲስ ዓለማየሁ ላንድ ወዳጃቸው የጋብቻ ሽምግልና ወደ አቶ አየለ ቤት በሔዱበት ወቅት “ እነ አቶ አየለ ስብሐት ከፈረንሳይ ሲመለሱ እኛ ገና ወጣቶች ነበርን። የአቶ አየለን አለባበስ፣ ቁመናና አንደበተ ርቱዕነት ለመታዘብ እጅግ እንጓጓ ነበር” ማለታቸውን በወቅቱ የነበሩ ሰዎች ያወጉ ነበር። በኒህ ታላቅ ሰው የቀብር ስነ-ሥርዓት ላይ ተገኝተው የሕይወት ታሪካቸዉን ያነበቡት ቢትወደድ አስፍሐ ወልደሚካኤልም  ትዝታቸውን ወደ ኋላ በማጠንጠን “ አቶ አየለ ስብሐት ጎፈሬያቸውን አበጥረው፣ ዝናራቸውን ታጥቀውና ጠበንጃቸውን አንግበው ከአሲምባ በረሓ በወጡበት ወቅት የተቆጣ አንበሳ ይመስሉ ነበር” ሲሉ ገልጸውታል። አቶ አየለ ስብሐት ልጆቻቸውንና አያሌ የቅርብ ቤተሰብ አባላት ልጆችን አስተምረው ለቁም ነገር ያበቁ ታላቅ ሰው ስለነበሩም በብዙ ሰዎች ዘንድ ተወዳጅነትን ያተረፉ በጎ ሰው ነበሩ።
በአርበኝነት ዘመን ያልተለዩአቸው ባለቤታቸው ወይዘሮ ከፈይ ዘውገ ለረጅም ግዜ በፈረንሳይ አገር የኖሩና የአጼ ምንይልክ የመሣሪያ አቅራቢ የነበሩት የአንኮበሬው የነጋድራስ ዘውገ ኃይሉ ልጅ ናቸው። አዲስ ዓለማየሁ “ከሞኝ አንግስ ቤቶች” በወረሰው ትረካ የአቶ ስብሐቱን ትውልድ ከአዲ ኢሮብ  ወደ ወይራ አምባ ያጓጓዘውም ከዚህ ውዥንብር የተነሳ ይመስለኛል። አየለ ስብሐት “አጥነተ ድሕነቱ የከበደው” ሳይሆኑ ወደ አገራቸው ከመመለሳቸው በፊት  በሊግ ኦፍ ኔሽን የምሥረታ ጉባኤ ላይ ኢትዮጵያን ወክለው ልኡክ (ዴሊጌት) ከነበሩት ሶስት ሰዎች መካከል አንዱ ነበሩ። በዚህ የምሥረታ ጉባኤ ላይ ከኢጣሊያዊው ወኪል የቀረበው የተቃውሞ ሙግት ቀላል አልነበረም። ኢጣሊያዊው ደሊጌት “ በኢትዮጵያ ውስጥ ባርያ ይሸጣልና ከዚህ የሰለጠነ ማሕበረሰብ ማሕበር በአባልነት ሊካተቱ አይገባቸውም” የሚል የመከራከሪያ ነጥብ አንስቶ ነበር። አቶ አየለ ይህን የተቃውሞ ሓሳብ ውድቅ ለማድረግ የወሰዱት እርምጃ ነፃ የወጡ ባርያዎች ስም ዝርዝር ይላክላቸው ዘንድ በወቅቱ አልጋ ወራሽ ለነበሩት ለተፈሪ መኮንን አስቸኳይ መልዕክት እንዲደርሳቸው ማድረግ ነበር። ይህ በአልጋ ወራሽ ተፈሪ መኮንን የተላከ ነፃ የወጡ የባርያዎች የሥም ዝርዝር እንደ መረጃ መቅረቡን ታሪክ ይዘግባል። በSept 10- Oct 4 1930 በተካሓደው “The eleventh section of the Assembly “ የተካፈሉ የደሊጌት አባላት  አየለ ስብሐት፣ ነጋድራስ መኮንንና Leone Legard (ሊየን ለጋህድ) እንደ ነበሩ ዶሴዎች ይጠቁማሉ።የዚህ መጣጥፍ ዋና ዓላማ በማንኛውም  ድርሰት ውስጥ በስም በሚጠቀሱ  ግለሰቦች ታሪክ ላይ የሚለጠፉ ባሕሪያት ከሥነ-ጽሑፋዊ ሥነ-ምግባርና ከትዝብት አንጻር ጥንቃቄ ሊደረግባቸው እንደሚገባ ማሳሰብ ነው። በየጠጅ ቤቱና “ሞኝ አንግስ” ቤቶች ከሰዓት በኋላ የሚነሱ ወጎችን እንደ ዋቤ ማቅረብም አግባብ አይመስለኝም። ድርሰትን እንዳሻው ሰነቃቅሮ ምርጥና ተነባቢ ማድረግ ይቻላል፣ የግለሰቦችንና የቤተሰባቸውን ስም በጭቃ ለውሶ የድርሰቱ መዋቢያ ማድረግ ግን ዕውቀትን ማዕከል ያላደረገ ድፍረት ነው። ለዚህም ነው አሜሪካዊያን “Ignorance Is Blessed” የሚሉት።
