Administrator

Administrator

    የአለማችን አየር መንገዶች 47.7 ቢሊዮን ዶላር እንደሚያጡ ይጠበቃል

          ታዋቂው የቴክኖሎጂ ኩባንያ አልፋቤት የሚያስተዳድረው ጎግል፣ ባለፉት 3 ወራት ብቻ 17 ቢሊዮን ዶላር የተጣራ ትርፍ ማግኘቱንና ይህም በታሪኩ ያስመዘገበው ከፍተኛው የሩብ አመት ትርፍ መሆኑን ከሰሞኑ ባወጣው  መግለጫ አስታውቋል፡፡
ጎግል በተጠቀሰው ጊዜ ያገኘው ትርፍ ባለፈው አመት ተመሳሳይ ጊዜ ካገኘው ጋር ሲነጻጸር የ162 በመቶ ዕድገት ማሳየቱን የዘገበው ቢቢሲ፤ ለትርፋማነቱ ከፍተኛ አስተዋጽኦ ያበረከተው፣ ከኮሮና ቫይረስ ወረርሽኝ ጋር በተያያዘ በመላው አለም በተጣሉ የእንቅስቃሴ ገደቦች ሳቢያ የጎግል ተጠቃሚዎች ቁጥር በከፍተኛ ሁኔታ ማደጉ መሆኑንም አመልክቷል፡፡
ጉግል ባለፉት ሶስት ወራት ያገኘው አጠቃላይ ገቢ 31 ቢሊዮን ዶላር ሲሆን ገቢው ካለፈው ሩብ አመት በ30 በመቶ መጨመሩንም አስታውቋል፡፡
በሌላ የቢዝነስ ዜና ደግሞ፣ በያዝነው የፈረንጆች አመት 2021፣ የአለማችን አየር መንገዶች ገቢ በ47.7 ቢሊዮን ዶላር ያህል ይቀንሳል ተብሎ እንደሚጠበቅ አለማቀፉ የአየር ትራንስፖርት ማህበር አያታ አስታውቋል፡፡ የአመቱ የአየር መንገዶች ገቢ ካለፈው አመት ጋር ሲነጻጸር በመጠኑ መቀነስ እንደሚኖረው ያመለከተው ተቋሙ፤ በ2020 የአለማችን አየር መንገዶች ያጡት አጠቃላይ ገቢ 126.4 ቢሊዮን እንደነበርም አስታውሷል፡፡
የአለማችን አየር መንገዶች በያዝነው አመት 2.4 ቢሊዮን ያህል ሰዎችን ያጓጉዛሉ ተብሎ እንደሚጠበቅ የገለጸው አያታ፤ ባለፈው አመት ያጓጓዟቸው መንገደኞች ግን 1.8 ቢሊዮን ብቻ እንደነበሩ አስታውሷል፡፡


  የሶማሊያው መሪ ለ2 አመታት የተራዘመላቸውን ስልጣን ገፍተው የምርጫ ጥሪ አቀረቡ

            የግብጹ ፕሬዚዳንት አብዱልፈታህ አልሲሲ በመላ አገሪቱ ከ4 አመታት በፊት የተጣለውና ለ15 ጊዜያት የተራዘመው የአስቸኳይ ጊዜ አዋጅ ለተጨማሪ ቀጣይ ሶስት ወራት መራዘሙን ባለፈው እሁድ በሰጡት መግለጫ አስታውቀዋል፡፡
የአገሪቱ መንግስት እ.ኤ.አ በ2017 የተከሰተውንና 44 ሰዎችን ለሞት የዳረገውን የሽብር ጥቃት ተከትሎ የጣለው የአስቸኳይ ጊዜ አዋጅ፤ ከወቅታዊው የአገሪቱ የደህንነት ስጋትና የጤና አደጋ ጋር በተያያዘ መራዘም እንዳለበት በመታመኑ  ለ16ኛ ጊዜ እንዲራዘም መወሰኑን ይፋ ማድረጉን አልጀዚራ ዘግቧል፡፡
በሌላ የጎረቤት አፍሪካ ዜና ደግሞ፣ የሶማሊያ ምክር ቤት ለቀጣይ ሁለት አመታት ስልጣናቸውን ያራዘመላቸው የአገሪቱ ፕሬዚዳንት ሞሃመድ አብዱላሂ ፎርማጆ፤ ጉዳዩ ተቃውሞና ቀውስ መፍጠሩን ተከትሎ በስልጣን ላይ የመቆየት ሃሳባቸውን መሰረዛቸውን በማስታወቅ ፕሬዚዳንታዊ ምርጫ እንዲደረግ ጥሪ አቅርበዋል፡፡
የስልጣን ዘመናቸው በየካቲት ወር ላይ ቢያበቃም ምርጫ መካሄድ ባለመቻሉ በአገሪቱ ምክር ቤት ውሳኔ ስልጣናቸውን ለሁለት አመታት ለማራዘም ተስማምተው የነበሩት ፎርማጆ፣ ውሳኔው በእሳቸው ደጋፊዎችና ተቃዋሚዎች መካከል በዋና ከተማዋ ሞቃዲሾ ውጊያ መቀስቀሱን የዘገበው ሮይተርስ፤ ይህን ተከትሎም ፕሬዚዳንቱ ባለፈው ረቡዕ በይፋ በሰጡት መግለጫ ምርጫ እንደሚደረግ አስታውቀዋል፡፡
በታጣቂዎች መካከል የተፈጠረው ውጊያና ግጭት ያሰጋቸው ከ100 ሺህ በላይ የመዲናዋ ነዋሪዎች ከተማዋን ለቅቀው ወደ ሌሎች አካባቢዎች መሰደዳቸውን የጠቆመው ዘገባው፤ አሸባሪው ቡድን አልሻባብ እየተባባሰ በመጣው ግጭትና አለመረጋጋት ተጠቅሞ የከፋ ጥፋት እንዳያደርስ መሰጋቱንም ገልጧል፡፡

     በህንድ ባለፈው ረቡዕ ብቻ ወደ 361 ሺህ የሚጠጉ ሰዎች በኮሮና ቫይረስ መጠቃታቸውንና 3 ሺ 293 ሰዎችም ለህልፈት መዳረጋቸውን ተከትሎ፣ በአገሪቱ በቫይረሱ የተጠቁ ሰዎች ቁጥር ወደ 18 ሚሊዮን መጠጋቱንና ለሞት የተዳረጉ ሰዎች አጠቃላይ ቁጥር ደግሞ ከ200 ሺህ ማለፉን ዘ ጋርዲያን ዘግቧል፡፡
በህንድ ባለፈው ረቡዕ የተመዘገበው የ360 ሺህ 960 የቫይረሱ ተጠቂዎች ቁጥር፣ ወረርሽኙ ከተቀሰቀሰበት ጊዜ አንስቶ በመላው አለም በአንድ ቀን የተመዘገበው ከፍተኛ የኮሮና ቫይረስ ተጠቂዎች ቁጥር ነው መባሉን ዘገባው አመልክቷል፡፡
