ኢትዮጵያ ምርቶቿን ከቀረጥ ነጻ በሆነ ሥርዓት ወደ አፍሪካ አህጉራዊ ነጻ የንግድ ቀጣና ማዕቀፍ አባል ሀገራት መላክ እንደምትጀምር የንግድና ቀጣናዊ ትስስር ሚኒስቴር አስታወቀ።

የንግድና ቀጣናዊ ትስስር ሚኒስትር ዶ/ር ካሳሁን ጎፌ፤ መስከረም 29 ኢትዮጵያ አህጉራዊ ነፃ የሸቀጦች ንግድ ትግበራን በይፋ ታስጀምራለች ሲሉ ተናግረዋል።

በዚህም ኢትዮጵያ በሚቀጥለው ሳምንት ወደ አፍሪካ አህጉራዊ ነጻ የንግድ ቀጣና ማዕቀፍ አባል ሀገራት ለመጀመሪያ ጊዜ ምርቷን ከቀረጥ ነፃ መላክ ትጀምራለች ያሉት ሚኒስትሩ፤ ይህም የንግድ ተወዳዳሪነትን እንደሚጨምር ተናግረዋል።

የአፍሪካ አህጉራዊ ነፃ የንግድ ቀጠና ስምምነት ትግበራ፣ ከንግድ ቀጠናነት ባሻገር የአፍሪካ ዘላቂ ዕድገትን ለማረጋገጥ የጎላ ጠቀሜታ እንደሚኖረው ሚኒስትሩ አክለው ገልጸዋል፡፡

ቴሌግራም ቻናልችንን በመቀላቀል የአዲስ አድማስን መረጃ ይከታተሉ…

የውሃ ሚኒስትር ሐብታሙ ኢተፋ፣ ሰሞኑን በሱዳን የተከሠተው ጎርፍ ከሕዳሴ ግድብ ጋር የተያያዘ አይደለም ማለታቸውን አሶሴትድ ፕሬስ ዘግቧል።

ሚኒስትሩ ይህን የተናገሩት፣ አንዳንድ የግብጽ የውሃ ባለሙያዎች፣ የሱዳኑን ጎርፍ በሕዳሴ ግድብ ምክንያት የተከሠተ መኾኑን መግለጣቸውን ተከትሎ እንደኾነ ዘገባው ጠቅሷል።

ጎርፉ የኋይት ናይል ወንዝ ሙላት የፈጠረው ሊሆን ይችላል ያሉት አቶ ሐብታሙ፣ ግድቡ ባይኖር የጎርፍ አደጋው እጅግ የከፋ ሊሆን ይችል ነበር ብለዋል ተብሏል።

ግድቡ እንዲያውም ጎርፉ ከፍተኛ ውድመት እንዳያደርስ በመከላከል ረገድ ቁልፍ አስተዋጽዖ ማድረጉን ሚኒስትሩ መግለጣቸውንም ዘገባው አመልክቷል።

ሚኒስትሩ፣ ኢትዮጵያ ከግድቡ ትርፍ ውሃ አለመልቀቋንም ተናግረዋል ተብሏል።

ዋዜማ-

ቴሌግራም ቻናልችንን በመቀላቀል የአዲስ አድማስን መረጃ ይከታተሉ…

በኢትዮጵያ ሀገራዊ የኤችአይቪ ስርጭቱ ካላፉት ዓመታት የተሻለ ቢሆንም፣ ከክልል ክልል፣ ከከተማ ከተማ የስርጭቱ መጠን እንደሚለያይ ተነግሯል።

በተለይ በወጣቶችና ለኤችአይቪ እጅግ ተጋላጭ ተብለው የተለዩ የማህበረሰብ ክፍሎች ላይ የመያዝ እድሉ በመጨመሩ መዘናጋት እንዳያስከትል ጥንቃቄ እንደሚያስፈልግ የጠቆሙት በኤድስ ሄልዝ ኬር ፋውንዴሽን (AHF) ኢትዮጵያ የኤችአይቪ መከላከልና ምክር አገልግሎት አስተባባሪ እንዲሁም የህብረተሰብ ጤና ባለሙያ የሆኑት አቶ ቢኒያም ባዩ ናቸው።

