ፓርኪንሰን የተባለው በሽታ ስያሜውን ያገነው ከተመራማሪው ሚስተር ፓርኪንሰን እንደሆነ ይነገራል፡፡ ቀደም ሲል በሽታው በአገራችን ብዙ ትኩረት ያላገኘና ብዙ ሰው የማያውቀው ነበር፡፡ ሆኖም ከጊዜ ወደ ጊዜ የታማሚዎቹ ቁጥር እየበረከተ በመምጣቱ ከሶስት ዓመት ወዲህ መጠነኛ ትኩረት ሊያገኝ ችሏል፡፡  በ32 ዓመታቸው በበሽታው የተጠቁት ወ/ሮ ክብራን፤
“የፓርኪንሰን ታማሚዎች ማህበር” መስርተው ታማሚዎችን ለመርዳት እየተንቀሳቀሱ
ይገኛሉ፡፡ ስለበሽታው ምንነት ህብረተሰቡ እንዲያውቅ፣ ለጤና ባለሙያዎች ለሚዲያ ሰዎችና ለበጎ ፈቃደኞች ስልጠና ይሰጣል፡፡ ማህበሩ የመድኃኒትና የገንዘብ እርዳታ በማፈላለግና ህብረተሰቡን በማንቃት በበሽታው ተይዘው እቤት የቀሩትን ሰዎች ወደ ህክምና ለማምጣት እየተጋም ይገኛል፡፡ ባለፈው ሳምንት መጨረሻ በብሄራዊ ሆቴል ለጋዜጠኞች በተሰጠው የግማሽ ቀን የግንዛቤ ማስጨበጫ ስልጠና ላይ የተገኘችው የአዲስ አድማስ ጋዜጠኛ ናፍቆት ዮሴፍ፤ የማህበሩ በጎ ፈቃደኛ ከሆኑት ከዶክተር ዳዊት ክብሩ ጋር በፓርኪንሰን ህመም መንስኤዎችና መፍትሄዎች ዙሪያ ተከታዩን ቃለምልልስ አድርጋለች፡፡  

ፓርኪሰን የሚባለው በሽታ ምንድን ነው?
በሰውነት ውስጥ “ኒውሮ ዲጀነሬቲቭ” የሚባሉ በሽታዎች ይከሰታሉ፡፡ ዝግመታዊ በሆነ ሂደት አዕምሮ ውስጥ የሚገኝ “ባዛል ጋንግሊያን” የሚባል ክፍል ውስጥ የሚኖሩ የነርቭ ሴሎች አሉ፡፡ እነዚህ ሴሎች “ዱፓሚን” የሚባል ንጥረ ነገር ያመነጫሉ። እነዚህ ሴሎች ሲሞቱ ደግሞ ንጥረ ነገሩ መመረት ያቆማል፡፡ሰ የዚህ ንጥረ ነገር ማነስ ወይም አለመኖር ለፓርኪንሰን በሽታ ያጋልጣል፡፡
“ዱፓሚን” የተባለውን ንጥረ ነገር ዋነኛ ጥቅሙ ምንድን ነው?
ንጥረ ነገሩ ዘርፈ ብዙ ጥቅም አለው፡፡ ዋነኛው ጥቅሙ ግን በሞተርነት የጡንቻዎችን እንቅስቃሴ ማቀላጠፍና ማነቃቃት ነው፡፡ ዱፓሚን ሲያንስ ግን የበሽታው ዋና ዋና ምልክቶች መታየት ይጀምራሉ፡፡
ምልክቶቹን ቢጠቅሱልኝ?
ለምሳሌ መንቀጥቀጥ፣ የጡንቻ መገታተር፣ የእንቅስቃሴ ፍጥነት መፍዘዝና የራስን ሚዛን አለመጠበቅና የመሳሰሉት ዋና ዋና ምልክቶች ናቸው፡፡
ዱፓሚን የተባለው ንጥረ ነገር የሚያንሰው አምራች ሴሎች ሲሞቱ ነው ብለውኛል፡፡ ሴሎቹ የሚሞቱበት ምክንያትስ ምን ይሆን?
ቀደም ብዬ እንደነገርኩሽ “ኻዛል ጋንግሊያ” የሚባለው የአዕምሮ ክፍል ውስጥ የሚገኙ ዱፓሚን አምራች ሴሎች ምክንያቱ ባልታወቀ ምክንያት ቀስ በቀስ ይሞታሉ፡፡ ከ80 በመቶ በላይ ሲሞቱ ደግሞ የንጥረ ነገሩ እጥረት ይከሰትና የበሽታው ምልክቶች መታየት ይጀምራሉ፡፡
በሽታው በአብዛኛው በየትኛው የእድሜ ክልል ያሉ ሰዎችን ያጠቃል?
እድሜያቸው ከ60 በላይ የሆኑ ሰዎች በብዛት በበሽታው ይጠቃሉ፡፡ አንዳንድ ጊዜ ግን በ20 እና በ30 አመት ዕድሜ የሚገኙ ሰዎችም በበሽታው የሚጠቁበት ጊዜ አለ፡፡ ከ90 በመቶ በላይ ግን ከ60 ዓመት በላይ የሆኑ ሰዎች ላይ ይከሰታል፡፡
በሽታው በሴቶች ላይ ይበረታል ወይስ ወንዶችን ያጠቃል?
ከሴቶች በበለጠ ወንዶችን የሚያጠቃ ሲሆን ከተማ ከሚኖሩ ገጠር የሚኖሩት ላይ ይበረታል፡፡
በአገራችን ተላላፊ ያልሆኑት በሽታዎች የሚባሉት እንደ ስኳር፣ ኩላሊት፣ ደም ግፊትና የመሳሰሉት ውስጥ ፓርኪንሰን ሊመደብ ይችላል? በአገራችንስ በሽታው ምን ያህል ይታወቃል?
በቅርብ ጊዜ በአገር አቀፍ ደረጃ በፓርኪንሰን ላይ የጠተና ጥናት የለም፡፡ አንድ ጥናት ከ30 ዓመት በፊት በፕሮፌሰር ረዳ ተሰርቶ ነበር፡፡ ያኔ ጥናቱ ሲሰራ የኢትዮጵያ የእድሜ ጣሪያ 43 ነበር፡፡ በአሁኑ ወቅት ግን የኢትዮጵያዊያን የእድሜ ጣሪያ 65 ዓመት ደርሷል እየተባለ ነው፡፡ በመሆኑም የበሽታው ተጠቂዎች ቁጥር እየጨመረ ነው የሚሄደው፡፡ ያደጉት አገራት በፓርኪንሰን የሚጠቁት የእድሜ ጣሪያቸው ትልቅ ስለሚሆን ነው፡፡ በአገራችን በሽታው እንደ በሽታ ትኩረት ማግኘት የጀመረው ከሶስት ዓመት ወዲህ ነው፡፡
ኢትዮጵያ ውስጥ የፓርኪንሰን ተጠቂዎች ቁጥር ምን ያህል እንደሆነ ይታወቃል? ከነርቭ ህመምስ በምን ይለያል?
ቀደም ሲል እንደነገርኩሽ በቅርብ የተጠና ጥናት ስለሌለ ቁጥራቸውን የሚያውቅ የለም። ታማሚዎቹም መራመድ፣ መናገር፣ መንቀሳቀስ ስለማይችሉ ወደ ህክምና አይመጡም፡፡ ስለዚህ ምን ያህል ናቸው የሚለው አይታወቅም፡፡ በእርግጥ አሁን አሁን የሰው ግንዛቤ እየጨመረ በመምጣቱ፣ ሰዎች ምልክቱን ሲያዩ ወደ ህክምና እየመጡ ነው። ከነርቭ በሽታ በምን ያለያል ላልሽው ነርቭን የሚያጠቁ በርካታ በሽታዎች አሉ፡፡ ለምሳሌ ስትሮክ የነርቭ በሽታ ነው፣ ኦሜንሺያ (የመርሳት ችግርም) እንዲሁ ነርቭን የሚያጠቃ በሽታ ነው፡፡
ስለዚህ አንድ ራሱን የቻለ የነርቭ በሽታ የለም፡፡ ፓርኪንሰንም ነርቭን ከሚያጠቁ በሽታዎች አንዱ ነው፡፡ በሽታው እንደነገርኩሽ የራሱ ምልክቶችና ባህሪዎች አሉት፡፡
በበሽታው ህክምና ላይ ስፔሻላይዝ አድርገው የሚሰሩ ባለሙያዎችና የጤና ተቋማት አሉ?
ባለሙያዎቹ የነርቭ ስፔሻሊስቶች ናቸው፤ ጤና ተቋማትም አሉ፡፡ ህክምናው በመንግስት ሆስፒታሎች የሚሰጥ ሲሆን በጥቁር አንበሳ ስፔሻላይዝድና በዘውዲቱ ሆስፒታል ይሰጣል፡፡ ታማሚዎች በእነዚህ ተቋማት መታከም ይችላሉ፡፡
ፓርኪንሰን በህክምና ይድናል ወይስ አብሮ የሚኖር ነው?
በሽታውን የሚያጠፋ መድኃኒት የለም፤ የሚያስታግስ እንጂ፡፡ ለምሳሌ የስኳር ታማሚዎች ኢንሱሊን በተደጋጋሚ እንደሚሰጣቸው ሁሉ መድኃኒቱን እድሜ ልክ በቋሚነት በመውሰድ ረጅም ጊዜ ይኖራሉ፡፡ ፓርኪንሰን በራሱ ገዳይ አይደለም፡፡
ለሌሎች በሽታዎችስ ያጋልጣል?
አዎ ለሌሎች ጉዳቶች ያጋልጣል፡፡ ለምሳሌ ለመሰበር አደጋ ያጋልጣል፡፡ ሚዛን መጠበቅ ስለማይችሉ ይወድቃሉ፤ ያን ጊዜ ስብራት ይመጣል። በሌላ በኩል ለሳንባ ምች በተደጋጋሚ ያጋልጣል፡፡ የፓርኪንሰን ታማሚዎች በአብዛኛው ለሳንባ ምች ይጋለጣሉ፡፡
ህክምናው በምን መልኩ ነው የሚሰጠው? መድኃኒቱስ?
ዘርፈ ብዙ ህክምና ነው ያለው፡፡ የክኒን ህክምና አለ፣ የስራ ቴራፒ ይሰጣል፡፡ የንግግር ቴራፒና የቡድን ቴራፒ ይሰጣል፡፡ በሽታው ንግግር፣ መዋጥ ሁሉ ይከለክላል፡፡ የንግግር ቴራፒ፣ ምግብ የመዋጥ ቴራፒ ሁሉ ይሰጣል፡፡ አገራችን ውስጥ በዋናነት ያለው የፊዚዮ ቴራፒና የክኒን ህክምና ነው፡፡
በሽታው በጡረታ እድሜ ላይ ያሉትን ነው የሚያጠቃው፡፡ መድኃኒቶቹ የጡረተኞችን አቅም አይፈትኑም?
በአገራችን ሁለት አይነት ክኒኖች አሉ፡፡ 600 እና 700 ብር ናቸው፡፡ እንዳልሽው ለጡረተኛ ውድ ናቸው፡፡ ይከብዳቸዋል፡፡ ምንም የገቢ ምንጭ እንደሌላቸው ካስመሰከሩ በመንግስት ሆስፒታሎች በነፃ የሚታከሙበት እድል አለ፡፡ ነገር ግን አንዳንዴ መድኃኒቱ ከአገር በሚጠፋበት ጊዜ የግድ ወደ ግል ፋርማሲዎች ሄደው ለመግዛት ይገደዳሉ፡፡
በሽታው የመጨረሻ ደረጃ ላይ ሲደርሱ ታማሚዎቹ ምን ይሆናሉ?
