Administrator

Administrator


             ከዕለታት አንድ ቀን አንድ አዝማሪ፣ ንጉሥ ግብር ገብቶ፣ ግብሩ ከተበላና ከተጠጣ በኋላ፤ ልዩ አስተያየት የሚያደርግላቸው መኳንንትና መሳፍንት ብቻ ሲቀሩ፤ ንጉሡን የሚያወድሱ አያሌ ግጥሞችን እየደረደረ በጣም አድርጎ አስደሰታቸው፡፡
ንጉሡም፤
“ንሳ አንተ አጋፋሪ፣ ና አንድ ኩታ ሸልምልኝ!” ይላሉ፡፡
 አዝማሪ ኩታውን ይደርባል፡፡ ከዚያም ውዳሴ-ንጉሡን ይቀጥላል፡፡
አሁንም ንጉሡ እጅግ ደስ ይላቸውና፤
“ንሳ አንተ አጋፋሪ፤ ሠናፊል ከወረደህ-ቆየኝ ሸልምልኝ!”
አዝማሪ ሽልማቱን ተጎናጸፈ!
ደገመ ሌላ ውዳሴ-ንጉሥ፡፡
ንጉሡ፤
“አንድ ካባ ደርብለት አጋፋሪ! አንድ ብርሌም ይጠጣ!” አሉ፡፡
ካባ አገኘ አዝማሪ፡፡ ብርሌዋንም በአንድ ትንፋሽ አንደቀደቃት! ሽልማቱ እያሰከረው መጣ! ድምፁም ከቀድሞው እጅግ ጮክ፣ እጅግ ጎላ አለ፡፡
ቀጥሎ ልኩን አለፈና ንጉሡን ዘለፈ፡፡ እንዲህ አለ፡-
“የንጉሥን አጫዋች፣ማን ደፍሮ ሊነካ
የሹሙንስ መሬት ማ ረግጦ ሊለካ
የሚመካ ካለ ፣በካባው ይመካ
የንጉሥ ዘመድ መሆን፣ ያሸልማል ለካ!”
ንጉሡ ተናደዱ፡፡
“ንሣ አንተ አጋፋሪ! ይሄን አዝማሪ የለበሰውንም፣ ያለበስከውንም ሁሉ ግፈፍልኝ! ከዚያ ቀጥለህ አርባ ጅራፍ አልብስልኝ!”
አዝማሪ፤ “በአፍ ይጠፉ፣ በለፈለፉ” እንደተባለው ሆነ፡፡ እራቁቱን አርባ ጅራፍ ቀመሰ!
ከጅራፉ በኋላም፤
“መወደስ ለጅራፍ፤ ከሆነ ነገሩ
አቀንቃኞች ሁሉ፣ ´አፍ-እላፊን´ ፍሩ!”
ሲል ዘፈነ ይባላል፡፡
*   *   *
ንጉሥ ምንም ሙገሳን ቢወድድ፣ ጥቂት  ዘለፋ የደረሰበት ዕለት የጭቃ ጅራፉን ያመጣዋል፡፡ አፋሽ አጎንባሽ፣ ዐባይ አድር-ባይ፣ ከሐዲ-ይሑዲ ሁሉ ይህ ጉዳይ ይመለከተዋልና “አሃ!” ብሎ ቢያዳምጥ የአባት ነው!
ታላላቅ የዓለም መንግስታት ኢትዮጵያን አወደሷት በተባለ ሰሞን- “ጠርጥር! ነገር አለ!” ብሎ ማሰብ ተገቢ ነው፡፡ “ሊበሏት ያሰቧትን አሞራ ጅግራ ናት ይሏታል” ነውና እግርን ሰብስቦ፣ ዐይንን አጥብቦ ማሰብ ያሻል፡፡
“ከዐሥር ዓመት የትግል እንቅስቃሴ ይልቅ፣ የአንድ ዓመት አብዮታዊ ሁኔታ፣ ህዝብን ያነቃዋል” ይላል የሩሲያው ሌኒን፡፡ ህዝብ በሸፍጥ የማይታለልበትና በጉልበት የማይበገርበት ደረጃ አንድ ቀን እንደሚደርስ፣ እያደርም “በቃኝ፣ አልገዛም” እንደሚል፣ ማንም መሪ ሊስተው አይገባም፡፡
የዛሬ የሀገራችን ፖለቲካ፤ “የሚያብድና የሚያድግ አይታወቅም” የሚባል ዓይነት ሆኗል፡፡ “ዘይት ተወደደብን” ሲባል፤ “ዳቦ በሙዝ ብሉ”፣ “ትራንስፖርት ተወደደብን” ሲባል፣ “በእግር መሄድ ጀምሩ” መባል እንደ ፖለቲካል-ኢኮኖሚያዊ መፍትሔ መቆጠር የተጀመረበት ዘመን ሆኗል፡፡
እንግዲህ በዚህ ላይ የማያባራ ጦርነት አለ፡፡ የአምራች ወጣት ኃይል እልቂት! የበሽታና ድርቅ  አባዜ! የህዝቦች መፈናቀል! ምኑ ቅጡ!
“ራሴን ያመኛል´ኮ፣ራሴን ይመቱኝ ይሆን?” አለ አሉ፤ አንድ ወደ ጦርነት ዘማች፡፡
በአንጻሩ ደሞ አንድ ከጦርነት ተመላሽ፤
“ጦርነቱ እንዴት ነበር?” ተብሎ ሲጠየቅ፣
“አይ እንደፈራነው አይደለም፡፡ አሥራ አራት ሆነን ዘምተን እኔ ደህና ተመልሻለሁ!” አለ አሉ፡፡ “ፈሪ የእናቱ ልጅ ነው” ይላል አበሻ ሲተርት፡፡
አንድ ጊዜ ክሊንተን ሮዚተር የተባለ አሜሪካዊ የፖለቲካ ተንታኝ ምሑር፤ “ያለ ዲሞክራሲ አሜሪካ  የለችም፡፡ ያለ ፖለቲካ ዲሞክራሲ የለም። ያለ ፖለቲካ ፓርቲዎችም ፖለቲካ የለም” ብሎ ነበር፡፡
ማርጋሬት ሚሼል የተባለችው ደራሲ ደግሞ፤ “ጦርነት ልክ እንደ ሻምፓኝ መጠጥ ነወ፣ አንዴ ከገቡበት በጀግናም በጅልም ራስ ላይ እኩል ይወጣል” ትለናለች ( War is like champagne, it goes to the heads of fools as well as brave-men at the same speed) ይሄ ማለት ልባምም ልበ-ቢስም እኩል ዝነኛና ጀግና የመባል ዕድል አላቸው እንደማለት ነው፡፡ እንደ ኢትዮጵያ አገራችን ሁኔታ ደግሞ በትንሽም በትልቅም ጉዳይ፣ አንዴ ወይ በተደጋጋሚ፣ታስረው አምነስቲ ኢንተርናሽናል ጭምር ያስፈታቸው “የድንገቴ ፖለቲከኞች” አይተናል፡፡ ከዚያ ማን ይችላቸዋል? በየመድረኩ ደስኳሪ፣ በየሰርጉ ጨፋሪ፣ በየለቅሶው ሙሾ አውራጅ እነሱ ብቻ ይሆናሉ! ከእኒህ ይሰውረን እንጂ ምን ይሏል? ከኒህ በላይስ የድል አጥቢያ ዐርበኛ የታል? በተለይ ከ1960ዎቹ ወዲህ፣ አብዛኛው ፖለቲካ፣ የፖለቲካ ድርጅት/ፓርቲ፣ የፍትህ አካል፣ የአስተዳደር ኤጀንሲና የደህንነት መሥሪያ ቤት ወዘተ… ለስሙ የህዝብ ግንኙነት በራቸውን መክፈት ቢጀምሩም፣ ብዙዎቹ የጓሮ በር አላቸው፡፡ ስለሆነም፣ግማሽ-ጎፈሬ፣ግማሽ ልጩ ናቸው!!
አገርን መከላከል ታላቅ ሚናና የአገር ወዳድነት ምልክት ነው። አገርን ማጥፋት ደግሞ ኃላፊነትን መካድና ወንጀለኝነት ነው። የጥፋት መልዕክተኝነት ነው! የውጪ ኃይሎች መቼም በኢትዮጵያ ጉዳይ ተኝተው አያውቁም። የእነሱ ጉዳይ አስፈጻሚ የሆኑት አምስተኛ ረድፈኞች (5th columnists እንዲል መጽሐፉ) ከውስጥ ይቦረቡሯታል። ይህ በየዘመኑ ያየነው፣ የታዘብነውና ምኔም የምንዋጋው ክስተት ነው። ታላላቅ መንግሥታትም ባገኙት መንገድ በጎረቤት አገርም፣ በማህል አገርም፤ ገንፎው ሲያቃጥል በማንኪያ፣ ሲበርድ በእጅ ለመቀራመት፣ እንደተለመደው አፍሪካን በመቀራመት አጀንዳቸው (Scramble for Africa) ሩጫቸውን  አላቆሙም። በዚያ ሳቢያም ሱዳን፣ ግብፅ፣ ሶማሊያ፣ ዩጋንዳ፣ ኬንያ… መንኳኳት የማይለያት አገር ካደረጓት  ውለው አድረዋል።
እነዚህን ጎረቤቶቻችንን የውስጥ- ዓርበኛ አድርገው የሚንቀሳቀሱት ኃያላን አገሮች “ቢቻል በካሮት ባይቻል በበትር” (Carrot and stick) የሚለውን ጨዋታቸውን ሳያሰልሱ እየተጓዙበት ነው። “አያያዙን አይተው ጭብጦውን ቀሙት” የሚለውን ተረት በጥሞና ማሰብ ብልህነት ነው። አለመዘናጋት ወሳኝነት አለው። ትልቁ ቁም-ነገር ግን፣ ኃያላን ኃይሎች በባሌም ይምጡ በቦሌ፣ በውስጥ- አርበኛም ይዋጉ “በቀኝ-መንገደኛ”፣ የአገርን ጉዳይ ቸል አለማለት ነው። ጉልበተኛ፤ “አገጭህን/ይዞ የሚለምንህ፣ እምቢ ብትል በጥፊ ሊልህ!” የሚለውን የአበው ብሂል፣ መቼም አለመርሳት ለአገር ታላቅ/ውለታ መዋል ነው! ዛሬም እንንቃ፣ ልብ-እንግዛ፣ እንትጋ!