በጠቅላላው የማህበረሰብ ክፍል ውስጥ ያለው የስርጭት መጠን ከዚህ ቀደም ከ 1 በመቶ በላይ ተሻግሮ የነበረውን በትብብር በመሰራቱ የስርጭቱ መጠን ከጊዜ ወደ ጊዜ እየቀነሰ ቢመጣም፣ በተለይም በስራቸውና በጾታቸው ምክንያት ተጋላጭ የሆኑ ሰዎች ቁጥር ከፍተኛ መሆኑንም አቶ ቢኒያም ይናገራሉ።

በወጣቶች በኩል የኤችአይቪ የመያዝ ቁጥርም ከፍተኛ ነው የሚሉት ባለሙያው፤ በኤችአይቪ መከላከል ላይ የሚሰሩ አዳዲስ ጥናቶች ወጣቶች ላይ ትኩረት ሊያደርጉ ይገባል ብለዋል፡፡

በቅርብ የኢትዮጵያ ህብረተሰብ ጤና ኢንስቲቱዩት በሰጠው መረጃ መሰረት፤ በወጣቶች ላይ ያለው የኤች አይቪ የስርጭት ሁኔታ 1.7 በመቶ እንደሚጠጋ የተነገረ ሲሆን፤ ከትምህርት ቤት ውጪ ባሉ ወጣቶች 2.2 በመቶና በትምህርት ቤት ባሉት ደግሞ 1.3 በመቶ ነው ተብሏል።

በአጠቃላይ ወጣቶችን ስንመለከት ካለው የኤችአይቪ ስርጭት ሁኔታ ከፍ ያለ መሆኑንና ከሌላው የማህበረሰብ ክፍል በተለየ ሁኔታ ከ10 እስከ 24 ዓመት የእድሜ ክልል ላይ ብዙ መስራት እንደሚያስፈልግ በቅርብ ጊዜ እየወጡ ያሉ መረጃዎች እንደሚያሳዩ ባለሙያው መጥቀሳቸውን ሸገር ዘግቧል፡፡

ኬንያ ዜጎቿ ወደ ሩሲያ በግዳጅ እየተወሰዱ በዩክሬን ጦርነት ውስጥ እንዲሳተፉ ይደረጋሉ መባሉን ተከትሎ ምርመራ መጀመሯ ተሰምቷል፡፡

ምርመራው ኬንያዊው አትሌት ኢቫንስ ኪቤት፣ የሩሲያ ሰራዊትን እንድቀላቀል ተታልዬ ነበር ማለቱን ተከትሎ የመጣ ነው ተብሏል፡፡

የኬንያ ባለስልጣናት እውነታውን እንዲሁም የተጎጂዎችን ደህንነት ለማረጋገጥ፣ ከሩሲያና ከዩክሬን ባለስልጣናት ጋር እየተነጋገሩ መሆኑ ተዘግቧል፡፡

ይህ ሁኔታ በግጭት ቀጠና ውስጥ የውጭ ሀገር ዜጎችን ኢላማ ያደረገ ቅጥር ላይ ያለውን ስጋት አጉልቶ እንደሚያሳይ ተጠቁሟል፡፡

ኬንያ አንዳንድ ዜጎቿ ወደ ሩሲያ ጦር ሰራዊት በግዳጅ እንደገቡና አሁን በዩክሬን የጦር ምርኮኞች ሆነው እንደሚገኙ የሚገልጽ ዘገባ ከወጣ በኋላ ነው የማጣራት ምርመራውን የከፈተችው፡፡