ዋቢ መረጃዎች፡(*LeagueNationsPhotoArchive.  www.indianaedu~legue/11thordinaryasembely.httm)
*ወመዘክር ገጽ 606 ተራ ቁጥር 85 (ከ1928 ዓ.ም በፊት ተምረው ወደ አገራቸው የተመለሱ ሰዎች ሥም ዝርዝር)
አስማማው ኃይሉ

Monday, 05 January 2015 08:10

ፖለቲካዊ ሃሜቶች

የአሜሪካው ፕሬዚዳንት ባራክ ኦባማ በቅርቡ በዓለም የኢኮኖሚ ሰሚት ላይ ለመሳተፍ ወደ ቻይና መዝለቃቸው ይታወሳል፡፡ በቤጂንግ ቆይታቸው ታዲያ ሲወጡ ሲገቡ ማስቲካ እያኘኩ ያዩዋቸው ቻይናውያን “እኚህ ፕሬዚዳንት ሳይሆን ራፐር ነው የሚመስሉት” በሚል ክፉኛ ነቅፈዋቸዋል፡፡
*           *          *
በዚሁ የቤጂንግ ስብሰባ ላይ የሩሲያው ፕሬዚዳንት ቭላድሚር ፑቲንም ተገኝተው ነበር፡፡ እሳቸው ደግሞ የቻይናን ቀዳማዊት እመቤት አሽኮርምመዋል በሚል ነበር የተወነጀሉት፡፡ ውንጀላው ከበድ ቢልም አንዳንድ ወገኖች “የሰው ድንበር መጣስ ለፑቲን ብርቃቸው አይደለም” ሲሉ የባሰ ወንጅለዋቸዋል፡፡
*           *          *
በቻይና፡-
ሳንሱር - አያሳስብም
ግርፋት - አያሳስብም
የህፃናት ጉልበት ብዝበዛ - አያሳስብም
ማስቲካ ማኘክ ግን - ዓይንህን ላፈር ያስብላል!!
*           *          *
የቀድሞው የአሜሪካ ፕሬዚዳንት ሮናልድ ሬገን እ.ኤ.አ በ1981 ዓ.ም የግድያ ሙከራ ተፈፅሞባቸው ነበር፡፡ ሆስፒታል ተወስደው ወደ ቀዶ ህክምና ክፍል ሊገቡ ሲሉ ሃኪሞቹን ትክ ብለው እያዩ፤ “ሁላችሁም ሪፐብሊካን እንደሆናችሁ ተስፋ አደርጋለሁ” ብለው ነበር ይባላል፡፡ (ዲሞክራት ሃኪሞችን አያምኗቸውም!)
“ይሄ ቡና ከሆነ እባካችሁ ጥቂት ሻይ አምጡልኝ፡፡ ይሄ ሻይ ከሆነ አባካችሁ ጥቂት ቡና አምጡልኝ”
አብርሃም ሊንከን

ከዕለታት አንድ ቀን ሁለት ወንድማማች ዝንጀሮዎች በአንዲት ዝንጀሮ ወዳጃቸው ይጣላሉ፡፡
አንደኛው ለሁለተኛው፤
“እንግዲህ እዚች ሚስቴ ዝንጀሮዬ ጋ ድርሽ እንዳትል” ይለዋል፡፡
ሁለተኛው፤
“አይ ወዳጄ እኔ ልልህ ያሰብኩትን ነው አንተ አሁን ያልከው፡፡ የሀሳብ መመሳሰል ያስገርማል፡፡ ዞሮ ዞሮ እዚች ሚስቴ ጋ ድርሽ ካልክ በራስህ ፈረድህ”
አንደኛው
“እንዴት?”
ሁለተኛው፤
“ሚስትነትዋ ያለጥርጥር የእኔ ነው፡፡ አርፈህ ተቀመጥ”
አንደኛው፤
“አርፈህ መቀመጥ ከቻልክ አንተው አርፈህ ተቀመጥ! አለዛ እንግዲህ እንዴት በቡጢ እንደማንገጫግጭህ ስታይ ዋጋህን ታውቃለህ!”
ሁለተኛው፤
“አንተ እኔን?”
አንደኛው፤
“አዎ አንተን ምናባክ እንዳትሆን ነው?”
