ኢትዮጵያን በዓለም አቀፍ ደረጃ በማስተዋወቅ የምትታወቀው ድምፃዊት ፀደንያ ገብረማርቆስ፣ አራተኛውን አዲስ አልበም ልታወጣ መሆኑ ተነገረ። ቀደም ሲል "እወደሀለሁ"፣ "አታላይ" እና "ብር ብር" የመሳሰሉ ተወዳጅ ዘፈኖችን ለአድናቂዎቿ ያደረሰችው አርቲስቷ፣ በአፍሪካ እና በዓለም ደረጃ ታላላቅ ሽልማቶችን በማግኘት ቀዳሚ መሆኗ ይታወሳል።

መስከረም 16 ቀን 2019 የሚወጣው አዲሱ አልበም 10 ውብ ሙዚቃዎችን የያዘ ሲሆን፣ ከአልበሙ ውስጥ አንድ አዲስ የሙዚቃ ቪዲዮም እንደሚለቀቅ ተገልጿል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…
https://t.me/AdissAdmas

300 የህወሓት ታጣቂዎች ህወሓት ከኤርትራ ጋር የፈጠረው ጥምረት ለትግራይ ሕዝብ የሚጎዳ መሆኑን በመገንዘብ እጃቸውን ለኢትዮጵያ መከላከያ ሠራዊት ሰሜን ምዕራብ ዕዝ መስጠታቸው ታውቋል፡፡

ተዋጊዎቹ ከገቡበት ዕዝ ጋር ባደረጉት ውይይት፣ የህወሓት አገዛዝን በመጥላት ሠላምን በመምረጥ እጅ ለመስጠት የሚጠባበቁ በርካታ ሌሎች የትግራይ ወጣቶችም እንዳሉ አረጋግጠዋል።

የትግራይ ህዝብ ጥያቄ የሚፈታው በጠብመንጃ ሳይሆን በመነጋገርና በመግባባት ነው የሚል እምነት ይዘው ለሰሜን ምዕራብ ዕዝ ሠራዊት እጅ የሠጡት የህወሃት ታጣቂዎች፣ ከሁለት መቶ ሰማንያ በላይ የነፍሰ ወከፍና የቡድን መሣሪያዎች፣ በርካታ የተለያዩ ዓይነት ተተኳሾች፣ የጦር ሜዳ መነፅርና ልዩ ልዩ ዶክመንቶች ይዘው መግባታቸውም ከመከላከያ ሠራዊት ማኅበራዊ ገጽ የተገኘው መረጃ ያመለክታል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…
https://t.me/AdissAdmas

በጀርመኗ ላይፕዚግ ከተማ ለ37 ዓመታት የኖሩት ትውልደ ኢትዮጵያዊው ፕሮፌሰር ጌቱ አብርሃም፣ ለከተማዋ ከንቲባነት በምርጫ ለመወዳደር መዘጋጀታቸውን ዶቼቬለ ዘግቧል። ፕሮፌሰሩ በላይፕዚግ ዩኒቨርሲቲ የእንስሳት ሕክምና መምህርና ተመራማሪ እንዲሁም የከተማዋ የምክር ቤት አባል ሲሆኑ፣ በምርጫው ለመወዳደር የተነሳሱት ከከተማው ነዋሪዎች፣ ከማህበራትና ከንግዱ ማህበረሰብ በመጣላቸው ከፍተኛ ግፊት እንደሆነ ገልጸዋል።

ምርጫው በፈረንጆች የካቲት 2027 ዓ.ም የሚካሄድ ሲሆን፣ ፕሮፌሰሩ የየትኛውም ፓርቲ አባል ባለመሆናቸው ህዝቡን በነጻነትና በእኩልነት ለማገልገል እንደሚረዳቸው ተናግረዋል። በአሁኑ ወቅትም ለምርጫው የሚያስፈልጉ ዝግጅቶችን እያጠናቀቁ ይገኛሉ።

ከፖለቲካው በተጨማሪ ፕሮፌሰር ጌቱ በላይፕዚግ የሚኖሩ ኢትዮጵያውያንን በማቀራረብና ማህበር በማቋቋም ይታወቃሉ። እንዲሁም «የላይፕሲሽ ኢትዮጵያ ወዳጆች ማህበር» በተሰኘው ድርጅታቸው አማካኝነት በትውልድ ቦታቸው በጎጃም የትመን አካባቢ የሚገኘውን የመጀመሪያ ደረጃ ትምህርት ቤት በማደስና የጉድጓድ ውሃ በማውጣት ትልቅ ድጋፍ እያደረጉ ይገኛሉ።

