Administrator

Administrator

 በአሜሪካው ኩባንያ ስፔስኤክስ አማካይነት ወደ ጠፈር ሊጓዙ ትኬት የቆረጡት ጃፓናዊው የፋሽን ኢንዱስትሪ ዘርፍ ቢሊየነር ዩሳኩ ሜዛዋ፣ በመንኮራኩሯ በቀሩት 8 ክፍት ወንበሮች አብረዋቸው ወደ ጠፈር መጓዝ የሚፈልጉ ሰዎች ካሉ ፈጥነው እንዲመዘገቡ ለመላው አለም ጥሪ አቅርበዋል፡፡
ሜዛዋ ከ5 አመታት በፊት ከስፔስኤክስ ኩባንያ ጋር በፈጸሙት ስምምነት ወደ ጠፈር ለመጓዝ የመጀመሪያው ሰው መሆናቸው በተዘገበበት ወቅት፣ አብረዋቸው ወደ ጠፈር እንዲጓዙ ለ8 ታዋቂ አርቲስቶች ግብዣ እንደሚያደርጉ አስታውቀው እንደነበር ያስታወሰው ዘ ኢንዲፔንደንት፤ ባለፈው ረቡዕ ግን በትዊተር ገጻቸው ባሰራጩት አጭር የቪዲዮ መልዕክት መሄድ የምትፈልጉ ተመዝገቡ ሲሉ ጥሪ ማቅረባቸውን ዘግቧል።
“ለሁሉም የመንኮራኩሯ ወንበሮች ከፍያለሁ! ስምንት ወንበሮች ክፍት ናቸው!... ከየትኛውም የአለም ክፍል አብራችሁኝ መሄድ የምትፈልጉና የተለየ የፈጠራ ክህሎት አለን የምትሉ ተመዝገቡ” ያሉት ቢሊየነሩ፤ ከሁለት አመት በኋላ ወደ ጠፈር ለሚያደርጉትና በጨረቃ ዙሪያ ለሚንቀሳቀሱበት ጉዞ ምን ያህል ገንዘብ እንደከፈሉ የታወቀ ነገር እንደሌለ ዘገባው ገልጧል፡፡
የ45 አመቱ ጃፓናዊ ቢሊየነር “ዲርሙን” የሚል ስያሜ በተሰጠው በዚህ የጠፈር ጉዞ አብረዋቸው ለመሄድ ፍላጎቱ ያላቸው ግለሰቦች እስከ መጪው ሳምንት መጨረሻ በድረገጻቸው አማካይነት እንዲመዘገቡ ጥሪ ማቅረባቸውን የጠቆመው ዘገባው፤ የመጀመሪያው ዙር ማጣሪያ በአንድ ሳምንት ጊዜ ውስጥ እንደሚጠናቀቅ መናገራቸውንም አክሎ ገልጧል፡፡


    ባለፈው የፈረንጆች አመት 2020 በመላው አለም በሚገኙ 29 አገራት፣ የኢንተርኔት አገልግሎት ከ155 ጊዜያት በላይ ሆነ ተብሎ እንዲቋረጥ ወይም ፍጥነቱ አዝጋሚ እንዲሆን መደረጉን አክሰስ ናው የተባለ ተቋም ያወጣውን አመታዊ ሪፖርት ጠቅሶ ዘ ኢንዲፔንደንት ዘግቧል፡፡
በአመቱ በብዛት የኢንተርኔት አገልግሎት የተቋረጠባትና ፍጥነቱ አዝጋሚ እንዲሆን የተደረገባት ቀዳሚዋ የአለማችን አገር ህንድ መሆኗን የጠቆመው ሪፖርቱ፤ በአገሪቱ በአጠቃላይ ለ109 ጊዜያት ያህል ክስተቱ መፈጸሙንና 96ቱ ህንድ በምታስተዳድረው የካሽሚር ግዛት ውስጥ መደረጉን ያብራራል።
በአመቱ የኢንተርኔት አገልግሎት በየመን 6 ጊዜ፣ በኢትዮጵያ 4 ጊዜ፣ በዮርዳኖስ 3 ጊዜ ያህል መቋረጡን ያስታወሰው ሪፖርቱ፤ በቤላሩስ፣ ቻድ፣ ጊኒ፣ ኬንያ፣ ፓኪስታን፣ ሱዳን፣ ቶጎና ቬንዙዌላ ደግሞ በተመሳሳይ ለ2 ጊዜያት መቋረጡንም አክሎ ገልጧል፡፡
ከአለማችን አገራት መካከል ለረጅም ጊዜ የኢንተርኔት አገልግሎትን በመዝጋት ቀዳሚነቱን የያዘችው ማይንማር መሆኗን የጠቆመው ሪፖርቱ፤ በአገሪቱ በተለያዩ ግዛቶች ግጭቶች መቀሰቀሳቸውን ተከትሎ አገልግሎቱ ለ19 ወራት ሙሉ ለሙሉ ተቋርጦ እንደነበርም ገልጧል፡፡
በአለማችን አገራት በአመቱ ከተፈጸሙት 109 የኢንተርኔት አገልግሎት ማቋረጦች መካከል 85 ያህሉ የተፈጸሙት ለጥንቃቄ ሲባል እንደሆነ የአገራቱ መንግስታት እንደሚናገሩ የጠቆመው ሪፖርቱ፤ ተቋሙ ባደረገው ጥናት ግን 80 ያህሉ ከፖለቲካዊ አለመረጋጋት፣ 17 የሚሆኑት ከምርጫ፣ 14 ያህሉ ደግሞ ከተቃውሞዎች ጋር በተያያዘ መሆኑን ለማረጋገጥ መቻሉን አመልክቷል፡፡
በአመቱ በተለያዩ አገራት የተከሰቱት የኢንተርኔት አገልግሎት መቋረጦች በሚሊዮኖች የሚቆጠሩ ሰዎች ከስራቸው፣ ከትምህርት፣ ከመረጃና ከግንኙነት እንዲስተጓጎሉ ማድረጋቸውን የጠቆመው ሪፖርቱ፤ በተለይም ከኮሮና ቫይረስ ወረርሽኝ ጋር በተያያዘ እንቅስቃሴ በተገደበበትና መረጃ ከመቼውም ጊዜ በላይ ወሳኝ በሆነበት ወቅት የተፈጸሙ መሰል ድርጊቶች አግባብነት የሌላቸውና ከፍተኛ ጉዳት ያስከተሉ መሆናቸውን ገልጧል፡፡