ይህ እንግዲህ ስቴጅ ፋይቭ (ደረጃ አምስት) ይባላል፡፡ ታማሚዎች እዚህ ደረጃ ላይ ሲደርሱ ዊልቸር ላይ ይቀራሉ፣ ንግግር ያቅታቸዋል፣ ምግብ መዋጥ አይችሉም፤ የአልጋ ቁራኛ ይሆናሉ ማለት ነው፡፡
ታዲያ እዚህ ደረጃ ሲደርሱ በምን መልኩ ይረዳሉ?
የንግግር ቴራፒስቶች የንግግርና የአዋዋጥ ስልጠና ይሰጧቸዋል፣ ይህን ሲያደርጉ ብዙ ትንታና ሳል የሚይዛቸው ከሆነ በቀዶ ህክምና ሆዳቸው ላይ ቲዩብ ገብቶላቸው፣ ምግብ በዚያ በኩል እንዲያገኙ ይደረጋሉ፡፡ ይህ እንዲህ የመጨረሻው ደረጃ ላይ ሲደርስ ነው፡፡
የዚህ በሽታ ተጠቂዎች በአማካኝ ምን ያህል እድሜ ይኖራሉ?
ከዋናው የእድሜ ጣሪያ ሁለት ወይም ሶስት አመት ቢቀንሱ እንጂ በደንብ ይኖራሉ፡፡ እንደነገርኩሽ ፓርኪንሰን በራሱ ገዳይ አይደለም፡፡ ለምሳሌ የኖርማል ሰው የእድሜ ጣሪያ 65 ዓመት ከሆነ እነሱ 62 ወይም 63 ዓመት መኖር ይችላሉ፡፡ ዋናው ችግር ግን ተጠቂዎቹ እድሜያቸውን ሙሉ መሥራትና ምርታማ አለመሆናቸው ነው፡፡
ዋናው የበሽታው መንስኤ እድሜ ነው ተብሏል አንዳንዴ በ30ዎቹ ውስጥም ያሉት ይጠቃሉ፡፡ ለምሳሌ የፓርኪንሰን ታማሚዎች ማህበር መስራች የሆነችው ወ/ሮ ክብራን በ32 ዓመቷ በበሽታው መጠቃቷ ከአኗኗር ዘይቤ ጋር ይገናኝ ይሆን?
በሽታው ለምን እንደሚከሰት አይታወቅም፡፡ ዋናው የዱፓሚን እጥረት ነው እጥረቱ የሚከሰተው አምራች ሴሎች ሲሞቱ ነው፡፡ ሴሎቹ ለምን እንደሚሞቱ አይታወቅም፡፡ ሴሎቹ የሰውየው እድሜ ሲጨምር ይሞታሉ ቢባል እንኳን በ30ዎቹ እድሜ ያሉትን ለምን እንደሚያጠቃ የሚታወቅ ነገር የለም፡፡
እዚህ አገር ለፓርኪንሰን በሽታ ህክምና የሚሰጥ ራሱን የቻለ ስልጠና አለ?
የፓርኪንሰን ስፔሻሊስት ለመሆን የሚሰጥ ስልጠናና ትምህርት እዚህ አገር የለም፤ ነገር ግን አንድ ባለሙያ በነርቭ ህክምና ላይ ስፔሻላይዝ ካደረገ በኋላ “Movement disorder” ወይም የእንቅስቃሴ መታወክ ሰብስፔሻሊቲ ስልጠና አለ፡፡ እሱን ወስደን ነው የምንሰራው፡፡

መድኃኒት ቤት (ፋርማሲ) ሄደው ሐኪም ያዘዘልዎትን የመድኃኒት መግዣ ወረቀት ሲሰጡ ፋርማሲስቱ፣ አወሳሰዱን በብልቃጡ ኮሮጆ ወይም ክኒኑን በጠቀለለበት ወረቀት ላይ ‹በቀን አንድ ጊዜ› ብለው ይሰጣሉ፡፡ ስህተቱ መድኃኒቱን ያዘዘው ሐኪም ይሁን ወይም የፋርማሲስቱ አይታወቅም እንጂ ልክ አይደለም፡፡ መድኃኒቱስ ‹በቀን አንድ ጊዜ› ይወሰድ። ግን መቼ? ጧት፣ ቀን፣ ማታ ወይስ ሌሊት? ግልጽ አይደለም፡፡
መድኃኒቶቹ የሚወሰዱበት ሰዓት ካልታወቀ ችግር አለው፡፡ ምክንያቱም ውጤታማ የሚሆኑባቸው ሰዓት አላቸው፡፡ ያለበለዚያ፣ ማሻላቸውንና ማዳናቸው ቀርቶ ጉዳት ሊፈጥሩ ይችላሉ፡፡ እንዴት? ቢባል እንስሳትም ሆኑ ተክሎች እንቅልፍ የሚተኙበት፣ ሆርሞን የሚያመርቱበት፣ ሌሎች ሂደቶችን የሚቆጣጠሩበት ተፈጥሯዊ የሰዓት ዑደት አላቸው፡፡
ብዙ መድኃኒቶች መወሰድ ባለባቸው ሰዓት ካልተወሰዱ ጥቅም ላይሰጡ ይችላሉ፡፡ “በተሳሳተ ሰዓት ከተወሰዱ፣ ድርጊቱን ዝም ብለው በቸልታ አይመለከቱትም፡፡ መልሳቸው መጥፎ ሊሆን ይችላል” ይላሉ በቴክሳስ አውስተን ዩኒቨርሲቲ የባዮሜዲካል ኢንጂነሪንግ ክፍል ረዳት ፕሮፌሰር የሆኑት ሚሼል ሰለንስኪ፡፡ “መድኃኒቶቹ በጭራሽ ዋጋ የላቸውም ማለት አይደለም፡፡ ነገር ግን ውጤታቸው በጣም ዝቅተኛ ይሆናል ወይም ድርጊቱን በቸልታ ላይመለከቱ ይችላሉ፡፡ ‹ባዕድ አካል መጣብን› ብለው መድኃኒቱን የሚያከሽፍ ነገር ሊያዘጋጁ ይችላሉ” ብለዋል ምሁሩ፡፡
በአሁኑ ወቅት የሚወሰዱት መድኃኒቶች ከፍተኛ ጥቅም እንዲሰጡ ወይም የሚያስከትሉት የጎንዮሽ ጉዳት ዝቅተኛ እንዲሆን drug chronotherapy advocats cyncing የተባለ የመድኃኒት አወሳሰድ ዘዴ መጥቷል፣ በዚህና በሌሎች ዘዴዎች ላይ ተመስርቶ ለተለያዩ ሕመሞች የሚታዘዙ መድኃኒቶች መወሰድ ያለባቸውን ሰዓት (ጊዜ) እንዲህ አቅርበናል። (ማሳሰቢያ፡- በፍፁም ሐኪምዎን ሳያማክሩ ወይም መድኃኒት የሚሸጥልዎትን ባለሙያ ሳያነጋግሩ መድኃኒት የሚወስዱበትን ጊዜ እንዳይለውጡ!!)
በጧት መወሰድ ያለባቸው መድኃኒቶች
የድብርት መድኃኒት፡- የተወሰኑ ሰሮቶኒን (Cerotonin) የተባሉ ነርቭ አነቃቂ ኬሚካሎች፣ የድብርት (ድባቴ) ሕመም ያለባቸው ሰዎች ጥሩ እንቅልፍ እንዳይተኙ (እንዳያገኙ) ያደርጋሉ፡፡ ስለዚህ ሕሙማኑ ጧት ሲነሱ ድብር ይላቸዋል፡፡ ለዚህ ነው ባለሙያዎች ብዙ ጊዜ ሕሙማኑ ከእንቅልፍ ሲነሱ መድኃኒታቸውን እንዲወስዱ የሚያዙት፡፡
የአጥንት መሳሳት መድኃኒቶች፡- ይህ የአጥንት በሽታ አብዛኛውን ጊዜ ያረጡ ሴቶችን አጥንት በጣም በመቦርቦር፣ በቀላሉ እንዲሰበርና በዝግታ እንዲያብጥ የሚያደርግ ነው፡፡ ሰውነታችን ታዲያ ለዚህ በሽታ የሚታዘዙትን እንደ ቦኒቫ እና ፎሳማክስ (Boniva and Fosamax) ያሉ መድኃኒቶችን በቀላሉ አይቀበልም፡፡
ስለዚህ ሐኪሞች ሕሙማኑ፣ ጧት በማለዳ ምንም ሳይቀምሱ ባዶ ሆዳቸውን መድኃኒታቸውን በአንድ ብርጭቆ ከዋጡ በኋላ፣ ምንም ሳይበሉ፣ ሳይጠጡ ወይም ሌላ መድኃኒትም ሆነ በተጨማሪነት የሚወሰዱ ሳፕሊመንቶችን ሳይወስዱ ለአንድ ሰዓት እንዲቆዩ ይመክራሉ፡፡
በእራት ሰዓት አካባቢ
ለቃር የሚወሰዱ መድኃኒቶች፡- ሆድ ከቀኑ 10 ሰዓት እስከ ሌሊቱ 8 ሰዓት ባለው ጊዜ ውስጥ፣ ከማንኛውም የዕለቱ ጊዜ (24 ሰዓት) ከሁለት እስከ ሦስት ጊዜ የበለጠ አሲድ ያመነጫል፡፡ እንደ ፔፕሲድ (Pepcid) ወይም ዛንታክ (Zantac) ያሉ አሲድ የሚቀንሱ መድኃኒቶች የሚወስዱ ከሆነ እራት ከመብላትዎ 30 ደቂቃ በፊት ይውሰዱ፡፡
ሆድ ከፍተኛውን የአሲድ መጠን የሚያመነጨው በሌሊት ስለሆነ መድኃኒቶቹ በዚህ ሰዓት ሲወሰዱ ለመቆጣጠር ይረዳቸዋል፡፡
የአለርጂ መድኃኒቶች፡- አብዛኛውን ጊዜ የመተንፈሻ አካላት ይብስ የሚታፈኑትና የበለጠ አጣዳፊ ሆነው የበሽታ መከላከያ ሴሎች የሚያመነጩት የሽታው ቀስቃሽ የሆነው ሄስታሚን (Histamine) የተባለ አፋኝ ምልክት መጠን ከፍተኛ የሚሆነው በጧት ማለዳ ነው፡፡
እንደ ክለሪቲን (Claritin) ያሉ የአለርጂ መድኃኒቶች በቀን ውስጥ አንዴ ከተወሰዱ የመከላከል ኃይላቸው ከፍተኛ ደረጃ ላይ የሚደርሰው ከስምንት እስከ 12 ሰዓት ባለው ጊዜ ነው፡፡ መድኃኒቱን በእራት ጊዜ መውሰድ፣ በማለዳ የሚከሰተውን ማፈን (የአለርጂ ምልክቶች) የበለጠ ለመከላከል ይረዳል፡፡ ስለዚህ የአለርጂ መከላከያ የሆነውን ፀረ ሄስታሚን በቀን ሁለት ጊዜ ጧትና ማታ ይውሰዱ፡፡