       “በአላህ ስም እጅግ በጣም ርኅሩኅ በጣም አዛኝ በኾነው።”

                  (ከኢትዮጵያ እስልምና ጉዳዮች ጠቅላይ ምክር ቤት የተቋሙን ወቅታዊ ሁኔታ በተመለከተ የተሰጠ መግለጫ፡-)


             እስልምና ሃይማኖት በሀገራችን ከ14 ክፍለ ዘመናት በላይ ባስቆጠረው ታሪኩ በተለይም እስከ 1980ዎቹ መጀመሪያ አመታት ድረስ ሙስሊሙ ማህበረሰብ ከምስራቅ እስከ ምዕራብ ከሰሜን እስከ ደቡብ በሁሉም አቅጣጫ ያለምንም ልዩነት በአንድነቱ ጸንቶ የኖረ ሲሆን ከሙስሊምነት ውጭ ሌላ መጠሪያም አልነበረውም።
የኢሕአዴግ መንግስት ወደ ስልጣን መምጣትን ተከትሎ የተፈጠረውን አጋጣሚ በመጠቀም የተለያዩ ባዕድ አስተሳሰቦች ከተለያዩ ሀገራት ወደ ሀገራችን የገቡ ሲሆን በተለይም የውሀብያ አስተሳሰብ ከገባበት ጊዜ ጀምሮ ማህበረሰባችን አንድነቱ ሲናወጥ፣ ልዩነቱ ሲሰፋ እና ሰላሙ ሲደፈርስ ቆይቷል።
በ2010 ከተደረገው የመንግስት ለውጥ ጋር በተያያዘ የጠ/ሚኒስትር ዶ/ር አብይ አህመድን የመደመር ፍልስፍና መሰረት ያደረገ የአንድ ሁኑ ጥሪ እና አንድነት በቁርአንም የታዘዘ እንደመሆኑና የመሻይኾቻችን ቅንነትና ሆደ ሰፊነት ተጨምሮበት ሚያዝያ 23፣ 2011 ሸራተን ላይ በተደረገው ስብሰባ የነበረው የመጅሊሱ አመራር ከህግ አግባብ ውጭ ብዙ ርቀት በመሄድ ለአንድነት ሲባል 26 አባላትን በያዘ የዑለማ ም/ቤት እና በስሩ በተደራጁ የቴክኒክ (ሙያዊ) ድጋፍ በሚሰጡ 7 የቦርድ አባላት እንዲተካ የተደረገ ቢሆንም በሚከተሉት የሰለፊ/ውሀብያው ቡድን አስቸጋሪ ባህሪያቱና በርካታ ጥፋቶች ምክንያት የታሰበው አንድነት ሊመጣ አልቻለም፦
የክልል መጅሊሶችን በአዲስ መልክ ለማደራጀት በተደረገው እንቅስቃሴ የአዲስ አበባ ከተማ መስተዳድርን፣ የኦሮሚያን፣ የደቡብን፣ የቤኒሻንጉልን እና የጋምቤላ ክልሎችን በአዲስ መልኩ የተደራጁ ቢሆንም በሁሉም ክልሎች ላይ የሰለፊ-ውሀብያው ቡድን የአመራር የበላይነትን በመያዝ በነባሩ የእስልምና መስመር መሳጂዶች፣ ዑለማዎች፣ ኢማሞች  እና ተከታዩ አማኝ ህዝብ ላይ በደሎችን በማድረሳቸው ሁኔታዎች እንዲስተካከሉ የም/ቤቱ ስራ አስፈጻሚ በተደጋጋሚ ያሳሰበ ቢሆንም ከቤኒሻንጉል ክልል በስተቀር ችግሮቹን ለመቅረፍ ፈቃደኛ ሳይሆኑ ቀርተዋል፤ የጠቅላይ ም/ቤቱን ትእዛዝ የማይቀበሉ መሆናቸውን በተደጋጋሚ በጽሁፍ አረጋግጠዋል፤
የድሬዳዋ ከተማ መስተዳድር፣ የሶማሊ እና የሐረሪ ክልል መጅሊስ አመራሮች አዲሱ የጠቅላይ ም/ቤቱ አመራር ከመረከቡ በፊት የቀድሞውን የመጅሊስ አመራሮች በማባረር በሰለፊ-ውሀብያው ወገን የተያዙ ሲሆን በጠቅላይ ም/ቤቱ በኩል ሁሉንም ወገኖች ባሳተፈ መልክ ለማደራጀት የተደረገው ሙከራ በሰለፊ-ውሀብያው ቡድን እምቢተኝነት አልተሳካም፤
የአፋር ክልልን ለማደራጀት ዑለሞች ከጠቅላይ ም/ቤቱ ቢላኩም ወትሮውንም በብቸኝነት አመራሩን ተቆጣጥሮ ይዞ የቆየው የሰለፊ-ውሀብያው ቡድን እምቢተኝነትን መርጧል፤
በአማራ ክልል እንዲያደራጁ ዑለሞች ቢመደቡም የሰለፊ-ውሀብያው ቡድን ወደ ክልሉ ለመሄድ ፈቃደኛ ባለመሆንና ይልቁንም ከሀገሪቱ የመንግስት አወቃቀር ውጭ ፖለቲካዊ አንደምታ ያለው በሚመስል መልኩ “የወሎ መጅሊስ” የሚባል ህገወጥ አደረጃጀት በመፍጠር ኢማሞችን የማባረርና መስጅዶችን የመንጠቅ ተግባሩን ቀጥሏል፤
ቦርዱ የ2011 የሐጅ አገልግሎትን የሰለፊ-ውሀብያው ቡድን አባላት ከሆኑት ከዶ/ር ጀይላን ኸድር እና ሸኽ አብዱልአዚዝ ጋር ሆኖ በመምራት የጠቅላይ ም/ቤቱ ብቸኛ ገቢ ከሐጅ አገልግሎት የሚገኝ ገንዘብ ሆኖ ሳለ ተገቢ ባልሆነ አሰራር የሐጅ ስርዓቱ ክንውን እንዳለቀ በጥቂት ወራት ውስጥ ጠቅላይ ም/ቤቱን ለሠራተኞች ደመወዝ እንኳ መክፈል በማይችልበት የፋይናንስ አቋም ላይ ከመጣሉ ባሻገር ገንዘባቸውን ከፍለው ሀጅ ባልሄዱ የ479 ተመዝጋቢዎች ገንዘብ ተቋሙን ባለዕዳ አድርጎታል፤
በፈፀመው የዲስፕሊን ግድፈት ምክንያት በዑለማ ም/ቤቱ ስራ አስፈጻሚ ውሳኔ በታገዱ የቦርድ አባላት፣ በሕገ ወጥ መንገድ ከተቋሙ በተወሰደው በመከነ ማኅተም እና ባለአርማ ወረቀት በተደረገ ጥሪ መጋቢት 20 እና 21፣ 2013 የሰለፊ/ውሀቢው ቡድን ለብቻው ጉባኤ አካሂደናል በማለት ረቂቅ ሰነዶችን በተናጠል አጽድቀናል፤ የጠቅላይ ም/ቤቱ ዋና ፀሀፊ የሆኑትን ሸኽ ቃሲም ሙሐመድ ታጁዲንን ከስራ አባረናል በማለት ህገወጥ ጉባኤና ውጤት የሌለው ህገወጥ ውሳኔ አስተላልፏል፤
የዓሊሞች የአንድነት እና የትብብር ረቂቅ ሰነዱ ላይ በጠ/ም/ቤቱ ስራ አስፈጻሚ ኮሚቴ አባላት ውይይት እንዲደረግበት አጀንዳው ቢቀርብም የሰለፊ/ውሀብያው ወገን ፈቃደኛ ባለመሆናቸው በተቀሩት ዑለማዎች በተደረገው ውይይት መሰረት ማሻሻያ ተደርጎበትና ተስተካክሎ ረቂቅ ሰነዱ ላይ አስተያየት እንዲሰጡበት ለክልል መጅሊሶች የተላከ ቢሆንም የእምቢተኝነት ምላሽ ሰጥተዋል፤
የጠቅላይ ም/ቤቱ ፕሬዝደንት ለስራ ጉዳይ ወደ ውጭ በሄዱበትና ከስራ አስፈጻሚው እውቅና እና ስምምነት ውጭ በሕገ ወጥ መንገድ ከተቋሙ በተወሰደው በመከነ ማኅተም እና ባለአርማ ወረቀት በጠ/ም/ቤቱ ም/ፕሬዝደንት ፊርማ ለመጋቢት 17 እና 18፣ 2014 ህገ ወጥ ስብሰባ ጠርተዋል፤
በመንግስት አካላት አደራዳሪነት በተደረገው ጉባኤ ከስምምነት ውጭ በየቀኑ አጀንዳ በማንሳት የታገደውን ቦርድ ለመመለስ ጥረት ከማድረጋቸው በተጨማሪ የጠቅላይ ም/ቤቱን ፕሬዝደንት ሰብሳቢነት በተደጋጋሚ አንቀበልም በማለት አመጸኛነታቸውን አሳይተዋል፤
ከመጋቢት 17 እስከ 24፣ 2014 በረቂቅ ደንቡ ላይ በተደረገው ውይይት በቃለ ጉባኤ የተያዙ የልዩነት ነጥቦችን መነሻ በማድረግ ዑለማንና ምሁራንን ያካተተ ከነባሩ እስልምና ተከታዮች 40 ከሰለፊ-ውሀብያው ቡድን 40 ግለሰቦች የተሳተፉበት ውይይት ግንቦት 8 እና 9፣ 2014 የተደረገ ቢሆንም የውይይቱን ውጤት ለመገምገምና ቀጣይ አቅጣጫን ለማስቀመጥ በፕሬዝደንቱ ስብሰባ ቢጠራም የሰለፊ-ውሀብያው ቡድን እንቢተኝነትን በመምረጥ ሆቴል ቤት በተናጠል ለቀናት ሲዶልት ቆይቶ በመጨረሻም በትናንትናው ዕለት ማለትም ግንቦት 18፣ 2014 ህገ ወጥ መግለጫ እና ውጤት የሌላቸው ህገ ወጥ ውሳኔዎችን አሳልፏል፤
እንደ ሃይማኖት ተቋም ቅድሚያ ትኩረትን የሚሻው የዓሊሞች የአንድነት እና የትብብር ረቂቅ ሰነድ ሆኖ እያለ ቡድኑ ትኩረት ያደረገው በረቂቅ መተዳደሪያ ደንቡ ላይ መሆኑ ተቋሙን ለመቆጣጠር አቋራጩ መንገድ ነው ብሎ በማመኑ ሲሆን በረቂቅ መተዳደሪያ ደንቡ ላይ በውይይቱ ወቅትም የታዩት የልዩነት ነጥቦች እንደሚያመለክቱት የሰለፊ-ውሀቢው ቡድን መጅሊሱ በኃይማኖቱ ሊቃውንት (ዑለማ) የሚመራ የኃይማኖት ተቋም መሆኑን እና የነባሩን የእስልምና መስመርና ትውፊት እንዲቀጥል እና አወቃቀሩም እነዚህን መሰረታዊ ነገሮች ያገናዘበ እንዲሆን ካለመፈለግ እና ልዩነትን በውይይትና በመነጋገር ከማጥበብ ይልቅ በሀገራችን ለ1400 ዓመት የነበረውን የእስልምና መስመር በመቀልበስ ከ30 አመት ወዲህ በቅርቡ ወደ ሀገራችን በገባው መጤ የውሀብያ አስተሳሰብ የመተካት አካሄድን በመምረጡ እንደሆነ ከላይ የተዘረዘሩት የቡድኑ አስቸጋሪ ባህሪያትና በርካታ ጥፋቶች ያስረግጣሉ።
በመሆኑም ጠቅላይ ም/ቤቱ የሚከተሉትን የአቋም መግለጫ ነጥቦች አውጥቷል፦
ሚያዝያ 23፣ 2011 ለአፋዊ ሳይሆን ለልባዊ አንድነት ሲባል ህግ በመጣስ የተደረገው የሸራተን ስምምነት እላይ የተዘረዘሩት ነጥቦች እንደሚያሳዩት የሰለፊ-ውሀብያው ቡድን በአስቸጋሪ ባህሪያቱ፣ በርካታ ጥፋቶች እና የተናጠል ጉዞ ምክንያት ያፈረሰው መሆኑን ለማህበረሰባችን እያሳወቅን የጥቂት ግለሰቦችና ቡድኖች መነጠል የሙስሊሙን ማህበረሰብ አንድነት እንደማያውከው እያስገነዘብን እያንዳንዱ ሙስሊም ሃይማኖቱን፣ ተቋሙንና መስጅዶቹን ለመጠበቅ ከመሻይኾቹ ጎን እንዲቆም ጥሪያችንን እናስተላልፋለን።
ከሚያዝያ 23/2011 የሸራተን አዲስ ስምምነት እራሱን ነጥሎ ያደራጀው ቡድን ግንቦት 18 ቀን 2014  ያስተላለፈውን ውሳኔ ጠቅላይ ም/ቤቱ ውድቅ አድርጎታል። በመሆኑም ውሳኔው በየትኛውም ተቋም ተፈፃሚነት ሊኖረው እንደማይገባ ጠቅላይ ም/ቤታችን በጥብቅ ያስገነዝባል።
በአዋጅ ህጋዊ ዕውቅና የተሰጠው ጠቅላይ ም/ቤቱ ከ14 ክ/ዘመናት በላይ ያስቆጠረው የነባሩ እስልምና ተከታይ በሆኑ የሃይማኖት አባቶቻችን የተቋቋመ ነባር ተቋም እንደመሆኑ የመሻይኾቻችን መንገድ  የሆነውን የአህሉ ሱና ወልጀማዐ መስመር ያስቀጥላል።
ጠቅላይ ም/ቤቱ በተጓደሉ የስራ አስፈጻሚ አባላት ምትክ ከዑለሞቻችን መካከል በመምረጥ የሚተካ ሲሆን ከሀጁ ስራ ጎን ለጎን በሀገር አቀፍ ደረጃ የዲኑ ባለቤት የሆኑትን ዑለሞቻችንን በመጥራትና ረቂቅ ሰነዶችን በማስጸደቅ ጠቅላይ ም/ቤቱን የሚያዋቅር መሆኑን እናሳውቃለን።
የሸራተኑ ስምምነት የተደረገው ከምንጩ እየደረቀ የነበረውን የሰለፊ-ውሀቢ አስተሳሰብ ወደ ተቋሙ በማስገባት ከነባራዊ ሁኔታው በመረዳት ወደ ነባሩ እስልምና የሚቀየርበትን መደላድል ለመፍጠር እንጅ ከፍቅር ይልቅ ጥላቻን፣ ከአንድነት ይልቅ ልዩነትን፣ ከአብሮነት ይልቅ መራራቅን መሰረት ያደረገ፣ የሰላምና እርጋታ ቦታ የሆኑ መስጅዶችን ወደ ሁከት መድረክ የቀየረ፣ ከውይይት ይልቅ ግጭትን የሚመርጥ፣ የማህበረሰብን ሰላም የሚያውክና መልካም እሴቶችን የሚንድ ስርዓት አልበኛን ተቋማዊ ለማድረግ አልነበረም። በመሆኑም መንግስት ህግና ስርዓት የማስከበር ሃላፊነቱን በአግባቡ እንዲወጣ እየጠየቅን ለዚህ ስርዓት አልበኛ ቡድን ድጋፍ የሚያደርጉ አንዳንድ የመንግስት ባለስልጣናትና ውስን ባለሃብቶች ከዚህ አድራጎታቸው እንዲቆጠቡ እናሳስባለን።
አሏሁ አክበር!
አላህ የሀገራችንን አንድነት እና የህዝባችንን ሠላም ይጠብቅልን!!!  
ግንቦት 19 ቀን፣ 2014
አዲስ አበባ፣ ኢትዮጵያ

