Administrator

Administrator

ከአዘጋጁ፡-
Tripadvisor በተሰኘ ድረገጽ ላይ አንድነት ፓርክን በተለያዩ ጊዜያት የጎበኙ ኢትዮጵያውያንና የውጭ አገር ዜጎች አስተያየታቸውን አስፍረዋል፡፡ ስለ ፓርኩ የተሰማቸውን ያስደነቀቃቸውን፣ ያስደመማቸውን፣ ያበሸቃቸውን -- በዝርዝር የገለጹ በርካቶች ናቸው፡፡ ለማሳያ ያህል አምስቱን ከእንግሊዝኛ ወደ አማርኛ ተርጉመን እንደሚከተለው አቅርበነዋል፡፡


            የኢትዮጵያ ታሪክና ባህል
በቅርቡ የተከፈተው ፓርክ ሙዚየም፣ መናፈሻ፣ የክልል ጐጆዎችና የህፃናት የመጫወቻ ሥፍራን የያዘ ነው፤ የምግብና መገበያያ ሥፍራም አለው፡፡ በቅርቡ አንበሶችና የዱር እንስሳት ፓርክም (zoo) ይኖረዋል፡፡ ፓርኩ በቅጡ ታቅዶ የተሰራ ነው፤ ፍተሻው ግን ጠንካራና ጥብቅ መሆኑን አውቃችሁ ተዘጋጁ፡፡  የመግቢያ ትኬት ከኦንላይን መግዛት ትችላላችሁ፤ቀኑንና ጊዜውን (ጠዋት ወይም ከሰዓት በኋላ) በመወሰን፡፡  
የጉብኝት ጊዜ፡- ኖቬምበር 2019
(ምዙንጉባቤ፤ አዲስ አበባ፤ ኢትዮጵያ)

ዕፁብ ድንቅ
ለአንድ ቀንም እንኳ አዲስ አበባ የመሆን ዕድል ከተገኘ፣ አንድነት ፓርክ ሊጎበኝ የሚገባው ሥፍራ ነው፡፡ ቤተ-መንግስቱን ለመጀመሪያ ጊዜ የጐበኘሁት ከጥቂት ዓመታት በፊት ለለቅሶ ገብቼ ነው፡፡ ያን ጊዜ ከነበረው አሁን እስካለው ድረስ ያለው  ለውጥ በስሜት የሚያጥለቀልቅ ነው፡፡
የ8 እና 9 ዓመት ልጆቼን ይዤ ነበር ወደ ፓርኩ የሄድኩት፡፡ እኔን ያስደሰተኝን ያህል እነሱም አስደስቷቸዋል፡፡ የዕጽዋት ሥፍራው፣ የአፄ ምኒልክ የ“ሰም” ምስል፣ እንዲሁም የኃይለሥላሴ፤ አዳራሾቹ ጭምር … ዕጹብ ድንቅ  ናቸው፡፡
የህንፃዎቹ ኪነ- ህንፃ፣ ላይ ሰዓታትን የማሳለፍ ፍላጐት ያሳድርባችኋል፡፡ ህንፃዎቹን የምትጎበኙ ከሆነ፣ በጋይድ እየታገዛችሁ አድርጉት - ክፍያው ወደድ ቢልም፣ በጥቅሉ እያንዳንዷን ሳንቲም የሚመጥን ነው፡፡
እባካችሁን፤ ይህን ዕፁብ ድንቅ ፓርክ መጐብኘት፣ በወደፊት ዕቅዳችሁ ውስጥ ማካተታችሁን አረጋግጡ፡፡
የጉብኝት ጊዜ፡- ዲሴምበር 2019
(ኒና ኤስ፤ አዲስ አበባ፤ ኢትዮጵያ)
ሊጐበኝ የሚገባው ምርጥ ሥፍራ
መጐብኘት ያለበት ዕፁብ ድንቅ ሥፍራ ነው! የኢትዮጵያ ታሪካዊ ቦታዎች፤ ሁሉም በአንድ ፓርክ የሚገኙበት፡፡ እያንዳንዱን ሥፍራ ወድጄዋለሁ! አዲስ አበባን ለመጐብኘት በእርግጥም በቂ  ምክንያት ነው፡፡ ጠ/ሚኒስትር ዶ/ር ዐቢይ፤ ድንቅ ሥራ ነው፤ አበጁ!!
የጉብኝት ጊዜ፡- ዲሴምበር 2019
(ሰላም ወርቁ)