ፕሮፌሰር ጌቱ ለከንቲባነት የሚወዳደሩት ገንዘብ ወይም ስልጣን ፈልገው ሳይሆን ለኖሩበት ህብረተሰብ ምስጋናቸውን ለማቅረብ እንደሆነ ገልጸዋል። አሸንፈው የመጀመሪያው ጥቁር የላይፕዚግ ከንቲባ ለመሆን በሚያደርጉት ጥረትም ከጀርመናውያን ጎን ለጎን ኢትዮጵያውያንም በሃሳብና በገንዘብ እንዲደግፏቸው ጥሪ አቅርበዋል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…
https://t.me/AdissAdmas

ዓለም አቀፍ የሞባይል ግንኙነት ሥርዓቶች ማኅበር (GSMA) ባወጣው የ2025 ዘገባ መሠረት፤ በኢትዮጵያ በርካታ ሕዝብ ኢንተርኔት የማያገኘው የኔትወርክ ሽፋን ባለመኖሩ ሳይሆን፣ በዘመናዊ ስልኮችና የዳታ ዋጋ ውድነት እንዲሁም በዲጂታል እውቀት ማነስ ነው ተብሏል።

በአገሪቱ የኢንተርኔት ኔትወርክ ባለበት አካባቢ የሚኖሩ ነገር ግን በነዚህ ምክንያቶች አገልግሎቱን የማይጠቀሙ ወደ 100 ሚሊዮን የሚጠጉ ሰዎች አሉ። ይህም ኢትዮጵያን በዓለም አቀፍ ደረጃ ከፍተኛ የኢንተርኔት አጠቃቀም ክፍተት ካለባቸው 20 አገራት አንዷ እንዳደረጋት የማህበሩ ሪፖርት ያመለክታል፡፡

በሌላ በኩል ኢትዮ ቴሌኮም በ2019 ዓ.ም የኢንተርኔት ተጠቃሚዎችን ቁጥር ወደ 60 ሚሊዮን ለማድረስና የዲጂታል አገልግሎትን ለማስፋት በርካታ ቁሳቁሶችን ለማቅረብ ማቀዱን አስታውቋል። ሆኖም ደንበኞች አሁንም የአገልግሎት ጥራትና የኔትወርክ ፍጥነት ችግር እንዳለባቸው ይናገራሉ።

በተለይም ደንበኞች የ3G፣ 4G ወይም 5G አገልግሎት ቢኖርም ኢንተርኔቱ ቀርፋፋ እንደሆነና የተገዛው ዳታም በፍጥነት ሳያውቁት እንደሚያልቅ ይገልጻሉ። የስልኮች ዋጋ ውድነትና የኔትወርክ ጥራት ማነስ ደግሞ የዲጂታል ክፍተቱ እንዳይጠብ ትልቅ እንቅፋት ሆኗል።

በኒው ዴልሂ በተካሄደው የብሪክስ ስብሰባ ወቅት የቻይናው ፕሬዚዳንት ሺ ጂንፒንግ በጽኑ ታመዋል የሚል ወሬ በማህበራዊ ሚዲያ ላይ ተሰራጭቶ ነበር። የቻይና መንግስት ተቃዋሚ የሆኑት ዋንጁን ሼ፣ ፕሬዚዳንቱ በስብሰባው ላይ ድንገት ተዝለፍልፈው መውደቃቸውን እና ወደ ቤጂንግ ተመልሰው በወታደራዊ ሆስፒታል ህክምና እንደተደረገላቸው የሚናገር መረጃ አሰራጭተው ነበር።

ነገር ግን የህንድ የውጭ ጉዳይ ሚኒስቴር መረጃውን አስተባብሏል። ሚኒስቴሩ መረጃው በፍጹም ሀሰተኛ መሆኑንና በማህበራዊ ሚዲያ የሚሰራጩት አሉባልታዎች የሀሰት መረጃ ዘመቻ አካል እንደሆኑ አስታውቋል።