  የአለም የጤና ድርጅት በመላው አለም የሚገኙ መስማት የተሳናቸው ሰዎች ቁጥር ከ1.5 ቢሊዮን ማለፉንና አስፈላጊው የጥንቃቄና የህክምና እርምጃ ካልተወሰደ በመጪዎቹ 30 አመታት በአለማችን 2.5 ቢሊዮን ሰዎች የተለያዩ የመስማት ችግሮች ተጠቂ ሊሆኑ እንደሚችሉ አስጠንቅቋል፡፡
የተለያዩ የመስማት ችግሮች ያሉባቸው የህብረተሰብ ክፍሎች መገለል እንደሚደርስባቸውና አብዛኛውን ህይወታቸውን ተነጥለው እንደሚገፉ የገለጸው ድርጅቱ፤ የመስማት ችግር አለማችንን በየአመቱ ለ1 ትሪሊዮን ዶላር ኢኮኖሚያዊ ኪሳራ እየዳረጋት እንደሚገኝም ከሰሞኑ ባወጣው መግለጫ አስታውቋል፡፡
ለመስማት ችግር ከሚያጋልጡ ምክንያቶች መካከል የጆሮ ኢንፌክሽንና የጆሮ ደግፍ በሽታ እንደሚገኙበትና አብዛኞቹ አጋላጭ ሰበቦች ልንከላከላቸው የምንችላቸው መሆናቸውን የጠቆመው መግለጫው፣ ከእነዚህም መካከል ከፍተኛ ድምጽ ያለው ሙዚቃ በጆሮ ማዳመጫ መስማት አንዱ መሆኑን አመልክቷል፡፡
የመስማት ችግሮችን ሊያቃልሉ የሚችሉ የቴክኖሎጂ ውጤቶችና የመስማት ብቃትን ለማሻሻል የሚረዱ ህክምናዎች ቢኖሩም ለአብዛኛው ሰው ተደራሽ አለመሆናቸውን የጠቆመው ድርጅቱ፤ በአለማችን መሰል ድጋፎች ከሚያስፈልጋቸው ሰዎች መካከል 17 በመቶ ያህሉ ብቻ ተጠቃሚ መሆናቸውንም አክሎ ገልጧል፡፡


  - በደቡብ አፍሪካና በቻይና ከ5 ሺህ በላይ ሃሰተኛ ክትባቶች ተይዘዋል
    - በኮሮና ሳቢያ በአለማችን 888 ሚ.ህጻናት ከትምህርታቸው ተስተጓጉለዋል

          ከሰሞኑ በደቡብ አፍሪካና በቻይና በህገወጦች የተመረቱ በአስር ሺዎች የሚቆጠሩ ሃሰተኛ የኮሮና ቫይረስ ክትባቶች መያዛቸውን ያስታወቀው አለማቀፉ የፖሊስ ጥምረት ኢንተርፖል፤ የወንጀል ቡድኖች መሰል ክትባቶችን በስፋት በማሰራጨት ላይ እንደሚገኙና ከክትባቶች ጋር የተያያዙ የወንጀል ድርጊቶች በእጅጉ መስፋፋታቸውን አስጠንቅቋል፡፡
በቻይና ከ3 ሺህ በላይ ሃሰተኛ ክትባቶችና በህገወጥ ክትባቶች ሽያጭ ላይ ለመስራት የተደራጀ ቡድን አባላት የሆኑ 80 ሰዎች በቁጥጥር ስር ሲውሉ፣ በደቡብ አፍሪካም 2 ሺህ 400 ሃሰተኛ ክትባቶችና ደረጃቸውን ያልጠበቁ 3 ሚሊዮን ማስኮች እንዲሁም አራት ተጠርጣሪዎች መያዛቸውን ኢንተርፖል ባለፈው ረቡዕ በሰጠው መግለጫ አስታውቋል፡፡
የአሜሪካ ፖሊስ ባለፉት ሳምንታት ከ10 ሚሊዮን በላይ ደረጃቸውን ያልጠበቁ ማስኮችን በቁጥጥር ስር ማዋሉን ያስታወሰው ዘ ጋርዲያን፤ ኢንተርፖል ለአለማችን መንግስታት የተደራጁ ወንጀለኞች ከኮሮና ጋር የተያያዙ ወንጀሎችን ሊፈጽሙ እንደሚችሉ ከወራት በፊት ማስታወቁን አስታውሷል፡፡
በአፍሪካ የኮሮና ቫይረስ ተጠቂዎች ቁጥር ከትናንት በስቲያ ወደ 4 ሚሊዮን መጠጋቱንና የሟቾች ቁጥር ደግሞ ከ105 ሺህ ማለፉን የአፍሪካ የበሽታ መከላከልና ቁጥጥር ማዕከል ባወጣው መግለጫ አስታውቋል፡፡
የተለያዩ የአፍሪካ አገራት በአንድ አመት ውስጥ ለ190 የአለማችን አገራት ከ2 ቢሊዮን በላይ ክትባቶችን ለማሰራጨት ካቀደው አለማቀፉ የክትባት ጥምረት ኮቫክስ የተላኩላቸውን የኮሮና ቫይረስ ክትባቶች በመቀበል ላይ ሲሆኑ፣ ክትባቶቹን ከተቀበሉት አገራት መካከልም ጋና፣ ኬኒያ፣ ዲሞክራቲክ ሪፐብሊክ ኮንጎ፣ ናይጀሪያ፣ አንጎላና ጋምቢያ ይገኙበታል፡፡
የአለም ባንክ በበኩሉ፤ ለ30 የአፍሪካ አገራት የኮሮና ቫይረስ መግዣ የገንዘብ እርዳታ ለመስጠት መወሰኑ የተነገረ ሲሆን፣ የእርዳታው ተጠቃሚዎች ከሚሆኑት አገራት መካከል ኢትዮጵያ፣ ኒጀር፣ ሞዛምቢክ፣ ቱኒዝያ፣ ሩዋንዳና ሴኔጋል እንደሚገኙበት ዥንዋ ዘግቧል፡፡
በሌላ በኩል ደግሞ፣ በመላው አለም ከ168 ሚሊዮን በላይ ህጻናት የሚማሩባቸው ትምህርት ቤቶች አመቱን ሙሉ መዘጋታቸውንና 214 ሚሊዮን ያህል ተማሪዎችም በኮሮና ቫይረስ ሳቢያ በትምህርት ገበታቸው ላይ መገኘት ከነበረባቸው ጊዜ 75 በመቶ ያህሉን በትምህርት ገበታቸው አለመገኘታቸውን የተባበሩት መንግስታት የህጻናት መርጃ ድርጅት ዩኒሴፍ ከሰሞኑ ባወጣው መግለጫ አስታውቋል፡፡
ከመጋቢት 2020 እስከ የካቲት 2021 በነበረው ጊዜ በአለማችን በሚገኙ 14 አገራት አብዛኞቹ ትምህርት ቤቶች ተዘግተው መክረማቸውን ያስታወሰው የድርጅቱ መረጃ፣ በመላው አለም የሚገኙ ከ888 ሚሊዮን በላይ ህጻናት በኮቪድ ሳቢያ የትምህርት መስተጓጎል እንደገጠማቸውም አክሎ ገልጧል፡፡
በሌላ የኮሮና ዜና፣ ብራዚል ባለፈው ማክሰኞና ረቡዕ ከፍተኛውን ዕለታዊ የቫይረሱ ሟቾች ቁጥር ማስመዝገቧን የዘገበው ሮይተርስ፤ በአገሪቱ ማክሰኞ ዕለት 1 ሺህ 641፣ ረቡዕ ደግሞ 1 ሺህ 910 ሰዎች ለሞት መዳረጋቸውንና አጠቃላይ የቫይረሱ ሟቾች ቁጥር 259 ሺህ 271 መድረሱን አመልክቷል፡፡