 ለህፃናትና ቤተሰብ ውድ የሆነ ድንቅ ሥፍራ
ይሄ በእጅጉ ልዩ ሥፍራ ነው፤ በአፍሪካ (ከደቡብ አፍሪካ ውጭ) ከሚገኙ ምርጥ ሙዚየሞች አንዱ ነው ማለት እችላለሁ፡፡ ሁሉም ነገር ግሩም ሆኖ የተሰራ ነው፤ ቀልብ በሚስቡ አያሌ ገጽታዎች የተሞላ፤ ከኢትዮጵያ አስቸጋሪ ያለፈ ጊዜ አንፃር ጥሩ ማካካሻ ነው፡፡ በአዲስ አበባ የግድ መታየት የሚገባው፡፡
እንዳለመታደል ሆኖ፣ አንዳንድ ችግሮች ነበሩ፡-
የዋጋ መረጃ አለመኖር፡፡ ድረገፁ የወረደ ሲሆን በመግቢያው በር ላይ ስለ ዋጋ የሚገልጽ ነገር የለም፡፡ እንደ አዲስ አበባ ከተማ ነዋሪነቴ፣ “ስታንዳርድ ትኬቶችን” ገዝቼ ነበር፡- ለቪአይፒ 1000 ብር እና ለመደበኛ 200 ብር ከፍዬ፡፡ እዚያ ስንደርስ ግን የነዋሪነት መታወቂያዬ ዋጋ እንደሌለው ተነገረኝ፡፡ እናም በውጭ ዜጐች ተመን፣ 50 ዶላር/1500 ብር ለቪአይፒ እና 20 ዶላር/600 ብር ለመደበኛ ከፈልኩ፡፡  
የህፃናት ተመን የለም፡፡ ለ3 ዓመት ህፃን ልጄ፣ በአዋቂ የዋጋ ተመን እንድከፍል ሲነገረኝ ደንግጫለሁ፡፡ ከሁለት ዓመት በላይ ለሆነ ሁሉ በአዋቂ ተመን ነው የሚከፈለው (ግን የትም ቦታ አልተፃፈም) በተዘዋወርኩባቸው አገራት፣ ለሁለት ዓመት ህፃን፣ በአዋቂ ተመን የከፈልኩበትን ቦታ አላስታውስም!
 የደህንነት ፍተሻ፡፡ የፍተሻ ሰራተኞች ወዳጃዊ አቀራረብ የላቸውም፡፡ ወደ ውስጥ ተይዞ የማይገባው ምን እንደሆነ ግልጽ አይደለም፡፡ የልጃችንን የውሃ ጠርሙስ ይዘን እንዳንገባ መከልከላችንን ጨምሮ፣ የኤርፖርት ዓይነት ስታይል ነው፡፡ ውሃ ከውስጥ እንድንገዛ ተመክረናል፡፡ ለብዙ ወጪ የሚዳርግ ሲሆን ቤተሰብ-ተኮር አይደለም (የአንድ ዓመቷ ልጄ ወተቷን ሊወስዱባት ሲሞክሩ አልቅሳለች)፡፡
በአሳዛኝ ሁኔታ፤ ወደ ውስጥ ስንገባ ስለተበሳጨን፣ ጉብኝት ከመጀመራችን በፊት፣ ለመረጋጋት፣ ጥቂት ደቂቃዎች አስፈልጐን ነበር:: ከዚያ በኋላ ሁሉም ነገር ድንቅ ነበር፤ በሳር/ጠጠር ላይ እንዳንራመድ ከተነገረንና ገና ብዙ ሥራ እየተከናወነ ከመሆኑ ውጭ (ይሄም ውዱን ዋጋ ይበልጥ አብሻቂ ያደርገዋል)፡፡
እነዚህ ችግሮች መፍትሔ ይበጅላቸዋል ብዬ ተስፋ አደርጋለሁ፤ የዋጋ ተመኑን በመከለስ ነዋሪዎች ደጋግመው እንዲጎበኙት ያደርጋሉ ብዬ እጠብቃለሁ፡፡ የማያደርጉት ከሆነም፣ በድጋሚ መሄዳችን አይቀርም፤ ነገር ግን ህፃናቶቹን በነፍስ ወከፍ 20 ዶላር ከፍሎ ማስገባት ተገቢ  አይደለም፡፡
የጉብኝት ጊዜ፡- ኖቬምበር 2019
(ጃፔ፤ አዲስ አበባ)

መጎብኘት  የሚገባው!
ውብ ሥፍራ፡፡ ትኬት መግቢያው ላይ ለእያንዳንዳችን በ600 ብር ገዛን (አስጐብኚ አልቀጠርንም፤ በዚህ የተነሳ ወሳኝ ጉዳይ እንዳመለጠንም አልተሰማንም)፡፡ እቦታው የደረሰውን ጠዋት ከ4 ሰዓት በኋላ ሲሆን ምንም ወረፋ አልነበረም (በኋላ ላይ ሰው በዝቶ ነበር):: የታሸገ ውሃና በርቀት የሚያሳይ መነጽር ፍተሻ ላይ ተወስዶብን ነበር (ጨርሳችሁ ስትወጡ መቀበል ትችላላችሁ፤ግን ካስታወሳችሁ ነው… እኔ ትዝ አላለኝም)፡፡ ወደ 3 ሰዓት ገደማ በስፍራው አሳልፈናል፤ጉብኝቱን በሁለት ሰዓት ውስጥም ማጠናቀቅ ይቻላል፤ ከወደዳችሁት ግን አራት ወይም ከዚያ በላይ ሰዓታትን በቀላሉ ልታሳልፉ ትችላላችሁ፡፡
አብዛኛው የፓርኩ ክፍል አሁንም በግንባታ ላይ ነው (ለምሳሌ፡- ዋናው የእንስሳት ፓርክ)፡፡ እንዲያም ሆኖ ግን አያሌ የሚታዩ ነገሮች ነበሩ፤ የደርግ የቀድሞ እስር ቤትን የተመለከተ በቅጡ የተደራጀ ማስረጃ፣ እንዲሁም የሃይማኖትና ፖለቲካ ታሪክ … ማስረጃዎች፣ እንዲሁም የንግስት ሳባን ታሪክ የሚያሳይ  መግለጫን ጨምሮ ማለት ነው፡፡ የተለያዩ ባህላዊ ክልሎችን ለማሳየት የተዘጋጀው ውጭያዊ ኤግዚቢት፣ የጥንቱ ዓለም ከአዲሱ ሲገናኝ የሚታይ ድንቅ ጥምረት ነበር::
የመታጠቢያ ክፍሎቹ ንጹህ ናቸው፤ በቅጡ የተሰናዳ የምግብ/ካፌና የመገበያያ ሥፍራ አለ (ለምሳና ሳንድዊቾች፣ ለባህላዊ ምግብ፣ ፒዛና ኬኮች፣ ግሩም ነው - ፒዛና ሁለት ቡና በ200 ብር ይገኛል)፡፡ ለሕጻናት በጣም አዝናኝ የመጫወቻ ሥፍራም ተዘጋጅቷል፡፡ ይሄን ሥፍራ እንድትጐበኙት አበክሬ እየጠቆምኩ፣ በቅርቡ ለሌላ ጉብኝት ተመልሼ እመጣለሁ ብዬ ተስፋ አደርጋለሁ፡፡   
የጉብኝት ጊዜ፡- ፌቡራሪ 2020
(ጄኒፈር ቢ፤ ሴንት ጆንስ፤ ካናዳ)

