Saturday, 02 April 2022 12:08

ባይንሽ እያየሁት!

Written by 
Rate this item
(4 votes)

ማንምን ከለመድሽ
ለእኔ ግድ ካጣሽ
(ካመታት በኋላ መስታወት ፊት ቆሜ)
አንቺን እየፈለኩ
እኔን አየዋለሁ
የምትወጂው አይኔን
ባይንሽ እያየሁት
እብሰለሰላለሁ!
ዛሬማ ደፍርሷል
ብርሃን መርጨት ትቷል
ናፍቆት አሟምቶታል
እንባ አበላሽቶታል
ስል እተክዛለሁ
--
ስብሃት! ለማማሩ
ስብሃት! ለጣዕሙ
ያልሽለት ከንፈሬን
በድድር መዳፌ እየደባበስኩት
ባይንሽ አየዋለሁ
“ሲጃር አጥቁሮታል
ማጣት ሰንጥቆታል. . .”
ስትይ እሰማለሁ
አብዝቼ አለቅሳለሁ
--
የማይቻል ሰጥቶት
ያላቅሙ አሸክሞት
የጎበጠ ጫንቃዬን
የምትወጂው ትከሻዬን
በመስታወቱ ውስጥ ባይንሽ አየው እና
“ይሄስ ኮስማና ነው!” ስትይ እሰማለሁ
ወዮ ለእኔ እላለሁ።
--
እምወዳት እኔ እንጂ ምትወዳቸው
የሉም
ስለዚህ አትመጣም
ብትመጣም አትቆይም
የሚል ድምፅ እሰማለሁ
እነፈርቃለሁ
ወዮ ለእኔ እላለሁ።
ናሆም አየለ

Read 1536 times