የፖለቲካ መብቶችና የህዝብ ነጻነቶችን ጨምሮ የተለያዩ መስፈርቶችን ተጠቅሞ የአገራትን አጠቃላይ ሁኔታ በመገምገም በየአመቱ አለማቀፍ የነጻነት ሁኔታ ሪፖርት የሚያወጣው ፍሪደም ሃውስ የተባለ ተቋም፣ ከሰሞኑም የ2020 የፈረንጆች አመት ሪፖርቱን ይፋ ያደረገ ሲሆን፣ በአመቱ የአለማችን ዲሞክራሲና ነጻነት ታይቶ በማይታወቅ ደረጃ በከፍተኛ ሁኔታ ማሽቆልቆሉን አስታውቋል፡፡
በአለም ዙሪያ የሚገኙ 195 አገራትና 15 ግዛቶችን አጠቃላይ የዲሞክራሲና ነጻነት ሁኔታ ያጠናው ተቋሙ፣ በዘንድሮው ሪፖርቱ 82 አገራትን “ነጻ”፣ 59 አገራትን “በከፊል ነጻ” እና 54 አገራትን “ነጻ ያልሆኑ” በሚል በሶስት ከፍሎ አስቀምጧቸዋል፡፡
የአመቱ ነጻነትና ዲሞክራሲ የሌለባት ቀዳሚዋ አገር ተብላ የተጠቀሰቺው ሶርያ ስትሆን፣ ኤርትራ፣ ደቡብ ሱዳን፣ ቱርኬሚኒስታንና ሰሜን ኮርያ እንደ ቅደም ተከተላቸው እስከ አምስተኛ ያለውን ደረጃ ይዘዋል፡፡
በአመቱ ከፍተኛ የነጻነትና ዲሞክራሲ መሻሻል ያሳዩት ቀዳሚዎቹ 5 የአለማችን አገራት ሱዳን፣ ማላዊ፣ ቦሊቪያ፣ ቺሊና ሰሜን ሜቄዶኒያ መሆናቸውን የጠቆመው ሪፖርቱ፤ በአንጻሩ ከፍተኛ ማሽቆልቆል ያሳዩት ደግሞ ካይሬጊስታን፣ ቤላሩስ፣ ማሊ፣ ኮትዲቯርና ታንዛኒያ ናቸው ብሏል፡፡
በአመቱ የአለማችን ነጻና ዲሞክራሲያዊ አገራት ተብለው የሚጠቀሱትን አሜሪካና ህንድን ጨምሮ 73 የአለማችን አገራት ባለፈው አመት ከነበሩበት ደረጃ ማሽቆልቆላቸውን የጠቆመው ሪፖርቱ፤ የነጻነት ደረጃቸውን ማሻሻል የቻሉ በአንጻሩ 28 አገራት ብቻ መሆናቸውንና ከእነዚህም መካከል ሱዳንና ማላዊ ይጠቀሳሉ ብሏል፡፡
ባለፉት 10 አመታት እጅግ ከፍተኛ የነጻነትና ዲሞክራሲ ማሽቆልቆል የታየባቸው ሶስቱ ቀዳሚ የአለማችን አገራት ማሊ፣ ቱርክና ታንዛኒያ መሆናቸውን የጠቆመው የተቋሙ ሪፖርት፤ ኢትዮጵያ አምና ከነበረችበት ደረጃ በ2 ዝቅ ማለቷንም ያሳያል፡፡