በአገሪቱ ባለፉት ሳምንታት የቫይረሱ ስርጭት በከፍተኛ ሁኔታ ማደጉንና በየዕለቱ የሚመዘገቡ ተጠቂዎች ቁጥር በከፍተኛ ሁኔታ እየጨመረ እንደሚገኝ የጠቆመው ዘገባው፤ ይህን ተከትሎም ሆስፒታሎች በከፍተኛ ሁኔታ መጨናነቃቸውን፣ የህክምና አገልግሎት ለመስጠት ማዳገቱንና የኦክስጂን እጥረት መፈጠሩንም አክሎ ገልጧል፡፡
በሌላ የኮሮና ቫይረስ ዜና ደግሞ፣ ደቡብ ሱዳንና ማላዊ የመጠቀሚያ ጊዜያቸው በማለፉ አንጠቀምባቸውም ያሏቸውን 78 ሺህ ያህል የኮሮና ክትባቶች ሊያስወግዱ ማቀዳቸውን የገለጹ ሲሆን የአለም የጤና ድርጅት በበኩሉ፤ አገራቱ ውሳኔያቸውን ተግባራዊ እንዳያደርጉ ቢያስጠነቅቅም፣ አገራቱ ግን ማስጠንቀቂያውን ውድቅ ማድረጋቸውን ኦል አፍሪካን ኒውስ ዘግቧል።
ደቡብ ሱዳን ጊዜው ያለፈበት ነው ያለቺውን 60 ሺህ የኮሮና ቫይረስ ክትባት ለማስወገድ ማቀዷን የጠቆመው ዘገባው፤ ማላዊ በበኩሏ ከአንድ ወር በፊት ከተረከበችው 360 ሺህ የአስትራዜኒካ ክትባት ውስጥ 16 ሺህውን አስወግዳለሁ ማለቷን የገለጸ ሲሆን የአለም የጤና ድርጅት ግን ክትባቶቹ ከተመረቱበት ጊዜ አንስቶ እስከ 36 ወራት ጥቅም ላይ መዋል እንደሚችሉ በመግለጽ አገራቱ ክትባቱን ከማስወገዳቸው በፊት በአግባቡ ሊያጤኑትና አማራጮችን ሊፈልጉ ይገባል ማለቱን አመልክቷል፡፡


 አንዳንድ ተረት ተደጋግሞ ካልተነገረን አንጀት አይደርስም።
የሚከተለውን ተረት ከአመታት በፊት ተርከነዋል። ዛሬም ይሄው እንተርከዋለን።  ትምህርታዊነቱ ደግ ነው ብለን ነው። እነሆ!
ከእለታት አንድ ቀን ሌሊት በጠፍ ጨረቃ ሶስት አህዮች ሳር ይግጣሉ።
እንዳጋጣሚ የተራቡ ጅቦች በዚያው ገደማ ያልፉ ኖሮ አህዮቹን አዩአቸው። ከበቧቸውና “ለመሆኑ ማንን ተማምነው ነው በጠፍ ጨረቃ በኛ ግዛት እንዲህ እየፈነጩ ሳር የሚግጡት? ችሎት ተቀምጠን እንጠይቃቸው” ብለው ጅቦቹ ለዳኝነት ተሰየሙ።
የመጀመሪያዋ አህያ ቃል ልትሰጥ መጣች። የመሃል ዳኛው፤ “እሜቴ አህያ፣ ለመሆኑ ማንን ተማምነሽ ነው በኛ ግዛት በጠፍ ጨረቃ ሳር የምትግጭው?”
አህያይቱም፡- “ፈጣሪዬን አምላኬን ተማምኜ ነው፤በእኔ ላይ ጉዳት የሚያደርሱን ሁሉ ፈጣሪዬ ይበቀልልኛል” ስትል መለሰች።
ሁለተኛዋ አህያ ቀረበች፡፡ መሃል ዳኛው፡- #አንችስ ማንን ተማምነሽ ነው በጠፍ ጨረቃ በእኛ ግዛት የምትግጭው?; ብሎ ጠየቃት።
አህያይቱም፡- “ጌታዬን፤ ሀብት የሆንኩትን ባለቤት፤ ለእኔ ክፉ የሰራን ሁሉ የገባበት ገብቶ ይበቀለዋል” አለች።
በመጨረሻም ሶስተኛዋ አህያ ቀረበችና አስረጅ ተባለች። ሶስተኛዋ አህይትም፡- “እኔ በጠፍ ጨረቃ የወጣሁት እናንተኑ ጌቶቼን ተማምኜ ነው” ስትል መለሰች።
ዳኞቹም መከሩና “የመጀመሪያዎቹን ሁለቱን ብንበላ እውነትም አደጋ አለው። ይህቺን እኛን የተማመነችውን ብንበላት ግን ማን ይጠይቀናል!” አሉና ከመቅጽበት ወረዱባት ይባላል።
*   *   *
እነሆ መተማመኛችንን አጥርተን ሳናውቅ መጓዝ ለአደጋ ሊያጋልጠን ይችላል። ሁሉ ነገር ከየጀርባው የስጋት ባለቤት አለው። ያም ሆኖ እጅግ ከባዱን አደጋ ከመካከለኛው አደጋ አመዛዝነን ማጤን ይገባናል። መካከለኛውንም ከትንሹ ማመዛዘን አለብን።
ጉዳዮቻችንን በእውቀትና በብልሃት መከወን ይጠበቅብናል። ነገር ግን የእነ ቶሎ ቶሎ ቤት ግድግዳው ሰንበሌጥ እንዳይሆን በጥንቃቄ መራመድን ግድ ይለናል።
በተለይ ወጣቶች ይህንን ያስተውሉ ዘንድ አዋቂዎችና በሳሎች ሳይታክቱና ሳያሰልሱ ሊያስይዟቸው ይገባል። ሁነኛ ቦታ እንዲውሉም የመንግስት ተዋጽኦ በቅጡ ሊታከልበት ይገባል። ከወዲሁ ካልታሰበበት ይረፍዳል። ሳይቃጠል በቅጠል የሚባለው ይኸው ነው። ይኸውም በዘመነ ኮሮና ያሰፈሰፈውን መአት (The Impending Catastrophi እንዲሉ) አለማየት የእውር የድንብር ጉዞ ነው። ግብዝነትም ነው። ግልጽነትና ተጠያቂነት አይቀሬ መንገድ ነው።
ዛሬ ቢላላ ነገ ይጠብቃል። ቆራጥነትን ግን ይጠይቃል። ሳይታክቱ መታተርን ነግ ሰርክ ማሰብ ወሳኝ ነው። ከጦርነት ወቅት ይልቅ የሰላም ወቅት የሴራና የተንኮል መቀፍቀፊያ ነው። አይንን ገልጦ ማየትና አለመተኛት፤ ጎረቤቶቻችንን ሳንፈራም ሳንዘነጋም ማዳመጥና ማየት ዋና መሆኑን ሌት ተቀን የምንገፋበት ሀገራዊ ሃላፊነት ነው።  ይቅርታ እናደርጋለን። ነገር ግን አንረሳም። We forgive but we don’t forget የምንለው ለዚህ ነው።
መልካም የትንሳኤ በዓል ይሁንላችሁ!
