Saturday, 18 March 2023 20:11

የግጥም ጥግ

Written by 
Rate this item
(2 votes)

(አልተቀየምኩሽም። ተመለሺ ቅሪ!
ወደጀመርንበት ፊትሽን አዙሪ
ይንጋልሽ በምልሰት
ልቤ ይቀድመኛል
ዱካው ይታየኛል
እንድረስ- እንድረስ- እንድረስ
የተባባልንበት የዘላለም ዳርቻ
ተሰዷል ለብቻ
ወደኋላ አያይም- መብረር አያቆምም
እንባ ሽቅብ ደፍቷል
አልፋ እና ኦሜጋ
መቅረትሽን ሰምቷል
እንዳይተናኮልሽ
የመሸው ትዝታ- ሸኝሻለሁ ባይኔ
ለሁለታችንም እኛን ላስታውስ እኔ
ልቤ ይቀድመኛል
ዱካው ይታየኛል
ዱካው የራሴ ነው
እከተለዋለሁ
ደርሼ ብይዘው
አብረሽው እንደሌለሽ
እንዴት ነግረዋለሁ
ሳይፈነዱ ገና
የጸሐይ እንቡጦች- ወደሚበቅሉበት
ልቤ መንገድ ስቷል
… ኮኮብ ሊቀጥፍልሽ
ባዶ ዘላለም ውስጥ
ብናኝ ሆኖ ጠፍቷል።
… ተመለሺ መሽቷል
ሌሊሳ ግርማ

Read 1184 times