  ከክርስቶስ ልደት በፊት በሶስተኛው ክፍለ ዘመን የነበረ ኩንግ ሲ የተባለ አንድ ንጉስ በቻይና ይኖር ነበር፡፡ ንጉስ አሳ በጣም ይወድ የነበረ መሪ ነበር ይባላል፡፡ የአገሩ ህዝብ በሞላ አሳ ይገዛና እጅ መንሻ ያቀርብለታል፡፡
ንጉሱ ኩንግ ሲዩ ግን ስጦታውን አልቀበልም፤ ይላል፡፡
ይህንን ያየው ታናሽ ወንድሙ ወደ ንጉሱ ይመጣና፤ “ያለጥርጥር አሳ በጣም እንደምትወድአውቃለሁ፡፡ ስለምን ነው የአሳ ስጦታቸውን አልቀበልም ያልከው?” ሲል ጠየቀው፡፡
ንጉሱም፤ “ወንድሜ ሆይ  የአሳ ስጦታ የማልቀበልበት ምክንያት፤ እያንዳንዱ ስጦታ በውለታ እንድትታሰር ያደርግሃልና ነው፡፡ በውለታ ከታሰርኩኝ የሃገራችንን ህግ እስከ መጠምዘዝ ድረስ እሄዳለሁ፡፡”
“ለምን ትጠመዝዛለህ?”
“ውለታ የዋልክለት ህዝብ በፋንታው ይሄን አድርግ ብሎ ስለሚጠብቅህ ነዋ!”
“ለምን እምቢ አትልም ታዲያ?”
“አሳ የምወድደው ጭንቅላቴን ረቂቅ ስለሚያደርግልኝ ነው፡፡ ይሄንን እንዳደርግ ያደረገኝም አሳ ነው!”
“አልገባኝም”
“አሳ አትበላማ! አሳ ሳትበላ እንዴት ይግባህ?”
“ህጉ ቢጣመም ምን ቸገረህ? ስልጣኑ ያንተ?”
“ህጉን ካጣመምኩ ራሴ ተጣምሜ ከስልጣኔ እወርዳለሁ”
“ከስልጣንህ ብትወርድ ምን ቸገረህ?”
“ከስልጣኔ ከወረድኩ በኋላ ራሴን አሳ ለመመገብ አልችል ይሆናል! በተቃራኒው ካየኸው ግን፤ ከህዝብ የአሳ ስጦታ ባልቀበል፣ ከመንበሬ ባልወርድ፣ መቼም ቢሆን አሳ ገዝቼ መብላት አያቅተኝም!!”
* * *
ስጦታና እጅ መንሻ ስርዓትን እስከ መናድ እንደሚደርስ በሀገራችን አይተናል፡፡ ከፈረንሳይ ድረስ የ70,000 (ሰባ ሺ) ብር ሽቶ (ብራችን በዶላር 2.05 ብር ይመነዘር በነበረ ጊዜ) ለልደታቸው ስጦታ ይመጣላቸው የነበሩ ልዕልቶች እንደነበሩ ታዝበናል፡፡ የሀገር መሪዎች በስዊስ ባንክ አያሌ ሚሊዮን ብርና ወርቅ አስቀምጠው የነበረበት ወቅት እንደነበር አንረሳም፡፡ ይህን ዓይነቱ ነገር የዛሬ ስሙ ሙስና ነው፡፡ መታያ፣ እጅ - መንሻ፣ ስጦታ፣ የደስ ደስ፣ ቤት ማሞቂያ፣ ህንፃ ማድመቂያ፣ እጅ ማበሻ… ሁሉም የሙስና ተለዋጭ ስሞች ናቸው፡፡
“ሙሳዊ ጫና የክፉ ስራዎች ሁሉ የዓመት ከዓመት ፀደይ ነው፡፡ የስርዓቱ ብልሽት መጠንሰሻ ነው፡፡ የአገር ዕዳ ክምር - ክንብንብ ነው፡፡ ክንዳችንን ያልማል፡፡ ከሸንጎ ውስጥ የጥበብን ብልት ቆርጦ ስልጣንን ለግል ጥቅም ለማዋልና ስምና ዝናን ማትረፊያ ለማድረግ እንድናውለው ያመቻችልናል!” ይለናል በርክ የተባለው ፀሐፊ፡፡
ይህ ሁነት በዲሞክራሲ ማነቆነት፣ በልማት እንቅፋትነት፣ በሃይማኖት ግጭት መንስዔነት፣ በጦርነት ሰበብነት ትልቅ ተፅዕኖ ቢፈጠር ዞሮ ዞሮ ጦሱ ለሀገር ነው የሚተርፈው፡፡
ጀርመኖች ደግሞ ስለ ታላላቅ ጦርነቶች የሚከተለውን ይላሉ፡-
ታላቅ ጦርነት ሃገሪቱን የሶስት ዓይነት ሰራዊት ባለቤት ያደርጋታል፡-
የጦር- ጉዳተኞች ሰራዊት፣ የሐዘንተኞች ሰራዊት እና የሌቦች ሰራዊት!
ሃይማኖቶች የቅዱሳት፣የቀና መንፈስ፣የመልካም ስራ መመሪያ የሚሰጡ፣የበጎ ምግባር አቅጣጫ መሪ እንጂ የግጭት መንስኤና ሰበብ መሆን የለባቸውም፡፡ ለዚህ ነው:-
“ሃይማኖት ታረደ ደሙን ኩቲ ላሰው
እንግዲህ ሆድ ለሆድ አልተገናኘም ሰው”
እያለ የሀገራችን ሰው የሚገጥመው፡፡
ሁሌ የምንሰራው ስራና የእንቅስቃሴያችን ሂደት “በተሳካ ሁኔታ መጠናቀቁ ተገለፀ”፣ “የስራ ግምገማው እንደሚያሳየው የዕድገት አቅጣጫ ጠቋሚ ነው”፤ “በይሄን ያህል ፐርሰንት ያደግን መሆኑ ተገለፀ” ወዘተ እየተባባልን ችግሮቻችንን እንዳናይ ዐይናችንን መጨፈን ትልቅ አባዜ ነው፡፡
“ሞኝ፤የሚያደንቀው ሞኝ አያጣም”፤ እንዲሉ እርስ በርስ በመደናነቅና “አበጀህ”፣ “አበጀህ!” በመባባል ብዙ የተራመድን በመሰለን ጊዜ መስጋትና መጠንቀቅ ብልህነት ነው፡፡
ፍትህ፤ ዕውነታችን በየትኛው አቅጣጫ እንዲበራ እንደምናደርግ ራሳችንን የምንፈትሽበት ድንቅ መሳሪያ ነው፡፡
“ስለ አገርህ፣ስለ አምላክህ፣ስለ ዕውነትህ፤ ይሁን እንጂ ቅን ዓላማህ፣
ፍትሐዊነት ቅን ፀጋ ነው፣ ፈፅሞ ፍርሃት አይግባህ”
(ይላል ሼክስፒር)
ዲሞክራሲያችንን እንፈትሽ፡፡ “ዲሞክራሲን ማፍቀር እኩልነትን ማፍቀር ነው፡፡” ይለናል ሞንቴስኩ፡፡ ይህ የእኩልነት ፍቅር አለን ወይ?
“ዲሞክራሲ ምርጥና ለመተግበር እጅግ አዳጋች የፖለቲካ አደረጃጀት ነው” ይለናል ራልፍ ባርተን፡፡ ይህንንስ ተገንዝበናል?(dynamic democracy) ተንቀሳቃሽ እና አንቀሳቃሽ ዲሞክራሲ ካልሆነ ዲሞክራሲ የለም ብንል ይሻላል፡፡ ህዝባችን መሳተፍ ሲያቆም፣ፀሀይ ውስጥ ቦታ ሲያጣ -ያኔ ሁላችንም በመበስበስ (በንትበት) ጨለማ (darkness of decadence) ውስጥ በነን እናልቃለን፡፡
ሁላችንም ዲዳ ፣ሞራለ - ቢስ እና የቀለጡ ነብሶች እንሆናለን” (ሳውል ደ-አሊንስኪ)
ዲሞክራሲ ስንል እንደ ፕሉታርክ “ሂድ፡፡ በራስህ ቤት የራስህ ዓይነት ዲሞክራሲ ሞክር” ማለታችን ቢሆንም ይመረጣል፡፡
የሙስናን፣ የጎረቤትን የጦርነትን፣ የሃይማኖትን ነገር፣ የዲሞክራሲንና የዕድገትን ነገር፣ በወጉ ለማየት ችግራችንንና መፍትሄዎቻችንን በተያያዘ ጥምረት ማገናዘብ አለብን፡፡ የሃገራችንን ችግር ስንቃኝ አንዱን ካንዱ አስተሳስረን መሆን አለበት፡፡ አለበለዚያ የአንድ ሰሞን ግርግር ዘመቻ ብቻ ይሆናል፡፡ ተከታታይ ጥረትና ቀጣይነት አይኖረውም፡፡ አንዱን ዘመቻ ሌላው እያስረሳውና እየሻረው ስለሚሄድ ዕድገታችን ደብዛዛ ይሆናል፡፡ የተሳሰረ ጥረት የማይረሳሳ ትግል ነው ሊኖረን የሚገባው፡ ፡ በተበታተነ ሁኔታ ውስጥ እንዳንበታተን፤ አረሙን፣ እንቅፋቱን፣ ዳተኝነቱንና ግብዝነቱን ትተን፣ ለመጓዝ፤ ”የመጣ ሳይመጣ የውሃ ቦይ ጥረግ” የሚለውን ተረት ማሰብ አለብን!!