የኢትዮጵያን ትንሳኤም ያፍጥንልን!

ሚያዚያ 12 ቀን 2013 (ኢዜአ) ቢ.ጂ.አይ ኢትዮጵያ ጣና ሀይቅን ከጥፋት ለመታደግ በ5 ነጥብ 9 ሚሊዮን ብር ወጪ የተመረተ የእንቦጭ አረም ለማስወገጃ ማሽን ለጣና ሃይቅና ሌሎች ውሃማ አካላት ጥበቃና ልማት ኤጀንሲ ዛሬ በድጋፍ አበረከተ።
የቢ.ጂ.አይ ኢትዮጵያ የህዝብ ግንኙነት ሃላፊ አቶ ገብረሥላሴ ስፍር በርክክብ ስነ ስርዓቱ ላይ እንዳሉት፤ ቢ.ጂ. አይ ኢትዮጵያ በማህበራዊ አገልግሎቶች በስፋት ተሳትፎ እያደረገ ይገኛል።
በማህበራዊ ዘርፍ ከሚያከናውናቸው ስራዎች መካከል የጣና ሀይቅን ለከፍተኛ ችግር የዳረገና ታላቁ የኢትዮጵያ ህዳሴ ግድብን የሚፈታተን እንቦጭን ለማጥፋት የሚያስችል ስራ ላይ በመሳተፍ የበኩሉን ድርሻ ማበርከት አንዱ መሆኑን ጠቅሰዋል።
ማሽኑ ሀገር በቀል ከሆነው ሙላት ኢንዱስትሪያል ኢንጅነሪንግ ጋር በመተባበር የተሰራ መሆኑን የጠቆሙት አቶ ገብረስላሴ፤ "ማሽኑን ለማሰራት የአራት ወራት ጊዜ ፈጅቷል" ብለዋል።
ማሽኑ በራስ አቅም መሰራቱ በአዋጭነቱና የሀገር ውስጥ አምራቾችን በማበረታታት ከፍተኛ አስተዋጽኦ እንዳለው ተናግረው፤ ማሽኑ የታለመለትን አላማ እንዲያሳካ በጥንቃቄ ስራ ላይ መዋል እንዳለበት ጠቁመዋል።
ማሽኑ የተሰራበት የሙላት ኢንዱስትሪያል ኢንጅነሪንግ ሃላፊነቱ የተወሰነ የግል ኩባንያ ባለቤትና ስራ አስኪያጅ አቶ ሙላቱ ባሳዝነው በበኩላቸው "ቢ.ጂ.አይ ኢትዮጵያ በራስ አቅም የተሻለ ቴክኖሎጂ እንዲሰራ ከማድረጉ በላይ 120 ሺህ ዶላር የውጭ ምንዛሬ ለሀገር ውስጥ ጥቅም እንዲውል አግዟል" ብለዋል።
የጣና ሃይቅን ለመታደግ ሁሉም አካል የተቻለውን ማድረግ እንደሚጠበቅበት ያስገነዘቡት ደግሞ የጣና ሃይቅና ሌሎች ውሃማ አካላት ጥበቃና ልማት ኤጀንሲ ምክትል ስራ አስኪያጅ አቶ ዘላለም ልየው ናቸው።

   አለማችን ከአንድ አመት በላይ አሳር መከራዋን ሲያሳያት የከረመውንና አሁንም በእጅግ ከፍተኛ ፍጥነት በመሰራጨት ላይ የሚገኘውን የኮሮና ቫይረስ ወረርሽኝ በወራት ጊዜ በቁጥጥር ስር ማዋል እንደምትችል የገለጸው የአለም የጤና ድርጅት፤ ይህን ማድረግ የሚቻለው ግን አስፈላጊ ሃብቶችን በፍትሃዊነት መከፋፈል ሲቻል ብቻ እንደሆነ አመልክቷል፡፡
የድርጅቱ ዳይሬክተር ዶክተር ቴዎድሮስ አድሃኖም በሳምንቱ መጀመሪያ በሰጡት መግለጫ፤ ኮሮናን በቀጣዮቹ ወራት በቁጥጥር ስር ለማዋል የሚያስችሉ መሳሪያዎች ቢገኙም የአለማችን አገራት እነዚህን መሳሪያዎች በፍትሃዊነት መከፋፈልና በዘላቂነት መጠቀም ካልቻሉ ግን ቫይረሱን በቁጥጥር ስር ማዋል አይቻልም ማለታቸውን የዘገበው ሮይተርስ፤ የተገኘው መላ ምን እንደሆነ ግን በግልጽ አልተናገሩም ብሏል፡፡
ቫይረሱ አሁንም በመላው አለም በእጅግ ከፍተኛ ፍጥነት በመሰራጨት ላይ እንደሚገኝና በተለይ ከ25 እስከ 59 አመት የዕድሜ ክልል ውስጥ ያሉ ሰዎችን እያጠቃ እንደሚገኝ ያልሸሸጉት ዳይሬክተሩ፤ በፍጥነት ለመሰራጨቱ በምክንያትነት ሊጠቀሱ ከሚችሉት ጉዳዮች መካከል የቫይረሱ አዳዲስ ዝርያዎች በብዛት መፈጠራቸው አንዱ ሊሆን እንደሚችልም ገልጸዋል፡፡

  በአለም ዙሪያ ባለፈው የፈረንጆች አመት ብቻ ከ483 በላይ ሰዎች የሞት ቅጣት ውሳኔ ተላልፎባቸው እንደተገደሉና ከእነዚህም ውስጥ 88 በመቶ የሚሆኑት በአምስት አገራት ውስጥ ብቻ የተፈጸሙ እንደሆኑ አለም አቀፉ የሰብአዊ መብቶች ተቋም አምነስቲ ኢንተርናሽናል ከሰሞኑ ባወጣው አመታዊ ሪፖርቱ አስታውቋል፡፡
በአመቱ በርካታ ቁጥር ያላቸውን ሰዎች በሞት ከቀጡ ቀዳሚዎቹ አምስት አገራት ውስጥ አራቱ የመካከለኛው ምሥራቅ አገራት መሆናቸውን የጠቆመው ሪፖርቱ፤ ኢራን 246፣ ግብጽ 107፣ ኢራቅ 45 የሞት ፍርድ ቅጣቶችን በመፈጸም ከአለማችን አገራት ከአንደኛ እስከ ሶስተኛ ያለውን ደረጃ መያዛቸውንም አመልክቷል፡፡