III.  በመኝታ ሰዓት የሚወሰዱ
የኮሌስትሮል መድኃኒት - በጉበት ውስጥ የሚፈጠረው የኮሌስትሮል (ስብ) ምርት መጠን ከፍተኛ የሚሆነው እኩለ ሌሊት ላይ ነው፡፡ ዝቅተኛ ምርት የሚኖረው ደግሞ ጧትና ከእኩለ ቀን ብዙም ሳይረፍድ ነው፡፡ ስለዚህ እንደስታቲን (Statin) ያሉ ደም ውስጥ ያለ የስብ መጠን የሚቀንሱ መድኃኒቶች መወሰድ ያለባቸው ከመኝታ ሰዓት በፊት ነው፡፡
የደም ግፊት መድኃኒቶች - አብዛኛውን ጊዜ የደም ግፊት መጠን ከፍ የሚለው ቀን ላይ ነው፡፡ ዝቅ የሚለው ደግሞ ሌሊት በመኝታ ጊዜ ነው፡፡ ነገር ግን ከፍተኛ የደም ግፊት ያለባቸው ብዙ ሰዎች በተለይ ዕድሜ እየጨመረ ሲሄድ ይህን የሌሊት ደም ግፊት ዝቅ ማለት በትክክል አያረጋግጡም፡፡ ከፍተኛ የደም ግፊት ደግሞ ለስትሮክ፣ ለልብ ሕመም (ኧርት አታክ) ለኩላሊት በሽታ መፈጠር መንስኤ ይሆናል፡፡
እንዴት መሰላችሁ? ሌሊት፣ የደም ግፊት አነስተኛ ነው ብለው ስለሚያስቡ፣ ሲተኙ፣ ምንም ዓይነት የደም ግፊት መቀነሻ መድኃኒት አይወስዱም፡፡ የደም ግፊቱ መጠን ከቀን ይቀንሳል ተባለ እንጂ አለ፡፡ ለዚህ ነው አንዳንድ ሰዎች የደም ግፊታቸው በዝቶ እንዳሸለቡ በዚያው የሚቀሩት፡፡
ስለዚህ ሐኪሞች የሌሊት የደም ግፊት መጠን ከቀኑ ጋር ተመሳሳይ እንዲሆንና የተጠቀሱት የበሽታ ስጋቶች እንዳይፈጠሩ፣ በመኝታ ሰዓት፣ የደም ግፊት መቀነሻ መድኃኒት መወሰድ እንዳለበት እያሳሰቡ ነው።
 IV. የሕመም ምልክት ሲሰማ የሚወሰዱ -
የመጋጠሚያ ሕመም - እንደ የፈረንሳይ ተመራማሪዎች እንደሚሉት፤ ከሆነ ብዙ ጊዜ ለመጋጠሚያ ሕመም ማስታገሻ በስፋት የሚወሰዱት እንደ ናፕሮክሲን (Naproxen)፣ ኢቡፕሮፊን (ibuprofen) ያሉ መድኃኒቶች፣ ሕመሙ ከፍተኛ ደረጃ ከመድረሱ 6 ሰዓት በፊት ቢወሰዱ፣ በትክክለኛው ሰዓት ሕመሙን ያስቆማሉ፡፡
ከሰዓት በኋላ ሕመሙ የሚያጠቃዎት ከሆነ በ5 ሰዓት ገደማ፣ ለምሽት ሕመም መከላከያ 10 ሰዓት አካባቢ፣ ለሌሊት ሕመም፣ ከእራት ጋር ማስታገሻዎቹን ቢወስዱ ጥሩ እፎይታ ያገኛሉ፡፡
ምንጭ - (“Readers digest – July 2014
USA” የተወሰደ)

የዛሬ ስድስት ዓመት ገደማ ተከፍቶ አገልግሎት መስጠት የጀመረው ኤድናሞል የመዝናኛ ማዕከል፤ ከሲኒማ ቤቱ በቀር ሌላው የልጆች መዝናኛ ላይ ያተኮረ ነበር፡፡
በቅርቡ በተከናወነው የማስፋፊያ ፕሮጀክት ግን ማዕከሉ አዋቂዎችንም የሚያካትት ሆኗል። የተክለብርሃን አምባዬ ኮንስትራክሽን ታፍ ኮርፖሬት ግሩፕ ዋና ሥራ አስፈፃሚ አቶ ሰይፈ አምባዬ እንደሚሉት፤ የማዕከሉ የማስፋፊያ ፕሮጀክት ብዙሚሊዮን ብር ፈጅቷል፡፡ በኤድናሞል የማስፋፊያ ሥራ ዙሪያ
የአዲስ አድማስ ጋዜጠኛ አበባየሁ ገበያው
ከአቶ ሰይፈ አምባዬ ጋር አጭር ቃለምልልስ አድርጋለች፡፡

እስቲ ስለኤድናሞል የማስፋፊያ ስራዎች ይንገሩኝ..
ኤድናሞል የልጆች መጫወቻ ብቻ ነበር፡፡ አሁን ግን ለወጣቶችና ለታዳጊዎች በሚመጥን መልኩ የማስፋፊያ ስራ ተከናውኗል፡፡ የቀድሞ ይዘቱ ሙሉ በሙሉ ተቀይሯል፡፡ ከፍተኛ ኢንቨስትመንት የወጣበት የማስፋፊያ ሥራ ነው የተከናወነው። ከኢንቨስትመንቱ ከሚገኘው ፋይዳ ይልቅ ለህብረተሰቡ የሚሰጠው አገልግሎት የላቀ ነው፡፡ እዚህ የዋለው ኢንቨስትመንት ሌላ እህት ኩባንያ ላይ ቢውል በአንድ አመትና በሁለት ዓመት ሊመልስ ይችላል፤ ይሄ ግን በአስር ዓመትም አይመልስም። ለማስፋፍያው ይሄን ያህል ገንዘብ አወጣን ብሎ ለመናገር ቢቸግርም ከ20 ሺ እስከ 70 ሺ ዶላር (ከ2ሚ.ብር እስከ 7ሚ.ብር ገደማ ማለት ነው) ድረስ የተገዙ ዘመናዊ የመጫወቻ መሳሪያዎች ገብተዋል፡፡
በከተማው ፈር ቀዳጅ መሆናችንን ስንናገር በእርግጠኝነት ነው፡፡ ዘመናዊዎቹ የልጆች፣ የታዳጊዎችና የወጣቶች መጫወቻ መሳሪያዎች ከአሜሪካ፣ ከአውሮፓና ከዱባይ ተገዝተው የመጡ ሲሆኑ አብዛኛዎቹም የቴክኖሎጂ ውጤቶች የ2014 ስሪቶች ናቸው፡፡
ይሄ ደግሞ የመዝናኛ ማዕከሉን ደረጃ ከፍ ያደርገዋል፡፡ እንዲህ ያለው መዝናኛ በሌላው ዓለም ቢሆን የአገልግሎት ክፍያው በጣም ውድ ነው። የእኛ ዋጋ ግን የተጠቃሚውን አቅም ያገናዘበና ተመጣጣኝ ነው፡፡
የመዝናኛ ማዕከሉ ለከተማዋ ያለው ፋይዳ ምንድነው?
በመዝናኛ ኢንዱስትሪው ጉልህ ሚና በመጫወት ረገድ ኤድናሞል ግንባር ቀደም ነው ቢባል ማጋነን አይሆንም፡፡ ኢትዮጵያ በመዝናኛ ኢንዱስትሪው ከሌሎች አገሮች ተርታ እንድትሰለፍ ትልቅ አስተዋፅኦም እያበረከተ ነው፡፡ አዲስ አበባ ለነዋሪዎችዋም ሆነ ለውጭ ሀገር ዜጎችና ጎብኝዎች ምቹ እንድትሆን በሲኒማና በመዝናኛው ዘርፍ ፈር ቀዳጅ ስራዎችን እየሰራን ነው፡፡ በኤድናሞል ደረጃ እንኳን ብታይ በአፍሪካ ገና ያልገቡ ለኢትዮጵያ የመጀመሪያ የሆኑ ቴክኖሎጂዎች ነው የምንጠቀመው፡፡ በርካታ ሚሊዮን ብሮች የወጣባቸው ናቸው፡፡
አዲስ ቴክኖሎጂዎችን እንደማምጣታችን የዓለማቀፉንም ልምድ ለማወቅ አሜሪካ፣ አውሮፓ፣ ዱባይና ሲንጋፖር በመሄድ ጥናት ተደርጎ ነው ያንን ልምድ ወደ ኢትዮጵያ ያመጣነው፡፡ እነዚህ ሁሉ የምታያቸው አዳዲስ ቴክኖሎጂዎች የተገጠሙት በአገር ውስጥ ባለሙያዎች አይደለም፡፡ የህንድና የቻይና ባለሙያዎች ናቸው የሰሩት፡፡ ምክንያቱም ኢትዮጵያ ውስጥ እንደዚህ ዓይነት ስራዎችን የሚሰሩ ባለሙያዎች የሉም፡፡
የሲኒማ ቤቱ ከ3ዲ እስከ 7ዲ ድረስ ያሉት ቴክኖሎጂዎች… በአውሮፓ ስታንዳርድ የተፈበረኩ፣ የ21ኛው ክፍለ ዘመን የፈጠራ ውጤቶች ናቸው። ለምሳሌ ሳውንድ ሲስተሙን አፍሪካ ህብረት ውስጥ ብቻ ነው የምታገኝው፡፡ የምስል ጥራትን በሚመለከት በቀዳሚ ደረጃ የሚቀመጥ ሲኒማ ቤት ነው ያለን፡፡ ኤድናሞል ከ6 ዓመት በፊት ሲከፈትም ይዞት የመጣው ቴክኖሎጂ ለኢትዮጵያ አይደለም ለአፍሪካም አዲስ ነበር፡፡ 21ኛውን ክፍለ ዘመን ያገናዘበ የረቀቀ ቴክኖሎጂ ነው ያስተዋወቀው፡፡ በአሜሪካ /ሆሊውድ/ ሲኒማ ሲለቀቅ ኤድናሞልም እኩል ነው የሚለቀቀው፡፡ በአፍሪካ ውስጥ ከሆሊውድ እኩል ሲኒማዎችን የሚለቁ አንድ ሁለት አገራት ቢኖሩ ነው፡፡ ምክንያቱም እነሱ የሚፈልጉትን የሲኒማ ቤት ስታንዳርድ ካላገኙ ሲኒማዎችን አይለቁም፡፡ በርካታ የአፍሪካ አገሮች ፊልሙ ከወረደ በኋላ ነው የሚያገኙት፡፡ ከዚህ አንፃር ኤድናሞል በአፍሪካም በኢትዮጵያም ፈር ቀዳጅ ነው ማለት ይቻላል፡፡
የወደፊት ዕቅዳችሁ ምንድነው?