  በመላው አለም ግጭትና ጦርነትን ጨምሮ በተለያዩ አስገዳጅ ምክንያቶች ከመኖሪያ አካባቢያቸው የተፈናቀሉ ሰዎች ቁጥር ከ100 ሚሊዮን ማለፉንና ከእነዚህም መካከል 60 ሚሊዮን ያህሉ የአገር ውስጥ ተፈናቃዮች መሆናቸውን ተመድ አስታውቋል፡፡
የተባበሩት መንግስታት ድርጅት የስደተኞች ከፍተኛ ኮሚሽን በሳምንቱ መጀመሪያ  ይፋ ባደረገው አዲስ መረጃ እንዳለው፤ ከ14 ሚሊዮን በላይ ሰዎችን ያፈናቀለውን የዩክሬን ጦርነት ጨምሮ የተለያዩ የአለማችን አገራት ሰዎች ግጭት፣ ብጥብጥ፣ እስራት፣ ግድያና የሰብዓዊ መብቶች ጥሰቶችን በመሸሽ ከመኖሪያ አካባቢያቸው ተፈናቅለዋል፡፡ በ2012 የፈረንጆች አመት 41 ሚሊዮን የነበረው የአለማችን ተፈናቃዮች ቁጥር፣ በ2019 ላይ 79.5 ሚሊዮን፣ በ2020 ከ82 ሚሊዮን በላይ፣ በአሁኑ ወቅት ይህ ቁጥር ከ100 ሚሊዮን ማለፉንም የኮሚሽኑ መረጃ ያሳያል፡፡

  - በመላው አለም 237 ሰዎች ቢጠቁም የሞተ ሰው የለም
       - የአለም የጤና ድርጅት ቫይረሱ ያን ያህል አያሰጋም ብሏል

                  በምዕራብ አፍሪካ አገራት የተለመደውና ከሁለት ሳምንታት በፊት በእንግሊዝ የተከሰተው የዝንጆሮ ፈንጣጣ አውሮፓ፣ አሜሪካና አውስትራሊያን ጨምሮ በአለማችን 18 አገራት በወረርሽኝ መልክ መስፋፋቱ የተገለጸ ሲሆን፣ እስካለፈው ረቡዕ ድረስ በመላው አለም 237 ሰዎች በበሽታው ቢያዙም፣ አንድም ሰው አለመሞቱን የአለም የጤና ድርጅት አስታውቋል፡፡
አገራት ቫይረሱን ለመከላከል የፈንጣጣ ክትባትን መጠቀም መጀመራቸውና ቫይረሱ የተገኘባቸውን አግልሎ ማስቀመጥን ጨምሮ የተለያዩ እርምጃዎችን በመውሰድ ላይ እንደሚገኙ የተነገረ ሲሆን፣ ቫይረሱ ወደሌሎች የአለማችን አገራትም እንደሚዛመት ቢጠበቅም፣ የአለም የጤና ድርጅት ግን ቫይረሱ ብዙ ሰዎችን የማጥቃት ዕድሉ ዝቅተኛ መሆኑንና በወረርሽኝ መልክ ባልተከሰተባቸው አገራት በፍጥነት በቁጥጥር ስር ማዋል እንደሚቻል አስታውቋል፡፡
ቫይረሱ ከተስፋፋባቸው የአለማችን አገራት መካከል ቤልጂየም፣ ካናዳ፣ ፈረንሳይ፣ ጀርመን፣ ጣሊያን፣ አሜሪካ፣ እስራኤል፣ ስዊዘርላንድና ዴንማርክ እንደሚገኙበት የተነገረ ሲሆን፣ የተባበሩት አረብ ኤሜሬቶች ከመካከለኛው ምስራቅ አገራት ቫይረሱ የተገኘባት የመጀመሪያዋ አገር ሆናለች፡፡
የራሱ ክትባት እንደሌለውና በንክኪ እንደሚተላለፍ የተነገረለት የዝንጆሮ ፈንጣጣ በሽታ በቀላሉ ከሰው ወደ ሰው የመተላለፍ ዕድሉ ዝቅተኛ መሆኑንና ምልክቶቹም ከፍተኛ ትኩሳት፣ ማሳከክ፣ የቆዳ ውሃ መቋጠር ሽፍታና እብጠት መሆናቸውን ያስታወቀው የአለም የጤና ድርጅት፤ የመግደል ዕድሉ 10 በመቶ በሆነው በዚህ ቫይረስ የሚጠቁ ሰዎች ከሁለት እስከ አራት ሳምንታት ከበሽታው እንደሚያገግሙም አስታውቋል፡፡
እ.ኤ.አ በ1970 በዲሞክራቲክ ሪፐብሊክ ኮንጎ ለመጀመሪያ ጊዜ የተገኘው የዝንጆሮ ፈንጣጣ በስፋት የሚገኘው በአፍሪካ መሆኑንና ከዚህ በፊት ከታየባቸው 11 የአፍሪካ አገራት መካከል ቤኒን፣ ካሜሩን፣ ጋቦን፣ ላይቤሪያና ናይጀሪያ እንደሚገኙበትም አክሎ ገልጧል፡፡

• ሁለተኛ አልበሟን በቅርቡ ለአድማጭ ታደርሳለች
           • በሽያጭ ባለሙያነቷ ከ40 በላይ ሽልማቶች አግኝታለች


              ትውልድና እድገቷ አዲስ አበባ ውስጥ ነው፡፡ የሁለተኛ ደረጃ ትምህርቷን እንዳጠናቀቀች ወደ ግሪክ አቀናች፡፡ ለአንድ ዓመት በግሪክ ከቆየች በኋላ በአጎቷ ግብዣ እ.ኤ.አ በ1992 ዓ.ም ወደ አሜሪካ ተሻገረች።
በአሜሪካ ለ18 ዓመታት የተዋጣላት የሽያጭ ባለሙያ ሆና ሰርታለች፡፡ በታዋቂ መጽሔቶች ሽፋን ላይ ለመውጣት የበቃች ሞዴልም ናት፡፡ ሁለተኛ አልበሟን እያጠናቀቀች የምትገኝ ድምጻዊትም መሆኗን ትናገራለች፡፡ በኢንቨስትመንት ዘርፍም ተሰማርታ እየሰራች ትገኛለች፡፡
ንግስት ጸጋዬ (ኒኪ) ትባላለች፡፡ ከሁለት ልጆቿ ጋር ወደ ኢትዮጵያ ከመጣች አንድ ወር ገደማ ሆኗታል፡፡ ከአዲስ አድማስ ጋዜጠኛ ናፍቆት ዮሴፍ ጋር በህይወቷ፣ በሙያዋ፣ በህልሞቿና ዕቅዶቿ ዙሪያ
አውግተዋል፡፡ እነሆ፡-  