ተጋጋሉ፡፡ ሁለቱም ለቡጢ ተቀራረቡ! ተሰነዛዘሩ፡፡ ሌሎች ች መጡና ከበቡዋቸው፡፡ ጩኸት በረከተ! የሠፈሩ አለቃ የሆነው የሁለቱ ወንድማማች ዝንጀሮዎች አባት መጣና ገላገላቸው፡፡
ሁሉም ፀጥ እርጭ አሉ፡፡
አባት፤
“እሺ የፀቡ መንሥዔ ምንድን ነው?” ሲል ጠየቀ፡፡
አንደኛው፤
“ሚስቴን እየነካ አስቸገረኝ”
ሁለተኛው፤
“እኔንም ሚስቴን እየነካ አስቸገረኝ”
አባት፤
“ሁለታችሁም ስለአንዲት ዝንጀሮ ሴት ነው የምታወሩት?”
አዎን አሉ ሁለቱም፡፡
“እንግዲያው” አለ አባት “ይቺ ዝንጀሮ ትጠራና ትምጣ” አለ፡፡
ዝንጀሮይቱ ተጠርታ መጣች፡፡
አባት፤   
“ይሄኛውም ልጄ የአንቺ ባል ነኝ ይላል፡፡
ይሄኛውም ልጄ የአንቺ ባል ነኝ ይላል…የትኛው ነው ትክክለኛ ባልሽ?”
ዝንጀሮይቱ ራሷን ደልደል አድርጋ ተቀመጠችና፤
“ጌታዬ፤ ከእነዚህ ልጆችዎ አንዱ እንኳ ዕውነተኛ ባሌ ቢሆን ከእኔው ጋር እቤቴ ተቀምጦ ያገኙት አልነበር? አርፎ የተቀመጠ ልጅ ኖሮዎት ያቃል?” ስትል መልሷን በጥያቄ አጠቃለለች፡፡
አባት፤
“እግዜር ይስጥሽ ያቺንም ያቺንም እየነካኩ ባል ነኝ ማለት አቋም የለሽነት ነው፡፡ አሳዳጊ የበደለው ልጅ ማለት የእኔ ልጆች ናቸው!! አንቺ ሂጂ፡፡ እኔም ልጆቼን ልሰብስብ” አሉ ይባላል፡፡
*   *   *
በማናቸውም የህይወት ዘርፍ ውስጥ ምግባረ - ብልሹ መሆን የአስተዳደግን ጉድለት ያሳያል፡፡ የአስተዳደግ ጉድለት ግብረገብነትን፣ ዕምነትን፣ ትምህርትን የሚመለከት በመሆኑ በአብዛኛው ከባህል ጋር ቁርኝት ያለው ነው፡፡ ምግባረ - ሠናይ መሆንም እንደዚሁ እንደ ባህሉ፣ እንደአስተሳሰቡ፣ እንደ አኗኗሩ የሚዳኝ ነው፡፡ በየሥራ መስኩ የምናየው የሰዎች አኳኋንም እንደየአስተዳደሩ የሚመዘን ነው የምንለው ለዚህ ነው፡፡
የሥራ - ዲሲፕሊን፣ የሥራ ፍቅር፣ ለሥራውም ለህሊናም ታማኝ መሆን፣ የኃላፊነት ስሜት ወዘተ ከመልካም አስተዳደር ጋር የተያያዙ ናቸው፡፡ በሀገራችን የመልካም አስተዳደር ጉድለት ከሥራ ባህሉና ከፖለቲካው ተፅዕኖ ጋር በተሠናሠለ መልኩ እግለሰቦች አስተዳደግ ጉድለት ድረስ የተለጠጠ እየሆነ መጥቷል፡፡ ከተቋማዊ አቅም ይልቅ ግለሰባዊ አቅም አይሎ ይታያል፡፡ አሳዳጊ - የበደለው ሆኗል እንደማለት ነው፡፡ በዚሁ ላይ የሙስና እጀታ ሲሠራለት በደምባራ  በቅሎ ቃጭል ተጨምሮ ሆኗል፡፡ ይህንኑ በውል ለመነጋገርም ሌላ ሙስና ውስጥ መዘፈቅ የሚያስፈልግበት ጊዜ ሆኗል፡፡
ፓቮ ፒልካነን የተባለ ሐያሲ፤
