ለመሞት መመኘት እንጂ ምኞቱን ተግባራዊ ለማድረግ ከዚያ በኋላ ሞክሮ አያውቅም፡፡ … የማይችልበትን ነገር መሞከር ተወ፡፡ በእሱ ፈንታ የሁለተኛ ክፍል ሂሳብአስተማሪው ሞቱ፡፡ እሱ መኖር ቀጠለ፡፡ ሲያገኝ ደግሞ ደሞዙ ስለማይበቃው መሞትን እንደሚመኝ አወቀ፡፡ በእውቀቱ ላይ እውቀት ቀጠለበት፡፡ በምኞት ላይ ምኞት፡፡ በውድቅት ላይ ውድቀት፡፡ ፍቅረኛ ከማግኘቱ በፊት ገንዘብ አግኝቶ ነበር፡፡ ገንዘብ ሲያገኝ መሞት የሚፈልግበትን አዲስ ምክንያት አብሮ አገኘ፡፡ መሞት የሚፈልገው ለፍቅረኛ የታደለ ባለመሆኑ ምክንያት ሆነ፡፡ ሆኖ ቆይቶ … ስለነበር መጠጥ እና ሌላ ትርፍ ሱሶችን አሳድጎ ሞቱን ለማፋጠን … በዜሮ ማርሽ ተንደረደረ፡፡ ፍቅረኛ ሲያገኝ ያሳደጋቸውን ሱሶች ማጣት አቃተው፡፡ ሞቱን ተመኘ፡፡ እየተመኘ ፍቅረኛው ለአቅመ ሚስት ሳትበቃ ፍቅሩ በመሀላቸው ሞተ፡፡ እንዲኖር የሚፈልገው ነገር ሞቶ፣ ለመሞት የሚፈልገው እሱ መኖር ቀጠለ፡፡ …መሞት የሚፈልግበትን ምክንያት በአዲስ መልክ ረቀቅ አድርጐ አወቀ፡፡ መሞት የሚፈልገው ከኢትዮጵያ ሀገር መውጣት ስላልቻለ ነበር፡፡ በኢትዮጵያ ውስጥ መኖር አስከሬን ሳጥን ውስጥ ሚስማር ተመትቶ እንደመኖር ነው፤ አለ - ምክንያቱን ሲያጠናክር፡፡ ከኢትዮጵያ ለመውጣት ሞክሮ ግን አያውቅም፡፡ ለመኖር ሞክሮ አያውቅም፡፡ መሞትንም ከሳሙናው በኋላ መሞከር እርም ብሎ ትቶታል፡፡ የማያውቅበትን ነገር መሞከር ይፈራል፡፡ ሞክረው የሚሳካላቸውን ግን ያስቀኑታል፡፡ … ለመኖር ሞክረው የተሳካላቸውን በአፉ እያደነቀ በልቡ ግን ያጣጥላል፡፡ ለመሞት ሞክረው የሚሳካላቸውን በአፍ እያወገዘ በልቡ ይቀናባቸዋል፡፡ ወደ አሜሪካ ለመሄድ ሳይሞክር ከመሞቻ ምክንያቱ ጋር የተክሊል ጋብቻ ፈፀመ፡፡ ወደ አሜሪካ ሄደው መኖር አቅቷቸው ግራ ተጋብተው የሚመለሱትን ታዘበ፡፡ ከመሞቻ ምክንያት ጋር የፈፀመውን ጋብቻ ወዲያው አፈረሰ፡፡ ወዲያው ሌላ ወጣት ምክንያት አገባ፡፡ የመሞቻ ምክንያት፡፡ ያገባት አዲሷ ምክንያቱ … ከዚህ በፊት ከነበሩት ምክንያቶች ሁሉ የተዋበች … ሀቀኛ፣ አመዛዛኝ፣ እመቤት የሆነች ምክንያት ነበረች፡፡ እቺን እፁብ ድንቅ የሆነች ምክንያት ሀይማኖቱ አደረጋት፡፡…