በክልሉ ዘላቂ መረጋጋት እንዲመጣ የመፍትሄ ሃሳቦችን ጠቁሟል

               ከወራት ዝምታ በኋላ ከሰሞኑ በትግራይ ወቅታዊ ጉዳይ ላይ መግለጫ ያወጣው አረና፤ በክልሉ ከጦርነቱ ጋር ተያይዞ የተፈፀሙ ሰብአዊ ጥቃቶች፣ የንብረት ዘረፋና ውድመት በገለልተኛ አካል እንዲጣራ እንዲሁም የኤርትራ ወታደሮች ከአካባቢው እንዲወጡና ክልሉ ቀድሞ ሲያስተዳድረው የነበረው ግዛቱ እንዲከበርለት ጠይቋል፡፡
የህወኃት ቡድን በነፍጥ መሸነፉን ተከትሎ፣ በትግራይ ተጨባጭ መረጋጋት ያልመጣባቸውን ምክንያቶች  የዘረዘረው አረና፤ ከጦርነቱ በኋላ መጠነ ሰፊ ውድመት፣ ዘረፋ እንዲሁም የሴቶች መደፈርን ጨምሮ ኢ-ሰብአዊ ድርጊቶች መፈጸማቸውን በሰበብነት ይጠቅሳል፡፡ ቀደም ሲል ክልሉ ሲያስተዳድራቸው የነበሩ አካባቢዎች ከህገ መንግስቱ ውጪ በአማራ ክልል ቁጥጥር ስር መሆናቸው እንዲሁም  በዚሁ ሂደት የአካባቢው ነዋሪ በትግራይ ተወላጆች ላይ ወከባና ዘረፋ መፈፀሙም ላለመረጋጋቱ ምክንያት  ነው ብሏል - ፓርቲው፡፡  
በተመሳሳይ፤ የኤርትራ ሰራዊት የትግራይ የተለያዩ አካባቢዎችን ተቆጣጥሮ መገኘቱ፣ ይህን ተከትሎም ኢ-ሰብአዊ ድርጊቶች መፈፀማቸውም ላለመረጋጋቱ አስተዋጽኦ ማድረጋቸውን አረና ይገልጻል፡፡  
የክልሉን ሰላምና መረጋጋት ለማረጋገጥ ይበጃሉ ተብለው በፓርቲው በመፍትሄነት ከተዘረዘሩት መካከልም፤ ሁሉን አቀፍ ሰብአዊ ድጋፍ በትኩረት ማከናወን፣ የመንግስት ተቋማት ወደ ስራ እንዲገቡና በአስቸኳይ የሰው ሃይልና የሃብት ምደባ እንዲደረግላቸው፣ ህገ መንግስታዊ እውቅና ያለውን የትግራይ ግዛት እንዲረጋገጥ እንዲሁም የአማራ ክልል ልዩ ሃይል ከትግራይ አካባቢዎች እንዲወጣ ማድረግ የሚሉት ይገኙባቸዋል፡፡  
በተጨማሪም የኤርትራ ጦር አካባቢውን ለቆ እንዲወጣ፣ ተፈፅሟል የተባሉ ኢ-ሰብአዊ ድርጊቶችም በገለልተኛ አካል ተጣርተው እውነታው እንዲታወቅ፣ አጥፊዎችም እንዲቀጡ ጠይቋል፤ አረና በመግለጫው፡፡


     በትግራይ ክልል በተካሄደው የሕግ ማስከበር ዘመቻ  ወቅት ሰላማዊ ሰዎችን ከመግደል ጀምሮ የጦር ወንጀል ሳይፈጸም እንዳልቀረ ትናንት አርብ ባወጣው ሪፖርቱ ያመለከተው ሂውማን ራይትስዎች፤ ጉዳዩ በአፋጣ በገለልተኛ አካል እንዲያጣራ ጠይቋል።
የሰብአዊ መብት ተቋሙ ትናንት ባወጣው ሪፖርቱ፤ ህዳር 10 ቀን 2013 ዓ.ም የኤርትራ ወታደሮችና መከላከያ በአክሱም ከተማ ላይ በፈፀሙት የከባድ መሳሪያ ድብደባ ሰላማዊ ሰዎች ለሞትና ለጉዳት መዳረጋቸውን፣ ከተማዋ ከተያዘች በኋላም ለሳምንት ያህል ሰላማዊ ሰዎች በጥይት መመታታቸውንና ንብረት በገፍ መዘረፉንና መውደሙን አመልክቷል።
በአክሱም ከተማ የሚገኙ 28 ሰዎችን በስልክ በማናገርና ቪድዮዎችን በማጣራት ሪፖርቱን  ማጠናቀሩን የጠቆመው  ሂውማን ራይትስዎች በከተማም በሁለት ቀናት ጥቃት ከ2 መቶ በላይ ሰዎች ሳይሞቱ እንዳልቀረ አስታውቋል።
በተመሳሳይ ቀደም ባለው ሳምንት በጉዳዩ ላይ ሰፋ ያለ ሪፖርት ያወጣው ሌላኛው የመብት ተሟጋች አምነስቲ ኢንተርናሽናል በአክሱም በኤርትራ ወታደሮች በተፈጸመ ጥቃት ከ2 መቶ በላይ ሰዎች መገደላቸውን ማስታወቁ ይታወሳል።
ሂውማን ራይትስዎች ይህን የምርመራ ሪፖርቱን ከሁለት ሳምንት በፊት ለኢትዮጵያና ለኤርትራ ባለስልጣናት አቅርቦ አስተያየታቸውን እንዲያካትቱ ጠይቆ እንደነበር ነገር ግን ምላሽ እንዳልተሰጠው ገልጿል።
ባለፈው ሳምንት፤ በተመሳሳይ አምነስቲ ኢንተርናሽናል ያወጣውን ሪፖርት ተከትሎ መንግስት  የኤርትራ መንግስት የተለመደ የስም ማጥፋት ሀሰተኛ ሪፖርት ሲል ያጣጣለው ሲሆን የኢትዮጵያ መንግስት በበኩሉ፤ ማጣራት  እንደሚያደርግ መግለፁ  አይዘነጋም። ከጠቅላይ አቃቢ ህግና ከፖሊስ የተውጣጣ አጣሪ  ግብረ ሃይል ፤ አደራጅቶ ማሰማራቱ ተገልጿል።