ግብጽ የሞት ቅጣት ያስተላለፈችባቸው ሰዎች ቁጥር ከአምናው በሶስት እጥፍ ማደጉን የጠቆመው ሪፖርቱ፣ በሳኡዲ አረቢያ በአንጻሩ ቁጥሩ በ85 በመቶ ያህል ከአምናው መቀነስ ማሳየቱንና ይህም ሊሆን የቻለው አገሪቱ ከአደንዛዥ እፅ ጋር በተያያዙ ወንጀሎች ጥፋተኛ የሆኑትን በሞት ፍርድ መቅጣት በማቋረጧ ሰበብ ነው መባሉንም አክሎ ገልጧል፡፡
በአመቱ በመላው አለም የተመዘገበው የሞት ቅጣት ባለፉት አስር አመታት እጅግ ዝቅተኛው ነው ቢባልም፣ ሪፖርቱ ግን በሞት በመቅጣት የሚታወቁትንና መረጃዎቻቸውን አሳልፈው የማይሰጡትን ቻይና፣ ሰሜን ኮርያ፣ ሶርያና ቬትናምን አለማካተቱ ቁጥሩን በእጅጉ ዝቅ እንደሚያደርገውም ተነግሯል፡፡ በአለማችን 108 ያህል አገራት የሞት ፍርድ ቅጣትን ሙሉ ለሙሉ ማቆማቸውንም ሪፖርቱ ይጠቁማል፡፡


  ቻድን ላለፉት 30 አመታት ያስተዳደሩት ፕሬዚዳንት ኢድሪስ ዴቢ ለ6ኛ ጊዜ በተወዳደሩበት ምርጫ 80 በመቶ ድምጽ በማግኘት ማሸነፋቸውን ይፋ ባደረጉበት ባለፈው ማክሰኞ በአማጺ ሃይሎች በደረሰባቸው ጥቃት መገደላቸውን ተከትሎ፣ የተቋቋመው የአገሪቱ የሽግግር ምክር ቤት በሟቹ ፕሬዚዳንት ወንድ ልጅ ጄኔራል መሃመት ኢድሪስ ዴቢ እንደሚመራ ተነግሯል፡፡
በማዕከላዊ አፍሪካዊቷ አገር ቻድ ቀጣይ ፕሬዚዳንታዊ ምርጫ እስኪከናወን አገሪቱን የሚያስተዳድረውንና ለ18 ወራት ይቆያል የተባለውን የሽግግር መንግስት ምክር ቤት የሚመሩት  ባለ አራት ኮከብ ጄነራሉ የ37 አመቱ መሃመት ኢድሪስ ዴቢ፣ ከዚህ ቀደም የአገሪቱ ልዩ ሪፐብሊካን ጋርድ መሪ እንደነበሩም ኦል አፍሪካን ኒውስ ዘግቧል፡፡
የምርጫ ውጤቱ ይፋ መደረጉን ተከትሎ በዋና ከተማዋ ኒጃሚና በመንግስትና ውጤቱን በተቃወሙ አማጺያን መካከል ውጊያ መጀመሩን ያስታወሰው ዘገባው፤ ፕሬዝደንት ዴቢ ከአማጺያን ጋር በመዋጋት ላይ የነበሩ ወታደሮችን እየጎበኙ ባሉበት አጋጣሚ በጥይት ተመትተው ህይወታቸው ማለፉንም አክሎ ገልጧል፡፡
የፕሬዚዳንት ዴቢን መገደል ተከትሎ መንግስትና ፓርላማው እንዲበተን የወሰነውና የሽግግር ምክር ቤት ያቋቋመው የአገሪቱ የጦር ሃይል፣ በመላ ቻድ ብሔራዊ ሃዘን ያወጀ ሲሆን፣ ሁሉም ድንበሮች እንዲዘጉ መደረጉንም ዘገባዎች  ያመለክታሉ።

 ከዕለታት አንድ ቀን ባልና ሚስት ጎጆ የሚወጡበት ቤት ለማግኘት በመሯሯጥ ላይ ሳሉና መንደሩን በመዳሰስ ሲዟዟሩ አንድ ደላላ ያገኛሉ።
ደላላው፡- “ምን ዓይነት ቤት ነው የፈለጋችሁት?” አላቸው።
ሚስትየው፡- “ግቢው ለብቻና ሰፋ ያለ፣  ከጎረቤት የማያገናኝ ፣ መብራትና ውሃ ለብቻው ቢሆን እንመርጣለን” አለች።
ደላላው፡- “ችግር የለውም””፤ ሌላ ጊዜ የምትፈልጉት ነገር አለ ወይ?”
ባልየው፡- “የግንብ አጥር አለ?”
ደላላው፡- “ችግር የለውም፤ አሁኑኑ በአንድ አፍታ ይገኝላችኋል”
ሚስትየው፡- “ግን የብረት በር መሆን አለበት”
ደላላው፡- “ችግር የለም፤ ሞልቷል”
ባልየው፡- “ቀለሙንም እኛ እንደፈለግን የምንለዋውጠው መሆን አለበት”
ሚስት፡- “ከዋናው አስፋልት በጣም የማይገባ ፤ አስፋልት ዳር የሆነ አለ?”
ደላላው፡- “በጣም ብዙ አለ፤ የሱ አይነት”
ባልየው፡- “እሺ ታዲያ መቼ ነው የምታሳየን?”
ደላላው፡- “ዛሬም ይቻላል፤ ነገም ከነገ ወዲያም ካልሆነም በሚቀጥለው ሳምንት፤ አንዱን ቀን”
ሚስት፡-”በቃ ነገ እንየዋ”
ደላላው፡- “ቆይ አንጣደፍ፤ እኔ ሲለቀቅ ልደውልላችሁ”
ሚስት፡- (በንዴት) “እንዴ! ያልተለቀቀ ቤት ነው እንዴ ሞልቷል በሽ ነው የምትለን የነበረው፤ ቀጣፊ!”