                ለምን ነበር ወደ ግሪክ የሄድሽው? ግሪክ በቆየሽባቸው ጊዜያት ምን ነበር የምትሰሪው?
ያው ግሪክ የሄድኩት እንደማንኛውም ሰው የተሻለ ህይወት ፍለጋ ነው፡፡ ግሪክ  ለአንድ ዓመት ስኖር መንገድ ላይ የፋሽን ኢንዱስትሪው ሰዎች አይተውኝ ሞዴል እንድሆን ተጠይቄ፣ ለሁለት ኩባንያዎች ኮንትራት ፈርሜ በሞዴልነት ስሰራ  ቆይቻለሁ፡፡
ኩባንያዎቹ እነማን ናቸው? ታስታውሻቸዋለሽ?
አዎ፤ማስቲንግ ጂንስ እና አጉስታ ለሚባሉ ኩባንያዎች ነበር የሰራሁት። የተፈራረምኩትን የ1 ዓመት ኮንትራት ጨርሼ ውል ድጋሚ ሳላድስ፣ ወደ አሜሪካ የምሄድበት አጋጣሚ ተፈጠረና ወደዚያው  ሄድኩኝ፡፡ ወደ አሜሪካ የተጓዝኩበት ዋና ዓላማ ለትምህርት ነበር። ግሪክ በሞዴሊንግ ጥሩ ተከፋይ ስለነበርኩና ዘርፉን ስለወደድኩት፣ ይህን ሙያ በትምህርት አዳብሬ ለምን ሰርቲፋይድ አልሆንም በሚል፣ በአሜሪካ “ጃንካ ዛብላንካ” የሚባል ሞዴሊንግ ት/ቤት ገብቼ ተማርኩና፣ ተመርቄ ሰርተፊኬትን አገኘሁኝ፡፡ ከዚያ በኋላ ለተለያዩ ኩባንያዎች ኮንትራት እየተፈራረምኩ ለብዙ ጊዜ በሙያው ስሰራ ቆየሁ፡፡ በዚህም ሂደት በርካታ መፅሔቶች ላይ፤ ለምሳሌ፡- ፕሪንት፣ ፕሬንዌይ፣ ከቨርገርል፣ ራፕሲቲ የተሰኙ እውቅ መፅሔቶች ሽፋን ላይ የመውጣት ዕድልም አግኝቻለሁ፡፡ በርካታ ስራዎችንም በሞዴሊንግ ሰርቻለሁ፡፡
እዚያው አሜሪካ “ሚስ ኢትዮጵያ”  የሚል ማዕረግ አግኝተሽ ነበር። እስኪ ስለሱ አጫውቺኝ?
ይህንን ማዕረግ ያገኘሁት ዋሽንግተን ዲሲ ውስጥ ነው፡፡ እንዴት መሰለሽ… ያን ጊዜ 21 ልጆች ተመርጠን ነበር፡፡ እኔ ያኔ ከሞዴሊንግ ት/ቤት የተመረቅሁበት ጊዜ ነበር፡፡ እናም ለ”ሚስ ኢትዮጵያ” ኦዲሽን ሲወስዱና ሲያዩኝ “አንቺ በጣም ታስፈልጊናለሽ፤ በሙያው የተመረቅሽና ቀደም ሲልም ግሪክ ውስጥ በሞዴልነት ልምድ ያለሽ በመሆኑ ልጆቹን ታሰለጥኚልናለሽ” አሉኝ። አዘጋጆቹም የተመረጡትም ኢትዮጵያውያን ነበሩ፡፡ በዚህ ዝግጅት ውስጥ እንደነ ተስፋዬ ለማ ያሉ ትልልቅ አርቲስቶች ነበሩበት፡፡ እኔም በተሰጠኝ ሀላፊነት መሰረት አስፈላጊውን ስልጠና ለልጆቹ ሰጠኋቸው፡፡ ይህን ስራ በአግባቡ ሰርቼ በበጎ ፈቃደኝነት ስላጠናቀቅኩኝ አዘጋጆቹ ተደስተው “የኢትዮጵያ ቆንጂት” የተሰኘች አንድ ነጠላ ዜማ ከአርቲስት ተስፋዬ ለማ ተበረከተልኝ፡፡ ይህ ዘፈን በእለቱ በመድረክ ላይ ታዋቂ ለሆነ ዘፋኝ ተሰጥቶ ከዘፈነው በኋላ መልሶ ለተስፋዬ ለማ አስረከበ፡፡ ተስፋዬ ለማም “ይሄ ለንግስት ተብሎ የተሰራ ዘፈን ነው; ብሎ በስጦታነት አበረከተልኝ፡፡
ድምፃዊነቱን በዚህች ነጠላ ዜማ ነዋ የጀመርሽው?
አዎ፤ ማለት ይቻላል።
አልበም ሰርተሻል?
አዎ፤የመጀመሪያ አልበሜን ባልሳሳት ከስምንት ከዘጠኝ ዓመት በፊት እዚህ መጥቼ ሰርቼ፣ በርካታ የቲቪ፣ የሬዲዮና የህትመት ሚዲያዎች ላይ ከወጣሁ በኋላ በመቻኮሌ በደንብ ሳይሰራጭ ተመልሼ ሄድኩኝ። የአልበሙ መጠሪያ “ሰላም” ይሰኛል። እዚህ ሳይሰራጭ በመሄዴ በጣም ተበሳጭቼ ነበር። ሆኖም አሜሪካ ብዙ ተሸጧል፤ በደንብ ተደምጧል፡፡
ከሞዴልነትና ድምጻዊነት በተጨማሪም የሽያጭ ባለሙያ መሆንሽን ሰምቻለሁ ---
ሙዚቃ ፓሽኔም ሆቢዬም ነው፡፡ አሁን ሙሉ በሙሉ ብገባበትም፣ ከሀይስኩል ጀምሮ ሙዚቃ ጎን ለጎን የምሰራው ፓሽኔ ነው፡፡ እንደዛም ሆኖ በአሜሪካ ለ18 ዓመት በሙሉ ሰዓት ሥራነት የሰራሁት ለሂልተን ሆቴልና ለውንደም ሪዞርት ኤግዚኪዩቲቭ ሴልስ ሪፕረዘንታቲቭ ሆኜ ነው። በሽያጭ ስራ ላይ በቆየሁባቸው ዓመታት እግዚአብሔር ባርኮኝ፣ ከ80 ሰዎች መካከል ብዙ ጊዜ አንደኛ ወይ ሁለተኛ ነበር የምወጣው። እነሱ “ቶፕ ፕሮዲዩሰር” ይሉታል፡፡ በዚህም ምክንያት ከ40 በላይ ሽልማቶችን አግኝቻለሁ፡፡ ስራችን የቫኬሽን ቤቶችን ለሀብታም ቱሪስቶች መሸጥ ስለነበር፣ በዚህ ሥራ ውጤታማ በመሆኔና ብዙ ሽያጭ በማስመዝገቤ ነው፣ ሽልማቶቹን ያገኘሁት፡፡ እነዚህን ቤቶች የምንሸጠው በሂልተን ኩባንያ ስር ስለሆነ ይኸው ወደ ሀገሬ ስመጣ ሂልተን ስፖንሰር አድርጎኝ ያረፍኩትም በሆቴሉ ነው፡፡ እዚህ እንደ ልዕልት ነው ተንከባክበው የያዙኝ። በሽያጭ ዘርፉ ለሂልተን ሆቴልና ለውንደም ሪዞርት ከ50 ሚ. ዶላር በላይ ገቢ አስገብቻለሁ፣ ብራንዱንም በጣም አከብረዋለሁ፡፡
ወደ ኢንቨስትመንቱም ገብተሽበታል ልበል?
ሰው ባገኘው አጋጣሚ፣ ባለው አቅም ሁሉ መስራት፣ መትጋት አለበት ብዬ አምናለሁ። እኔም ያው በሙዚቃና በፋሽን ዘርፉ ላይ ብሆንም፣ በኢንቨስትመንቱ በኩልም፣ ሪል እስቴት በመግዛት በማደስና በመሸጥ እየሰራሁ እገኛለሁ፡፡ እግዚአብሔር ይመስገን በዚህም ስኬታማ ነኝ፡፡ ከዚያም አልፎ ተርፎ የውጭ ሀገር ኢንቨስተሮች እዚህ ሀገሬ ላይ ኢንቨስት እንዲያደርጉ እያማከርኩ ነው፡፡ እነዚህ ኢንቨስተሮች እዚህ መዋዕለ ነዋያቸውን ቢያፈሱና ወደ ስራ ቢገቡ፣ ለሀገሬ ልጆች ትልቅ የስራ እድል ስለሚፈጥሩና የሀገር ኢኮኖሚ ስለሚያሳድጉ፣ ይህ እንዲሳካ ትልቅ ጥረት እያደረግሁ ነው ያለሁት፡፡ ለዚህ አሁን ኢትዮጵያ ውስጥ እጅግ አስፈላጊውና ሊሰራበት የሚገባው ዘርፍ የትኛው ነው የሚለውን እያጠናንና እየተመካከርን ነው፡፡ አንድ ሁለት የውጭ ኩባንያዎችን አሳምኜ መጥተው እያጠኑ ነው፡፡ እንግዲህ እግዚአብሔር ይጨመርበት፡፡
እንደሰማሁት ከሆነ በበጎ አድራት ሥራዎች ሰፊ እንቅስቃሴዎች ታደርጊያለሽ፡፡ ኢትዮጵያ ደግሞ በተለይ ከሁለትና ሦስት ዓመታት ወዲህ በኮቪድ 19 ወረርሽኝ፣ በእርስ በርስ ጦርነትና በበረሃ አንበጣ ሳቢያ ለመከራና ሰቆቃ ተዳርጋለች፡፡ ዜጎች ለአሰቃቂ ሞት፣ ለአካል ጉዳት፣ ለመፈናቀልና ለረሃብ ተዳርገዋል። ወገኖችሽን ለመደገፍ ያደረግሽው ነገር ካለ ብትነግሪኝ--?
ይሄ በጣም ጥሩ ጥያቄ ነው፡፡ የሚገርምሽ ነገር አሜሪካ ላስቬጋስ ውስጥ 45 ሺህ ኢትዮጵያዊያንና ትውልደ ኢትዮጵያዊያን ይገኛሉ፡፡ እናም ለብዙ ጊዜ እዛ ኮሚዩኒቲ ውስጥ ትልልቅ አስተዋፅኦ አድርጌያለሁ ብዬ አስባለሁ። ለምሳሌ “ህሊና ሬዲዮ” የሚባል የኮሚዩኒቲው የሬዲዮ ጣቢያ አለ፡፡  ገና ከመጀመሪያው በገንዘብም ሆነ ለህዝቡ የሚያስፈልገውን መረጃ በመስጠት እገዛ እንዳደርግ ተጠየቅኩኝ፡፡ በዚህ መሰረት ለትርፍ ያልተቋቋመ የበጎ አድራጎት ድርጅት ስላለኝ በሱ ስር “ኒኪን ይጠይቁ” የተሰኘ የሬዲዮ ፕሮግራም በማዘጋጀትና ለኮሚዩኒቲው በርካታና ጠቃሚ መረጃ በመስጠት ሳገለግል ቆይቻለሁ።
የበጎ አድራጎት ድርጅትሽ በምን ሥራ ላይ ነው የተሰማራው?
ድርጅቴ “Too helping hands” ይሰኛል። ለትርፍ ያልተቋቋመና ማህበራዊ ሃላፊነቴን ለመወጣት የምሰራበት፤  ሰዎችን የማገለግልበት ድርጅት ነው። “ኒኪን ይጠይቁ” የተሰኘው ፕሮግራምም በዚህ ስር ነበር የሚዘጋጀው። በሌላ በኩል፤ ሬዲዮው በፋይንስ እጥረት እንዳይቋረጥ የገንዘብ ድጋፍ ሳደርግ ነበር-ለረጅም ዓመት። ይህን ኮሚዩኒታችን የሚገናኝበትን ሬዲዮ በመደገፌም መረጃና ግንዛቤ በመስጠት በማገልገሌም ኩራት ይሰማኛል። ሬዲዮው እስካሁን አለ። ከዚህ በተጨማሪ ለተፈናቀሉት ወገኖችም ይሁን ለህዳሴው ግድብ የገቢ ማሰባሰብ ስራ እንዲያስተባብሩ ከተመረጡት ውስጥ አንዷ ነበርኩኝ።