በተጨማሪም የኢኮኖሚክ ታይምስ እና የሮይተርስ ዘገባዎች እንደሚያሳዩት፣ ፕሬዚዳንት ሺ ጂንፒንግ ከህንድ ጠቅላይ ሚኒስትር ናሬንድራ ሞዲ ጋር የተሳካ ውይይት አድርገዋል። የተያያዙ የጉባኤ መርሃ ግብሮችንም አጠናቀው በታቀደላቸው ሰአት ወደ ሀገራቸው ተመልሰዋል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…
https://t.me/AdissAdmas

*ዓምና 1. 2 ቢ ብር ቦነስ ለሠራተኞቹ ሰጥቷል

ሚድሮክ ኢንቨስትመንት ግሩፕ በሥራቸው የላቀ ውጤት ላስመዘገቡ 700 አመራሮችና ሠራተኞች ከ100 ሺህ እስከ 500 ሺህ ብር የሚደርስ የገንዘብ ሽልማትና የዕውቅና ሰርተፊኬት አበረከተ። የግሩፑ ዋና ሥራ አስፈጻሚ አቶ ጀማል አሕመድ በወቅቱ እንደገለጹት፣ በተያዘው በጀት ዓመት በርካታ ግዙፍ ፕሮጀክቶች ተጠናቀው ወደ ሥራ የሚገቡ ሲሆን፣ ሀገሪቱ በፍጥነት እያደገ የሚገኝ ኢኮኖሚ ያላት መሆኑን ጠቅሰርው የተሠራውን ማወደስ ብቻ ሳይሆን ይበልጥ የተሻለ ውጤት ለማስመዝገብ በትጋት መሥራት እንደሚገባ አሳስበዋል።

ሚድሮክ በሀገሪቱ ያለውን ወቅታዊ የኢኮኖሚ ሁኔታ ያገናዘበ ውሳኔ ማሳለፉን የገለጹት ዋና ሥራ አስፈጻሚው፣ የሠራተኞችን አነስተኛ የመነሻ ደመወዝ ወደ 10 ሺህ ብር ከፍ ማድረጉንና ባለፈው በጀት ዓመት ብቻ 1 ነጥብ 2 ቢሊዮን ብር የቦነስ ክፍያ ለሠራተኞቹ መስጠቱን አስታውሰዋል። ተቋሙ የተሻለ የሥራ አፈጻጸም ላስመዘገቡ አካላት ያደረገው ይህ የዕውቅና እና የማበረታቻ መርሐግብር የሠራተኞችን ተነሳሽነት ይበልጥ እንደሚያሳድገው ተገልጿል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…
https://t.me/AdissAdmas

አዲስ ዓመት አዲስ ተስፋ ይዞ ይመጣል ብንልም፣ ሳምንታት ሳይቆጠሩ የተስፋ መቁረጥ መርዶዎችን እየሰማን ነው። አንድ ሕዝብ በገዛ ሀገሩ፣ በቤቱ አቅራቢያ እና በመንገዱ ላይ በታጣቂዎች ሲገደል፣ ሲታገት እና ሲፈናቀል ከመመልከት በላይ የጸጥታ ቀውስ ከየት ይመጣል?

ይህ መንግሥትን መክሰስ አይደለም፤ ተቋማዊ ኃላፊነቱን እንዲወጣ መልስ የመጠየቅ ሂደት ነው። የሚቀጠፈው የዜጎች ሕይወት የፖለቲካ መለያ የለውም፤ እነርሱ ወላጆች፣ ልጆች፣ ባሎች እና ሚስቶች ናቸው።

በጉራጌና ምስራቅ ጉራጌ ዞኖች በተለይም በአበሽጌ እና ሶዶ ወረዳዎች ያለፉት አመታትን ክስተቶች ትተን እንኳን ለመጨረሻ ጊዜ ዘግናኝ የጥቃት መርዶዎችን ከሰማን አንድ ወር እንኳን አልሆነም፡፡ የዛኔውም የአሁኑ ከ13 በላይ ሰዎች የሞቱበት የከፋ ጥቃትም ከዲጂታል ሚዲያ ዜና ማዕበል ያለፈ ትኩረት አላገኘም፡፡

ስለዚህ ሕዝቡ የመጠየቅ መብት አለው።

መሰል ጥቃቶች ለምን በተደጋጋሚ በአንድ አካባቢ ይከሰታሉ?

መንግሥት ወቅታዊ የሀገር ውስጥ የጸጥታ ስትራቴጂው ምንድነው?