ደላላው፡- “እሱማ የስራችን ጸባይ ነው እኮ እመቤቴ”
ሚስት፡- (እንደገናበንዴት) “ምን  የስራችሁ ፀባይ፤ የራሳችሁ ጸባይ ነው እንጂ አስቸጋሪው”
ደላላው፡- “ለማንኛውም አይቶ መፍረድ ነው፤ ግቢውን ስታዩት ትወዱኛላችሁ፤ ነገ እናየዋለን”  በዚሁ ተሰነባበቱ።
በነገታው ወደ ግቢውና ወደ ቤቱ ተያይዘው ሄዱ። ሲታይ ቤቱ ኮርኒሱ የተቦዳደሰ፣ አጥሩ የአረብ ጥርስ ይመስል የወላለቀ ሆኖ ተገኘ።
“ባልየው ምነው የኔ ወንድም፤ ያ ሁሉ ስለ ግቢና ስለ ቤቱ ውበት መቀባጠር ለምን አስፈለገ፤ እኔንስ ባለቤቴንስ ለምን አንገላታኸን? ላንተ ያለውን´ኮ ብትዋሽም ባትዋሽም አታጣውም!?  ምንጊዜም እውነትን ተማመን። የውሸቱ መንገድ ጊዜያዊና የማያደርስህ ነው” ብሎ መክሮ አሰናበተው።
*   *   *
መንገዶች ሁሉ ለመጀመሪያ ጊዜ ብትሄዱ ብትሄዱ ሩቅ ይመስላሉ፤ ከአንድ ጊዜ በላይ ከባድ አይሆኑም። አዲስ ነገር ግራ የሚያጋባን ለዚህ ነው። ምናልባትም ለውጥን የማንረዳውም የምንፈራውም ለዚህ ነው። በዚህ ላይ እድሜና ልማት ካልበሰሉ ጣጣና አባዜያቸው አስጊ ነው። አይጣልም የሚባል ነው።
መንገዳችን ሁሉ አለቀ በስለት
ምን ይበላ ይሆን የተገናኘን ለት
አክርማ እንኳን የለኝ ሰፍቼ አልጨርሰው
እንዴት በያገሩ ጅምር ይተዋል ሰው
ያለውን ድምጻዊ ውብሸትን አለመርሳት ነው። የመጀመሪያው ሰሙ ኢኮኖሚያዊ መንገዳችንን ማቃናት ምን ያህል እንዳልቀናን የሚጠቁም ነው።
ሁለተኛው ስንኝ በየአጋጣሚው እየጀመርን ያልጨረስናቸው ጉዳዮች አያሌ መሆናቸውን የሚጠቁመን ነው። ምን ያልጀመርናቸው ጉዳዮች ነበሩ? ዛሬ ያለነው የለውጥ ኩርባ ላይ ነው። ያላሰብነው፣ ገቢር ወነቢር አልነበረም። ያላቋረጥነው ድልድይ፤ ያልሰበርነውም ድልድይ አልነበረም።
አስረጂ...
ዲሞክራሲ ...
ፍትህ...
እኩልነት...
ጥምር መንግስት...
የተራማጆች ህብረትና ውህደት...
እንደ መግባቢያና የውይይት መድረክ (ፎረም)...
የህዝብ ድርጅት ጊዜያዊ ጽ/ቤት...
የጤናና ትምህርት ቢሮዎች...
የአርበኞች ማህበር...
የዩኒቨርስቲ ተማሪዎች ማህበር...
የኢትዮጵያ ስካውት ማህበር...
የኢትዮጵያ ሴቶች ትግል ድርጅት...
የኢትዮጵያ አብዮታዊ ወጣቶች ድርጅት...
ወክማና ወህክማ...
 እነዚህ ሁሉ የኢትዮጵያን ወጣቶች የቀረጹ ናቸው ቢባል የዋህነት አይሆንም፤ የኢትዮጵያ ኮሌጆች ቅድሚያ ውድድርን አንዘነጋም።
የቀድሞ ቀኃስ የአሁኑ አዲስ አበባ ዩኒቨርስቲ፤ አያሌ ወጣት ምሁራንን ያፈራ፣ የአፍሪካ የተከበረና ለአፍሪካ ሀገሮች ስኮላርሽፕ እስከ መስጠት የደረሰ አንጋፋ ዩንቨርሲቲ የነበረ ነው። ምንም እንኳን ዛሬ ከሐምሌት ጋር፡-
“ያለፈ ጥረታችንን ሳስታምመው ትዝ ሲለኝ
ከሞከርነው ነገር ይልቅ ያልሞከርነው ነው የሚቆጨኝ”
ብንልም ከመሞከር ወደ ኋላ አንልም። ከሁሉም ወሳኙና አንገብጋቢው የእውነትን ፍለጋ ጥረታችንን አለማቋረጣችን ነው። አለበለዚያ ለትውልድ የምንሰጠው ትረካ አይኖረንም። ልጆቻችን የሚረከቡንን ይወቁ! እኛም አውቀን እናሳውቃቸው። ቢደክመንም ቢደክማቸውም እንተጋገዝ። ምክንያቱም እውነቱን ሲያውቁ በየነፍሳቸው የራሳቸውን እድል ይወስናሉና።
ዛሬም በልጆቻችን ላይ እንስራ!

የተከበራችሁ የሀገራችን ሕዝቦች፣
ከሦስት ዓመታት በፊት ወደ ለውጥ ጎዳና የገባነው በመንገዱ ላይ ችግሮች አይገጥሙንም በሚል እሳቤ አልነበረም፡፡ ሀገራችን ትከሻ ላይ
የተቆለለውን የበዛ ችግር ከነውስብስብነቱ ተረድተን እንጂ፤ አቅልለን አይተን አልተነሳንም፡፡ ለዘመናት ሲከመር ቆይቶ ወደ ግዙፍ ተራራነት
የተለወጠው ሀገራዊና ቀጠናዊ ችግሮች በቀላሉ መወገድ ቢችሉ ጥሩ ነበር። ነገር ግን ችግሮቹ እንኳን እርስ በእርስ እየተጓተትን ቀርቶ አንድ
ሆነንም በጥቂት ዓመታት ውስጥ ድምጥማጣቸው የሚጠፋ አይደለም፡፡
ይሄንን በሚገባ አውቀን እስከ መጨረሻው ሕቅታ ዋጋ ለመከፈል ቆርጠን ነው የተነሳነው፡፡ ሀገራችን ያሉባት ችግሮች ምንም ያህል እንደ