Saturday, 15 February 2020 11:33

የብሔር ማንነት ቅዠት

     የከረረ ‹‹ብሔርተኝነት›› የሚያራምዱ በኢኮኖሚ፣ በፖለቲካ፣ በማህበራዊና በሃይማኖታዊ  የበላይነትን ይዘው አገዛዛቸውን ማስቀጠል ተቀዳሚ ተግባራቸው ነው፡፡ ይኸውም በዋናነት ሕዝብን  ከሕዝብ ጋር ‹‹በብሔርና›› በኃይማኖት ማንነትን እንዲሁም የመሬት ወሰንን መሰረት ባደረገ ሕዝብ ከሕዝብ ጋር በማጋጨት፣ ጥላቻ እንዲፈጠርና ደም እንዲፋሰስ በማድረግ በተቻላቸው መጠን የማይታረቅ ቅራኔ መፍጠር፣ ከመሰረታዊ ሴራቸው አንዱ ነው፡፡ የዚህ አይነት ሴራ በአሁኑ አለም በዋናነት በአፍሪካ፣ በኢስያ፣ በላቲን አሜሪካና በሌሎች አገራት ላይ የምእራባውያን ቅኝ ገዥዎች ዋንኛ ስልታቸው እንደነበር የሚታወቅ ሲሆን እስከ አሁንም አሻራቸው አልደረቀም፡፡
ይህም በ‹‹ብሔር›› ማንነት ቅዠት ላይ የታቀኘ የቅኝ ግዛት አሻራ እንደተቀበረ ቦንብ ባልታሰበ ጊዜ እየፈነዳ፣ ሕዝብን በአንጻራዊ በሰላም እንዳይኖርና ስለራሱ ሕይወት እንዳያስብ ሁልጊዜ በነውጥና በስጋት እንዲኖሩ እያደረገ ነው። በመሆኑም ምዕራባውያን በ‹‹ብሔር›› ማንነት ቅዠት የቅኝ አገዛዝ ስልት ይገዟቸው ወደነበሩና ወደ ሞከሩት ሀገራት በመዛመቱ፣ ይህ የ‹‹ብሔርተኝነት›› ቅዠት ጦስ እስካሁን ያለቀቃቸው ኢትዮጵያን ጨምሮ የአፍሪካና የእስያ ሀገራት በርካታ ናቸው። የ‹‹ብሔር›› ማንነት ቅዠት ሲከፋ ነቀርሳ ደረጃ ስለሚደርስ ህሊናንና ሰብአዊነትን ፈጽሞ ያሳጣል፡፡
በ‹‹ብሔር›› ማንነት ቅዠት የተለከፉ አምባገነን ገዥዎችና አራማጆች በሚያራምዶት የ‹‹ብሔር›› ማንነታቸው አገዛዝ መተማመን ስለማይኖራቸው ሴራ ዋና መሳሪያቸው ነው፡፡ ‹‹የብሔረተኛ›› ገዥዎች ሥነ አዕምሯቸው የተቃኘው ለጊዜያዊ ጥቅም ብቻ የተደራጁ በመሆናቸው፣ ሕዝብን ከፋፍሎ መግዛትን መርህ ያደረገ፣ የወሮ በላ ቡድን ናቸው፡፡ በመሆኑም በራሳቸው ‹‹ብሔርተኝነት›› የአዕምሮ ቅዠት ሕመም የተጠናወታቸው በመሆኑ፣ አገዛዛቸውን በማስቀጠል በኢኮኖሚ ተጠቃሚነታቸው የበላይነትን በማረጋገጥ ላይ ብቻ አዕምሯቸው የተቃኘ በመሆኑ ቅንጣት ያህል ሀገራዊ ዜግነትና ሕዝባዊነት የማይሰማቸው ናቸው፡፡ ለአገዛዛቸው ዘለቄታ ሲሉ ሥነ አዕምሯቸው ለጠላት አገራት የእጅ አዙር ቅኝ አገዛዝ የተመቸና ራሳቸውም የእጅ አዙር ቅኝ ገዢዎች ናቸው:: ለአገዛዛቸው ስጋት በሚሆንባቸው ሕዝብ መካከል እነርሱ ባስፈለጋቸው ጊዜ ግጭትና ያለመረጋጋትን ሊፈጥሩ የሚችሉበትን ሴራ ይጠነስሳሉ፡፡
‹‹የብሔረተኛው›› የአገዛዝ ቡድን ሌላውን የሀገሪቱ ሕዝብ ሀብት የማፍራት መጠን በሴራቸው እየገደቡ በሂደት ሙሉ በሙሉ በሚባል ደረጃ፣ የሀገሪቱን ኢኮኖሚ በመቆጣጠር ሌላውን ሕዝብ እንደ ባሪያ በመቁጠር፣ ምግብ እየበላ በዘላቂነት መገዛትን ያለመ ነው፡፡ ይኸውም ሌባ ተደብቆ እንደሚሰርቅ ተደብቀው የሕዝብን ሀብት፣ ነጻነትና ምርጫ መስረቅ ዋና ሴራቸው ነው:: ሕዝብ ወደ ሴራቸው እንዳያተኩር ሁልጊዜ ትኩረትን ማዘበራረቅ የማያቋርጥ ስራቸው ነው፡፡ በ‹‹ብሔር›› ማንነታቸው ቅዠት፣ ሕዝብን በ‹‹ብሔር›› ማንነት በመከፋፈል ግራና ቀኝ ጽንፍ በማስያዝ ወይም ‹‹እሳትና ጭድ›› እንደሚባለው በማድረግ፣ አክራሪ ማድረግም ከዋና ዋና ሴራቸው አንዱ ነው:: በዚህ ምክንያት ሕዝቡን በመከፋፈል የአገዛዙ ምርኮኛ (State Capture) ያደርጉታል:: ሕዝብን ምርኮኛ አድርጎ የሚገዛ አምባገነን አገዛዝ ሁልጊዜ ማንኛውንም ውሳኔዎች የሚያሳልፈው የአገዛዙንና የኢኮኖሚ የበላይነቱን የሚያስጠብቅለትን በመመርመር ብቻ ነው፡፡
‹‹ብሔርተኛ›› ገዢዎች በአንጻራዊ ከራሳቸው ‹‹ብሔር›› ውጪ የሌላውን ‹‹ብሔር›› ስለማያምኑ ከፍተኛ የጦር አመራሮችን ሙሉ በሙሉ በሚባል ደረጃ ከራሱ ‹‹ብሔር›› ይሾማል፡፡ በመሆኑም ከገዥው ‹‹ብሔር›› ውጪ አልፎ አልፎ በከፍተኛ አመራር የሚሾሟቸው ቢኖሩም፣ ለአገዛዙ ምርኮኛ የሆኑትን ብቻ ነው:: በዚህ ምክንያት የሀገሪቱን ሀብት እንደ ግላቸው ንብረት በኪሳቸው ውስጥ ጠቅልሎ በመከተት፣ ለአገዛዛቸው ለሚመቻቸው ሁሉ እንደ ግል ሀብታቸው ከኪሳቸው እያወጡ እንደሚከፍሉ፣ የአገሪቱን ሀብት ለፈለጉት ቆንጥረው ይሰጣሉ፤  ላልፈለጉት ይነፍጋሉ፡፡ ለማይመቿቸው የነበራቸውንም ሀብት እንኳ ሳይቀር በሴራቸው ይነጥቋቸዋል፡፡ ለአገዛዝ የማይመቿቸውን ግለሰቦች በሴራና በሃሰት በተቀነባበረ ምክንያታዊና በሕግ ሽፋን ወንጀል እንደሰራ በማስመሰል፣ በማስፈራራትና በማሰር መበቀል፣ የደህንነቱ ዋና ተግባር ነው፡፡ በአጠቃላይ ‹‹የብሔርተኛው›› ገዢ ቡድን የማይደግፏቸው የሚመስላቸውን ከፍተኛ ባለሀብቶች በሴራቸው ያጠፏቸዋል፡፡     
የ“ብሔር” ማንነት ቅዠት”
መጽሐፍ የተቀነጨበ። 2011 ዓ.ም
(ከሰብስቤ አለምነህ)