በከተማዋ የተለያዩ አካባቢዎች ተመሳሳይ መዝናኛዎችን የማስፋፋት እቅዶች አሉን፡፡ የ5 ዓመት መርሃ ግብር ነድፈን እየሠራን ነው፡፡ ደረጃ በደረጃ የሚከናወኑ ናቸው፡፡  ሲኤምሲ፣ ጎተራ… ቦታ አለን፡፡ ወደፊት ትልልቅ ሞሎችና ሲኒማ ቤቶች እንገነባባቸዋለን የሚል ዕቅድ አለን፡፡ ከፍተኛ ኢንቨስትመንት እንደሚጠይቀን እናውቃለን፡፡ ቢሆንም ግን ዓላማችን የመዝናኛ ኢንዱስትሪውን በአለማቀፍ ደረጃ ተወዳዳሪ ማድረግና አማራጮችን ማስፋት ነው፡፡

ኢትዮጵያ በመዝናኛ ኢንዱስትሪው ከሌሎች አገሮች ተርታ እንድትሰለፍ ትልቅ አስተዋፅኦም እያበረከተ ነው፡፡ አዲስ አበባ ለነዋሪዎችዋም ሆነ ለውጭ ሀገር ዜጎችና ጎብኝዎች ምቹ እንድትሆን በሲኒማና በመዝናኛው ዘርፍ ፈር ቀዳጅ ስራዎችን እየሰራን ነው፡፡

በመንግስት ሹመኛ የተበደለና የመረረው፣ በእጁ የሰው ህይወት የጠፋበትና መደበቂያ ያጣ ገበሬ ወደ ጮቄ ያማትራል፡፡ “ዱር ቤቴ!” ብለው የሚመሽጉበት ጥንታዊ ደን ነው፡፡ ብርቅየነቱና ግርማ ሞገሱ ይማርካል፤ ብርዱ ግን አይጣል ነው፡፡ ቅዝቃዜው ከበጋ እስከ ክረምት አንድ በመሆኑ ደጋ መባል ያንሰዋል፡፡ ውርጭ ነው - የ24 ሚሊዮን ዓመት ባለጸጋው የጮቄ ተራራ፡፡
የነዋሪው የአመጋገብና የአለበበስ ባህል ብርድን እና ውርጭን ያገናዘበ ነው፡፡ በጥጥ የተሰራ ኮፍያ፣ ሙቀት ሰጪ ካፖርት፣ ጓንት፣ ከክር የተሰራ ኮፍያ፣ ስካርፕ፤ ጎጃም አዘነ የተሰኘው ፎጣ መልበስ ያዘወትሩሉ - ‹‹ደገኞቹ›› የጮቄ ነዋሪዎች በመባል ይጠራሉ፡፡  
በምስራቅ ጎጃም ከደብረማርቆስ ከተማ የ70 ኪሎ ሜትር ርቀት ላይ ነው፡፡ ከአራት ሺህ ሜትር በላይ በሆነ ከፍታ የተነሳ ሃይለኛ ቅዝቃዜው ለደገኛ ነዋሪዎቹ ፈታኝ ቢሆንም፤ ለሌሎቻችን ከአጠገባችን የማይደርስ የሩቅ ወሬ ሊመስለን ይችላል፡፡ ግን አይደለም፡፡ የጮቄ ተራራ ከሁላችንም ሕይወት ጋር የተሳሰረ እንደሆነ በጮቄ ላይ ምርምር ያካሄዱት ዶ/ር መለሰ ተመስገን ይናገራሉ፡፡ “እንዴት?” በሉ የጮቄ ተራራና አካባቢው የ273 ምንጮችና የ59 ወንዞች መፍለቂያ ነው፡፡ ከነዚህም ውስጥ 23ቱ የአባይ ገባር ወንዞች እንደሆኑ የገለፁት ዶ/ር መለሰ፤  ከጠቅላላው የአባይ ውሃ 9.5% ያህል ከጮቄ እንደሚመነጭ ይናገራሉ፡፡ ይህንን መረጃ በማየት ብቻ ከሕይወታቸው ጋር ምንኛ የተሳሰረ እንደሆነ መገንዘብ ይቻላል፡፡ ከኛ ህይወት ጋር ብቻ ሳይሆን ከሱዳንና ከግብጽ ጭምርም እንጂ፡፡
ይህም ብቻ አይደለም፡፡ ክረምት ከበጋ፤ ሲያሰኘው በዶፍ ዝናብ፣ ሲያሻው እንደ ጥጥ ብናኝ ሰማይ ምድሩን በሚሸፍን የበረዶ መና ከአመት አመት ከእርጥበት የማይላቀቀው የጮቄ ተራራ አህጉርና ባሕርን የሚያሻግር ግንኙነት አለው፡፡
የጮቄ ዝናብና እርጥበት፣ ከአትላንቲክ ውቅያኖስና ከምዕራብ አፍሪካ የአየር ንብረት ጋር የተቆራኘ እንደሆነ የሚናገሩት ዶ/ር መለሰ፤ ነገሬ ብለን መመርመርና ማጥናት፤ ተፈጥሯዊውን ፀጋ መጠበቅና መንከባከብ አለብን ይላሉ፡፡ እስከ ዛሬ ግን አላደረግነውም፡፡  
ዛሬ ዛሬ ግን የዚህ ተራራ ዕድሜ ጠገብ ተፈጥሮዊ ማንነት እየከሰመ፣በአፈር መሸርሸርና በደን መራቆት የብዝሀ ህይወት ፀጋዎቹ እየጠፉ፣ ምንጮቹና ወንዞቹም እየደረቁ ነው፡፡ የጮቄ ተራራ መዘዙም ለአካባቢው ብቻ አይደለም፡፡ በሰፊው ለአገራችን አሳዛኝ ጥፋት ነው ሌላው ቢቀር ታላቁ የአባይ ወንዝን ይነካላ፡፡ ግን በአህጉር ደረጃና ለአለም የአየር ንብረት ለውጥም አንድ ተጨማሪ ስጋት እንደሆነ ጥናቶች ያሳያሉ፡፡
የአካባቢው መራቆት  የህዝብ ቁጥር መጨመርን ተከትሎ የመጣ ነው፡፡ የእርሻ መሬት ያለው  ነዋሪዎች፤ ወደ ተራራው እየወጡ ደንና ጢሻውን በመመንጠር ከመሬቱ ተዳፋታማነት ጋር ተዳምሮ ከጊዜ ወደ ጊዜ ጐርፍ እየበረታ ወጥቷል፡፡ በአንድ በኩል ለም አፈር በፍጥነት እየተሸረሸረ የአካባቢው ልምላሜ ይራቆታል፡፡ በሌላ በኩልም ቁልቁል የሚንደረደረው ውሃ ወደ መሬት መሰረግ ጊዜ ስለማያገኝ ምንጮች ይደርቃሉ፡፡ የጮቄ ተራራ ተፈጥሯዊ ገጽታ መራቆት አደገኛ መሆኑን የተገነዘቡት የአዲስ አበባ ዩኒቨርስቲና የደብረ ማርቆስ ዩኒቨርስቲ ጮቄን ወደ ቀድሞው ይዞታው በመመለስ ወደ ፓርክነት ደረጃ ለማሳደግ የምርምር ፕሮጀክት ቀርፀው መስራት ጀምረዋል፡፡
ከካርቱም ዩኒቨርስቲ እና ኔዘርላድ ከሚገኝ ተቋም ጋር በመተባበር በጮቄ ዙሪያ ጥናት የሚያካሂዱት ዶ/ር መለሰ ተመስገን፤ ስለ ጮቄ ሲናገሩ፤
ከ24 ሚሊዮን ዓመት በፊት የመጨረሻው እሳተ ጎመራ በሚፈነዳበት ጊዜ ገንፍሎ የወጣው የቀለጠ አለት በአንድ አቅጣጫ በመፍሰሱ የተፈጠረ ተራራ ነው ይላሉ፡፡ መሆኑ እርጥበት አዘል ቀዝቃዛ አየር ከአትላንቲክ ውቅያኖስ ተነስቶ ዛየር እና ኮንጎ ላይ ካረፈ በኋላ ወደ ኢትዮጵያ እንደሚመጣ ዶ/ር መለሰ ጠቅሰው፤ እርጥበት አዘሉን አየር ገጭቶ የሚያስቀረው ጮቄ መሆኑን ያስረዳሉ፡፡ በምንጮችና በወንዞች መፍለቂያነቱም ነው፤ የውሃ ጋን(የውሃ ማማ) የሚል መጠሪያ የተሰጠው ይላሉ ተመራማሪው፡፡
ጮቄን ለመታደግ መታተሩ የአካባቢውን ስርዓተ ምህዳር ለመመለስ እና ለመጠበቅ የአካባቢውን አርሶ አደሮች ተጠቃሚ ባደረገ መልኩ የሚሰሩ ስራዎች በተፋጠነ መልኩ ወደ ተግባር ቢገባበት እየተመናመነና እየተሸረሸረ ያለውን አካባቢ፤ ከንክኪ ከማጽዳት በተጨማሪ የደን፣ የብዝሃ ህይወት፣ የአፈር መሸርሸርን የጮቄን ተፈጥራዊ ይዞታ በመጠበቅ የዓለም የአየር ንብረት መዛባትን ከመቀነስ አንፃር ተፅዕኖ ይኖረዋል ይላሉ አጥኝው፡፡
በደቂቃዎች ልይነት አንዳንዴ ደመናማ ቆየት ብሎም ብራ እየመሰለ የተፈጥሮ መቅበጥበጥ  በሚታይበት የጮቄ ተራራ አናት ላይ ተወጥቶ፤ አካባቢውን ለመጎብኘት የቅዝቃዜውና ውርጩ ያስቸግራል፡፡ ግን ደግሞ አስደናቂ ነው፡፡ የጮቄ በረዶ ብዙዎቻችን ከምናውቀው ጠጣር በረዶ ይለያል፡፡ ጉም ይመስላል፡፡ የበረዶ ካፊያ እንደተነደፈ ጥጥ በጸጉርና በሰውነት ላይ ብትን ብሎ ሲታይ ልዩ ስሜትን ይፈጥራል፡፡ የበረዶው ካፊያ ግን አያረጥብም፣ ምክንያቱም ቶሎ አይሟሟም፤ አይቀልጥም፡፡
ጭጋግ በወረሰው ተራራማ ስፍራ ተቁሞ ዙሪያ ገቡን ለተመለከተው ድንቅ ነው፡፡ እንደ ቀድሞው ባይሆንም፤ በተራራው ዙሪያ ዛሬም መንፈስን የሚያረካ የደን ልምላሜ ይታያል፡፡ ነገር ግን  ችም ችም ጥቅ ጥቅ ብለው ከሚታዩት ደኖች መሃል በየቦታው የሚታዩ ጎጆ ቤቶች ተቀልሰዋል፡፡ ከጐጆ ቤቶቹ ውስጥ እለት ተእለት የማይጠፋ ነገር ቢኖር እሳት ነው፡፡ ከጐጆዎቹ አናት የሚወጣውን ጪስ ከሩቅ ለተመለከተ ሰው፤ የተራራው ደን ውስጥ በየቦታው እሳት የተለቀቀበት ይመስለዋል፡፡ የአካባቢው ነዋሪ ከደን ማገዶ እየቆረጠ ከማንደድ ውጭ ምን አማራጭ አለው? ክረምት ከበጋ ውርጭ ነው፡፡ የማገዶ እሳት ባህላዊ “ኤር ኮንድሸነር” ነው፡፡ የአካባቢውን ደን ቀስ በቀስ እሳት እየተበላ መሆኑ ግን አያከራከርም፡፡ በተራራው አናት ላይ ከተተከሉት የኢትዮጵያ ሬድዮና ቴሌቪዥን ድርጅት እና የቴሌ የመቀባበያ አንቴናዎች አጠገብ ሆኖ ዙሪያ ገባው ከየጐጆው የሚወጣውን ጭስ ማየት ልብን ይሰብራል፡፡
በተቃራኒው በተራራው አናት ላይ ለተወሰነ ደቂቃ ከጮቄ ብርቅ ተፈጥሮ ጋር እየተነጋገሩ መቆየት መንፈስን ይማርካል፡፡ ልዩ ነው፡፡ ታዲያ ብርዱ ፋታ አይሰጥም፡፡ ለአንቴና ጥበቃ ኑሯቸውን ከተራራው አናት ላይ የቀለሱት ባለትዳሮቹ በላቸውና የሰውዘር ብርዱን እንዴት እንደሚችሉት እንጃ? ለማንኛውም የእነሱን ብርታት በማየት “የዛሬን የመጣው ይምጣ” ብሎ ውርጩን ማሸነፍ አያቅትም፡፡
“ብርዱ እንዴት ነው ብዬ ጠየኩት” በላቸውን
“እራ.. እሱስ ይከረስሳል” አለኝ በጭንቅላቱ ላይ የሹራብ ቆቡን እያስተካከለ፡፡ ጨዋታ ለመቀጠል አቅም አልነበረኝም፡፡ ብርዱ ያንዘፈዝፈኝ ጀምሯል፡፡
“ቤታችሁ ገብቼ ትንሽ እሳት መሞቅ እችላለሁ?” አልኩት ቅዝቃዜው አንጀቴ ውስጥ ሲገባ፡፡
“እህ ግቢ እንጂ” አለኝ …እንግዳ ማስተናገድ ባህላችን አይደለም በሚል ስሜት፡፡
ባህላቸው እንደሆነ ለማወቅ ግን ጊዜ አልፈጀብኝም፡፡ ባለቤቱ የሰው ዘር አፍታ ሳትዘገይ፤
እየተቀቀለ የነበረውን ትኩስ ድንች የአካባቢው መለያ ከሆነው ማባያ ተልባ ጋር አቀረበችልኝ “ቤት ያፈራውን” ብላ፡፡
አስከትላም፤ ከተለያዩ እህሎች የተሰራ አረቄ ቀድታ ጋበዘችኝ - “ይጠቅምሻል ለብርዱ፤ ባትውጅም ቅመሽው” በማለት፡፡ ተቀበልኳት፡፡ ገና ሳልቀምሰው፣ መዓዛውን ፈራሁት፡፡ ግን ከብርድ አይብስም፡፡ ቀመስኩት..እሳት የሆነ አረቄ፡፡
“ይጠቅምሻል” ያለችኝ በከንቱ አይደለም፡፡ እውነትም አሁን በተራራው አናት ላይ እንደ ጅብራ መገተር እችላለሁ፤ ሰውነቴን ሙቀት ተሰማኝ፡፡ ዝምታዬ በኖ ጠፋ፡፡
“ታርሳላችሁ?”