ቴሌግራም ቻናልችንን በመቀላቀል የአዲስ አድማስን መረጃ ይከታተሉ…

• ጉብኝቱ በእዳ ሽግሽግ ዙሪያ ለመምከርና የኢኮኖሚ

ትብብርን ለማጠናከር ያለመ ነው ተብሏል

በአዲሱ የብሔራዊ ባንክ ገዢ ዶ/ር ኢዮብ ተካልኝ የተመራ ልዑክ በቻይና ቤጂንግ የሥራ ጉብኝት እያደረገ ሲሆን፤

ጉብኝቱ በእዳ ሽግሽግ ዙሪያ ለመምከርና በኢትዮጵያና ቻይና መካከል ያለውን የኢኮኖሚ ትብብር ለማጠናከር ያለመ ነው ተብሏል፡፡

ልዑካኑ በቤጂንግ ቆይታቸው ከቻይና ገንዘብ ሚኒስቴር ከፍተኛ አመራሮች፣ ከቻይና ሕዝብ ባንክ፣ ኤግዚም ባንክ እና ከተለያዩ የንግድ ተቋማት አመራሮች ጋር እንደሚወያዩ ይጠበቃል፡፡

በዚህም በኢትዮጵያ ሀገር በቀል የኢኮኖሚ ሪፎርም የተከናወኑ ሥራዎችንና የተገኙ ውጤቶችን በተመለከተ ገለጻ እንደሚያደርጉ ባንኩ አስታውቋል፡፡

በቀጣይ በኢትዮጵያ የመልማት አቅም ያላቸው የኢንቨስትመንት ፕሮጀክቶችን በተመለከተ ዝርዝር ማብራሪያ እንደሚሰጥ ተጠቁሟል፡፡

የአዲስ አበባ ከተማ ገቢዎች ቢሮ፣ ከመንግሥት ገቢ ሊቀንሱ የሚችሉ ከባድ የሂሳብ ግድፈቶች የፈጸሙ የ10 የሂሳብ ባለሙያዎችና ኦዲተሮች የሙያ ፈቃድ እንዲሰረዝ ለኢትዮጵያ የሂሳብና ኦዲት ቦርድ ጥያቄ አቀረበ።

ቢሮው እንዳስታወቀው፣ በ2017 በጀት ዓመት ውስጥ 13 የግብር ከፋዮችን የሂሳብ መዝገብ በመመርመር ከባድ ግድፈቶች የተገኙባቸውን 10 ባለሙያዎች ለይቷል። ቢሮው ባደረገው የቅድመ ኦዲት ምርመራ፣ እነዚህ ባለሙያዎች ያዘጋጇቸው የሂሳብ መዝገቦች ከፍተኛ መጠን ያለው የገቢ ልዩነት እንዳለባቸውና በታክስ ስወራ መንግሥት ሊያገኘው የሚገባውን ገቢ ሊያሳጣ እንደነበር ገልጿል።

በዚህም መሰረት፣ ቢሮው ከፍተኛ የገንዘብ መጠን የመንግስትን ጥቅም ሊያሳጣ የሚችል ግድፈት የፈጸሙ 10 የሂሳብ ባለሙያዎችና ኦዲተሮች የሙያ ፈቃዳቸው እንዲሰረዝ ጥያቄ አቅርቧል። የቢሮው ሃላፊዎች እነዚህ ባለሙያዎች በቦርዱ የሙያ ፈቃድ የተሰጣቸው መሆናቸውን አረጋግጠዋል።

ቢሮው በተጨማሪም የከተማው ነዋሪዎችና የግብር ከፋዮች፣ ፈቃዳቸው እንዲሰረዝ የተጠየቀባቸው እነዚህ የሂሳብ ባለሙያዎች የሚያዘጋጁትን የሂሳብ መዝገብ እንደማይቀበል አስጠንቅቋል። የስም ዝርዝራቸውን ከቦርዱ በመጠየቅ የሙያ ስነ ምግባሩን ጠብቀው በሚሰሩ የሂሳብ ባለሙያዎችና ኦዲተሮች የሂሳብ መዝገቡን በማሰራት እንዲያቀርብም አሳስቧል፡፡

የአዲስ አበባ ገቢዎች ቢሮ ከዚህ ቀደምም በሂሳብ መዝገብ አዘገጃጀት ላይ የሚስተዋሉ ግድፈቶችን ለመቀነስ ከቦርዱና ከሙያ ማህበራት ጋር በመተባበር መፅሄት በማዘጋጀትና በመወያየት ትምህርት ሲሰጥ እንደነበር አስታውሷል።

አስ-