 “የአገዛዞች ቀይ መስመር፤ ጭቆናን የመስበር ጽናቶች” በሚል ርዕስ የተዘጋጀው የጋዜጠኛ ኤልያስ ገብሩ አዲስ መፅሐፍ በዛሬው እለት ለአንባቢያን
ይበቃል። በተለያዩ የጋዜጦችና መጽሔቶች ላይ በአዘጋጅነት፣ በዋና አዘጋጅነት እንዲሁም ጠንካራ ሂሳዊ ፅሑፎች በማህበራዊ ሚዲያዎች በመጻፍ የሚታወቀውና በዚህም ለተደጋጋሚ እስር የተዳረገው የጋዜጠኛ ኤልያስ ገብሩ መፅሐፍ፤ የሃገሪቱን ፖለቲካዊ፣ ማህበራዊና የህግ
ሂደቶች ይዳስሳል፡፡ በ220 ገጾች የተዘጋጀው “የአገዛዞች ቀይ መስመር”፤ በ180 ብር ለገበያ የቀረበ ሲሆን ከዛሬ ጀምሮ በሁሉም መፃሃፍት ቤቶችና አዟሪዎች እጅ ይገኛል ተብሏል።

 • ትልቁ አጀንዳችን ራስን በራስ የማስተዳደር ጥያቄ ነው
     • ዎላይታነት ተግባር ነው፤ ዎላይታነት አስተሳሰብ ነው
     • ሌሎች ሃይሎች እንደሚሉን ዘር-ተኮር አይደለንም
     • ተወዳዳሪዎች ላይ የሚፈፀሙ ጫናዎች ያሳስቡናል

          የክልልነት ጥያቄ ከሚነሳባቸው የደቡብ አካባቢ አንዱ የዎላይታ ዞን ነው፡፡ አወዛጋቢ የክልልነት ጥያቄ እየቀረበበት ባለው ዎላይታ ለዘንድሮ ምርጫ የፓርቲዎች አሰላለፍ ምን ይመሰላል? ዋነኛ ተፎካካሪዎች እነማን ናቸው? የምርጫው ዋነኛ አጀንዳ ምንድን ነው? በሚሉና ተያያዥ ጉዳዮች ዙሪያ የዎላይታ ብሔራዊ ንቅናቄንና የዎላይታ ህዝብ ዲሞክራሲያዊ ግንባር የመሰረቱት (የዎላይታ ቱሳ ዲሞክራሲያዊ ግንባር) ሊቀ መንበር ከሆኑት አቶ አማኑኤል ሞጊሶ ጋር
የአዲስ አድማስ ጋዜጠኛ አለማየሁ አንበሴ ተከታዩን ቆይታ አድርጓል፡፡