ምድር አሸዋ ቢበዙ ፈጽሞ ከዜጎቿ አቅም በላይ እንደማይሆኑ ጽኑ እምነት አለን የሚፈቱትም ተነጣጥለን ሳይሆን በአንድነትና በትብብር
እንደሆነ ገና ከጅምሩ አሳውቀናል፡፡ በወቅቱ ያለ ብዙ ፈተና በአንዲት ጀንበር የተለወጠች ሀገር ትኖረናለች ብለው የጠበቁ ሰዎች እንደነበሩ
ግልጽ ነው፡፡ ለውጡ ከአንድ አቅጣጫ ይመጣልም ብለው እንደታዛቢ ዳር ቆመው የሚመለከቱ መኖራቸውም እንዲሁ፡፡
ያኔ የለውጥ ጉዞ በጀመርንበት ወቅት ሁሉም ሰው ከፍ ባለ ሞራልና በፌስታ ተሞልቶ የነበረ ቢሆንም፣ ሁሉም በጀመረበት የመንፈስ ከፍታ
እንደማያጠናቅቅ ግልጽ ነበር። ሀገራችን ለዘመናት ስትናፍቀው የኖረችው የተስፋ አድማስ ላይ ደርሰን ሁላችንም የመንካት አድሉ ይገጥመናል
ብሎ ማሰቡም ሞኝነት ነው፡፡ በየመንገዱ የሚገጥመንን እሾህና ጋሬጣ ሳያቆስለን፣ እባብና ጊንጡ ሳይነድፈን፣ ሀሩርና ቃጠሎው ሳይለበልበን
የምናልማትን የበለጸገች ሀገር መገንባት ብንቸልማ ኖሮ ገና ድሮ በአደረግነው ነበር፡፡
በረሃውን ሳናቋርጥና ባህሩን ሳንሻገር ጉዞው ይጠናቀቃል ብለው ያሰቡ ሰዎች ከመጀመሪያውም ተሞኝተዋል። ከፊታቸው የተዘረጋውን ፈተና
ቀድመው ያላዩ፣ ጉዞው መሐል ላይ ወገባቸው ዝሎ መንቀጥቀጥ ሲጀምር ቢናደዱ፣ መበሳጨት ያለባቸው በሌላ አካል ሳይሆን በተሳሳተ
ግምታቸው ነው፡፡ አሁንም ቢሆን ይበልጥ ወደ ተስፋ ሰገነታችን እየቀረብን በመጣን ቁጥር ፈተናው እንደሚበረታ መረዳት ይኖርብናል፡፡
በሀገራችን በተለያዩ ጊዜያት ያየናቸው ግጭቶች፣ የሰላም ማጣትና የደህንነት ስጋቶች በለውጥ ጉዞአችን በእጅጉ ከፈተኑን ፈተናዎች ጎራ
የሚመደቡ ናቸው፡፡ መንገድ ያስጀመረንን አንድነት ሊደቁሱ፣ እጅ ለእጅ ያስተሳሰረንን ገመድ ሊበጣጥሱ፣ የጋራ ቤታችንን ሊደረማምሱ
የሚቋምጡ ብርቱ ፈተናዎቻች ጉዞ ከመጀመራችን በፊትም ነበሩ፣ አሁንም አሉ፡፡
ምናልባትም መንገዳችን ላይ ልዩ ልዩ ጋሬጣዎችን እየጣሉ ከጉዞአችን ሊያስቀሩን የሚሹ አካላትን ድብቅ ፍላጎት በአግባቡ ተረድተን
በጥንቃቄና በጥበብ ወደ ግባችን መጓዛችንን እንደማናቆም እስካላሳየናቸው ድረስ በቀሪ ምዕራፎቻችንም ላይ ተከትለውን ይመጣሉ።
የጠላቶቻችን ፍላጎት በጉዞአችን መሐል ወድቀን ግባችንን ሳናሳካ እንድንቀር ነው፡፡ በጋራ ቆመን ያጸናነው ቤታችን ፈራርሶ ወደ ትቢያነት
ሲቀየር ማየት ይሻሉ፡፡ እኛ ደግሞ ለዚያ የተመቸን ሆነንላቸዋል፡፡
አንድ ቤት በሦስት ምከንያቶች ሊፈርስ ይቸላል። በግንባታው ወቅት በገጠሙት ችግሮች፣ ከውስጥ ባሉ ሰዎች እና ከውጭ በሚመጡ
ኃይሎች። እነዚህ ሦስቱ አውቀውትም ይሁን ሳያውቁ የሚተባበሩበት ጊዜ አለ። አንዳንድ ጊዜ በዓላማ፣ አንዳንድ ጊዜ በሂደት፣ አንዳንድ
ጊዜም በውጤት ይተባበራሉ። ከውስጥ ያሉት ሰዎች በውስጥ ጉዳያቸው ሲጣሉ፤ ከውጭ ያሉ ኃይሎች ቤቱን አፍርሰው ቤቱ የተገነባበትን ቦታ
ወይም በቤቱ ውስጥ ያለውን ሀብት መዝረፍ ሲፈልጉ፣ ቤቱ እንዲፈርስ ተባብረው ሊሠሩ ይችላሉ።
ቤቱ ሲገነባ ያጋጠሙት ችግሮች ካሉ ደግሞ ነገሩ “በዕንቅርት ላይ ጆሮ ደግፍ” ዓይነት ይሆናል።
የተከበራቸሁ ኢትዮጵያውያን፣
ሁላችንም ልንዘነጋው የማይገባን አንድ ሐቅ አለ። ሀገራችን የጋራ ቤታችን ናት፡፡ የሁላችንም ቤቶች በዚያች ትልቅ ቤት ውስጥ የሚገኙ የቤቱ
ከፍሎች ናቸው፡፡ በየከፍሎቻችን ተወሽቀን ያለነው ሁላችንም የጋራ ቤታችንን አጽንጸን በማቆየት ላይ ተመሳሳይ አቅምና አቋም የለንም። ቤትን
ከውጭ የሚመጣ ኃይል ብቻውን አያፈርሰውም። የውስጦቹ ካልተባበሩት በቀር፡፡ የቤቱ ሰዎች የውጭ አፍራሾች በሦስት መንገድ
ዐውቀውም ይሁን ሳያውቁ ሊተባበሯቸው ይችላሉ፡፡ ሆን ብለው፣ ሞኝ ሆነው እና ተኝተው፡፡
ከሚፈርስ ቤት እንጠቀማለን የሚሉ ሞኝ የቤት ሰዎች አሉ፡፤ ከመሥራትና ከመድከም ዋጋ ማግኘት የሚከብዳቸው፤ የቤቱን ፍርስራሽ ሽጠው
ማትረፍ የሚፈልጉ የፍርስራሽ ጌቶች አሉ፡፡ እነዚህ ሆን ብለው ቤቱ እንዲፈረስ ይሠራሉ፡፡ ቤቱ ቶሎ ፈራርሶላቸው ፍራሹን ለመቸብቸብ
ስለሚቸኩሉ፣ ከውጭ ሆነው ቤቱን ከሚነቀንቁት ጋር ተባብረው ያፈርሳሉ፡፡ ሌሎቹ ደግሞ በምግቡም፣ በልብሱም፣ በሳሎኑም በምኝታ