    ከጥራት ደረጃ በታች የሆነ 19ሺ 770 ጀሪካን ፓልም የምግብ ዘይት፣ ወደ ሀገር ውስጥ ሊገባ ሲል መታገዱን የንግድና ኢንዱስትሪ ሚኒስቴር ገለጸ፡፡
ሚኒስቴር መስሪያ ቤቱ ባለፉት ስድስት ወራት 875,691.42 ሜትሪክ ቶን የገቢ ምርቶች ላይ የጥራት ቁጥጥር ለማድረግ አቅዶ፣ በ1,465,177.44 ሜትሪክ ቶን ምርቶች ላይ ቁጥጥር አድርጎል፡፡ የቁጥጥር ስራው የተካሄደው አስገዳጅ የኢትዮጵያ የጥራት ደረጃ የወጣላቸው የገቢ ምርቶች ላይ ሲሆን ፓልም የምግብ ዘይት፣ የቤት ክዳን ቆርቆሮ፣ የአርማታ ብረት፣  ሳሙና፣ ሚስማርና የታሸጉ ምግቦች ይገኙበታል፡፡ ቁጥጥር ከተደረገበት የምግብ ዘይት ውስጥ 19ሺ 770 ጀሪካን ፓልም የምግብ ዘይት ከደረጃ በታች ሆኖ በመገኘቱ ወደ ሀገር ውስጥ እንዳይገባ ታግዷል፡፡
በተጨማሪም 700 ካርቶን ሚስማር፣ 28.7 ሜ.ቶ የቤት ክዳን ቆርቆሮ፣ 600 ፍሬና 23 ጥቅል የአርማታ ብረት፣ 180 ካርቶን ሳሙና፣ 37 ካርቶን  የታሸጉ  ምግቦች፣ 2113 ሜ.ቶ  ጋልቫናይዝድ ኮይል እንዲሁም 934 ከረጢት ሩዝ  ወደ ሀገር ውስጥ ሊገቡ ሲሉ ከጥራት ደረጃ በታች ሆነው በመገኘታቸው እንዳይገቡ ታግደዋል፡፡            
የጥራት ቁጥጥር መደረጉ ከደረጃ በታች የሆኑ አስገዳጅ ደረጃ ያላቸው ምርቶች ወደ ሀገር ውስጥ እንዳይገቡና የህብረተሰቡን ጤና፣ ደህንነትና ጥቅም እንዳይጎዱ ያስቻለ መሆኑን የገለጸው የንግድና ኢንዱስትሪ ሚኒስቴር ዳይሮክቶሬት፤ በቀጣይም መ/ቤቱ፣ ይህን ተግባር ከባለድርሻዎች ጋር በመቀናጀት አጠናከሮ እንደሚሰራ አስታውቋል፡፡

