የተለያዩ መስፈርቶችን ተጠቅሞ የአለማችንን ከተሞች እያወዳደረ በየአመቱ ደረጃ የሚሰጠው ሪዞናንስ ኮንሰልታንሲ የተባለው ተቋም፣ ከሰሞኑም የ2021 የአለማችን ምርጥ 100 ከተሞችን ዝርዝር ይፋ ያደረገ ሲሆን የእንግሊዟ መዲና ለንደን በአንደኛ ደረጃ ላይ ተቀምጣለች፡፡
ላለፉት አራት ተከታታይ አመታት የአለማችን ምርጥ ከተማ ሆና የዘለቀችው ለንደን፤ ዘንድሮም ስፍራዋን ሳታስነጥቅ መቀጠሏን  የጠቆመው ተቋሙ፣ የተፈጥሮ ውበቷንና የመሰረተ ልማት አውታሮቿን ጨምሮ የተለያዩ ጸጋዎቿ ለምርጥነት እንዳበቃት ተነግሯል፡፡
የአሜሪካዋ ኒውዮርክ የአመቱ 2ኛዋ የአለማችን ምርጥ ከተማ ስትባል፣ የፍቅር ከተማ ተብላ የምትጠራው የፈረንሳዩዋ ፓሪስ በበኩሏ በሶስተኛ ደረጃ ላይ መቀመጧን ተቋሙ ይፋ ባደረገው መረጃ አመልክቷል፡፡
የታላላቅ ሙዚየሞችና የቱሪስት መስህቦች መገኛ የሆነችው የሩስያ ርዕሰ መዲና ሞስኮ አራተኛ እንዲሁም የጃፓን መዲና ቶክዮ አምስተኛ ደረጃን ሲይዙ፤ ዱባይ፣ ሲንጋፖር፣ ባርሴሎና፣ ሎስ አንጀለስ እና ማድሪድ ደግሞ እንደ ቅደም ተከተላቸው ከስድስተኛ እስከ አስረኛ ያለውን ደረጃ መያዛቸውን የተቋሙ መረጃ ያሳያል፡፡