“ከሰው ልጅ በርካታ ችግሮች ውስጥ ጉልህ ቦታ የሚይዘው ስለችግሮቹ ለማውራት አለመቻሉ ነው፡፡ ለዚህ ትልቅ አስተዋፅዖ ይኖረው የነበረው ደግመ ጥበብ ነው” ይለናል፡፡ ጥበብ የኮሙኒኬሽን ቱባ መሣሪያ ነው እንደማለት ነው፡፡ የአንድ ህብረተሰብ መንፈሣዊ ዕሴት መገለጫ ጥበብ ነው፡፡ ይህ ጥበብ ዕፁብ፣ ክቡርና ንፁህ ዋጋ ያለው ሲሆን ዕውነተኛ ማንነትን ቁልጭ ንጥር አድርጐ ያሳያል፡፡ ያልታየውን ይገልጣል፡፡ ዕሙናዊውን ህይወት ያፀኸያል፡፡ የህብረተሰቡ ማህበራዊ ስነልቡና ሲነክትም ቀና ብሎ ጠቋሚው ጥበብ ነው፡፡ ለህብረተሰብ በጐ በሆነ ገፁ ያፀኸያል፡፡ ይህን ንፁህ ጥበብ ሰውንና ህይወቱን ከመግለፅ አልፎ የፖለቲካ ቅብ ለመቀባት ከተሞከረ ግን ይበረዛል፡፡ ኦርጅናሌነቱን ያጣል፡፡ እንደተቀባው ቅብ ያለ ቀለም እየያዘ የእስስት ጠጨባይ ያመጣል፡፡ ህይወት እንድትፈስ በተፈቀደላት ተፈጥሮአዊ ሂደት መሄዷ ቀርቶ በግድ በፒንሣ ተጠምዝዛ የመሄድ ያህል ጫና ይበዛባታል፡፡ የሀገራችን የጥበብና የጥበብ ባለሙያ ሁኔታ በዚህ መልክ ሊጤን ይገባል፡፡ የጥበብ ባለሙያ መናቅ ጥበብን መግደል ነው፡፡ እርግይ እንደጠባይ ዘርፉ ከጥንተ - ፍጥረቱ ፖለቲካዊ ቃና ያለውም ጥበብ አለ፡፡ ይሄ ለፖለቲካዊ ህይወት መገለጫ ብቻ ነውና በፖለቲካ ሥነ-ውበትና ቃለ-ኃይል ላይ የሚንተራስ ይሆናል፡፡ ከመግባቢያነት አልፎም መቀስቀሻ ዓላማን ማራመጃ ሊሆን ይችላል፡፡ የዚህ ጥበብ ችግር ፖለቲካው ትኩሳት ካበቃ ሽባ ሆኖ የመቅረት ዕጣ ፈንታው ነው፡፡ ስለዚህ ቀድመን የገለፅነው ዓይነቱ ንፁህና ኦርጅናሌ ጥበብ የአብዛኛው የጥበብ ማህበረሰብ መናኸሪያና ዘላቂነት ያለው ነው፡፡ የህብረተሰብን ንቁ ተሳትፎ፣ መንፈሳዊ ልሳን የሚከፍትለትም ንፁህ ጥበብ ነው፡፡ ይህን ዓይነቱን ጥበብ መንከባከብና ማሳደግ ያስፈልጋል፡፡ ጥበብን ማሳደግ የፈጠራ ኃይልን፣ አዲስ የመፍጠርን ባህል ማበልፀግ ነው፡፡ ጥበብ እንደፖለቲካ መፈክር ለጊዜያዊ ግብ ብቻ የምናውለው መሪ ቃል አይደለም፡፡ የፖለቲካ ዲኮሬሽንም፣ ቀለምም አይደለም፡፡ እንደዲፕሎማሲ ነገረ - ስራ የሆድን በሆድ ይዞ አፍአዊ ማማለያ አይደለም፡፡ የጥበብ ሰውን መውደድ፣ ማበረታታትና ማሳደግ መሰረቱ መሆን ያለበት ይሄና ይሄ ዕሳቤ ነው፡፡ ባለፈው ስርዓት “ ኪነት ለመደቧ” ስንል ከርመን አሁን ደግሞ “ ኪነት ለወገኗ” እንዳንል መጠንቀቅ ይገባናል
“የጥበብ ሰው ህሊናውን የተነጠቀ ዕለት አለቀለት” ይላሉ የጥበብ ሊቃውንት! አንድን የጥበብ ሰው ከህሊናው ውጪ እንዲጓዝ ካደረግነው ጥበቡን በንቀት ዐይን ማየታችን ነው፡፡ ፈጠራን ማቀጨጫችን ነው፡፡ በሞቀበት ዝፈን ማለታችን ነው፡፡ ጥበብን ስንንቅ የመወያያ ገመዳችንን መበጠሳችን ነው፡፡ በፖለቲካውም ሆነ በጥበቡ መስክ መናናቅ ካለ ተያይዞ እረብ ማለት አይቀሬ ነው፡፡ “በቆሎ ጤፍን አይታ አሁን እዚችም ሆድ ውስጥ እህል አለ?” ብትል፣ ጤፍ “ሁለታችንም ስንፈጭ ዱቄት ነን” አለች አሉ የሚለው ይሄንን ሁሉ ያካትታል፡፡