  አንድ አፈ - ታሪክ “ከዕለታት አንድ ቀን በሚል የሚከተለውን ያወጋል፡፡
በመጀመሪያ ድቅድቅ ጨለማ ነበረ፡፡ ማንም ምንም ነገር ማየት አይችልም ነበር:: ሰዎችም እርስ በርስ ይጋጩ ነበር፡፡
ስለዚህም “ይህ ዓለም የሚፈልገው ብርሃን ነው” አሉ፡፡
ቀበሮ፤ በዓለም በሌላኛው ወገን የሚኖሩ አያሌ ብርሃን ያላቸው ህዝቦች መኖራቸውን እንደሚያውቅ ተናገረ፡፡ ሆኖም ሰዎቹ እጅግ ስግብግብ ከመሆናቸው የተነሳ ለሌላ ለማጋራት ፈቃደኛ አይደሉም አለ፡፡ ፖሰም የተባለው እንስሳም ከዚህ ብርሃን ጥቂቱን ለመስረቅ ፈቃደኛ መሆኑን ገልጦ ተናገረ፡፡ “እኔ ጭራዬ ቡፍ ያለ ነው” ስለዚህ ያንን ብርሃን በጭራዬ ውስጥ መደበቅ እችላለሁ አለና ወደ ሌላኛው የዓለም ወገን አቀና፡፡
እዚያም ፀሐይን አገኛት፡፡ ፀሐይ ዛፍ ላይ ተንጠልጥላ ለሁሉ ፍጥረት ስታበራ አየ፡፡
ወደ ፀሐይ ሹልክ ብሎ ገብቶ ቅንጣት ብርሃን ወሰደና ጭራው ውስጥ ዶለው፡፡ ሆኖም ብርሃኑ በጣም የጋለ ስለነበረ የጭራውን ፀጉር አነደደው፡፡
ህዝቡ ሌብነቱን አወቀበትና ብርሃኑን መልሶ ወሰደበት፡፡ ከዚያን ጊዜ ጀምሮ የፓሰም ጭራ መላጣ ሆኖ ቀረ፡፡
“ቆይ እኔ ልሞክር” አለ ቡዛርድ፡፡
“የተሰረቀ ብርሃን ጭራ ውስጥ ከመደበቅ የተሻለ መላ አውቃለሁ፡፡ እራሴ ላይ አረገዋለሁ” ብሎ ወደ ሌላኛው ዓለም በረረና ወደ ፀሐይ ሰንጥቆ ገብቶ፣ ብርሃኑን በጥፍሩ ያዘው፡፡ ከዚያ ራሱ ላይ አስቀመጠው፡፡
ሆኖም ብርሃኑ የጭንቅላቱን ላባ አነደደው፡፡ የሰው ልጅ ደግሞ ፀሐይን ከሱ ነጥቆ ወሰደበት፡፡ የቡዛርድ ራስ ከዚያን ጊዜ ጀምሮ መላጣ ሆኖ ቀረ፡፡
ከዚያም ሴት አያት ሸረሪት “እኔ ልሞክር!” አለች፡፡ በመጀመሪያ ከሸክላ በጣም ጥጥር ያለ ግድግዳ ያለው እንሥራ ሠራች፡፡
ቀጥላም ወደ ሌላኛው ዓለም የሚደርስ ድር አደራች፡፡ እጅግ ደቃቃ ከመሆኗ የተነሳ ማንም መምጣቷን አላወቀም፡፡ አያት ሸረሪት በፍጥነት ፀሐይዋን ሰርቃ የሸክላው እንስራ ውስጥ ከታ፣ አንደኛውን የድር መስመር በመጠቀም፣ ወደ ቤቷ ተመለሰች፡፡ አሁን እንግዲህ በሷ በኩል ያለው አለም ብርሃን አገኘ፡፡ ሰው ሁሉ ተደሰተ!
እናት ሸረሪት ወደ ቼሮኪ ህዝቦች ያመጣችው ፀሐይን ብቻ ሳይሆን እሳትም ጭምር ነበር፡፡ ከዚያም በተጨማሪ ለቼሮኪ ህዝብ የእንስራ አሠራር ጥበብን አስተማረች፡፡
***
ከሁሉም ነገር በላይ በዓለም የጨለመ ወገን ብርሃንን ማጋራት ታላቅ ጽድቅ ነው:: ይህንን ደግ ሥነምግባር ይዞ መገኘትም ታላቅ ፀጋ ነው፡፡ የጋን መብራት ላለመሆን መጣር ከጥረቶች ሁሉ የላቀ ነው፡፡ ምነው ቢሉ፤ ያ ብርሃን አንድም ለዓለም ሁለትም ለራስ የሚሆን ነውና ነው፡፡
ሮበርት ብራውኒንግ የተባለው ደራሲ እንዲህ ይለናል፡-
“…ደግሞም ማወቅ ማለት፡-
ከውጪ ያለውን ሄዶ ከመፈለግ
ከውስጥ የበራውን እንዲወጣ ማድረግ!”
ብዙ ከዋክብት ከመካከላችን አሉ፡፡ ብርሃናቸው ለሁላችንም ይዳረስ ዘንድ መንገዱን መጥረግ ይኖርብናል፡፡ እኛ ነፃነትን የምንፈልገውን ያህል፣ ነፃነትን የተራቡ ብዙዎች ናቸው፡፡ እኛ መብታችን ይጠበቅልን ዘንድ ከልባችን የምንፈልገውን ያህል ሌሎችም እንደኛው መብታቸውን እንደ እህል ውሃ ሲናፍቁ ዓመታት አልፈዋል:: እነሱ ስለ መብታቸው መብታቸውን ለማስከበር እንደሚታገሉ እያወቅን እጆቻችንን አጣጥፈን መቀመጥ ፈጽሞ የማይገባ ነገር ነው፡፡ መብታችንን ለማወቅና ለማሳወቅ ሌት ተቀን መድከም፤ ሳያሰልሱም መታገል የዜግነት ግዴታችን፣ የአገርም ኃላፊነታችን ነፀብራቅ ሊሆን ይገባዋል፡፡ ምኞታችን ዛሬ ባይሳካ ነገ በእርግጠኝነት ለፍሬ መብቃቱ አይቀሬና አሌ የማንለው ሃቅ ነው! ዱሮ ስናሰግረው የነበርነው መፈክር ዛሬ ከመቼውም ጊዜ በላቀ ደረጃ ፈጦ እየታየ ነው “ጉዟችን ረጅም ትግላችን ረጅም ነው” ብለናል፡፡ የምንለኩሰው እሳት አንድም ከድቅድቁ ጨለማ የምንወጣበት፣ አንድም የያዘን ቆፈን እንዲለቅቀን የምንገለገልበት ነው! ዛሬም፤
“ሁሉንም ሞክሩ
የተሻለውን አፅኑ! (“ኩሉ አመክሩ፤ ወዘሰናየ አፅንዑ” ማለት ያባት ነው እንላለን:: በዚህም ትውልድ እናድንበታለን ብለን እናምናለን፡፡
ህዝባችን የኖረውን ያህል ደስታን እንዲጐናፀፍ እየተመኘን፣ አሁንም የተስፋችንን ብርሃን ቀንዲሉን መለኮሳችን ዕውነት ነው፡፡ “ሀ” ብለን የጀመርነውን የዲሞክራሲ እንቅስቃሴ ዳር ለማድረስ፣ ጉዟችንን ከነድክመታችን ተሸክመን፤ የድል ጐዳናችንን እየናፈቅን ዘንድሮም እንደ አምና ካቻምና ውጣ ውረዱን እንያያዘዋለን! ያለጥርጥር “በወርቅ አልጋ፣ በእርግብ ላባ” ላይ እንተኛለን የሚል ቅዠት የለብንም፡፡ ሁሉንም እንደየአመጣጡ መክተን፣
“በፊደል ነው የተለከፍኩት
በትግል ነው ራሴን ያወኩት
ሌላ ባላውቅም እንኳ የራሴን ዋጋ አውቃለሁ ነው ያልኩት!”
…እያልን ወደ ግባችን እናመራለን፡፡
ትግላችን መራራ ነውና፤
“ኧረ ምረር ምረር
ምረር እንደቅል፤
አልመርም ብሎ ነው ዱባ እሚቀቀል” እንላለን፡፡
ከዕለታት አንድ ቀን “ቅድመ - አያት ሸረሪት ፀሐይን ሰረቀች” የምንለውም አምርረንና ጠንቅቀን ነው!