“አዎ” አለኝ ባሏ ቀበል አድርጎ፤ “ግን መሬቱ ተደፋት ሆኖ ተጠራርጎ ይሄዳል”
“እናስ ምን ዘየዳችሁ”
“እረ መላም የለው” አለኝ
“እንዴት?”
“ውርጩ ይይዘዋል፤ መሬቱም አንድኛውን ተዳፋት ሆኖ እህሉንም በደንብ አይዝ..”
“አመሉ ነው ወይስ ዛሬ ነው እንደዚህ የሆነ” አልኩት
“እራ!! መሬት ሲጠበን ወደ ላይ መጣን እንጂ..ፊትማ ወደ ታች መስኩ ላይ ነበርን” አለ፡፡
ባለቤቱ የሰው ዘር ቀበል አድርጋ “ተዳፋት ላይ ተንጠልጥለን ተራራ መቧጠጥ፤ ከውርጪ በቀር ምንም አላተረፈልን” አለች እሳቱ ላይ ማገዶ እየጨመረች፡፡
“ማገዶ ከየት ነው የምታገኙ?”
“ያው ከጫካ..” አለች
በአካባቢው እየተመናመነ ወደ አለው ደን አቅጣጫ እያመለከተች፡፡
አረቄውን ብዙ ባልደፍረውም፤ አዲስ እንደተገጠመ ሞተር ሴሎቼ መሟሟቅ ስለጀመሩ ከውርጩ ጋር ለመጋፈጥ በድጋሚ ወደ ተራራው አናት ተመለስኩ፡፡
በተራራው አናት ዙሪያም በየቦታው ፍልቅ ፍልቅ ብለው የሚታዩ ምንጮች ‹‹ጠጡኝ፣ ጠጡኝ›› የሚል፣ ከፍሪጅ የወጣ ጥም የሚቆርጥ ውሃ ይመስላል፡፡ አሁን ‹‹ጮቄ የማዕድን ውሃስ የማይወጣ ሆኖ ነው?” ይህንን ለተማራማሪዎች እንተወው፡፡
የጮቄ ተራራ ልዩ መለያ ነባር እፅዋቶች ጅብራ፣ አስታ እና የተለየ ሳር ዓይነቶች ናቸው፡፡ ቀደም ሲልም የዱር አራዊቶች ይገኙበት እንደነበረ ይነገራል፡፡ የደን ጭፍጨፋውን ማስቆም እና የብዝሀ ህይወት ጥበቃ ተጠናክሮ፣ አርሶ አደሩ በመስኖ ዘመናዊ እርሻ በመጠቀም ምርታማነቱን በመጨመር የጮቄ ተራራን ፓርክ በመከለል በኢኮቱሪዝም መስክ መንቀሳቀስ ያስፈልጋል፡፡ አመቺ ሆነ የመኪና መንገድ የመዝናኛ ስፍራዎች በአካባቢው ቢሰሩና በሰፊው የማስተዋወቅ ስራ ቢሰራ የቱሪስት መስህብነቱ ከአገር አልፎ በአለማቀፍ ጎብኝዎች ትኩረት የሚስብ ተፈጥሮዊ ቦታ ነው ብለዋል - ዶ/ር መለሰ፡፡
ከጮቄ ተራራ ላይ የሚነሱ ሀምሳ ዘጠኝ ወንዞች፣ ሃያ ሶስቱ የአባይ ገባር በመሆናቸው ለታላቁ የኢትዮጵያ ህዳሴ ግድብ የሚያበረክተው አስተዋጽኦ የጐላ መሆኑ ስጠቀስም አካባቢው ተጠበቀ ማለት ከአባቢው የሚመነጩ ወንዞች አመቱን ሙሉ እንዲፈሱ እና የአባይን፣ ውሃ መጠን ከፍ  በማድረግ የወንዞች ሙሉ አቅም ወደ አባይ በማስገባት የአፈር መሸርሸሩን በመቆጣጠር የታላቁ የኢትዮጵያ ህዳሴ ግድብን በደለል እንዳይሞላ መከላከል እንደሚቻል የምርምር ውጤቱ ይጠቁማል፡፡

(ስለ መሳሳም)
“ፂም የሌለው ስሞሽ (Kissing) ጨው እንደሌለው እንቁላል ነው” የሚል የቆየ የስፓኒሾች አባባል አለ፡፡
ማዲሰን ጁሊየስ ካዌይን
(አሜሪካዊ ገጣሚ)
እሱ ከሳመኝ በኋላ የቀድሞዋ እኔ አይደለሁም፡፡ ሌላ ሰው ሆኛለሁ፡፡
ገብርኤላ ሚስትራል
(ስፔናዊት ገጣሚ፣ ዲፕሎማትና
የትምህርት ባለሙያ)
መሳም እወዳለሁ፤ የሥራዬ አካል ነው። እግዚአብሔር ወደ ምድር የላከኝ ብዙ ሰዎችን እንድስም ነው፡፡
ካሪ ፊሸር
(አሜሪካዊ ተዋናይና ፀሃፊ)
ሴቶች ሲስሙ የነፃ ትግል ተፋላሚዎች እጅ ለእጅ መጨባበጥን ያስታውሰኛል፡፡
ኤች.ኤል. ሜንኬን
(አሜሪካዊ ጋዜጠኛ፣ ሃያሲና አርታኢ)
የሞቴን አምሳል ለመሳም ናፍቄአለሁ፡፡
ዊልያም ድራሞንድ
(ስኮትላንዳዊ ገጣሚ)
አንድ ጊዜ
ከ20 ዓመት በፊት
የአየር ማቀዝቀዥያ በተገጠመለት ባቡር ላይ
ሌሊቱን ሙሉ ስስማት አድሬአለሁ፡፡
ሳአዲ ዩሱፍ
(ኢራናዊ ገጣሚ)
ድሮ፤ ፂም የሌለበት ስሞሽ (Kissing) ጨው እንደሌለው እንቁላል ነው ይሉ ነበር፡፡ እኔ ደግሞ ምንም ክፋት የሌለው ጥሩነት ነው ስል አክልበታለሁ፡፡
ዣን-ፖል ሳርተር
(ፈረንሳዊ ፈላስፋ፣ ፀሃፌ ተውኔትና ደራሲ)
ላሟ ቤት እስክትመጣ ድረስ ተሳሳሙ፡፡
ቤውምንት እና ፍሌቸር
(እንግሊዛዊ ፀሃፊ ተውኔቶች “Scornful Lady”
ከሚለው ትያትራቸው የተወሰደ)
ግን እኮ እየሳምኳት አልነበረም፡፡ አፏ ውስጥ እያንሾካሾኩ ነበር፡፡
ቺኮ ማርክስ
(አሜሪካዊ ኮሜዲያን፤ ዘማሪ ልጃገረድ
ሲስም ለደረሰችበት ሚስቱ የሰጠው ምላሽ)

ታሪክና ተስፋ
ነ.መ.
በዚህኛው መቃብር ጎን
ታሪክ ተስፋ አታድርግ ይላል
ሆኖም በዕድሜያችን አንድ ቀን
ያ የናፈቅነው ማዕበል
ፍትሕ ተጭኖ ይመጣል
ያኔ ታሪክና ተስፋ፣ ዜማው ጥሞ ቤት - ይመታል!!
“ዘ ኪውር አት ትሮይ”
ሶፎክለስ
(ሲሙስ ሔንሲ ወደ እንግሊዝኛ እንደመለሰው)

ታሪክና ተስፋ
ነ.መ.
በዚህኛው መቃብር ጎን
ታሪክ ተስፋ አታድርግ ይላል
ሆኖም በዕድሜያችን አንድ ቀን
ያ የናፈቅነው ማዕበል
ፍትሕ ተጭኖ ይመጣል
ያኔ ታሪክና ተስፋ፣ ዜማው ጥሞ ቤት - ይመታል!!
