የቀድሞው የኡጋንዳ መሪ የኢዲ አሚን የልጅ ልጅ የሆነው አዚዝ አብዱል፣ በኮመንዌልዝ ጨዋታዎች የቦክስ ውድድር ካሸነፈ “የስኮትላንድ አዲሱ ንጉሥ” ሊሆን እንደሚችል ተናገረ። እድሜው 25 ዓመት የሆነው አብዱል በሩብ ፍፃሜው ከእንግሊዙ ዳማር ቶማስ ጋር የሚገጥም ሲሆን፣ ካሸነፈ ቢያንስ የነሐስ ሜዳሊያ የሚያገኝ ሲሆን ይህም አገሩ ኡጋንዳ ከብዙ ዓመታት በኋላ በኮመንዌልዝ ቦክስ የመጀመሪያውን ሜዳሊያ እንድታገኝ ያደርጋታል።

አያቱ ኢዲ አሚን ለስኮትላንድ በነበራቸው ፍቅር ራሳቸውን “የስኮትላንድ ንጉሥ” ብለው ይሰየሙ የነበረ ሲሆን፣ አብዱልም ያንን በማስታወስ “የስኮትላንድ አዲሱ ንጉሥ እሆን ይሆናል” ሲል ተናግሯል። አያቱ በ1950ዎቹ የታወቁ ቦክሰኛ የነበሩ ቢሆንም፣ አብዱል ግን ስለ አያቱ የፖለቲካ ታሪክ ብዙ ማውራት እንደማይፈልግና ትኩረቱ ሙሉ በሙሉ በጨዋታው ላይ እንደሆነ ገልጿል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…
https://t.me/AdissAdmas

የቀደሙት ትውልዶች የከፈሉትን መስዋዕትነት እና ያከማቹትን ጥበብ እንደ ዋጋ ቢስ ማየት ታሪክንና ልምድን መናቅ እንደሆነ ታዋቂው የፊልም ባለሙያ ሀይሌ ገሪማ በአንድ ፖድካስት ላይ ባደረጉት ቃለ-መጠይቅ አሳሰቡ።

ከአያቶችና ከአባቶች ስኬትም ሆነ ስህተት ለመማር ፈቃደኛ አለመሆን፣ የነበሩ ጥፋቶችን እንደ አዲስ እንድንደግማቸው የሚያደርግ መሆኑን ገልጸዋል። እንዲሁም ሁሉንም ነገር በራሳችን እውቀት ብቻ ለመለካት መሞከር የትዕቢት እና የትዕግስት ማጣት ማሳያ መሆኑን ተናግረዋል።

"እኛ የታሪክ መጀመሪያም መጨረሻም አይደለንም" የሚሉት ሀይሌ ገሪማ፣ እውነተኛ እድገት ሊመጣ የሚችለው በቀደሙት ትውልዶች ጠንካራ መሰረት ላይ አዲስና የተሻለ ነገር መገንባት ሲቻል ብቻ መሆኑን አስገንዝበዋል። ትውልድ አልፎ ትውልድ እንደሚተካ በማስታወስ፣ ያለፉትን አባቶች ጥበብና ታሪክ ረስቶ መሄድ ለሀገር እድገት ትልቅ እንቅፋት መሆኑን በውይይታቸው ላይ አንስተዋል።

ይህንን የተሳሳተ አስተሳሰብ ለመለወጥ በቤተሰብ፣ በትምህርት ቤት እና በማህበራዊ ሚዲያ የትውልዶችን ውይይት ማጠናከር እንደሚገባ ተመላክቷል። የታሪክ አወንታዊ እሴቶችን ለወጣቱ ትውልድ ማሳየትና ከቀድሞ ልምዶች መማር ለወደፊቱ የተሻለ ሀገር ለመገንባት ቁልፍ መፍትሄ መሆኑን የፊልም ባለሙያው አሳስበዋል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…
https://t.me/AdissAdmas

የኢትዮጵያ አየር መንገድ ከመንገደኞች ትራንስፖርት ባለፈ በቴክኖሎጂ ሽግግር አበረታች ውጤት ማስመዝገቡን የአየር መንገዱ ዋና ሥራ አስፈጻሚ አቶ መስፍን ጣሰው ገለፁ። አየር መንገዱ ለዓለም አቀፉ የቦይንግ አውሮፕላን አምራች ኩባንያ ለ68 አውሮፕላኖች የሚሆኑ አካላትን በጥራት በማምረት ማቅረብ ችሏል። በዚህም ከዘርፉ 6.2 ሚሊዮን ዶላር ገቢ ማግኘት የተቻለ ሲሆን፣ ይህ ስኬት የአገሪቱን የኢንዱስትሪ ልማት ከፍ የሚያደርግ ትልቅ ಹೆማጃ ነው።

ይህን የማምረት አቅም ይበልጥ ለማስፋትና አለም አቀፍ ተወዳዳሪነቱን ለማጠናከር በቂሊንጦ አካባቢ የተገነባው ግዙፍ ፋብሪካ ሙሉ በሙሉ ተጠናቆ በቅርቡ ምርት እንደሚጀምር ተገልጿል። የኢትዮጵያ አየር መንገድ ይህንን የቴክኖሎጂ አቅም በማሳደግ በዓለም አቀፍ ደረጃ አምራችነቱን ለማረጋገጥ የሚያደርገው ጥረት ተጠናክሮ የቀጠለ ሲሆን፣ ማኑፋክቸሪንግ ዘርፉም ለአገሪቱ ኢኮኖሚ ትልቅ አስተዋጽኦ እያበረከተ ይገኛል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…
https://t.me/AdissAdmas