     አሜሪካ፣ አለምባንክ፣ ሱዳን እና ግብጽ ጫና እያሳደሩ ነው
                    በህዳሴው ግድብ ጉዳይ እየተደረገ ባለው ድርድር አሜሪካ፣ አለም ባንክ፣ ግብጽ እና ሱዳን በጋራ ተሰልፈው በኢትዮጵያ ላይ ጫና እየሳረፉ ነው፤ የድርድሩ አቅጣጫም ወደ ውሃ ድርሻ ክፍፍል እንዲዞር ተደርጓል ተብሏል፡፡
ስማቸው እንዳይጠቀስ የፈለጉና በድርድር ሂደቱ ኢትዮጵያን ከወከሉ ኃላፊዎች አንዱ የሆኑ ባለስልጣን ለውጭ መገናኛ ብዙሃን በሰጡት መረጃ ድርድሩ ፈሩን ለቆ ወደ የውሃ ድርሻ ድርድር ዞሯል ብለዋል፡፡
“ቀደም ሲል በግድቡ የውሃ አሞላል ጉዳይ የነበረው ድርድር ወደ ውሃ ድርሻ ድርድር ዞሯል” ያሉት ኃላፊው በግድቡ ጉዳይ ብዙውን ጊዜ ከኢትዮጵያ ጐን ትሠለፍ የነበረችው ሱዳንም ከግብጽ ጋር ወግናለች ብለዋል፡፡
ድርድሩ እየተካሄድ ያለው ኢትዮጵያ በአሜሪካ፣ አለም ባንክ፣ ሱዳን እና ግብጽ ጫና ስር ወድቃ 4 ለ1 በሆነ ሁኔታ ነው ሲሉ ኃላፊው አስታውቀዋል፡፡
በአሜሪካ ሲካሄድ በቆየው ድርድር ጉዳዩ ለመገናኛ ብዙሃን ቀደም ባለው ሣምንት ማብራሪያ የሰጡት የውሃ መስኖና ኢነርጂ ሚኒስትር ዶ/ር ስለሺ በቀለ በበኩላቸው ድርድሩ ከተቋጨ በኋላ ለፊርማ የተዘጋጀው ሰነድ የተሟላ ሆኖ ባለመገኘቱ በኢትዮጵያ በኩል ውድቅ መደረጉን አስታውቀዋል፡፡
ድርድሩ የውሃ ድርሻ ክፍፍል መልክ እንደነበረው ያረጋገጡት ሚኒስትሩ በኢትዮጵያ በኩል ተገቢ ያልሆነ ስምምነት እንዳይፈርም ጥንቃቄ ተደርጓል ብለዋል፡፡
ጠ/ሚኒስትር ዶ/ር ዐቢይ አህመድ በበኩላቸው ቀደም ባለው ሣምንት ፓርላማው ባቀረቡት ማብራሪያ ስምምነቱ እንዲዘገይ ማድረጋቸውን አስገንዝበዋል፡፡  


 ዱባይ አውሮፕላን ማረፊያ በርካታ መንገደኞችን በማስተናገድ ቀዳሚ ሆኗል

             ባለፈው የፈረንጆች አመት 2019 የተለያዩ የአለማችን አገራትን የጎበኙ አለማቀፍ ቱሪስቶች ቁጥር በ4 በመቶ በማደግ፣ 1.5 ቢሊዮን መድረሱንና በአመቱ ከ90 ሚሊዮን በላይ ቱሪስቶች የጎበኙዋት ፈረንሳይ፤ በበርካታ ቱሪስቶች የተጎበኘች ቀዳሚዋ የአለማችን አገር መሆኗ ተነገረ፡፡
የተባበሩት መንግስታት የቱሪዝም ድርጅት ያወጣውን አመታዊ ሪፖርት ጠቅሶ ፎርብስ መጽሄት እንደዘገበው፤ በአመቱ በ83.8 ሚሊዮን ቱሪስቶች የተጎበኘችው ስፔን የሁለተኛነት ደረጃን ይዛለች፡፡ በቱሪስቶች እድገት ከአለማችን አገራት ቀዳሚነቱን የያዘችው ማይንማር ስትሆን አገሪቱን የጎበኙ የቱሪስቶች ቁጥር በአመቱ የ40.2 በመቶ እድገት ማሳየቱን የጠቆመው ዘገባው፣ የ31.2 በመቶ ዕድገት ያስመዘገበችዋ ፖርቶ ሪኮ በሁለተኛ ደረጃ ላይ መቀመጧንም አመልክቷል፡፡
በተያያዘ ዜና ደግሞ፣ ላለፉት አምስት ተከታታይ አመታት እጅግ በርካታ ቁጥር ያላቸው አለማቀፍ መንገደኞችን በማስተናገድ በአለማችን ቀዳሚው አውሮፕላን ማረፊያ ጣቢያ ሆኖ የዘለቀው የዱባይ አውሮፕላን ማረፊያ ጣቢያ ዘንድሮም ክብሩን አስጠብቆ መዝለቁን የዘገበው ገልፍ ኒውስ፤ አውሮፕላን ማረፊያ ጣቢያው ባለፈው የፈረንጆች አመት 2019 ብቻ 86.4 ሚሊዮን መንገደኞችን ማስተናገዱን አመልክቷል፡፡ የእንግሊዙ ሄትሮው አለማቀፍ አውሮፕላን ማረፊያ ጣቢያ 80.4 ሚሊዮን መንገደኞችን በማስተናገድ፣ የአለማችን ሁለተኛው አውሮፕላን ማረፊያ ጣቢያ መሆኑንም ዘገባው አክሎ ገልጧል፡፡