“ዘ ኪውር አት ትሮይ”
ሶፎክለስ
(ሲሙስ ሔንሲ ወደ እንግሊዝኛ እንደመለሰው)

(ስለዲፕሎማት)
ዲፕሎማት ማለት ሁልጊዜ የሴትን የልደት ቀን የሚያስታውስ ነገር ግን ዕድሜዋ ትዝ የማይለው ሰው ማለት ነው፡፡
ሮበርት ፍሮስት
(አሜሪካዊ ገጣሚ)
በዚህ ዘመን ዲፕሎማት ሌላ ሳይሆን አልፎ አልፎ መቀመጥ የተፈቀደለት የአስተናጋጆች አለቃ ማለት ነው፡፡
ፒተር ዪስቲኖቭ
(እንግሊዛዊ ተዋናይ፣ ዳይሬክተርና ፀሃፊ)
እውነተኛ ዲፕሎማት የሚባለው የጎረቤቱን ጉሮሮ ጎረቤቱ ሳያውቅ መቁረጥ የሚችል ነው፡፡
ትሪግቭ ላይ
(ኖርዌጃዊ ፖለቲከኛ)
አምባሳደር ለአገሩ ጥቅም እንዲዋሽ ወደ ውጭ አገር የሚላክ ሃቀኛ ሰው ነው፡፡
ሄነሪ ዎቶን
(እንግሊዛዊ ገጣሚና ዲፕሎማት)
እኔ እንደሃኪም ነኝ፡፡ በሽተኛው ክኒኖቹን በሙሉ መውሰድ ካልፈለገ የራሱ ውሳኔ እንደሆነ እነግረዋለሁ፡፡ ነገር ግን በቀጣዩ ጊዜ በቀዶ ህክምና ባለሙያነቴ ቢላዬን ይዤ እንደምመጣ ማስጠንቀቅ አለብኝ፡፡
ዣቬር ፔሬዝዲ ሱላር
(የፔሩ ዲፕሎማት)
ውጭ አገር ስትሆን ከፍተኛ የመንግስት ኃላፊ ነህ፤ አገር ቤት ግን ፖለቲከኛ ብቻ ነህ።
ሃሮልድ ማክሚላን
(እንግሊዛዊ ጠ/ሚኒስትር)
ከፍርሃት የተነሳ ድርድር ውስጥ መግባት የለብንም፤ ነገር ግን ድርድርን ፈፅሞ ልንፈራ አይገባም፡፡
ጆን ፊትዝጌራልድ ኬኔዲ
(የቀድሞ የአሜሪካ ፕሬዚዳንት)
አንዳንድ ጥያቄዎቻችሁን እመልስላችኋለሁ። በጣም አስቸጋሪዎቹን ደግሞ የሥራ ባልደረቦቼ ይመስላችኋል፡፡
ሮላንድ ስሚዝ
(እንግሊዛዊ የቢዝነስ ኃላፊ፤ በብሪቲሽ ኤሮስፔስ
 ዓመታዊ ጠቅላላ ጉባኤ ላይ የተናገሩት)
ወጣቶች ከሚሞቱ በዕድሜ የገፉ ዲፕሎማቶች ቢሰላቹ ይሻላል፡፡
ዋረን ሮቢንሰን አውስቲን
(አሜሪካዊ ዲፕሎማት፤ በተባበሩት መንግስታት
ድርጅት በተካሄደው ሰረዥም ውይይት ተሰላችተው እንደሆነ ሲጠየቁ የመለሱት)

ደራሲ ከበደ ሚካኤል ከፃፏቸው አጫጭር ትርክቶች መካከል የሚከተለው ይገኝበታል፡፡
ከዕለታት አንድ ቀን አንድፈረሰኛ ተራራ እየወጣ ሳለ፤ አንድ፣ አንድ እግሩ ቆራጣ የሆነ ሰው ያንን መንዲስ የሚያክልና ጫፉ ሩቅ የሆነ ተራራ፤ እየተንፏቀቀ ለመውጣት ሲፍጨረጨር ያገኘዋል፡፡ ያም እግሩ የተቆረጠ ሰው፡-
“ጌታዬ እባክህ የተወሰነ መንገድ ድረስ አፈናጠኝና ውሰደኝ?” ሲል ይለምነዋል፡፡ ፈረሰኛውም ልቡ በጣም ይራራና፤
“እሺ ወዳጄ ፈረሱ የቻለው ርቀት ያህል አብረን እንሄዳለን፡፡ ና ውጣ” ብሎ፤ ወርዶ፣ አቅፎ ያፈናጥጠዋል፡፡
ትንሽ መንገድ አብረው ከተጓዙ በኋላ፤ እግረ ቆራጣው ሰውዬ፤
“ጌታዬ፤ ብዙ ምቾት አልተሰማኝም፡፡ አካል-ጉዳተኛ በመሆኔ አንደኛው እግሬን እጅግ ህመም ተሰማኝ!” አለው፡፡
ፈረሰኛው፤
“ታዲያ እንዴት ብናደርግ ይመችሃል?” ሲል ጠየቀው፡፡
አካል-ጉዳተኛውም፤
“ትንሽ መንገዱ እኔ ልሂድ፣ አንተ እግርህ ጤነኛ ስለሆነ ተከተለኝ” አለው፡፡
ፈረሰኛው በሁኔታው አዝኖ ልቡ ራራና፤
“መልካም፤ እኔ ልውረድ አንተ ሂድ፡፡ ሲደክመኝ ትጠብቀኝና ደሞ አብረን እንጓዛለን” አለውና ወረደ፡፡
የተወሰነ ርቀት፤ አካል-ጉዳተኛው በፈረስ፣ ባለፈረሱ በእግሩ ተጓዙ፡፡
ፈረሰኛው “ደክሞኛል ጠብቀኝ” አለው፡፡
እንደገና ተፈናጠጡና መንገድ ቀጠሉ፡፡ ጥቂት እንደተጓዙ፣ ፈረሰኛው ወረደለትና አካል ጉዳተኛው በፈረስ ቀጠለ፡፡ አሁን ግን ያ አካል-ጉዳተኛ ፈረሱን ኮልኩሎ ለዐይን ተሰወረ፡፡ ፈረሰኛው ቢሮጥ፣ ቢሮጥ ሊደርስበት አልቻለም፡፡
ባለፈረሱ ጮክ ብሎ፣ “እባክህ ሌላ ምንም አልፈልግም፣ የምነግርህን ብቻ አንዴ አዳምጠኝ?” አለው፡፡
ፈረስ ነጣቂው ባለቤቱ የማይደረስበት አስተማማኝ ቦታ ሲደርስ፤
“እሺ ምን ልትል ነው የፈለከው? እሰማሃለሁ ተናገር!” አለው በዕብሪት፡፡
ባለፈረሱም፤
“ወንድሜ ሆይ! አደራህን ይሄን እኔን ያደረከኝን ነገር ለማንም ሰው እንዳትነግር፡፡ ወደፊት በዓለም ደግ የሚያደርግ ሰው ይጠፋል!” አለው፡፡
*         *          *
ደግነት የብዙ ህይወታችን መሰረት መሆኑን አንዘንጋ፡፡ ቀናነት ካልተጨመረበት ዲሞክራሲም፣ ፍትሃዊነትም፣ ልማትም፣ አስተማማኝነቱ አጠያያቂ ነው፡፡ ደግ ያደረጉን ለመካስ ዝግጁ መሆን እንጂ ለክፉ ማጋለጥ አይገባም፡፡ ሁሉም የህብረተሰብ ክፍል በሀገሩ ጉዳይ ያገባዋል፡፡ መምህራን የልጆችን ተስፋ አለምላሚ ናቸው፡፡ ወታደሮች የሀገር ህልውና ጠባቂዎች ናቸው፡፡ ገበሬዎች የኢኮኖሚ ገንቢዎች ናቸው፡፡ የጥበብ ሰዎች የዘመን ዜማዎች ናቸው፡፡ ሁሉም የዴሞክራሲ ተቋዳሾች ናቸው፡፡  
“ሀብት ሲበዛ ዲሞክራሲ ይረጋገጣል ያለው ማነው?” ብሏል አንድ አዋቂ፤ ምን ያህል ፖለቲካና ኢኮኖሚ እንደሚተሳሰሩ ሲያጠይቅ! ያለው ይናገራል፣ የሌለው ያፈጣል ወይም ሁሉን “እሺ” ይላል፤ የሚባል ነገር አለና አስተውለን ብናስብ ታላቅ ነገር ነው፡፡ ዞሮ ዞሮ፤ እየተሳሰቡ መጓዝን የመሰለ ነገር የለም፡፡ መከራችን፤ የሀገራችን የችግር ቁልል ተራራ አካል ነውና ለብቻ አይገፋም፡፡
ከረዥም ጊዜው የኢትዮጵያ ወጣቶች ትግል አንፃር ስንመለከት ወጣቶች ልዩ ባህሪ እንዳላቸው እናስተውላለን - ታሪክን ዋቤ ቆጥረን፡፡ ባህሪያቸው፤ ቁርጠኝነትና ራስ - ወዳድ አለመሆን፣ ፍትሐዊነት፣ ጭቦኛ አለመሆን፣ የሴቶችን እኩልነት ማመን እና ትሁትነት የሚያካትቱ ልዩ ምልክቶቹ ነበሩ፤ ለማለት ያስደፍራል፡፡ እኒህ ምልክቶቹ ዛሬ ወዴት አሉ? ብሎ መጠየቅ ያባት ነው! እንጠያየቅ፡፡ ወጣቱን ያላቀፈ ጉዞ፣ ጉዞ አይደለምና!
አንጋረ ፈላስፋ፤
“ፀብ ክርክር ካለበት ጮማ-ፍሪዳ፤ ፍቅር ያለበት ጎመን ይሻላል” ይለናል፡፡ ፍቅርና መተሳሰብ የልማት፣ የኢኮኖሚ ድርና ማግ ናቸው እንደማለትም ነው፡፡ ባህልን ማክበር፣ አዋቂን ማድመጥ፣ ለዕውቀት መሪ ቦታ መስጠት፣ ጎረኝነትን ማስወገድና የጋራ መድረክ፣ የጋራ ሸንጎ መሻት፣ ዋና ጉዳይ መሆናቸውን መቼም አንዘንጋ፡፡
“የአያቴ ብስክሌት መንዳት አሪፍ መሆን እኔን ከመውደቅ አያድነኝም” ይላል ገጣሚ ሰለሞን ደሬሣ (ልጅነት)፡፡ በትላንት አበው ታሪክ መመካት ብቻውን ወደፊት አያራምደንም ሲል ነው፡፡ አንድም ነገን ዛሬ እንፍጠረው እንደማለት ነው፡፡ የሁሉም እኩል የሆነች አገር አጠንክሮ ለመጨበጥ እንዘጋጅ ሲልም ነው፡፡ እርስ በርስ የማንፈራራባት፣ የማንጠራጠርባት፣ ነጋችንን ጨለማ አድርገን የማናይባት አገር ነው መገንባት ያለብን፡፡ ከሁሉም በላይ ግን፤ አለመተማመን ከመርገምት ሁሉ የከፋ መርገምት ነው፡፡ “ስንት ሰዓት ነው?” ቢሉ ከተሜው፤ “የዘመኑ ሰዓትና የዘመኑ ሰው ውሸታም ነው፡፡ ዝም ብለው ጥላዎትን አይተው ይሂዱ!” አለ ባላገር፤ የሚለው ቁም ነገር ነገን እንድናስተውል ልብ በሉ የሚለን ነው!

ከ60ሺ በላይ የሚሆኑት ራሳቸውን እንዲችሉ ስልጠና ተሰጥቷቸዋል
5ሺ የጎዳና ተዳዳሪ ወጣቶች ከነገ ወዲያ  ለሥልጠና ወደ አፋር ይጓዛሉ
በኮብልስቶን ከሰለጠኑት ውስጥ ብዙዎቹ ወደ ጐዳና ተመልሰዋል
“ፖሊሶች ጥፉ ይሉናል፤ ወዴት እንጥፋ? የትስ እንኑር?”