ጥቃቶችን ከመከላከል ይልቅ፣ ከክስተቶች በኋላ ለምን በቂ ትኩረትና እርምጃ አይወስድም?

እነዚህ የጋዜጠኛ ብቻ ሳይሆኑ የሕዝብ ጥያቄዎች ናቸው። በአዲስ ዓመት የምንመኘው አዲስ ሕይወት እንጂ አዲስ የሞት ዜና አይደለም። እነዚህ ጥያቄዎች አስቸኳይ መልስ ያስፈልጋቸዋል።

ሰላም የሚጀምረው የጥይት ድምጽ ሲቆም ብቻ ሳይሆን፣ ሕዝብ መልስ ማግኘት ሲጀምርም ነው!

Sodo Lema-

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…
https://t.me/AdissAdmas

* ሃብቷ ከብዙ አገራት ዓመታዊ ገቢ ይልቃል !

አሊስ ዋልተን የተባለችው የዎልማርት መስራች ብቸኛ ሴት ልጅ፣ በ2026 ዓ.ም የሀብት መጠንዋ ወደ 118 ቢሊዮን ዶላር በመድረስ ከብዙ አገራት ዓመታዊ ገቢ በላይ መሆኑ ተዘግቧል፡፡ ፎርብስ እንዳረጋገጠው፣ አሊስ በአሜሪካና በዓለም አቀፍ ደረጃ ቀዳሚዋ የምድራችን ሀብታም ሴት ናት።

ሀብቷ ከ100 ቢሊዮን ዶላር በላይ በመሻገርም ብቸኛዋ የአሜሪካ ሴት ሴንቲቢሊየነር ሆናለች። የዎልማርት አክሲዮኖች ከ10 በመቶ በላይ በማደጉ የሷም ሀብት በዚሁ ዓመት በፍጥነት
አሻቅቧል።

ዋልተን ከወንድሞቿ በተለየ መልኩ የጥበብ ሙዚየም የገነባች ሲሆን በአርካንሳስም የሕክምና ትምህርት ቤት መገንባት ጀምራለች። ይህም ግዙፍ ሀብት ባህልንና ትምህርትን እንዴት መለወጥ እንደሚችል ያሳያል ተብሏል።

የአፍሪካ አየር መንገዶች ማኅበር ባወጣው አዲስ ሪፖርት መሠረት፤ የኢትዮጵያ አየር መንገድ ዋና መነሻ የሆነው ቦሌ ዓለም አቀፍ አየር መንገድ በነሐሴ ወር 2016 ዓ.ም 1,251,909 የመቀመጫ አቅም በማስመዝገብ ከግብፅ ካይሮ ዓለም አቀፍ አየር መንገድ ቀጥሎ በአፍሪካ 2ኛ ደረጃን ይዟል። ይኸው ስኬት የደቡብ አፍሪካውን ኦ.አር. ታምቦ እና የሞሮኮውን ሞሃመድ አምስተኛ አየር ማረፊያዎችን በመብለጥ የተመዘገበ ታላቅ ድል ነው።

በአህጉር ደረጃ በአጠቃላይ የአፍሪካ አየር መንገዶች የመቀመጫ አቅም ካለፈው ዓመት ተመሳሳይ ወቅት ጋር ሲነፃፀር የ8.8% ዕድገት ያሳየ ሲሆን፣ በተለይም በአህጉሩ ውስጥ የሚደረጉ በረራዎች የ10.5% ከፍተኛ ዕድገት አሳይተዋል። ለዚህም አዎንታዊ ዕድገት ዋና ምክንያቶች አዳዲስ የበረራ መስመሮች መከፈት፣ የኔትወርክ መስፋፋት እና ዘመናዊ ትላልቅ አውሮፕላኖች ጥቅም ላይ መዋላቸው እንደሆነ ተገልጻል።

በአህጉራዊ የመቀመጫ አቅም ስርጭት ክፍፍል ሰሜን አፍሪካ በ41.9% አንደኛ ደረጃን ሲይዝ፣ የቦሌ አየር መንገድ የሚገኝበት ምስራቅ አፍሪካ ደግሞ በ22.7% ድርሻ ሁለተኛውን ደረጃ ይዟል። ደቡብ አፍሪካ በ18.3% እንዲሁም ማዕከላዊ እና ምዕራብ አፍሪካ በ17.1% ተከተለው ይገኛሉ።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…
https://t.me/AdissAdmas