የሌሴቶ ቀዳማዊት እመቤት ጣውንታቸውን ገድለዋል በሚል በነፍስ ማጥፋት ወንጀል ክስ እንደተመሰረተባቸው ዘ ጋርዲያን ባለፈው ረቡዕ ባወጣው ዘገባ አስነብቧል፡፡
የአገሪቱ ጠቅላይ ሚኒስትር ቶማስ ታባኔ የቀድሞ የትዳር አጋር የነበሩት ሊፖሊዮ ታባኔ በ2017 መገደላቸውን ያስታወሰው ዘገባው፣ በግድያው ውስጥ እጃቸው አለበት የተባሉት የወቅቱ የአገሪቱ ቀዳማዊት እመቤት ሜሳህ ታባኔ ባለፈው ማክሰኞ በፖሊስ ቁጥጥር ስር መዋላቸውንና በነፍስ ማጥፋት ሊከሰሱ መሆኑን አመልክቷል፡፡
ፖሊስ ከግድያው ጋር በተያያዘ ምርመራ መጀመሩን ተከትሎ ከእስር ለማምለጥ አገር ጥለው ወደ ደቡብ አፍሪካ ጠፍተው የነበሩት ቀዳማዊት እመቤት ሜሳህ ታባኔ፣ ባለፈው ማክሰኞ ወደ አገራቸው እንደተመለሱ በፖሊስ ቁጥጥር ስር መዋላቸውንም ዘገባው ገልጧል፡፡
ጠቅላይ ሚኒስትር ቶማስ ታባኔ የቀድሞ የትዳር አጋራቸው ሊፖሊዮ ታባኔ ከመኖሪያ ቤታቸው አቅራቢያ ተገድለው ከተገኙ ከሁለት ወራት በኋላ ከአሁኗ ቀዳማዊት እመቤት ሜሳህ ታባኔ ጋር ትዳር መመስረታቸውን ያስታወሰው ዘገባው፣ በግድያው የተጠረጠሩት ቀዳማዊ እመቤቷ በቅርቡ ፍርድ ቤት ይቀርባሉ ተብሎ እንደሚጠበቅም አመልክቷል፡፡

Saturday, 08 February 2020 16:21

የልጆች ጥግ

 
           ውድ ልጆች፡- መኝታ ክፍል የግል ሥፍራ መሆኑን ታውቃላችሁ አይደል!? ሰው መኝታ ክፍል ውስጥ ዘው ብሎ አይገባም፡፡ በመኝታ ክፍላችሁ ውስጥ የራሳችሁን ነገሮች ታስቀምጣላችሁ፡፡ አንዳንድ ነገሮቻችሁን ሰዎች እንዲያዩባችሁ አትፈልጉ ይሆናል፡፡ ለምሳሌ የዕለት ማስታወሻ ማስፈሪያችሁን (ዲያሪያችሁን) ማንም እንዲነካባችሁ ላትፈልጉ ትችላላችሁ:: ትክክል ናችሁ፡፡ እናንተም የሌሎችን የግል ንብረት ያለ ፈቃድ መንካት የለባችሁም፡፡
የቤተሰብ አባላትን የመኝታ ክፍሎች አክብሩ፡፡ በሌሉበት መሳቢያቸውን ወይም ኮመዲናቸውን ከፍታችሁ መመልከት ወይም መበርበር የለባችሁም፡፡ ቦርሳቸውን ወይም ሞባይላቸውን መክፈት ወይም መውሰድ ትክክል አይደለም፡፡ የሰው ዕቃ የወንድም ይሁን የአባት ወይም የእናት ሳታስፈቅዱ መውሰድ የለባችሁም፡፡
የመኝታ ክፍሉ በሩ ዝግ ከሆነ፣ ከመግባታችሁ በፊት ማንኳኳት አለባችሁ፡፡ ከዚያም ‹‹እገሌ ነኝ፤ መግባት እችላለሁ?›› ብላችሁ ጠይቁ፡፡ “መግባት ትችላለህ” ወይም “ትችያለሽ” እስክትባሉ ድረስ በትዕግስት ጠብቁ፡፡ መታጠቢያ ክፍል ከሆነ ደግሞ በሩን ከመክፈታችሁ በፊት ባዶ መሆኑን ወይም ሰው አለመኖሩን አረጋግጡ፡፡
ውድ ልጆች፡- ሁሌም አባትና እናታችሁን፣ ታላላቅ ወንድምና እህቶቻችሁን ማክበርና የሚነግሯችሁን መስማት አለባችሁ፡፡ መምህራኖቻችሁንም አክብሩ፡፡ በመምህራን መሳቅና ማሾፍ ተገቢ አይደለም፡፡ ታናናሾቻችሁን ደግሞ በምትችሉት ሁሉ እርዷቸው፡፡  
እደጉ! እደጉ! እደጉ!