በሌላ በኩል፤ እዛው ላስቬጋስ ውስጥ መንገድ በሀገራችን ስም ለማሰየም በሚደረገው እንቅስቃሴ ከተመረጡት የኮሚቴ አባላት አንዷ ነኝ። መንገዱን “Little Ethiopia” ብለን ለማሰየም እየሰራን እንገኛለን። ይህ ጉዳይ ከዚህ ስመለስ ይሳካል ብዬ አስባለሁ። በአጠቃላይ በሀገሬ ጉዳይ በሚደረግ ማንኛውም መልካም ነገር ላይ እሳተፋለሁ፤ አስተባብራለሁ፤ የሚጠበቅብኝን አደርጋለሁ።
ሁለተኛውን አልበምሽን ሰርተሽ ለማስተዋወቅ እንደመጣሽ ሰምቻለሁ። እስኪ ከአልበሙ ውጪ ሌሎች እቅዶችም ካሉሽ አጫውቺኝ---የአሁኑ አመጣጥሽ ለየት ያለ ነገር ካለውም እግረመንገድሽን ብትነግሪኝ …
የመጣሁት  በጣም ደስ የሚል እቅድ ነድፌ ነው። ለኔ ይሄኛው ጉዞዬ ታሪካዊ የሚባል ነው። አንደኛው፤ ሁለቱ የምኮራባቸው ከኮሌጅ የተመረቁ ውድ ልጆቼ፤ ሜሎዲ አሮንና ናትናኤል አሮን ለመጀመሪያ ጊዜ ሀገራቸውን ለማየት አብረውኝ መጥተዋል። በዚህ በጣም ኩራት ተሰምቶኛል። ለረጅም አመታት ብቻዬን ሆኜ ያሳደግኳቸው ልጆቼ ለቁም ነገር በቅተው ሀገራቸውን ለማየት ሲመጡ የሚፈጥረውን ስሜት አስቢው። ገና እግራችን ኢትዮጵያን እንደረገጠ ለሶስት ቀን ጸበል ቦታ ሄደን ተጠምቀንና ጸሎት ቆይተን ነው የወጣነው።
እንዴት እንደዛ አደረጋችሁ? ማለቴ እግራችሁ እንደገባ ወደ ጸበል መሄዳችሁ ገርሞኝ ነው…
እኔ በህይወቴ እግዚአብሔርን ካስቀደምኩኝ የማስበው ሁሉ ይሳካል የሚል እምነትን በውስጤ ይዤ ነው እዚህ የደረስኩት። አሁንም በዛው መንፈስ በኢትዮጵያ ላሳካ ያቀድኳቸውን ነገሮች ከመጀመሬ በፊት ጸበልና ጸሎት ያስፈልግ ስለነበር፣ ሁሉንም ከጸሎትና ከጸበል ነው የጀመርኩት። እግዚአብሔር ይመስገን አሁን ሁሉም እየተሳካ ነው ያለው። ሁሌም እምነቴን አጠናክሬ መሄዴ ነው፣ ህልሜን እንድኖር ያደረገኝ። ከዚያ ልጆቼን ጸበል አስጠምቄ፣ ለ15 ቀናት የሚጎበኙትን አስጎብኝቼ ደስ ብሏቸዋል። እዚህ ከመጣሁ  አንድ ወር ተኩል ሆኖኛል። የአልበሙ መጠሪያ “ንጉሱ” ዘፈን ቪዲዮው አላለቀም ነበር፤ እሱ በጥሩ ሁኔታ አለቀ። በቤተሰብም በኩል አንዳንድ ጉዳዮች ነበሩ። ለምሳሌ የአባቴ የንግድ ቦታዎች ነበሩ። እነሱም ጉዳዮች አለቁልኝ። ብቻ ሁሉም በተያዘለት ጊዜና እቅድ እየሄደልኝ ነው።
እስኪ ስለ አዲሱ አልበምሽ ንገሪኝ፤ ግጥምና ዜማውን ማን ሰራው? ስንት ዘፈኖች ይዟል? አንቺስ ግጥምና ዜማ ትሰሪያለሽ?
የሚገርምሽ ነገር አልበሜ በጣም በታወቁ የግጥምና ዜማ ጸሀፊዎችና በራሴም ነው የተሰራው። አንድ አራቱን እራሴ ነኝ የጻፍኳቸው። ሌሎቹን ግን ከአንጋፋዎቹ እንደነ አብርሃም ወልዴ፣ አለምጸሐይ ወዳጆ፣ ተስፋዬ ለማ ሲሳተፉበት፣ ከአዳዲሶቹ ኢዮኤል መሃሪ የተባለ በጣም ድንቅ የሆነ ልጅ ተሳትፎበታል። ግጥም ጸሀፊም አቀናባሪም ሆኖ እየሰራ ነው። ማስተሪንግና ሚክሲንግ ደግሞ ይትባረክ የተባለ ሰው ከጎኔ ሆኖ እየረዳኝ ይገኛል። ታምራት አበበ የተባለ ብሩህ ገጣሚ አለ። እሱም ዘፈኖች ጽፎልኛል። በጣም የተዋጣለት ስራ እንደሚሆን አምናለሁ። እኔ ስራው አስደስቶኛል ብዬ ለአልበም አብቅቼዋለሁና፣ ሌላውን ለአድማጮች ፍርድ ነው የምተወው።
አሁን አልበሙ ተጠናቅቆ እስኪለቀቅና እስኪመረቅ እዚሁ በመቆየት በደንብ እሰራለሁ። የመጀመሪያ አልበሜ ሳይለቀቅ በመሄዴ የቆጨኝን ቁጭት በዚህ አካክሳለሁ። እንግዲህ ለሁሉም እግዚአብሔር ይጨመርበት።
ታዲያ አልበምሽን መቼ እንጠብቅ?
ከአንድ ከሁለት ወር በኋላ ይለቀቃል። አድማጮች በጣም ይወዱታል ብዬ አስባለሁ።
አሁን ኢትዮጵያ ውስጥ ስትመጪ ያዘንሽበትና ያስከፋሽ ነገር አለ?
ያው እዛም ሆኜ አገሬን አስባለሁ። ምን አስተዋጽኦ ማድረግስ እችላለሁ ብዬ ሳስብ ከሁለት ዓመት በፊት በህይወቴ አሳዛኝ ነገር ተፈጠረ። ወንድሜ ከ8 ዓመት በፊት እዚህ አገር መጥቶ ያለ አባት የሚያድጉ ወይም አባትና እናት የሌላቸውና አያት ወይም አክስት ጋር ተጠግተው  የሚኖሩ ግን ደግሞ በትምህርታቸው ጎበዝ የሆኑ ልጆች ይፈልግና አዶፕት ያደርጋቸዋል፤ አሳዳጊያቸው ይሆናል። ከዚያም ከጓደኞቹም ከራሱም ገንዘብ እያዋጣ እነዚህን ልጆች ለስምንት ዓመት ሲያግዝና ሲረዳ ነበር። ከሁለት ዓመት በፊት እዚያው አሜሪካ በኮቪድና በአስም በሽታ ሞተብኝ፡፡ እጅግ የምወደውና የማከብረው ታላቅ ወንድሜ ነበር። በሙያው መሃንዲስ ነው። እሱ ሲሞት አጠገቡ ስለነበርኩ የመጨረሻ ቃሉ፤ “እነዚህን ልጆች አደራ” የሚል ነበር። በዚህ ቃል መሠረት፤ ከ2 ዓመት በፊት ልጆቹን ተረክቤ እዛው ሆኜ እሱ የሚያደርግላቸውን እያደረግሁ፣ ገንዘብ እየላኩኝ ማስተማሬን ቀጠልኩ። ይሄ ጉዞዬ ታሪካዊ ነው ብዬሽ ነበር ቅድም። አንዱ ታሪካዊ የሚያደርገው እነዚህን ልጆች ለመጀመሪያ ጊዜ በአካል ያገኘሁበትም በመሆኑ ነው። እነሱን ሳገኛቸው ደስታም ሀዘንም ነው የተሰማኝ። ሃዘኑ፤ ወንድሜ ቢኖርና አብረን ብናገኛቸው ከሚል ነው። ደስታው፤ ቃሌን ጠብቄ ሃላፊነቴን በመወጣቴና በአካል መገናኘቴ ነው።
ዕድሜያቸው ስንት ነው? በምን ሁኔታ ላይ ናቸው?
መጨረሻ ላይ አዶፕት ያደረጋቸው እህትማማቾች ናቸው። እድሜያቸው 4 እና 6 አመት ነው። ትልቅ የሚባለው 19 ዓመት ነው። እናም ኮምፒዩተሮች፣ ስልኮች፣ ልብሶችና ሌሎች በርካታ ነገሮች ይዤላቸው ነው የመጣሁት፡፡ እዚህም ከመጣሁ በኋላ ለበዓል፣ ለትምህርታቸው የሚያስፈልጋቸውን ነገር አሟላሁ፤ ልጆቹን ደስ ብሏቸው ሳይ "በቃ ወንድሜ አልሞተም; ነው ያልኩት፤ በጣም ተደሰትኩ። በሌላ በኩል፤በርካታ ሊታገዙ ድጋፍ ሊደረግላቸው የሚገቡ እናቶችና ልጆችን አይቻለሁ። አቅሜ ቢፈቅድና ብችል ሁሉንም እንደነዚህ ልጆች ብረዳቸውና ባግዛቸው ደስ ይለኝ ነበር። ነገሩ ግን በአንድ ግለሰብ የሚሆን አይደለም። እኔ እግዚአብሔር ፈቅዶ የምችለውን እያደረግሁ ነው።
ይሄ ችግር ተቀርፎ ባይ ደስ ይለኛል። ሃገሬ ከድህነት ተላቃ፤ ሰላም አንድነት፣ ፍቅርና መረጋጋት የሰፈነባት ሆና ማየት ምኞቴ ነው። ለዚህ በግሌ የምችለውን ሁሉ አደርጋለሁ። ሌላውም የድርሻውን ከተወጣ የምንፈልጋትን ኢትዮጵያን ማየት እንችላለን። ምክንያቱም ኢትዮጵያ ብዙ አቅም ያላትና ለሁላችንም የምትበቃ ሀገር ናት። ፍቅርና ሰላም ካለ፣ ሁሉም ይኖራል ብዬ አምናለሁ፡፡
ከመሰነባበታችን በፊት የምትይው ነገር ካለ ዕድሉን ልስጥሽ---
እኔ ብናነሳው ደስ የሚለኝ የቱሪዝም ጉዳይ ነው። እንደነገርኩሽ እኔ ለ18 ዓመታት በሂልተን ሆቴልና በወንዶም ሪዞርት ከብዙ ቱሪስቶች ጋር የመገናኘት ዕድል ነበረኝ። በዚህም ስኬታማ ነኝ። የእነዚህ ቱሪስቶች ዳታ ቤዝም ስላለ እነዚህ ቱሪስቶች ወደዚህ ሀገር ተጋብዘው መጥተው የሀገራችንን የአየር ንብረት፣ መልክአ ምድር፣ የተፈጥሮና ሰው ሰራሽ መስህቦች፤ ክብራችንን ጭምር አይተው እንዲመለሱ የማደርግበትን ሁኔታ እያሰብኩ ነው።
በዚህ ረገድ ቱሪዝም ሚኒስቴር እና ሌሎች ጉዳዩ የሚመለከታቸው አካላት አብረውኝ እንዲሰሩ እጠይቃለሁ። ይህ እድል ሊያመልጠን አይገባም። ከዚህ በፊት ይህን ሀሳብ አቅርቤ የሰማኝ ያደመጠኝ አካል አልነበረም። እኔ ግን ተስፋ አልቆርጥም፤ ተደማምጠንና ተረዳድተን ለሀገራችን የሚበጀውን ማድረግ አለብን። በመጨረሻም ለዚህ ሁሉ ያበቃኝን እግዚአብሔርን አመሰግናለሁ። ማናጀሬን ለተብርሃንን፣ ደረጀ በለጠን፣ ግርማ በላሜን፣ ልጆቼንና ከጎኔ ሆነው የሚያግዙኝን ሁሉ አመሰግናለሁ።