ሂውማን ራይትስ ዎች በሳዑዲ ዓረቢያ በስቅላት የተገደሉ አምስት ኢትዮጵያውያንን ጉዳይ አስመልክቶ፣ የኢትዮጵያ መንግሥት አፋጣኝ ጣልቃ ገብነትና የቆንስላ አገልግሎት እንዲሰጥ ጥሪ አቅርቧል። ድርጅቱ ሳዑዲ ዓረቢያ በአደንዛዥ እጽ ዝውውር ውንጀላ የሞት ቅጣት ከሚጠብቋቸው ሌሎች 79 ኢትዮጵያውያን በተጨማሪ፣ በዜጎች ላይ እየወሰደች ያለውን ከባድ የፍርድ ርምጃ በአስቸኳይ እንዲያቆም አሳስቧል።

በሌላ በኩል ሳዑዲ ዓረቢያ ባካሄደችው የጸጥታ ቁጥጥር ዘመቻ ከተያዙት 1 ሺሕ 626 የውጭ ዜጎች መካከል ሁለት ሦስተኛው ኢትዮጵያውያን መሆናቸው ተሰምቷል። በአጠቃላይ ሕገወጥ የመኖሪያ ፈቃድ እና ድንበር ጥሰትን ጨምሮ ከ15 ሺሕ በላይ ሰዎች የታሰሩ ሲሆን፣ ከድንበር ማቋረጥ ውጭ ባሉ ወንጀሎች የተያዙ ኢትዮጵያውያን ቁጥር ግን እስካሁን በውል እንደማይታወቅ ዋዜማ ዘግባለች።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…
https://t.me/AdissAdmas

የአሜሪካ ውጭ ጉዳይ መሥሪያ ቤት የመካከለኛው ምሥራቅና አፍሪካ ጉዳዮች ከፍተኛ አማካሪ ማሳድ ቡሎስ፣ አሜሪካ በአፍሪካ ቀንድ በምታደርገው እንቅስቃሴ ወደ “ጸረ-ኢትዮጵያ ጥምረት” አጋድላለች የሚሉ ዘገባዎችን “ሐሰተኛ፣ የተሳሳተና አላስፈላጊ ውጥረት የሚፈጥር” ሲሉ አጣጥለውታል።

በቅርቡ በካይሮ ከግብፅ፣ ኤርትራ እና ሶማሊያ ውጭ ጉዳይ ሚኒስትሮች ጋር ባደረጉት ስብሰባ በቀጠናው ትኩረት ቢስቡም፣ አሜሪካ የምትከተለው ዲፕሎማሲ ተቀናቃኝ ጎራ ከመፍጠር ይልቅ ከሁሉም አጋሮች ጋር ግጭትን በመከላከልና ዘላቂ ሰላምን በማረጋገጥ ላይ ያተኮረ መሆኑን ገልጸዋል።

አማካሪው በኤክስ ገጻቸው ባሰፈሩት መልዕክት፣ ዩናይትድ ስቴትስ የጋራ ጥቅሞችን ለማስጠበቅ ከኢትዮጵያም ሆነ በመላው የአፍሪካ ቀንድ እና የቀይ ባሕር አካባቢ ከሚገኙ ሀገራት ጋር አብራ እንደምትሠራ አረጋግጠዋል።

የፕሬዝደንት ዶናልድ ትራምፕ አማች የሆኑት ቡሎስ ከአገራቱ ውጭ ጉዳይ ሚኒስትሮች ጋር ባደረጉት ውይይት የሁለትዮሽ ግንኙነትንና የቀጠናውን ሁኔታ መምከራቸውን የገለጹ ሲሆን፣ የትራምፕ አስተዳደርም ከቅርብ ጊዜ ወዲህ ከኤርትራ ጋር የነበረውን ግንኙነት ለማደስ ከፍተኛ ጥረት እያደረገ እንደሚገኝ ተመላክቷል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…
https://t.me/AdissAdmas

በአዲስ አበባ አራዳ ክፍለ ከተማ ወረዳ 01 አሮጌ ቄራ አካባቢ የሚገኘው TNT Construction የግንባታ ፕሮጀክት ተሽከርካሪዎች መንገድን በጭቃ በማበላሸታቸው 55 ሺህ ብር አስተዳደራዊ ቅጣት ተጣለባቸው።

ድርጅቱ ድርጊቱን ከፈጸመ በኋላ በወቅቱ የነበረውን ዝናብ ተገን በማድረግ ተሽከርካሪዎቹን ለመሰወር ቢሞክርም፣ የአራዳ ክፍለ ከተማ ደንብ ማስከበር ጽሕፈት ቤት ከልደታ ትራፊክ ማኔጅመንት ጋር በመተባበር ባደረገው ክትትል ተሽከርካሪዎቹን በመለየት ቅጣቱን ለመጣል ችሏል።

የአዲስ አበባ ከተማ ደንብ ማስከበር ባለሥልጣን ተቋማት ሥራቸውን ሲያከናውኑ የኮሪደር ልማቶችን፣ የመንገድ መሠረተ ልማቶችንና አረንጓዴ ስፍራዎችን በጥንቃቄ የመጠበቅ ኃላፊነት እንዳለባቸው አሳስቧል። በተጨማሪም ወቅቱ የክረምት በመሆኑ ለማህበረሰቡ አደጋ የሚያስከትሉ እና የመሠረተ ልማት ጥበቃን ችላ የሚሉ አካላት ላይ ሕግ የማስከበር እርምጃው በተጠናከረ ሁኔታ እንደሚቀጥል ገልጿል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…
https://t.me/AdissAdmas