      የአሜሪካው ፕሬዚዳንት ዶናልድ ትራምፕ ስልጣናቸውን ያለአግባብ በመጠቀምና የምክር ቤቱን ስራ በማደናቀፍ ከስልጣን እንዲነሱ ከቀረቡባቸው ሁለት ክሶች በሴኔቱ ውሳኔ ነጻ መሆናቸው ተዘግቧል፡፡
ሪፐብሊካኑ አብላጫ ወንበር የያዙበት ሴኔት ባለፈው ረቡዕ በትራምፕ ላይ በተመሰረቱት ሁለት ክሶች ላይ ድምጽ የሰጠ ሲሆን፣ ስልጣናቸውን ያለአግባብ በመጠቀም የቀረበባቸውን ክስ 52 ለ48፤  የአገሪቱን የምክር ቤት ስራ አደናቅፈዋል በሚል የቀረበባቸውን ክስ ደግሞ 53 ለ47 - ሁለቱንም ክሶች በአብላጫ ድምጽ ውድቅ አድርጓቸዋል፡፡
ምንም አይነት ጥፋት አልፈጸምኩም በማለት ሲከራከሩ የቆዩት ዶናልድ ትራምፕ፤ በአገሪቱ ታሪክ ሴኔት ፊት ቀርበው ክሳቸውን እንዲከላከሉ የተወሰነባቸው ሶስተኛው ፕሬዚዳንት ቢሆኑም፣ ሴኔቱ በሰጠው ድምጽ ስልጣናቸውን ከመልቀቅ እንደታደጋቸው ቢቢሲ ዘግቧል፡፡ ትራምፕ የዩክሬን አቻቸው ቭላድሚር ዘለንስኪን በቀድሞው የአሜሪካ ምክትል ፕሬዚዳንትና በምርጫ ተቀናቃኛቸው ጆ ባይደን እና በልጃቸው ላይ የሙስና ምርመራ እንዲያደርጉ በመደለልና ጫና በማድረግ ስልጣንን ያለአግባብ በመጠቀም፤ እንዲሁም ከዚህ ጋር በተያያዘ ለሚደረግባቸው ምርመራ መረጃዎችን ባለመስጠትና የምክር ቤቱን ስራ በማደናቀፍ እንዲከሰሱ በቀረበባቸው የውሳኔ ሃሳብ ዙሪያ የአሜሪካ የህዝብ ተወካዮች ምክር ቤት ከአንድ ወር በፊት ለአስር ሰዓታት ያህል ክርክር ካደረገ በኋላ እንዲከሰሱና ሴኔት ፊት ቀርበው የቀረቡባቸውን ክሶች እንዲከላከሉ በአብላጫ ድምጽ መወሰኑን ያስታወሰው ዘገባው፣ ባለፈው ረቡዕ ሴኔቱ በሰጠው ድምጽ ከሁለቱም ክሶች ነጻ ሊወጡ መቻላቸውንም አመልክቷል፡፡
የቀረበባቸውን ክስ የአክራሪ ግራ ዘመሞች ነጭ ቅጥፈትና በሪፐብሊካን ላይ የተሰነዘረ ጥቃት ሲሉ በአደባባይ ያጣጣሉት ዶናልድ ትራምፕ፤ ከስልጣን እንዲለቁ በዲሞክራቶች የተጎነጎነባቸውን ሴራ በመበጣጠስና ራሳቸውን ነጻ በማውጣት ያስመዘገቡትን ድል ለሁለተኛ ዙር የስልጣን ዘመን በሚወዳደሩበት ቀጣዩ የአገሪቱ ፕሬዚዳንታዊ ምርጫ ለመድገም መዘጋጀታቸውንም ዘገባው አመልክቷል፡፡
በአሜሪካ ፕሬዚዳንቶች ታሪክ በኮንግረስ ውሳኔ ሴኔት ፊት ቀርበው ክስ እንዲመሰረትባቸው የተወሰነባቸው ሁለት የአገሪቱ መሪዎች አንድሪው ጆንሰንና ቢል ክሊንተን እንደነበሩ ያስታወሰው ዘገባው፣ ያም ሆኖ ግን ሁለቱም ከስልጣን እንዲለቅቁ እንዳልተወሰነባቸውም አክሎ ገልጧል፡፡


Saturday, 08 February 2020 16:03

የግጥም ጥግ

  ሞልትዋል ብላቴና

ደመረ ብርሃኑ
(በአዲስ አድማስ 15ኛ ዓመት የግጥም
ውድድር 2ኛ የወጣው ግጥም)
ነበር ፍጹም ጨቅላ በጥቁር አፈር ላይ በጥቁር
ተፀንሶ
ጥቁር የወለደው ጥቁር ስጋ አልብሶ፣
ነበር ብላቴና
ከጥቁር ገላ ውስጥ ነጭ ወተት ግቶ
አጥንቱ የጸና የቆመ በርትቶ፣ ነበር ደቀ መዝሙር
ጥቁር ብላቴና
በነጭ ጠመኔ በጥቁር ሰሌዳ
ሀ ሲሉት ሃ ብሎ A ሲሉት A ብሎ
ጥቁሩን ከነጩ ጋር አዋዶ ያጠና፡፡
ታሪክ የጻፈውን ሳይንስ እያጠፋ
ሳይንስ የፃፈውን ሂሳብ እያጠፋ
ሂሳብ የፃፈውን ሲቪኩ እያጠፋ፤
በተዥጎረጎረች ባንዲት ሰሌዳ ላይ
ሁሉም የእየራሱን ሲያስተምር ሲለፋ
አንዲትዋ ሰሌዳ ጥቁር ወዝዋ ወድሞ
ወጭው የጫረውን ገቢው እያጠፋ
ነበር ብላቴና
ካንድ ወንበር ተቀምጦ ትዝብቱ ያልሰፋ
በሰሌዳው ማድያት በስሎ ያልተከፋ፡፡
***

Page 7 of 469