ቤቱም የሚፈጠርባቸውን ቅሬታ የቤት ማፍረሻ ምክንያት የሚያደርጉ የዋሐን ባለቤቶች ናቸው፡፡
‹የላሞች ጠብ በረቱን ለተኩላ፤ የውሾች ጠብ መንደሩን ለጅብ ይሰጠዋል› እንደሚባለው፣ እነዚህ የቤት ልጆች ከውጭ ያሰፈሰፈውን ጠላት
ባለማወቅ የሚያደርጉት ጠብ፣ ከተራ እሰጣገባ አልፎ ሳያስቡት ቤቱን ያፈርሰዋል። አንዴ ከፈረሰ በኋላ ለውስጦቹ ትርፋቸው ቁጭት
ይሆናል። ከመሆኑ በፊት እንጂ ነገሮች ከተበለሻሹ በኋላ መጸጸትና መቆጨቱ ምንም ትርጉም የለውም፡፡ ሦስተኞቹ ደግሞ ተኝተው ቤት
የሚያፈርሱ ናቸው።፡ የቆሸሸውን ማጽዳት፣ የተሰነጠቀውን መጠገን፣ የጎደለውን ማሟላት፤ የጠመመውን ማቅናት ሲገባቸው እእ ምን አገባኝ›
ብለው ይተኛሉ። አጥሩ ሲፈርስ ሳሎን ሲድረስ ይላሉ፤ ሳሎን ሲፈርስ ምኝታ ቤት እስኪደርስ ይጠብቃሉ፤ ምኝታ ቤቱ ሲፈርስ ጓዳ
ተደብቀው በመተኛታቸው የሚተርፉ ይመስላቸዋል። ሁሉም ግን የጊዜ ጉዳይ ይሆናል፡፡
ዛሬ ታላቋ ቤታችን ኢትዮጵያ በዚህ ሁኔታ ላይ ናት፡፡ ሦስቱም ዓይነት ልጆች አሏት፡፡ ከውጭ ጠላቶቿ ጋር ይሁነኝ ብለው በዓላማ ለማፍረስ
የሚሠሩ፤ በዓላማ ባይገጥሙም በውጤት ከውጭ አፍራሾች ጋር የሚሠሩ፤ ቤታቸው ሲቃጠል እያዩ ከመንቃት ይልቅ በሙቀቱ ተከናንበው
የተኙ። ይህ ወቅት ለኢትዮጵያ ከወሳኝ ወቅቶች አንዱ ነው፡፡ በአንድ በኩል ፍትሐዊ፣ ዴሞከራሲያዊና ተአማኒ ምርጫ አድርገን በሕዝብ
ድምጽ የሚጸና መንግሥት ለመመሥረት በሂደት ላይ ነን በሌላ በኩል ደግሞ የሀገራችን ከፍታ አንዱ ማሳያ የሆነውን የሕዳሴውን ግድብ
ሁለተኛውን ዙር ሙሌት ለማከናወን እየተጋን ነው።
ከእነዚህ ጎን ለጎን የኢትዮጵያ ግሥጋሴ ከሚያሠጋቸው የውጭና የውስጥ ጠላቶች ጋር በየአቅጣጫው ግንባር ለግንባር ገጥመናል፡፡ ኢትዮጵያ
እነዚህን ሦስት ፈተናዎች አልፋ ግቦቿን ካሳካች፣ ከዚያ በኋላ ለማንም በቀላሉ እጅ የማትሰጥ የሁላችን መመኪያ ሆና ትወጣለች፡፡ ይህ
እንዳይሳካ ከምንጩ እናደፍርሰው፣ ከእንጎቻው እንሰቅስቀው፣ ከእሸቱ እናጠውልገው› የሚሉ የማሰናከያ ድንጋዮች በየአቅጣጫው
ተነሥተዋል፡፡ ወሳኙ የእነርሱ መነሣት አይደለም፤ የእኛ ምላሽ እንጂ።
ውድ የሀገራችን ሕዝቦች፣
ከለውጡ ጅማሬ አንሥቶ የገዛ ዛፋችንን ከዛፉ በተቆረጠ ጠማማ እንጨት የመቁረጥ አዝማሚያ መኖሩን እየተናገርንም እየታገልንም ነበር።
በተለያየ አቅጣጫ የሚወረወረው ድንጋት በቤታችን ላይ የሚያደርሱትን አደጋ ለመግታት፣ የፖለቲካ አመራሩና የጸጥታ አካሉ መሥዋዕትነት
የተከፈለበት ትግል አካሂዷል። ከጁንታው ጋር የተደረገው ትግል የዚህ አንዱ ማሳያ ነው፡፡ እነዚህ አካላት ዛሬም አልጠፉም፡፡ የተለያዩ
ብሔሮችን ስሞች ይዘው፣ ሲመች በሰላም ሳይመች በጠመንጃ የላኪዎቻቸውን ዓላማ ለማሳካት እየሠሩ ነው፡፡
የእነዚህን ተልዕኮ ያልተረዱ የዋሖች ደግሞ ሀገር እንድትፈርስ ባይፈልጉም ሀገር እንድትፈርስ ግን እየሠሩ ነው። የቤቱ ጥያቄ የሚመለሰው
መጀመሪያ ቤቱ ሲኖር መሆኑን ዘንግተውታል፡፡ ቤት እያፈረሱ ስለ ቤት ለመወያት ይፈልጋሉ፡፡ ‹ቤቴን እጠብቃለሁ፤ ሙሣቴንም እሟገታለሁ›
የሚሉ አባቶች ልጆች መሆናቸውን ረስተውታል። ስለ ላሟ ወተት የሚኖረው ጥያቄ የሚመለሰው መጀመሪያ ላሟ ስትኖር መሆኑን
ረስተውታል። ከእነዚህ ከሁለቱ ጋር ተደምረው ‹ምን አገባኝ የሚሉ ዜጎችም አሉ፡፡ ምድር ቤቱ ሲቃጠል እሳቱ ሰባተኛ ፎቅ ላይ የሚደርስ
የማይመስላቸው፡፡ ወይ ለመገንባት ወይ ለመመከት አንዳች የማያደርጉ፡፡ እሳቱን ከመከላከል ይልቅ በሙቀቱ ተመቻችተው ያንቀላፉት
ጭምር የሀገራችን ችግሮች ናቸው፡፡
አሁን በአለንበት ጊዜ ሦስት ወሳኝ ዓላማዎቻችንን በጽናት ማሳካት ይኖርብናል። በመጀመሪያ አንድ ወር ያህል ጊዜ የቀረውን ምርጫ ውጤታማ
እናድርገው፡፡ በነቂስ ወጥተን ካርድ እንውሰድ። ሁላችንም ይበጀናል ያልነውን እንምረጥ። የፈለግነውን እንዳንመርጥ እንቅፋት የሚሆንብን
የትኛውም አካል እርሱ የኢትዮጵያ ጠላት ነው፡፡ የሚያጋጥሙ ፈተናዎችን እየተቋቋምን፤ ችግሮችን እያረምን፣ ጉድለቶችን እየሞላን