    የሎከርቢው ፍንዳታ…
                              አሌክስ አብርሃም


               በፈረንጆቹ 1988 …ንብረትነቱ የፓን አሜሪካ አየር መንገድ የሆነ ግዙፍ የመንገደኞች አውሮፕላን የሎከርቢ ሰማይ ላይ ፈነዳ! ሎከርቢ የስኮቲሾች ከተማ ናት፡፡ በፍንዳታው 243 መንገደኞችና 16 የበረራ ሰራተኞች እንዲሁም ፍንዳታው በተከሰተባት ከተማ አገር ሰላም ብለው ቤታቸው የተቀመጡ 11 ነዋሪዎች ድንገት በዘነበባቸው እሳት ህይወታቸውን አጡ፡፡ በኋላ ሲጣራ ለካስ የሽብር ጥቃት ነው፡፡ እንደ ሻንጣ ቦምብ ጭነውለት ነበር የተነሳው፡፡ እዛ ሲደርስ ቡምም!! በዩናይትድ ኪንግደም ትልቁ የሽብር ጥቃት ነው፤ እስከዛሬ ይባላል!
ባጭሩ ይህን የቦንብ ጥቃት እንዲፈፀም ያዘዙት የሊቢያው መሪ ሙዓመር ጋዳፊ መሆናቸው ተደረሰበት ተባለ፡፡ ጋዳፊ ታዲያ ሽምጥጥ አድርገው ካዱ፡፡ እንደውም ያቀናበሩት ሰዎች ሊቢያ መሽገው መልካም ስማችንን ሊያጠፉ እንደሆነ ደርሰንበታል፤ እናደባያቸዋለን ምናምን ብለው ሐዘናቸውን ሁሉ ገለፁ፡፡ በእርግጥ ከ15 ዓመታት በኋላ ሐላፊነቱን ወስደው ግን በቀጥታ አላዘዝኩም ካሉ በኋላ ለእያንዳንዱ የአደጋው ተጎጂ ቤተሰብ ጠቀም ያለ ካሳ ለመክፈል ተስማምተው ነበር፡፡
ዋናው ወጋችን እሱ አይደለም …ጋዳፊ "እኛ አላዘዝንም ከደሙ ንፁህ ነን፤ የዚህ ሽብር አቀናባሪዎች ሊቢያ መመሸጋቸውን አውቀን እርምጃ እንዲወሰድ ትዛዝ ሰጥተናል…" እያሉ በሚከራከሩበት ወቅት አንዲት ቀልቃላ ጋዜጠኛ ወደ አንድ ዝቅተኛ የሊቢያ አየር ሃይል አዛዥ ጋ ሄደች አሉ! ሄደችና ...
"ሽብሩን ያቀነባበሩት ሰዎች በሊቢያ እንደሚገኙ ታውቋል?" ስትል ጠየቀች፡፡
"አዎ ታውቀዋል፤ ያሉበትም ተለይቷል"
"እርምጃ እንድትወስዱም ታዛችኋል?"
"አዎ አየር ሃይሉ እርምጃ እንዲወስድ ታዞ ተዘጋጅቶ ነበር"
"እና ለምን አልወሰዳችሁም?"
"የሽብርተኞቹን ስልክ ጠልፈን ያሉበትን ቦታ ለየን"
"እና ምን ትጠብቃላችሁ፤ መሳሪያ የላችሁም?"
"ሞልቶ!"
"እና?" አለች በስሜት፡፡
"ችግሩ ምን መሰለሽ" አሉ ሰውየው ፀጉራቸውን እያከኩ … "የጠለፍነው ስልክ ሲግናል የሚያሳየው ሰዎቹ መሪያችን ጋዳፊ ያረፉበት ቤተመንግስት ውስጥ ማረፋቸውን ነው!"
እንዲህ ያለ ትግል ነው የገጠመን! (ሳይሉ አልቀሩም በአረብኛ)

___________________________________________

                          ሽልማቱ
                            በእውቀቱ ስዩም

            “በምርጥ ነጠላ ዜማ ዘርፍ ያመቱ ኮከብ ተሸላሚ ማሞ መንገሻ; ብሎ ለፈፈ፥ የመድረክ መሪው፡፡
አዳራሹ በጭብጨባ ተርገበገበ፡፡
የማሞ ልብ በሀይል መምታት ጀመረ፥ ተሸላሚነቱን ከሰማ ጊዜ ጀምሮ መኪና እሸለማለሁ የሚል ሰመመን ጭንቅላቱን ተቆጣጥሮት ቆይቷል፤ ምን አይነት መኪና ይሆን እሚሸልሙኝ የሚል ሀሳብ ጠመደው፤
ወደ ሽልማቱ አዳራሽ የመጣው የሰፈሩን ላዳ ሹፌር አስቸግሮ ነው፤ በሰፈሩ የታወቀውን የላዳ ሹፌር ከዚህ በሁዋላ ማሞን በዱቤ ላለማጓጓዝ ምሎ ነበር፤ ይሁን እንጂ ማሞ ለሽልማት የታጨበትን መጥርያ ሲያሳየው ተረታ፡፡ ደንበኛው፤  #ገንዘብ ከሸለሙኝ እስከዛሬ ያለብኝን እዳ እጥፍ አድርጌ እከፍልሀለሁ፤ መኪና ከሸለሙኝ ላንድ ወር ራይድ ትሰራባታለህ” የሚል ተስፋ ሰጥቶታል፡፡
ማሞ ከወንበሩ ተነስቶ ወደ መድረኩ አቅጣጫ ለመራመድ ሲቃጣ የፕሮግራሙ መሪ፤ “ማሞን ወደ መድረኩ ከመጥራታችን በፊት ለዚህ ሽልማት እውን መሆን ከፍተኛ ደጋፍ ያደረጉ ስፖንሰሮቻችንን እናስተዋውቃለን፤; ብሎ ጀመረ #ጌድዮን ሪል ስቴት ለድርጅታችን ቢሮ እንደሚሰጠን ቃል ስለገባ እናመሰግናለን! ጠንበለል ቢራ አንድ ሚሊዮን ብር ስላበረከልን ደስታችን ወደር የለውም፤ እባካችሁ ጭብጨባ ያንሳል”
ጭብጨባው አዳራሹን ነቀነቀው፡፡
የፕሮግራሙ መሪው ዝርዝር ውስጥ ያልተጠቀሰ የንግድ ድርጅት የለም፤ ማሞ በቆመበት እግሮቹ ሊክዱት ሲያንገራግሩ ተሰማው፤ "ከዚህ በሁዋላ ሁለት ደቂቃ ከቆምኩ ዊልቸር እንጂ መኪና አያስፈልገኝም" ብሎ አሰበ፡፡
ሁለት ቆነጃጅት ሴቶች አጅበው ወደ መድረክ ወሰዱት፤ ከመድረኩ ጫፍ እስከ ሸላሚው ድረስ ያለው ርቀት አገር አቁዋራጭ ሆነበት፤ መሸለሚያው ላይ ሲደርስ ሁለት ግላድያተር እሚያካክሉ ወጠምሾች የብረት ሙቀጫ እሚያክል ዋንጫ መዳፉ ላይ አስቀመጡለት፡፡
ወደ ወንበሩ ሲመለስ ጋዜጠኞች አንገቱን በየማእዘኑ እየጠመዘዙ የካሜራ ብርሀን ነሰነሱበት፥
የፕሮግራም መሪው ሌሎችን ተሸላሚዎች አንድ ባንድ መጥራት ቀጠለ፤ ባዳራሹ ውስጥ ካሉት ታዳማዊዎች መካከል ዘጠና በመቶው ተሸላሚዎች ሳይሆኑ አልቀሩም፤ ማሞ የመዳፉ መስመሮች እስኪደበዝዙ ሲያጨበጭብ ቆየ፡፡
የመድረኩ ወከባ በረድ ሲል አንድ ዘፋኝ መድረክ ላይ ወጦ እንደ ድንገተኛ ዝናብ ታዳሚውን መበትን በሚችል ድምጽ መዝፈን ጀመረ፤ ማሞ ቀስ ብሎ ዋንጫውን እንደ ግንድ ጉማጅ ትከሻው ላይ አድርጎ ካዳራሹ መሰስ ብሎ ወጣ፤ ትንሽ እንደተራመደ፤ የቤትና የጉዋዳ እቃዎችን የሚሸጥ ሱቅ ተመለከተ፥
“ይሄንን ስንት ትገዛኛለህ?” አለው ባለሱቁን፡፡
“ምንድነው?” አለ ባለሱቁ ሽልማቱ ላይ አፍጥጦ፡፡
“ዋንጫ;
“ይሄማ ዋንጫ ሊሆን አይችልም”
“ታድያ ምንድነው?" አለ ማሞ፤የተሸከመውን ሽልማት እንደገና እየቃኘ፡፡
“ባለ እጄታ ዳምቤል ነው የሸለሙህ” ባለሱቁ ዘለግ ያለ ሳቅ ሳቀ፡፡
“እሺ ስንት ትገዛኛለህ?” ማሞ በቅጡ በማይሰማ ድምጽ ቀጠለ፡፡
“በነጻ ብትሰጠኝ ንክች አላደርገውም፤ ያንድ ደርዘን ስኒ ቦታ ይይዝብኛል፥ ለምን ጂም ቤት አትሞክርም?;
ከጥቂት ደቂቃ በሁዋላ ማሞ ራሱን የሞላ ሚኒባስ ውስጥ አገኘው፡፡
ወያላው ትከሻውን ሲነካው ቀና አለ፤
“ጀለስ!" አለው ወያላው፤ ማሞን ቁልቁል እያየው፡፡
“አቤት”
“ለእቃው ትከፍላለህ”

________________________________________________________

                              እርግጠኛነት - እግር ኳስ -
                             Spatiotemporal Continuity
                                    ገመቹ መረራ ፋና