          የዎላይታ ብሔራዊ ንቅናቄ (ዎብን) የምርጫ ዝግጅት ምን ይመሰላል? ለምርጫው በከፍተኛ ትኩረት እየቀሰቀስን ነው፡፡ የእጩ ምልመላ እያጠናቀቅን ነው። በዚሁ መሃል ደግሞ በዎላይታ ጠንካራ መሰረት ከነበረው የዎላይታ ህዝብ ዴሞክራሲያዊ ግንባር (ዎህዴፓ) ጋር ግንባር ፈጥረናል፡፡
የሁለታችንን ለየብቻ መንቀሳቀስ በተመለከተ ግምገማ አድርገን፣ በመካከላችን የመስመርም የአላማም የ ግብም ል ዩነት እንደሌለ ተ ረድተን፣ ለብቻቸው መጓዛቸው አስፈላጊ አይደለም ብለን ተወያይተን ነው ግንባር የፈጠርነው። የሁለቱን ፓርቲዎች ግንባር መፍጠር በጠቅላላ ጉባኤያችን አረጋግጠንም፣ ሰነዱን ለምርጫ ቦርድ አስገብተናል፡፡ የተፈጠረው ግንባር ምን ይባላል? የዎላይታ ቱሳ ዴሞክራሲያዊ ግንባር ይሰኛል የፈጠርነው ግንባር፡፡ ግንባሩን በሊቀ መንበርነት እንድመራ የተመረጥኩትም እኔ ነኝ፡፡ ይሄ ሃይልን፣ ጉልበትንና ገንዘብን በጋራ አሰባስቦ ጠንካራ ተፎካካሪ ሆኖ ለመቅረብ በእጅጉ ያግዘናል፡፡ እኛ ለምርጫው ብቻ አይደለም ግንባሩን የፈጠርነው፤ የህዝቡን አንድነት ለማምጣት ጭምር ዘላቂ ራዕይ አስቀምጠን ነው፡፡ ፓርቲዎቹ በቀጣይ እስከ ውህደት
እንደሚደርሱም አ ቅጣጫ ተ ቀምጧል። የምርጫ ዝግጅታችንም በጋራ ይሆናል፡፡ አሁን ዝግጅታችንን ወደ ማጠናቀቁ ደርሰናል፡፡ የግንባሩ አላማና ግብ ምንድን ነው ? በዝርዝር ያስቀመጣችሁት አላማና ግብ ካለ ቢገልጹልን?
አንደኛ ህዝቡ በተለያየ ደረጃ የጠየቃቸውና እየጠየቃቸው ያሉ የመብትና የእኩልነት ጥያቄዎች አሉ፡፡ ዎላይታ እንደ ብሔር ራሱን በራሱ የማስተዳደር ህገ መንግስታዊ፣ ሞራላዊና ታሪካዊ መብቱን ማረጋገጥ አንዱ ግባችን ነው፡፡ ህዝቡ በወከላቸው ልጆች እንዲመራ ማስቻል፣ እውነተኛ ዴሞክራሲን በተግባር ማሳየት ነው አላማችን፡፡ ዎላይታ በጣም የቆየ ታሪክ፣ ስርወ መንግስት፣ አደረጃጀት ያለው ብሔር ነው። አንድን ህዝብ ብሔር ለማለት የሚያስችሉ
አለማቀፍ መስፈርቶችን የሚያሟላ ነው። ከዛሬ 150 አመታት በፊት ስልጣኔ የነበረው ህዝብ ነው። ያንን ራስን በራስ የማስተዳደር መብቱን መመለስ ነው ግባችን፡፡ በሌላ በኩል፤ የወላይታ ህዝብ የተጋፈጣቸው ፖለቲካዊ፣ ማህበራዊና ኢኮኖሚያዊ ኢ-ፍትሀዊነቶች አሉ። እነዚህን ኢ-ፍትሀዊነቶች መፍታት ሌላኛው ግባችን ነው፡፡ የኛ አላማ በምርጫ የማሸነፍና ያለማሸነፍ ብ ቻ አ ይደለም። የዎላይታ ህዝብ ዲሞክራሲያዊ መብቱን እንዲለማመድ ማድረግ
ነው፡፡ በዚህ ምርጫ ላይ ስትሳተፉ በምን መርህ ነው? እኛ እንደ መርህ ፍትሀዊነትን ይዘን ነው የምንቀሳቀሰው፡፡ እኛ ዝም ብሎ በዎላይታነት ብቻ ድምፅ እናገኛለን ብለን አይደለም የምንሳተፈው፡፡ ሌሎች ሃይሎች እንደሚሉን ዘር ተኮር አይደለንም፡፡ እኛ ዎላይታ ብለን ስንነሳ ከ ደም ጥ ራት ወ ይም ው ልደት ጋ ር የሚያያዝ አይደለም፡፡ ዎላይታነት ተግባር ነው፡፡ ዎላይታነት አስተሳሰብ ነው፡፡ ስለዚህ እኛ የምንበይነውን የሚያሟላ የትኛውም ዘር ሊሆን ይችላል እሱ ዎላይታ ነው፡፡ ያንን የማያሟላው ደግሞ በ ደም ዎላይታ ነ ኝ ቢ ልም እሱ ዎላይታ አይደለም፡፡ ዎላይታነት በደም የሚወረስ አይደለም። ዎላይታነት በተግባር
ነው የሚገኘው፡፡ ስለዚህ እኛ የምንቆመው ለወላይታነት ነው ስንል፣ በዎላይታነት ውስጥ ላሉ ሁሉ ማለት ነው፡፡ ሁሉንም በእኩል እናገለግላለን። አንዱ ሌላውን አሸማቅቆ የሚገፋበትን ሁኔታ አጥብቀን እንቃወማለን፡፡ መርሀችን ፍትሃዊነት ነው፡፡ በምርጫው ማን ነው የእናንተ ዋነኛ ተፎካካሪያችሁ? እኛ በሃገር ደረጃ ያሉ ሁሉንም ፓርቲዎች ድክመትና ጥንካሬ በሰፊው እየገመገምን ነው። አሁን ባለው ደረጃ የእኛን ግንባር ይገዳደራል ብለን የምናስበው ፓርቲ የለም። ብልጽግና እንደሆነ መጀመሪያውኑ ለህዝቡ ጥያቄ አሻፈረኝ ብሎ ተቀባይነቱን አጥቷል። ኢዜማም ቢሆን ዎላይታ የሚያነሳቸውን ጥያቄዎች በትክክል የሚመልስ ስትራቴጂ ሲያስተዋውቅ አላየነውም። ሌሎች ሁለት ፓርቲዎች አሉ፡፡ እነሱም ቢሆኑ ከህዝቡ ራስን በራስ ማስተዳደር ጋር ቀጥታ ግንኙነት ያላቸው አቋሞች ሲያራምዱ አይስተዋሉም። እኛ በቀጥታ የህዝቡን የራስን በራስ የማስተዳደር ጥያቄ ተሸክመን ነው ወደ ምርጫው የምንገባው፡፡ በዚህም ከሌሎቹ የተሻለ ለህዝቡ ፍላጎት የቀረበ እንቅስቃሴ እያደረግን ነው ብለን እናምናለን፡፡ ከዚሁ ጋር በተያያዘ፣ ባለፉት ሁለት ዓመታት፣ በፖለቲካ ኢኮኖሚና ማህበራዊ ዘርፍ ያሉ የዎላይታ ህዝብ ችግሮችን አጥንተን የፖሊሲ አማራጮችን ስናዘጋጅ ነው የቆየነው፡፡ በዎላይታ ምሁራን የተሰናዱ 7 ዋነኛ ፖሊሲዎች አሉን፡፡ በተለይ የወጣቱን ስደትና መፈናቀል የሚያስቆሙ የፖሊሲ አማራጮችን ይዘን ነው የመጣነው፡፡ አሁን ባለው ሁኔታ የዎላይታ ታዳጊ ትምህርቱን