ምርጫውን ውጤታማ እናድርገው። ይሄንን ምርጫ በድል ተወጣነው የምንለው ሂደቱ የሚጠበቅበትን ደረጃ ለማለፍ ከቻለ ነው፡፡ ለዚህ
ደግሞ መራጩ ሕዝብ፣ ተመራጮች እና የምርጫ ቦርድ ሀገራዊ ኃላፊነታችሁን እንድትወጡ አደራ እንላለን፡፡
ሁለተኛ ከምርጫው ጎን ለጎን ግድባችንን ባቀድነው መንገድና ጊዜ መገንባትና ሁለተኛውን ዙር የውኃ ሙሌት ማከናወን አለብን፡፡
የትኛውንም ዓይነት ጫና ተቋቁመን፤ የውስጥና የውጭ ፈተናዎቻችንን አልፈን እንሞላዋለን፡፡ ኢትዮጵያን መውደዳችንን የምናሳየው
የኢትዮጵያን ጉዞ በማቀላጠፍ እንጂ በማደናቀፍ አይደለም፡፡ በእሳት ላንቃ ውስጥ እያለፍንም ቢሆን ማድረግ ያለብንን ማድረግ አለብን፡፡
በያዝነው የጊዜ ሰሌዳ መሠረት ግድባችንን ሞልተን ኃይል ማምረት እንጀምራለን በየአቅጣጫው የምናየው የወገኖቻችን አሰቃቂ ግድያ፣
ማፈናቀል፣ ቤትና ንብረት ማውደም፣ ነውጥና ሸፍጥ ሁሉ በሀገር ውስጥ ብቻ የተመረተ አይደለም፡፡
አብዛኛው ጥፋት በውጭ ተምርቶ በሀገር ውስጥ የሚገጣጠም ጥፋት ነው፡፡ ግጭቱንና ጥፋቱን ከውጭ አስመጥተው በሀገር ውስጥ
የሚገጣጥሙት የእፉኝት ልጆች ናቸው። በዚህ ዓመት መጀመሪያ የእፉኝቶችን ዋና መፈልፈያ አፍርሰነዋል። ከዚህ በፊት ፈልፍሎ እዚህና
እዚያ የጣላቸው ግልገሎቹ ግን አሁንም ይቀራሉ፡፡ የትኛውንም ዓይነት የብሔርና የአምነት ስም ቢይዙ፤ ከየትኛው የውጭ ኃይል የሚረዱትን
ገንዘብና መሣሪያ ቢጨብጡ ኢትዮጵያን ይፈትኗት ይሆናል እንጂ አያሸንፋፏትም፡።፡
መጀመሪያ በውስጣችን ያሉትን ባለ ሁለት በላዋዎች እናጸዳለን። ቀን ቀን ለኢትዮጵያ የሚሠሩ የሚመስሉ፤ ሌሊት ሌሊት በኢትዮጵያ ላይ
የሚዶልቱ አሉ። እነርሱ ከውጭ ጠላቶቻችን በላይ ዋነኞቹ ጠላቶቻችን ናቸው፡፡ አጥር ላይ ተቀምጠው፣ አሸናፊውን አይተው፣ ከተመቻቸው
ሊገቡ፣ ካልተመቻቸው ሊሸሹ የሚያስቡ መኖራቸውን ዐውቀናል፡፡ ወቅቱ የምርጫ ነውና መምረጥ አለብን፡፡ ወይ እነርሱን እናጸዳለን ወይ
ኢትዮጵያን አሳልፈን እንሰጣለን። የኛ ምርጫ ኢትዮጵያን ሰእነርሱ ስንል መሠዋት ሳይሆን፤ እነርሱን ለኢትዮጵያ ስንል መሠዋት ነው፡፡
በአጠቃላይ ምርጫውን ሰላማዊ፣ ዴሞክራሲያዊና ፍትሐዊ ለማድረግ፤ ግድባችንን በታቀደለት መንገድ ገንብተን ሁለተኛውን ዙር የውኃ
ሙሌት ለማከናወን፤ እንዲሁም ኢትዮጵያን ከውስጥና ከውጭ ጠላቶቿ ታድገን ወደሚገባት ደረጃ ለመውሰድ እንድንቸል፤ የኢትዮጵያ ሕዝብ
በንቃትና በብስለት ከመንግሥት ጎን እንዲቆም ጥሪ እናደርጋለን። ቆም ብለን እናስብ፤ ከሁሉም በፊት ኢትዮጵያን እናስቀድም፡፡ በፌዴራልና
በከልል የምትገኙ የጸጥታ አካላት፣ ተቀናጅታችሁና ተናብባችሁ በመሥራት የኢትዮጵያንና የኢትዮጵያውያን ሰላምና ደኅንነት እንድታስጠብቁ
እናሳስባለን።
የሚደረጉ ማናቸውም የፖለቲካና የመብት እንቅስቃሴዎች ይደገፋሉ፡፡ የትግላችን ውጤቶች ናቸውና፡፡ እነዚህ የመብትና የፖለቲካ
እንቅስቃሴዎች ግን ኢትዮጵያን እንዲያናውጡ አንፈቅድም፡ ፖለቲካዊ ጨዋታውን ከጨዋታ ሜዳ ውጭ ለማድረግ ለሚፈልጉት ኃይሎች፣
ትእግሥታችን ማለቁን በዚሁ ኢጋጣሚ ልንነግራቸው እንፈልጋለን። ሁሌም እንደምንለው፤ በጽናትም እንድምናምንበት፣ ለኢትዮጵያ ፈተና
ብርቋ፣ ድል ማድረግም ሰበር ዜናዋ አይደለም፡፡ ከዚህ በላይ አልፋ ዛሬ ላይ ደርሳለች። ይሄንን አልፋ ነገ ላይ ትገኛለች፡። ኢትዮጵያ ማሸነፏ
ላይቀር እንዳታሸንፍ ሲታገሉ የኖሩትን ትታዘባቸዋለች፤ በታሪከ ሂደትም ትቀጣቸዋለች፡፡ እርሷ ግን ወጥመዱን በጣጥሳ፣ ሰንኮፉን ነቃቅላ፣
አዚሙን አስወግዳ ያሰበችበት ትደርሳለች።
ኢትዮጵያ እስካሁን የቆየችውም ወደፊትም የምትቆየውም፣ በእኛ በመስዕዋት ልጆቿ ደምና አጥንት ነው። ዛሬ እኛ የምንከፍለው ዋጋ፣ ነገና
ከነገወዲያ ሀገራችንን ወደማይቀለበስ የብልጽግና ከፍታ ላይ እንደሚያደርሳት ምንም ጥርጥር የለውም፡፡
የብሔራዊ ደህንነት ምክር ቤት
ሚያዚያ 16፣ 2013 ዓ.ም
አዲስ አበባ

Page 8 of 529