              አንድ የፍልሥፍና ዕንቆቅልሽ (Philosophical conundrum) አለች፣ ቲዎሪው “ስፓሺዎቴምፖራል ኮንቲኒውቲ” ሲባል በቅንፍ የOxford Dictionary of Philosophyን ትርጉም አስቀምጬልሃለሁ። ከረዘመብህ ወይም ከደበረህ እለፈው፣ ከርሱ በታች በምሳሌ ተብራርቷል።
([It is] the property of well-behaved objects in space and time, that they do not ‘jump’, or in other words if a body exists at one time and a later time, then it exists throughout the interval, and if it is in one place at a time and a different place at a later time, then it traced a path through space from the one place to another.)
«የቲሲየስ መርከብ»
ከሁለት ሺህ ዓመታት በፊት የነበረው ግሪካዊ የታሪክ ሰው እና ጸሐፊ ፕሉታርክ አንድ ተረክ ፅፏል፣ የቲሲየስ መርከብ የሚል። ቲሲየስ ምናልባት አቴንስን እንደመሰረተ የሚነገርለት የግሪክ ንጉስ ነበር። በርካታ ጦርነቶችን ገጥሞ ድል ያደረገው ጀግናው ቲሲየስ ሲሞት አቴናውያን ለመታሰቢያው ብለው ቲሲየስ ለዘመቻ ይጠቀምባት የነበረችውን መርከቡን ወደብ ላይ ለመታሰቢያነት አቆሟት። በጊዜ ሂደት መርከቧ አረጀች። ነዋሪዎቹም የመርከቧን አካል በአዲስ ጥርብ እንጨት እየተኩና እያደሱ የቲሲየስ መታሰቢያ የሆነቸውን መርከብ አቆይዋት። በጊዜ ሂደት ሁሉም የመርከቧ አካል በእርጅና ወላልቆ በአዲስ ተተክቷል። ይሄኔ ነው ጥያቄው የሚነሳው። ይቺ አሁን ያለችው መርከብ እውን የቀደመችው ያቺ የቲሲየስ መርከብ ነች? ወይስ ሙሉ ለሙሉ ሌላ መርከብ ነች? ሌላ ሆናለች ካልን እንዴት ነው የሰውዬው መታሰቢያ ልትሆን የምትችለው?
የክለብ ድጋፍ
የእንግሊዝ ፕሪምየር ሊግ ማየት የጀመርኩት ሀይስኩል ተማሪ እያለሁ ነበር። ጓደኛዬ አሹ እና የዲኤስቲቪ እየከፈለልን ያሳየን የነበረው ፍሬአለም የተባለው ጓደኛችን የቼልሲ ደጋፊዎች ነበሩ። አጋጣሚው የቼልሲ ደጋፊ አድርጎኝ አረፈ። በዚያው የጆሴ ሞሪንሆ ወደ ቼልሲ መምጣት የበለጠ ደጋፊነቴን አጠነከረው። ማሸነፍ ደስ ይላል። እነ አስቶን ቪላን የመሳሰሉ ክለቦች 7 እና 8 ለ 0 እያሸነፈ «ተከላካይ ቡድን» ቢሉትም ግድ አልሰጠኝም። ሰማያዊዎቹን ወጥሬ ደገፍኩ። ከዚያ ዩኒቨርሲቲ ገባሁ። ቼልሲም ለ4 ዓመታት አብሮኝ ገባ። በኳስ ተሸንፎ በቃላት ጦርነት የሚያሸንፈው The Special One ለሚያበሽቁን ጓደኞቻችን መድሃኒት ሆነልን። አሸንፈው እንኳን ደስታቸውን እንዳያጣጥሙ ማድረግ ይችላል። እኛን ከጓደኞቻችን ምላስ ካሳረፈ ተጫዋቾቹን ደግሞ እንዴት እንደሚከላከላቸው ማሰቡ ያስደስታል።
ከተመረቅኩና ሥራ ከጀመርኩ በኋላ ባሉት ዓመታት ግን ቀስ በቀስ ኳስ ማየት ቀነስኩ። ከዚያም አቆምኩ። እግር ጥሎኝ ትልልቅ ጨዋታዎች ካልሆኑ አሊያም የአህጉራት ዋንጫ ካላየሁ በስተቀር ከእንግሊዝ ፕሪምየር ሊግ ቋሚ ተመልካችነት ተፋታሁ። ሳቆም ለራሴ የሰጠሁት ምክንያት ሞሪንሆ ከቼልሲ ከወጣ በኋላ ስለፍራንክ ላምፓርድ ያደረጋት ያቺን ንግግር ነበር። «ቼልሲ ያለ ላምፓርድ ቲማቲም የሌለው ሰላጣ ማለት ነው» . . .
እውነትም . . . እነዚያ የምወዳቸው ተጫዋቾች በጊዜ ሂደት የሉም። አርሰናልን ሁሌ የሚያስለቅሰው ድሮግባ፣ ከዳሚየን ደፍ ጋር በክንፍ እየበረሩ የቼልሲን የማይረታ ቡድን የፈጠረው አሪየን ሮበን፣ የፕሪምየር ሊጉን «ክሊን ሺት» ሪከርድ ሰብሮ «ሚስተር ዜሮ» የሚል ቅፅል የተሰጠው ፔትር ቼክ፣ መሀል ሜዳውን እንደጉድ የሚፈነጭበት አጭሩ ማኬሌሌ፣ በጆን ቴሪ የእንግሊዛዊነት ፕሪቪሌጅ አስደናቂ አቋሙ የተሸፈነው የሊጉ ምርጥ ተከላካይ ሪካርዶ ካርቫልሆ፣ ለኔ የዓለማችን ቦክስ ቱ ቦክስ ምርጡ ሆልዲንግ ሚድፊልደር የሆነው ማይክል ኢሲየን፣ ወዘተ የሉም። በሌሎች ተተክተዋል። አሰልጣኞች ሄደው ይመጣሉ። ኳስ የማይወዱት አቭራም ግራንት እንኳን አሰልጥነዋል። ከአሰልጣኞቻቸው ጋር የኳስ ፍልስፍናው ተቀይሯል። እና የቱን ቼልሲ ነው የምደግፈው? ውስጡ ያሉትና ክለቡን እንድወደው ያደረጉኝ ተጫዋቾች እንዲሁም አጨዋወት ከሌለ ክለቡ ባዶ ካርቶን ነው። ካርቶኑ ቲማቲምም፣ ድንችም፣ አፈርም ሲይዝ አብሬ መደገፍ አለብኝ?
በጭራሽ።
እናም ከቼልሲ ተፋታሁ . . .
እንግዲህ ይሄ የኔ ሎጂክ በሀገር በቀል ቡድኖች ላይ አይሰራም። ምክንያቱን በምሳሌ ላስረዳ። የአምቦ ልጆች የሙገር ደጋፊዎች ናቸው/ነበሩ። እኔም የሙገር ደጋፊ የነበርኩት ሙገር ፕሪምየር ሊጉን ከተማችን ድረስ ያመጣ የከተማችን ክለብ ስለነበረ ነው።
እንዲያ ባይሆን ኖሮ የኢትዮጵያ ፕሪምየር ሊግ ለኛ የቲቪና የሬዲዮ ዜና ላይ የሚቀርብ ተራ ነገር ነበር የሚሆነው። የጎንደር ልጆች ፋሲል ከነማን፣ የአዳማ ልጆች አዳማ ከነማን፣ የሶዶ ልጆች ወላይታ ዲቻን፣ የሀዋሳ ልጆች ሀዋሳ ከነማን ወዘተ ይደግፋሉ። የክለቡ ውጤት ወይም ጨዋታ አማረም አላማረም ይደግፉታል፤ ክለባቸው እንዲያሸንፍላቸው ይፈልጋሉ። ይሄ የከተማህ ክለብ የሚያመጣልህ የባለቤትነት ስሜት፣ የታማኝ ደጋፊነት ስሜት ነው።
አንዳንዴ በአንድ ከተማ ውስጥ ሁለት ክለቦች ይኖራሉ። እንደ ቡናና ጊዮርጊስ። ከሁለቱም እኩል ርቀት ላይ ትገኛለህ - የምታውቀው ተጫዋች የለም፣ የተለየ ቁርኝት የለህም፣ ጓደኞችህ እኩል እኩል ደጋፊዎች ናቸው ምናምን። ይሄኔ የተሻለ የሚጫወተውን ልምረጥ በቃ ልትል ትችላለህ። ቡናን ወይም ጊዮርጊስን ልደግፍ ትላለህ። ይሄኔ በአጨዋወታቸው መዝናናትና በውጤታቸው መደሰት ስለምትፈልግ የአሁን ብቃታቸውን፣ ውጤታማነታቸውን ምናምን ታይና ትወስናለህ።
አንድ ኢትዮጵያዊ የእንግሊዝ ፕሪምየር ሊግ ክለቦችን ሲደግፍ ግን እነዚህ ኤለመንቶች በሙሉ የሉም። ልክ እንደኔ ጓደኛህ፣ ቤተሰብህ ወይም ወላጆችህ ያወረሱህ የክለብ ድጋፍ ታሪክ ነው የሚኖርህ። ለዚያ ነው የእንግሊዝ ክለቦች ድጋፍ እንደሀይማኖት ከወላጆች ወይም ከጓደኞች የሚወረስ ነው ያልኩት። ለዚያም ነው ዛሬም የአርሰናል እና የዩናይትድ ደጋፊዎች የሚበዙት።
እንደዚያ ባይሆን ኖሮ (የሚወረስ ባይሆን ኖሮ)፣ ወቅታዊ አቋም እናይና እንደግፍ ነበር። ወቅታዊ አቋም ስናይ ደግሞ ባለፉት አንድ ደርዘን ሲዝኖች ማንችስተር ሲቲ ምርጥ የሚባል አጨዋወት፣ አቋምና ውጤት ነበረው። አንድ ወጣት በደንብ አጣጥሞ ኳስ ማየት በ13 ዓመቱ ጀመረ ብንል፣ በዚህ ሰዓት ጥሩ ጨዋታ፣ ጥሩ ውጤትና የክለብ አቋም ላይ የተመሰረተ ድጋፍ የሚሰጡ፣ ዕድሜያቸው ከ13 እስከ 25 የሆነ፣ ከአርሰናል፣ ቼልሲና ዩናይትድ ደጋፊዎች እኩል ቁጥር ያላቸው ሲቲን የሚደግፉ ወጣቶች መኖር ነበረባቸው።
(ከቅድሙ ፖስት በኋላ እኔን ፌስቡክ ላይም ሆነ መሬት ላይ አጋጥመውኝ ባያውቁም በርካታ የሲቲ ደጋፊዎች እንዳሉ ሰምቻለሁ። ይሄ አሪፍ ነገር ነው።)

______________________________________________

                               የአለማችን ታዋቂ ሰዎች ስለ ንባብ


 1. “ማንበብ ትልቅ ሀብትን ያጎናፅፋል። እስከዛሬ በአለማችን ላይ ስለተከሠቱ እና በሌሎች ሰዎች ስለተሰሩ ነገሮች በሙሉ ማወቅ የምንችለው ማንበብ ስንጀምር ነው።” (አብርሃም ሊንከን)
2. “በህይወቴ ማወቅ የምፈልጋቸው ነገሮች በሙሉ መጽሐፍቶች ውስጥ አሉ። የኔ ምርጥ ጓደኛ ብዬ የምቀርበው ሰው ያላነበብኩትን መጽሐፍ “እንካ አንብብ” ብሎ የሚሰጠኝ ነው።” (አብርሃም ሊንከን)
3. “እዚህ ምድር ላይ ግዜ የማይሽረው ደስታን የሚሰጠን ብቸኛው ነገር መጽሐፍ የማንበብ ልምድ ነው። ሁሉም ደስታዎቻችን በወረት ከእኛ ሲለዩን መጽሐፍ የማንበብ ልምዳችን ግን ዘወትር ደስተኞች ያደርገናል።” (አንቶኒ ትሮሎፔ)
4. “ዘወትር ባነበብኩኝ ቁጥር ውስጤ የነበረውና ያለው ትልቁ የመቻል አቅም ይቀሰቀሳል።” (ማልኮምኤክስ)
5. “የኔን የግል ህይወት ብቻ ሳይሆን በዙሪያዬ ያሉ ሰዎችን ህይወት መለወጥ የቻሉ ሀሳቦችን መተግበር የቻልኩት መጽሐፍ በማንበቤ ነው።” (ቤል ሑክሥ)
6. “መጽሐፍን የሚያነብ ሰው በህይወት ውጣ ውረዱ አያማርርም። ሠዎች ለምን ጎዱኝ፣ ለምንስ አያስቡልኝም ብሎም ሌሎችን አይወቅስም። ከሌሎች ጋርም አይቀያየምም፤ ምክንያቱም መጽሐፍ የሚያነብ ሰው ለራሱ ስኬትና ደስተኛነት ራሱ ብቁ ነውና ከሌሎች ምንም ስለማይጠብቅ።”(ባሮው)
7. “ዛሬ ላይ ያለህ ማንነት የዛሬ አምስት አመት ከሚኖርህ ማንነት ጋር ፍፁም ለውጥ ሳይኖረው ተመሳሳይ ነው። ግን በነዚህ አመታቶች ውስጥ መጽሐፎችን ካነበብክ አዎ! ከአሁኑ ይልቅ የዛሬ አምስት አመት የተሻለ ማንነት ይኖርሃል።” (ቻርሊጃንሥ)
8. “ለአንድ ሠው መጽሐፍ ስትሸጥ የሸጥከው ብዙ ወረቀቶችን፣ የተፃፈበትን ቀለምና ጥራዙን አይደለም። ለርሱ የሸጥክለት ዋናው ነገር ሙሉ የሆነ አዲስ ህይወትን ነው።”(ክርስቶፈር ሞርሌይ)
9. “በዚህ ዘመን በየትኛውም ሁኔታ በጣም ግዜ የለኝም፣ እረፍት የለኝም ብለህ የምታስብ ቢሆን እንኳን ለማንበብ የግድ ግዜ መስጠት አለብህ። ይህን አላደረክም ማለት ግን በገዛ ፍላጎትህ ራስህን አላዋቂ እያደረከው ነው ማለት ነው።”(ኮንፊሽየሥ)
10.“ድሮ ልጅ ሣለሁ ወደ ትምህርት ቤት ስሔድ ዘወትር አፍንጫዬን በመጽሐፍ ደብቄ ነበር። ይኸው ዛሬ ላይ ታዲያ እዚህ ለመድረሴ ዋና ምክንያት ሆኖኛል።”(የሙዚቃ አቀንቃኙ ሱሊዮ)
መልካም ጊዜ  with Mekibebe Ayalew.