የ27 ዓመት ወጣት ነው፡፡ ለጎዳና ህይወት የተዳረገው ወላጆቹን በኤችአይቪ በማጣቱ ነበር። በጎዳና ላይ ከጓደኞቹ ጋር ለ7 ዓመታት የኖረው ታዴ፤ አንድ ቀን ከጐዳና ወጥቼ እንደማንኛውም ሰው የተሻለ ህይወት ይኖረኛል ብሎ ያስብ እንደነበር ይናገራል፡፡
እንዳለውም ሰው ሆኖ መኖር የሚችልበት አጋጣሚ ባልጠበቀው ጊዜ ተፈጠረ፡፡ መንግስት የጎዳና ተዳዳሪዎችን አሰባስቦ በማሰልጠን ራሳቸውን እንዲችሉ ድጋፍ መጀመሩን የሰማው በ2003 ዓ.ም ነው፡፡ ወዲያው መስቀል አደባባይ አካባቢ ከሚኖርባት የፕላስቲክ ጎጆው በመውጣት፣ ከሁለት የጎዳና ጓደኞቹ ጋር ቂርቆስ ክፍለ ከተማ ሄዶ፣ የጎዳና ተዳዳሪ መሆኑን በማስመስከር ተመዘገበ፡፡ ከዚያም ከ2500 በላይ ከሚሆኑ ሌሎች የጎዳና ተዳዳሪዎች ጋር ጨፌ ወደሚገኘው የማሰልጠኛ ካምፕ ገባ - በሁለተኛ ዙር ምልምልነት፡፡
ስልጠናው ለአንድ ወር ብቻ የዘለቀ እንደነበር የሚናገረው ታዴ፤ በዚህ ወቅትም  የኮብልስቶን አመራረትን ጨምሮ በመጠኑም ቢሆን ከስነልቦና ጋር የተገናኘ ትምህርት እንደተሰጣቸው ያስታውሳል፡፡ በስልጠናው ወቅት በየቀኑ በሬ እየታረደ በቀን ሶስት ጊዜ የስጋ ተዋፅኦ የሆኑ ምግቦችን  ይመገቡ እንደነበር ይናገራል፡፡ የአንድ ወሩ ስልጠና እንደተጠናቀቀም እዚያው ጨፌ በሚገኘው የኮብልስቶን ማምረቻ  ቆርቆሮ በቆርቆሮ የሆኑ ትናንሽ ክፍል ቤቶች ተሰጥቷቸው መኖር እንደጀመሩ ታዴ ይናገራል፡፡ ገቢ ማግኘት ከጀመሩ በኋላ  ቁርስ፣ ምሳ እና እራት በ15 ብር ኩፖን ይቀርብላቸው ነበር፡፡ ከጥቂት ጊዜ በኋላ የምግቡ ዋጋ 20 ብር ገባ፡፡
“መንግስት በሚገባ ተንከባክቦናል፤ ምቾታችን እንዳይጓደልም ብዙ ጥሯል” የሚለው ታዱ፤ አንድ ነጠላ የኮብል ድንጋይ በ2.10 ብር እንድንሸጥ ገበያ አመቻችቶልናል፤ የበረታ በቀን እስከ 200 እና 300 ብር የሚያወጣ ጥርብ ድንጋይ ማምረት ይችላል” ብሏል፡፡ በወቅቱ አንድ አምራች በወር 4ሺህ እና 5ሺህ ብር ያገኝ ነበር የሚለው ታዴ፤ እያንዳንዳቸው የባንክ ቁጠባ ደብተር ተከፍቶላቸው ሙሉ ገንዘባቸውን እንዲቆጥቡ ይደረግ እንደነበር ያስታውሳል፡፡ በባንክ የገባውን ቁጠባም እንደፈለጉ ማውጣት አይቻልም ነበር ብሏል፡፡
የሁለተኛ ዙር ሰልጣኞች በዚህ መልኩ እየሰሩ እየቆጠቡ፣ ከመንግስት በቅናሽ ዋጋ ምግብ እየቀረበላቸው እየተመገቡ፣ በነፃ መኖርያ ቤት ተሰጥቷቸው እየኖሩ ሳለ፣ ኤልሻዳይ የሚባል ድርጅት “ራሳችሁን ወደ ተሻለ ደረጃ ማሳደግ አለባችሁ፤ እኔ በብረታ ብረትና በማሽን ኦፕሬተርነት፣ በእንጀራ መጋገርና በተለያዩ አነስተኛ ኢንዱስትሪዎች የምትሰለጥኑበትን መንገድ አመቻችላችኋለሁ” እንዳላቸው ታዴ ያስታውሳል፡፡
ይሄኔ ነው ቀድሞ የማይፈቀድላቸውን የቁጠባ ገንዘብ እንዳሻቸው እንዲያወጡ የተፈቀደላቸው። አብዛኞቹም ገንዘቡ የሚያልቅ አልመሰላቸውም ነበር፡፡ በባንክ ለሁለት አመት ገደማ ያጠራቀሙትን ገንዘብ በማውጣት፣ መንግስት በነፃ ከሰጣቸው ቤት ወጥተው እዚያው መድኃኒዓለም ጨፌ አካባቢ የግለሰብ ቤት እየተከራዩ መኖር ይጀምራሉ - የኤልሻዳይን ስልጠና ተስፋ በማድረግ፡፡ ብዙዎቹ የቀድሞ የገቢ ምንጫቸው የነበረውን ኮብልስቶን የማምረት ስራ እርግፍ አድርገው በመተው፣ የቆጠቡትን ያለስስት እያወጡ መብላት ጀመሩ፡፡
“ከኛ መሃል እዚያው ተጋብተው ልጆች የወለዱም ነበሩ” ይላል ታዴ፡፡ ተስፋ የጣሉበት ኤልሻዳይ ግን የውሃ ሽታ ሆነ፡፡ በዚህም የተነሳ በርካቶች ያለ ስራ ተቀምጠው ገንዘባቸውን ሙልጭ አድርገው ጨረሱት ይላል፡፡ “የሚያሳዝነው ታዲያ ዛሬ እነዚያ ወጣቶች ተመልሰው ጎዳና ላይ ወድቀዋል” ሲል ታዴ በሃዘን ተሞልቶ ይናገራል፡፡ በአሁኑ ሰዓት በካምፑ ከነበሩት አንደኛና ሁለተኛ ዙር ምልምሎች መካከል እሱን ጨምሮ ከ10 የማይበልጡ ብቻ መቅረታቸውን የሚገልፀው ወጣቱ፤ በሺዎች የሚቆጠሩት ተመልሰው ጐዳናን ሲቀላቀሉ፤ ነቃ ያሉት ጥቂቶች ደግሞ ጥሩ ደረጃ በሚያደርሳቸው  የስራ መስክ ላይ ተሰማርተው ይገኛሉ ብሏል፡፡
ሪፖርተሮቻችን ቦታው ድረስ በመገኘት እንደታዘቡትም፤ በማምረቻ ማዕከሉ ከ1ኛና ሁለተኛ ዙር ሠልጣኞች ውስጥ ከ10 የማይበልጡ ወጣቶችን የተመለከቱ ሲሆን በካምፑ ያሉ የቆርቆሮ ቤቶችም ኦናቸውን መቅረታቸውን አስተውለዋል፡፡ በካምፑ በአጠቃላይ በ3 ዙሮች ከገቡት መካከል ደግሞ 170 ያህል ሰልጣኞች ብቻ እንደሚገኙ በካምፑ ውስጥ ለሁለት አመታት የቆየው ታዴ ገልፆልናል፡፡
“ህዳሴ” የሚል ስያሜ በተሰጠው የጨፌ የኮብልስቶን ማምረቻ ማዕከል ውስጥ ከቀሩት ጥቂት ወጣቶች አንዱ የሆነው ዘሪሁን (ለዚህ ፅሁፍ ሲባል ስሙ የተቀየረ)፣ ከሱ ጋር በየክፍለ ከተማው ከሚገኙ ጎዳናዎች ተለቃቅመው በ3ኛ ዙር ወደ ማዕከሉ ከገቡት ከ2ሺ በላይ ምልምሎች መካከል እሱን ጨምሮ 160 ብቻ መቅረታቸውን ይናገራል፡፡ አብዛኞቹም ወደ መጡበት ጎዳና ተመልሰዋል የሚለው ወጣቱ፤ “መገናኛና ካዛንቺስ፣ አራት ኪሎ፣ ሜክሲኮ፣ መስቀል አደባባይና ሌሎች የከተማዋ አካባቢዎች ስዘዋወር ብዙ የህዳሴ ፍሬዎችን ጐዳና ላይ  እያገኘኋቸው በኪሴ የያዝኳትን ሳንቲም አካፍላቸዋለሁ” ብሏል፡፡
መንግስት ስልጠናውን ሲያዘጋጅ መጀመሪያ የልጆቹን አመለካከትና አስተሳሰብ የሚለውጥ የስነ ልቦና ምክር መሰጠት ነበረበት የሚለው ዘሪሁን፤ ይህ ባለመደረጉ ብዙዎቹ ትንሽ ጊዜ ሰርተው በዝግ ሂሳብ  የተቆጠበላቸውን ገንዘብ እንኳ ሳይቀበሉ “ጎዳና ናፈቀን” እያሉ ወደ ቀድሞው ህይወት ተመልሰዋል  ብሏል፡፡ እስከ 10ኛ ክፍል መማሩን የነገረን ዘሪሁን፤ በአሁን ሰዓት ከኮብልስቶን ሥራ በሚያገኘው ገቢ ከፍተኛ ክፍያ እንደሚያስገኙ ከሚነገርላቸው የሙያ መስኮች አንዱ በሆነው የዶዘር ኦፕሬተርነት እየሰለጠነ መሆኑን ገልፆልናል፡፡ “በእርግጠኝነት ነገ ራሴን የተሻለ ቦታ አገኘዋለሁ” የሚለው ወጣቱ፤ በሺዎች የሚቆጠሩ ጓደኞቼ ተመልሰው ጐዳና መውጣታቸውን ባሰብኩ ቁጥር ግን ሃዘን ይሰማኛል ብሏል፡፡ ወደ ቤተክርስቲያን በሄደበት አጋጣሚ የቅርብ ጓደኛው የነበረ የማዕከሉን ሰልጣኝ፣ በልመና እየተዳደረ እንዳገኘውም ወጣቱ ተናግሯል፡፡ መገናኛ አካባቢም አብረውት ሲሰልጥኑና ሲሰሩ የነበሩ ወጣቶች ጎዳና ላይ ወድቀው፤ ለእለታዊ ሱሳቸው ማስታገሻ፣ የሲጋራ ቁሩና የጫት ገረባ ሲያስሱ በተደጋጋሚ እንደገጠመው  ጠቁሟል፡፡
ከዛንቺስ አካባቢ ጎዳና ላይ የላስቲክ ጎጆ ቀልሶ የሚኖረው ሌላው ወጣት በበኩሉ፤ ከሁለተኛው ዙር ሰልጣኞች አንዱ እንደነበር ጠቁሞ፤ “ኤልሻዳይ” የሚባለው ድርጅት በተለያዩ ሙያዎች እንድትሰለጥኑ አድርጌ፣ተደራጅታችሁ የራሳችሁን ቢዝነስ ትሰራላችሁ” በማለቱ ከጓደኞቹ ጋር በመመካከር፣ ያጠራቀሙትን 20 ሺ ብር የሚደርስ ገንዘብ ከባንክ አውጥተው መገናኛ አካባቢ በ600 ብር የግለሰብ ቤት ለሶስት ሆነው በመከራየት መኖር እንደጀመሩ ይናገራል፡፡