እንኳ በአግባቡ ሳይገፋ በኑሮ ተገፍቶ፣ በአዲስ አበባና ሌሎች ክልሎች ተበታትኖ፣ ለስራ እየተሰደደና ለጉስቁልና እየተዳረገ ነው፡፡ ይሄ መጥፎ ጠባሳ የሚጥል ነው፡፡ ትናንት ደቡብ ላይ ዎላይታ ነበር በዘመናዊ ትምህርት ፈር ቀዳጁ፤ አሁን ግን ይሄ ተለውጧል፡፡ የተማረ ትውልድ እየመከነ ነው፡፡ ተማሪዎች አሁን ላይ ከገጠር ወደ ከተማ እየተሰደዱ ነው፡፡ በአውሮፓና አሜሪካ እንደተበተነው ኢትዮጵያዊ ነው፣ የዎላይታ ታዳጊዎች በየከተማው ተበትነው ያሉት፡፡ ይሄ
ሁኔታ በዚሁ ከቀጠለ እንደ ማህበረሰብም እንደ ሃገርም አደጋ ነው የሚሆነው፡፡ አንድ የሆነ የማህበረሰብ ክፍል ይፈጠራል ማለት ነው። የዜግነት ፖለቲካ የሚያራምዱ አካላት ይሄን እንዴት ነው የሚያስተናግዱት? መጀመሪያ የአካባቢውን ህዝብ ስነ ልቦናና ሞራል መጠበቅ ይቀድማል። አካባቢያዊ ችግሮችን እየፈታን ስንሄድ ነው፣ ዜግነት ብለን አጉልተን ልንንቀሳቀስ የምንችለው፡፡ ይሄ ሁኔታ ውሎ አድሮ አንድ የትውልድ አንጓ ይፈጥራል ማለት ነው፡፡ እኛ ይሄ
የዎላይታ ህዝብ ላይ እንዲያጋጥም አንፈልግም። ስለዚህ ከቀየው ፈልሶ የሄደው ተመልሶ የሚማረው መማር፣ የሚሰራው መስራት አለበት ብለን ነው የተነሳነው፡፡ ለእነዚህ ችግሮች መልስ የሚሰጡ ሰፊ ጊዜ ተወስዶ በምሁራን የተዘጋጁ የፖሊሲ አማራጮች አሉን፡፡ ስለዚህ ምርጫው ፍትሃዊ ከሆነ ማሸነፋችን አይቀርም። ህዝቡ ክልል ልሁን ብሎ ጠይቋል፡፡ በዚህ ጥያቄ የሚደራደር ዎላይታ በአሁኑ ወቅት የለም፡፡ በምርጫው ትልቁ የመፎካከሪያ አጀንዳ
ይሆናል ማለት ነው? በሚገባ! እኛ ራሱ ይሄን አጀንዳ ባንይዝ ህዝቡ ውስጥ ምን እንሰራለን፡፡ ትልቁ አጀንዳችን ራስን በራስ ማስተዳደር ወይም የክልል መዋቅር ጥያቄ ነው፡፡ እኛ የክልል ጥያቄ ስንጠይቅ የመሬት ይገባኛል አይደለም፤ የሞራል የታሪክና የፍትህ ጥያቄ ነው፡፡ ዎላይታ የራሱ የሰለጠነ አስተዳደር
የነበረው ህዝብ ነው፡፡ ዎላይታ ትልቅ ብሔር ነው፤ ክ ልል ለ መሆን ም ንም የ ሚጎደለው ነገር የለም፡፡ የመዋቅር ችግሩን አስተካክሎ፣ የተወላጆቹን ችግር የመፍታት አላማ ነው ያለን። እንዴት? ኢትዮጵያ ውስጥ ያለው አስተዳደር ክልላዊ ነው፡፡ ግንኙነቱ ክልል ከክልል እንጂ ዞን ከክልል አይደለም፡፡ በዚሁ የመዋቅር ችግር የተነሳ ዎላይታ ባለቤት አልባ ነው የሆነው፡፡ ዎላይታ በአዲስ አበባ፣ ኦሮሚያ፣ ሲዳማ ሌሎች ክልሎች በሙሉ ተዟዙሮ የሚሰራ ነው፡፡ ልክ እንደ አማራ ጉራጌ ተበታትኖ ያለ ነው፡፡ በዚህ ሁኔታ ኦሮሚያ ላይ ዎላይታ ችግር ቢገጥመው፣ አሁን ባለው መዋቅር መደራደር እንኳ አይችልም፡፡
ምክንያቱም ዞን ከክልል ጋር በቀጥታ መነጋገር አይችልም፡፡ ስለዚህ መዋቅሩ የዎላይታን መብት ለማስከበር አቅም አይሰጥም፡፡ ክልል ከሆነ ግን ከሌሎች ክልሎች ጋር የመደራደርና የመወያየት አቅም እናገኛለን ምን ያህል እጩዎች ነው ያዘጋጃችሁት?
ለፌደራል ዞኑ ያለው ኮታ 13 ነው። ለደቡብ ክልል ደግሞ 39 ነው፡፡ እኛ በሁሉም ላይ እጩዎች አዘጋጅተናል፡፡ በርካታ ምሁራንን ነው በእጩነት እየመረጥን ያለነው፡፡ እጩዎቻችንንም በተለያዩ አካባቢዎች እየገመገምን ነው፡፡ ዎላይታ አሁንም ዞን ነው፡፡ እናንተ በምርጫው ካሸነፋችሁ ለደቡብ ክልል 39 ወንበር መያዝና 13 የፓርላማ ወንበር መቆጣጠር እንዲሁም ዞ ኑን ማ ስተዳደር ሊ ሆን ይ ችላል። ይሄን እድል ብታገኙ በምን አይነት መንገድ ነው የዎላይታ ጥያቄዎችን ምላሽ ልትሰጡ የምትችሉት?
አንደኛ የሰላማዊ ትግል አማራጮችን በሙሉ እንጠቀማለን፡፡ እስካሁንም መንግስት የክልልነት ጥያቄውን ያልፈታበትን ምክንያት ማንም አያውቀውም፡፡ መንግስት ጥያቄውን ባለቤት አልባ አድርጎ ለማምታታትም እየተሞከረ ነው፡፡ ይሄ ባለቤት አልባ ተደርጎ ለማሳየት የተሞከረው የክልልነት ጉዳይ ባለቤት እንዳለው በምርጫው ይረጋገጣል። አሁን ሾላ በድፍኑ ነው ያለነው። ህዝበ ውሳኔውን ሲያሳውቅ ሁሉም ግልጽ ይሆናል፡፡ እኛ እስከ መጨረሻው የምንታገልለት አላማችን ስለሆነ የሰላማዊ ትግል አማራጮችን በሙሉ እንጠቀማለን፡፡
ከምርጫው ጋር በተገናኘ ተስፋና ስጋታችሁ ምንድን ነው?
ከስጋቱ ስንጀምር ምርጫው ይጭበረበራል የሚል ነው ስጋታችን። ያለፉት ምርጫዎች በዚህ መልኩ ያለፉ መሆናቸው ይታወቃል፡፡ ሌላው ተወዳዳሪዎች ላይ የሚፈፀሙ ጫናዎችና ወከባዎች ያሳስቡናል፡፡ ተስፋችን ደግሞ የህዝብ ጥያቄ ነው፡፡ ህዝባችን ከጎናችን መሆኑ ነው ተስፋችንን ከፍ የሚያደርገው፡፡



Page 7 of 523