         እናት ፓርቲ በደቡብ ክልል ወላይታ ዞንና በአማራ ክልል የሚገኙ አመራሮቹ  እንደታሰሩበት አስታወቀ።
ፓርቲው በአማራ ክልል እየተፈጸመ ነው ባለው አፈና፣ አቶ ሙሉጌታ የሺጥላ የተባለ የሰቆጣ መምህራን ትምህርት ኮሌጅ መምህርና የእናት ፓርቲ የሳይንት 2 ምርጫ ክልል የህዝብ ተወካዮች ምክር ቤት እጩ ተወዳዳሪ፣እንዲሁም በህልውና ዘመቻው ወጣቱን በማስተባበር፣ በግንባር በመዋጋትና በማዋጋት ጭምር ከፍተኛ ዋጋ የከፈለና አሁንም በመምህርነት ስራ ላይ ተሰማርቶ ያለ አመራሩ፣ ከስራው ቦታ እንዳ “ታፍኖ” ከተወሰደ በኋላ ፓርቲው መግለጫውን እስካወጣበት ሃሙስ ድረስ ያለበት አለመታወቁን አመልክቷል።
ሌላኛው አቶ ታደለ ጋሾ የተባለ የአዊ ዞን ደጉሳ ሽኩደድ (ቲሊሊ) ከተማ የእናት ፓርቲ ም/ሰብሳቢ  በተመሳሳይ መልኩ “ታፍኖ” ከተወሰደ በኋላ እስካሁን አድራሻው አይታወቅም ያለው ፓርቲው፤ የእናት ፓርቲ ሞጣ ቅርንጫፍ፣ የፓርቲው የሕዝብ ተወካዮች ም/ቤት እጩ ተወዳዳሪ የነበረው አቶ ምግባሩ አስማረ ደግሞ፣በሞጣ ፖሊስ ጣቢያ ታስሮ እንደሚገኝ አመልክቷል።
የፓርቲው አባላት  በአማራ ክልል  ብቻ ሳይሆን በደቡብ ክልል ወላይታ ዞንም መታሰራቸውን ያወሳው መግለጫው፤ በወላይታ ዞን የእናት ፓርቲ ስራ አስፈጻሚ አባልና የሶዶ አካባቢ የሕዝብ ተወካዮች ም/ቤት እጩ ተወዳዳሪ የነበሩት ወ/ሮ ስመኝ ታደመ መታሰራቸውንም አስታውቋል።
መንግስት በየአካባቢው በፓርቲው አመራርና አባላት ላይ የሚፈጸሙ  አፈናዎችና እስራቶችን እንዲያስቆም የጠየቀው እናት ፓርቲ፤ ብሔራዊ ምርጫ ቦርድና የኢትዮጵያ  ሰብአዊ መብቶች ኮሚሽን ድርጊቱን እንዲያወግዙና በመንግስት ላይ ጫና እንዲፈጥሩ  ጥሪ አቀርቧል።



 • በአለማችን ከሚከሰተው ሞት 16 በመቶው ከብክለት ጋር የተያያዘ ነው
• በአለማችን 1 ቢሊዮን አካል ጉዳተኞች ድጋፍ ሰጪ መሳሪያዎችን አላገኙም
            በመላው አለም በየአመቱ 9 ሚሊዮን ያህል ሰዎች በተለያዩ አይነት ብክለቶች ለህልፈተ ህይወት እንደሚዳረጉና  በየአመቱ በመላው አለም ከሚከሰተው አጠቃላይ ሞት 16 በመቶ ያህሉ ከብክለት ጋር የተያያዘ መሆኑን ከሰሞኑ የወጣ አንድ አለማቀፍ ጥናት አመልክቷል፡፡
ላሰንት የተባለው የሳይንስ መጽሄት ከሰሞኑ ያወጣውን የጥናት ውጤት ጠቅሶ አሶሼትድ ፕሬስ እንደዘገበው፣ ከአለማችን አገራት መካከል በርካታ ሰዎች በብክለት ሳቢያ የሚሞቱባት ቀዳሚዋ አገር ህንድ ስትሆን በአገሪቱ በአመት 2.4 ሚሊዮን ያህል ሰዎች በብክለት ለሞት ይዳረጋሉ፡፡ በአመት 2.2 ሚሊዮን ያህል ሰዎች ከብክለት ጋር በተያያዘ ለሞት የሚዳረጉባት ቻይና ሁለተኛ ደረጃን መያዟንም ጥናቱ ያመለክታል፡፡
በአለማችን ከመኪኖችና ከኢንዱስትሪዎች በሚወጣ በካይ ጋዝ ሳቢያ በሚከሰት ብክለት ለሞት የሚዳረጉ ሰዎች ቁጥር  ባለፉት 20 አመታት በ55 በመቶ ያህል ጭማሪ ማሳየቱንና በየአመቱ ከሚከሰተው አጠቃላይ የብክለት ሞት ሁለት ሶስተኛ ያህሉን የሚያስከትለው የአየር ብክለት መሆኑን የሚጠቁመው ጥናቱ፤ ብክለት በሚል ካካተታቸው መካከል የመኪኖችና ኢንዱስትሪ በካይ ጋዞች፣ የውሃ ብክለትና ከሲጋራ አጫሾች የሚወጣ በካይ ጭስ እንደሚገኙበትም ለማወቅ ተችሏል፡፡
በሌላ ዜና ደግሞ፣ በመላው አለም የሚገኙ 1 ቢሊዮን ያህል ህጻናትና አዋቂ አካል ጉዳተኞች ድጋፍ ሰጪ መሳሪያዎችንና ቴክኖሎጂዎችን ማግኘት ቢኖርባቸውም ተጠቃሚ እንዳልሆኑ በ70 የአለማችን አገራት ላይ የተሰራና ሰሞኑን የወጣ አንድ አለማቀፍ ሪፖርት ገልጧል፡፡
የአለም የጤና ድርጅትና የተባበሩት መንግስታት የህጻናት መርጃ ድርጅት በጋራ ይፋ ያደረጉት ጥናት እንደሚለው፣ በመላው አለም ከ2.5 ቢሊዮን በላይ አካል ጉዳተኞች ተሸከርካሪ ወንበርና ማዳመጫን የመሳሰሉ አንድ ወይም ከዚያ በላይ ድጋፍ ሰጪ መሳሪያዎችን ማግኘት ቢኖርባቸውም 1 ቢሊዮን ያህሉ ተጠቃሚ መሆን አልቻሉም፡፡
በተለይም አነስተኛና መካከለኛ ገቢ ባላቸው አገራት የሚኖሩ አካል ጉዳተኞች መሰል ድጋፍ ሰጪ መሳሪያዎችን የሚያገኙት 3 በመቶ ያህሉ ብቻ እንደሆኑ የጠቆመው ጥናቱ፤ በመላው አለም 240 ሚሊዮን ያህል ህጻናት አካል ጉዳተኞች እንደሚኖሩና መሰል ድጋፍ የማግኘት መብታቸውን ለማስጠበቅ መንግስታትና አለማቀፉ ማህበረሰብ ርብርብ ማድረግ እንደሚገባው ያመለክታል፡፡



             የስነተዋልዶ ጤና ፖሊሲዋን ለማሻሻል ልዩ ትኩረት እንደሰጠች የሚነገርላት ስፔን፣ ሴቶች የወር አበባ በሚመጣበት ወቅት ከሚከሰትባቸው ህመም እንዲያገግሙ ለማገዝ በየወሩ የሶስት ቀናት የስራ እረፍት ፈቃድ ለመስጠት የሚያስችል ህግ ማርቀቋን ሮይተርስ ዘግቧል፡፡
ረቂቅ ህጉ በመጪው ሳምንት ለአገሪቱ ፓርላማ ለውሳኔ እንደሚቀርብ የጠቆመው ዘገባው፤ ህጉ ጸድቆ ተግባራዊ የሚሆን ከሆነ ስፔን የወር አበባ እረፍት በመስጠት በምዕራቡ አለም የመጀመሪያዋ አገር እንደምትሆን ቢነገርም አንዳንዶች ግን ሴቶችን ከስራ ገበታ የሚያገልል ነው ሲሉ ህጉን እንደተቃወሙት ገልጧል፡፡
ህጉ የሚጸድቅ ከሆነ የወር አበባ ሲመጣባቸው ከፍተኛ ህመም የሚሰማቸው ሴቶች በየወሩ የ3 ቀናት የስራ እረፍት እንደሚሰጣቸው የጠቆመው ዘገባው፤ በመጪው ማክሰኞ ለአገሪቱ ፓርላማ የሚቀርበው ረቂቅ ህጉ ከወር አበባ እረፍት በተጨማሪ ለተማሪዎችና ለችግረኛ ሴቶች የንጽህና መጠበቂያዎችን በነጻ መስጠትና የሞዴስ ቀረጥ ማንሳትን ጨምሮ ሌሎች አዳዲስ ህጎችን ማካተቱንም አክሎ ገልጧል፡፡
ለሴቶች ተመሳሳይ የወር አበባ እረፍት በመስጠት ላይ የሚገኙ የአለማችን አገራት ጃፓን፣ ደቡብ ኮርያ፣ ኢንዶኔዢያና ዛምቢያ ብቻ መሆናቸውንም አስታውሷል፡፡

   • የአሜሪካው ቤክሻየር ሃታዌ 1ኛ ደረጃን ይዟል
          • ኩባንያዎቹ በ12 ወራት 5 ትሪሊዮን ዶላር ትርፍ አግኝተዋል

              የኩባንያዎችን ሽያጭ፣ ትርፍ፣ ሃብትና የገበያ ዋጋ በማስላት በየአመቱ ደረጃ የሚሰጠው ታዋቂው ፎርብስ መጽሄት ከሰሞኑም የ2022 የፈረንጆች አመት የአለማችን ግዙፍ ኩባንያዎችን ዝርዝር ይፋ ያደረገ ሲሆን፣ የአሜሪካው ቤክሻየር ሃታዌ በአንደኛ ደረጃ ላይ ተቀምጧል፡፡
ኢንሹራንስ፣ ትራንስፖርት፣ ማኑፋክቸሪንግና ኢነርጂን በመሳሰሉ ሰፋፊ የንግድ ዘርፎች የተሰማራውና በአሜሪካዊው ቢሊየነር ዋረን በፌት የሚመራው ቤክሻየር ሃታዌ በ12 ወራት ጊዜ ውስጥ 276.09 ቢሊዮን ዶላር ሽያጭ በማስመዝገብ፣ 89.08 ቢሊዮን ዶላር ትርፍ ያገኘ ሲሆን፤ የኩባንያው ሃብት 958.78 ቢሊዮን ዶላር፣ የገበያ ዋጋው ደግሞ 741.48 ቢሊዮን ዶላር መድረሱን የፎርብስ መረጃ ያሳያል፡፡
ላለፉት 9 ተከታታይ አመታት የአለማችን ቁጥር አንድ ግዙፍ ኩባንያ ሆኖ የዘለቀው የቻይና የኢንዱስትሪና ንግድ ባንክ ዘንድሮ ወደ ሁለተኛ ደረጃ ዝቅ ያለ ሲሆን፣ የሳዑዲ አረቢያው የነዳጅ ኩባንያ አርማኮ 3ኛ፣ የአሜሪካው ጄፒ ሞርጋን 4ኛ፣ የቻይና ኮንስትራክሽን ባንክ ደግሞ 5ኛ ደረጃን ይዘዋል፡፡
በዘንድሮው የፎርብስ የአለማችን ግዙፍ ኩባንያዎች ዝርዝር ውስጥ የአሜሪካው አማዞን 6ኛ፣ የአሜሪካው አፕል 7ኛ፣ የቻይና የግብርና ባንክ 8ኛ፣ ባንክ ኦፍ አሜሪካ 9ኛ፣ የጃፓኑ ቶዮታ ሞተርስ 10ኛ ደረጃን ይዘዋል፡፡
ፎርብስ መጽሄት የአመቱ የአለማችን 2000 ግዙፍ ኩባንያዎች ብሎ የመረጣቸው ኩባንያዎች በድምሩ 47.6 ትሪሊዮን ዶላር ገቢ፣ 5 ትሪሊዮን ዶላር ትርፍ፣ 233.7 ትሪሊዮን ዶላር ሃብትና 7.5 ትሪሊዮን ዶላር የገበያ ዋጋ ማስመዝገባቸውን ለማወቅ ተችሏል፡፡
የአመቱ 2000 የአለማችን ግዙፍ ኩባንያዎች የ58 የተለያዩ የአለማችን አገራት ኩባንያዎች ሲሆኑ፣ አሜሪካ 590 ኩባንያዎችን በዝርዝሩ ውስጥ በማካተት ቀዳሚነቱን ስትይዝ፣ ቻይና በ351፣ ጃፓን በ196 ኩባንያዎች ሁለተኛና ሶስተኛ ደረጃን ይዘዋል፡፡

Page 8 of 611