“ያጠራቀምነው ብር ብዙ ስለመሰለን ከመንግስት ጥገኝነት በፍጥነት ለመውጣት ጉጉት ነበረን” የሚለው ወጣቱ፤ “በእንጨት ስራ፣ በዳቦ ቤት፣ በእንጀራ መጋገር፣ በብሎኬት፣ በፕሪካስት ስራና በመሳሰሉት ተደራጅታችሁ እንድትሰሩ ይደረጋል የሚለው ተስፋ፣ በቃ ከእንግዲህ ራሳችንን ችለናል፤ ወደ ኋላ አንመለስም ብለን እንድናስብ አድርጎናል” ይላል፡፡ ኤልሻዳይ የተሰኘው ግብረ ሰናይ ድርጅት በዚህን ቀን ወደ ስልጠና ትሄዳላችሁ እያለ በተስፋ ስንጠብቅ፣ ጊዜው እየነጎደ ገንዘባችንም እያለቀ መጥቶ፣ የማታ ማታ ለጎዳና ህይወት ተመልሰን ተዳረግን ይላል ወጣቱ፡፡
የጎዳና ልጆች የራሳቸው ፓርላም አላቸው። ስብሰባም ይቀመጣሉ፡፡ ውሳኔዎችም ይወስናሉ፣ ለማንኛውም ውሳኔ የጎዳና ልጆች መገዛት ግድ ይላቸዋል፡፡ በዚህ መልኩ ህይወታቸውን  የሚመሩት የጎዳና ልጆች፤ ዛሬ  እጣ ፈንታቸው ካጋፈጣቸው ፈተና በተጨማሪ “መንግስት እየጨከነብን ነው” ሲል ይናገራል - ሌላው ተስፉ የተባለ የጎዳና ተዳዳሪ፡፡ በኮብልስቶን ሥልጠና አለመሳተፉን የጠቆመው ወጣቱ፤በርካታ ለኮብልስቶን ስልጠና ተለይተውት የነበሩ ወዳጆቹን ተመልሰው ጎዳና ላይ ወድቀው እያገኛቸው እንደሆነ ተናግሯል፡፡  “እናንተ በኮብልስቶን ሰልጥነው የተመለሱትን ትላላችሁ፤ዛሬ ከዩኒቨርሲቲ በዲግሪ ተመርቀው የጎዳና ወዳጆቻችን ሆነው የቀሩ ብዙ ወጣቶች አሉ” ብሏል - ተስፉ፡፡
በተለያዩ ግብረ ሰናይ ድርጅቶች አጋዥነት በስካቫተር፣ በዶዘርና ሎደር ኦፕሬተርነት፣ በኤሌክትሪሻንነት፣  በብረታ ብረት ሥራና በመሳሰሉት ሙያዎች ከ8 ወራት በላይ ሰልጥነው የነበሩ ወዳጆቹም ስራ በማጣት ተመልሰው ለጎዳና ህይወት መዳረጋቸውን ይኸው ወጣት ይገልፃል፡፡
በጎዳና ተዳዳሪዎች ዘንድ በተግባቢነቱ ከፍተኛ ዝና እንዳለው የሚነገርለትና በ97 ዓ.ም የጐዳና ልጆችን ፊርማ አሰባስቦ ለፓርላማ  ሊወዳደር አቅዶ ያልተሳካላት ተስፉ፤ በዘንድሮው አመት ከየትኛውም ጊዜ በበለጠ የጎዳና ተዳዳሪዎች ቁጥር ጨምሯል፤ በየእለቱም ቁጥራቸው እየጨመረ ነው ባይ ነው፡፡ ቀደም ሲል መንግስት ለስልጠና የሰበሰባቸው ወጣቶች ተመልሰው ወደ ጎዳና መውጣታቸው ብቻ ሳይሆን የጨረቃ ቤቶች በዘመቻ እንዲፈርሱ መደረጋቸውም በርካቶችን ለጎዳና ዳርጓቸዋል፤ ከጎዳና ህይወት ከወጡ በኋላ ተመልሰው ለጎዳና የተዳረጉ በርካታ ወዳጆችም አሉኝ ይላል፡፡
ለአንድ ቀን ማደርያ 4 ብር እና 3 ብር ይከፈልባቸው የነበሩ አልጋ ቤቶች ወደ 20 እና 30 ብር ማሻቀባቸው የጎዳና ተዳዳሪውን ቁጥር እንዳበራከተው ተስፉ ይናገራል፡፡ ከደቡብ፣ ከአማራና ከትግራይ ክልሎች የሚመጡ ስራ ፈላጊዎችም ያሰቡት ሳይሳካላቸው ለጎዳና ህይወት መዳረጋቸው ለቁጥሩ መጨመር አስተዋፅኦ አበርክቷል የሚለው ወጣቱ፤ ህፃናት በብዛት ከሸዋሮቢትና ከሻሸመኔ አካባቢ እንደሚመጡ ይገልፃል፡፡
“ኑሮ በጎዳና ከፍቷል”
የጎዳና ልጆች ከቅርብ ጊዜያት ወዲህ ከመንግስት አካላት ጥቃት እየደረሰባቸው ነው የሚለው ተስፋ “ፖሊሶች ምሽት ላይ ባገኙን ቁጥር ‘ከዚህ አካባቢ ጥፉ’ ይሉናል፣ የላስቲክ ቤታችንን ያፈርሱብናል፤ ወዴት እንጥፋ? የትስ እንኑር?” ሲል ተስፉ  ይጠይቃል፡፡
“ሴቶች የጎዳና ተዳዳሪዎች ከሰው ተራ ወጥተው ገላቸውን በአነስተኛ ዋጋ በየአጥሩ ስር ይቸረችራሉ፣ ስጋዋን ሸጣ የምታድረውም ለፖሊሶች ራት መግዛትና ካርድ መሙላት ይጠበቅባታል” የሚለው ወጣቱ፤ ከሆቴሎች ለምነን የምናገኛትን ፍርፋሪ እንኳ ሆቴሎቹን እንዳትሰጧቸው እያሉ ስለሚያስፈራሯቸው የምንቀምሰው እያጣን ነው ሲል ያማርራል፡፡
ምን እንሁን ብለን ስንጠይቅ ሃገሪቱ እየተለወጠች ነው፤ እናንተም ተለወጡ ይሉናል፤ ያለው ወጣቱ፤ ‘እንዴት እንለወጥ?’ ስንል ግን እነሱም መልስ የላቸውም ብሏል፡፡ “ስራ ለማግኘት፣ እንደሰው ለመቆጠርና ለመታመን ተያዥ ያስፈልጋል” የሚለው ወጣቱ፤ በርካታ ወጣት እውቀት እያለውና መስራት እየቻለ በእነዚህ ምክንያቶች በየጎዳናው መናኛ ሆኖ ቀርቷል” ሲል ምሬቱን ይገልፃል፡፡
“አብዛኞቹ የጎዳና ልጆች እለታዊ ችግራቸውንና ረሃባቸውን ለማስታገስ አደገኛ ሱሶች ውስጥ ከመደበቃቸው ባሻገር፤ ኑሮ ይበልጥ ሲመራቸው ለአጭር ጊዜ የምታሳስር ቀላል ወንጀል ሰርተው ማረሚያ ቤት ለመግባት ይተጋሉ፤ ይህ መሰሉ ድርጊት በተለይ በክረምት ወራት የተለመደ ነው” ብሏል - ወጣቱ የጐዳና ተዳዳሪ፡፡
ከአረብ ሃገር የስደት ተመላሾች መካከል ለጐዳና የተዳረጉት “መቀሌ ኤምባሲ” በሚል በሰየሙት የጎዳና ነዋሪዎች አካባቢ እንደሚገኙ የጠቆመው ተስፉ፤ አብዛኞቹ ቀኛማችነትን የእለት ጉርስ ማግኛ እንዳደረጉት ገልጿል፡፡
የሰራተኛና ማህበራዊ ጉዳይ ሚኒስቴር የህዝብ ግንኙነት ኮሚኒኬሽን ዳይሬክቶሬት ዳይሬክተር አቶ ግርማ ሸለመ  እንደሚሉት፤ መንግስት “ኤልሻዳይ ሪሊፍ ኮሌክሽን” ከሚባል ሃገር በቀል የበጎ አድራጎት ድርጅት ጋር በመሆን ባለፉት 8 ዓመታት ወደ 60ሺ 759 ወገኖች ከጎዳና ላይ ተነስተው ራሳቸውን ችለው እንዲቋቋሙ የተለያዩ ስልጠናዎች ተሰጥቷቸዋል፡፡ ከነዚህ ውስጥ ወደ 19 ሺ 50 ያህሉ ህፃናት ናቸው፡፡ ህፃናቱ መስራት ስለማይችሉ ትምህርት እንዲያገኙ ተደርጓል፡፡
እነዚህን የጎዳና ተዳዳሪዎች “ለመጪው ትውልድ ልማትን እንጂ ልመናን አናወርስም፤ ልመና የሌለባት ኢትዮጵያን ማየት እንችላለን” በሚል መርህ መንግስት በነፃ ማሰልጠኑንና እያሰለጠነ መሆኑን የጠቆሙት አቶ ግርማ ፤ ከስልጠናው በኋላ ያለውን ሂደት የሚከታተለው ኤልሻዳይ የተሰኘው ግብረ ሰናይ ድርጅት መሆኑን ተናግረዋል፡፡
ባለፈው አመት 2400 የሚሆኑ የጎዳና ልጆች በአፋር ክልል ኢሚባራ ወረዳ በሚገኘው የብረታ ብረት ኢንጂነሪንግ ኮርፖሬሽን አዲስ ራዕይ ማሰልጠኛ ማዕከል ገብተው በተለያዩ የሙያ መስኮች ሰልጥነው እንደተመረቁ የጠቆሙት  አቶ ግርማ፤ ከነገ በስቲያ ሰኞ 5 ሺህ ዪደርሱ የጎዳና ተዳዳሪዎች በሁለተኛ ዙር እንዲሰለጥኑ ጠቅላይ ሚኒስትሩ በተገኙበት አሸኛኘት ይደረግላቸዋል ብለዋል፡፡ “ሰልጣኞቹ ወደ ጎዳና እንዳይመለሱ ኤልሻዳይ ይከታተላል፤መንግስትም ድጋፍ ያደርጋል፤ ወደ ጎዳና ተመልሰዋል ስለሚባለው ግን መረጃው የለንም” ያሉት ኃላፊው፤ የሰልጣኞቹን ቁጥርና የት ደረሱ የሚለውን ኃላፊነት ወስዶ እየሰራ ያለው ኤልሻዳይ መሆኑን ተናግረዋል፡፡
ከአዲስ አበባ አስተዳደር ሰራተኛና ማህበራዊ ጉዳይ ቢሮ ጋር በመተባበር በኮብልስቶን ሲሰለጥኑ የነበሩት የጎዳና ተዳዳሪዎች የኤልሻዳይን ስልጠና በመጠባበቅ ገንዘባቸውን ጨርሰው ወደ ጎዳና ተዳርገዋል የሚለውን በተመለከተ የጠየቅናቸው የኤልሻዳይ መሥራችና ሥራ አስኪያጅ አቶ የማነህ፤ ሥልጠናው መዘግየቱን አልካዱም፡፡ “ሁኔታዎች ናቸው ያዘገዩት፤ ላቅ ያለ ነገር ለመስራት ስለታቀደ ለመቆየት ተገደናል፡፡ ወጣቶቹ በሚያገኙት ስልጠና እስካሁን የተጉላሉትንና ያጋጠማቸውን ችግር እንደሚረሱት ተስፋ እናደርጋለን›› ያሉት የኤልሻዳይ መሥራች፤ ቀደም ሲል ወደ አፋር ሄደው ከሰለጠኑት ውስጥ 95 በመቶ ያህሉ ስኬታማ መሆናቸውን አረጋግጠናል ብለዋል፡፡