ቢጂአይ ኢትዮጵያ አብዛኛውን ወጪ ሸፍኖለታል የተባለው የቤተሰብ ፌስቲቫል በአዲስ አበባ ኤግዚቢሽን ማዕከል እየተካሄደ ነው፡፡ “በጥቅምት አንድ አጥንት” በተሰኘው በዚህ ዓመታዊ የቤተሰብ ፌስቲቫል ላይ ጥሬ ስጋ በግማሽ ዋጋ እየተቆረጠ ሲሆን፤ ቢጂአይ ኢትዮጵያ ፌስቲቫሉ የሁሉንም አቅም ያገናዘበ ይሆን ዘንድ በተለይ የጥሬ ሥጋውን ግማሽ ዋጋ ሸፍኗል ተብሏል፡፡

“የዘንድሮውን ፌስቲቫል ግማሽ ወጪ የሸፈንነው ደንበኞቻችንን ስለምናከብር ነው” ብሏል - ኩባንያው፡፡

በሴንቸሪ ፕሮሞሽንና ኤቨንትስ የተዘጋጀው የቤተሰብ ፌስቲቫል፣ ዛሬ ጠዋት ረፋድ ላይ የተከፈተ ሲሆን፤ የከተማችን 10 ታዋቂ ሥጋ ቤቶች እየተካፈሉበት ነው፡፡ በፌስቲቫሉ ላይ የቢጂአይ ምርቶች የሚቀርቡ ሲሆን፤ አንጋፋዎቹ ድምጻውያን አብነት ግርማና ፍቅር አዲስ ነቅአጥበብን ጨምሮ ሌሎችም ኹነቱን እንደሚያደምቁት ነው የተነገረው፡፡

ሴንቸሪ ፕሮሞሽንና ኤቨንትስ ፌስቲቫሉን አስመልክቶ በሰጠው መግለጫ፤ ህብረተሰቡ በአንድ ቦታ ተሰባስቦ፣ አብሮ የመብላትና የመጠጣት እንዲሁም የመዝናናትና የመመካከር ባህሉን የሚያጠናክርበት ነው ብሏል፡፡

“በጥቅምት አንድ አጥንት” በሚል የሚካሄደው የቤተሰብ ፌስቲቫል ነገም እንደሚቀጥል ለማወቅ ተችሏል፡፡