ህወሓት የፕሪቶሪያ የሰላም ስምምነት ዋስትና ሰጪ የሆኑት አሜሪካ፣ አውሮፓ ኅብረት፣ አፍሪካ ኅብረትና የተባበሩት መንግሥታት ድርጅት የገቡትን ቃል ተግባራዊ ሳያደርጉ ቀርተዋል ሲል ከሰሰ።

ፓርቲው ስምምነቱ ከተፈረመ ከሦስት ዓመታት በኋላም ቢሆን፣ በትግራይ ክልል “በዝምታ ውስጥ እየተፈጸመ ያለ ዘር ማጥፋት ቀጥሏል” ሲልም ገልጿል።

ህወሓት መስከረም 19 ቀን 2018 ዓ.ም ባወጣው መግለጫ፣ በክልሉ እየተፈጸመ ያለውን ውድመት ለማስቆም ዓለም አቀፉ ማኅበረሰብ ጣልቃ እንዲገባ አሳስቧል። አክሎም፣ “ዓለም አቀፉ ማኅበረሰብ አሁን እርምጃ እንዲወስድ እንጠይቃለን። የትግራይ ውድመት በዝምታ እንዲቀጥል አትፍቀዱ። ለሰላም የገባችሁትን ቃል አክብሩ፣ ንጹሐንን ጠብቁ፣ እናም ሌላ አሳዛኝ ክስተት እንዳይከሰት ተከላከሉ” ብሏል።

ፓርቲው፣ ተፈናቃዮች ወደ ቀዬአቸው እንዲመለሱና የተያዙ ቦታዎች እንዲለቀቁ ለማስቻል በህዳር 2022 የተፈረመው የፕሪቶሪያው ስምምነት በአብዛኛው ሳይተገበር ቀርቷል ብሏል። መግለጫው፣ “አብዛኞቹ ድንጋጌዎች ተፈጻሚ አልተደረጉም፤ተፈናቃዮች ሳይመለሱ ቀርተዋል፣ የተያዙ ቦታዎችም አልተለቀቁም። አደጋው እየከፋ ሄዶ በዝምታ ውስጥ እየተፈጸመ ያለ ዘር ማጥፋት ቀጥሏል” ሲል አክሏል።

በተጨማሪም ፓርቲው፣ ዋስትና ሰጪዎቹ ኃላፊነታቸውን መወጣት አለመቻላቸውንም በማውገዝ፤ “የፕሪቶሪያ ስምምነት ሙሉ በሙሉ እንዲተገበር፣ ኃይሎች ከያዙት ቦታዎች አስቸኳይ ለቀው እንዲወጡና ተፈናቃዮች በሰላም እንዲመለሱ” ጠይቋል።

አስ-

ቴሌግራም ቻናልችንን በመቀላቀል የአዲስ አድማስን መረጃ ይከታተሉ…

በትግራይ ክልል የአስገድዶ መድፈር ሁኔታዎች ባለመቆማቸው፣ ወላጆች በ12 ዓመት ዕድሜ ላይ የምትገኝ ልጃቸውን እየዳሩ እንደሚገኙ ተገልጿል፡፡

ፆታን መሠረት አድርገዉ በሴቶች ላይ የሚፈፀሙ የኃይል ጥቃቶችን ለመከላከል የግንዛቤ ማስጨበጫ ሥራዎች በተለይም ከአምስት ዓመት ወዲህ ሲሰራ ቢቆይም፣ ከፀጥታዉ ችግር ጋር ተይያዞ ሙሉ ለሙሉ ጥቃቶችን ማስቆም አለመቻሉን ትግራይ ክልልን ጨምሮ በኦሮሚያ ምሥራቅ ሐረርጌ እንዲሁም በአማራ ክልል ደቡብ ጎንደር የተደረገ ጥናት አመላክቷል፡፡

ይህም የተገለፀው የኢትዮጵያ ሴቶች ማህበራት ቅንጅት፣ በትናንትናው እለት "እሷ ትመራለች" በሚል ላለፋት አምስት ዓመታት ሲተገብር የቆየው ፕሮጀክት መጠናቀቁን አስመልክቶ በተዘጋጀው መድረክ ላይ በቀረበው የጥናት ሪፖርት ነው፡፡

በዚህ ወቅት የታዳጊዎችና ስርአተ ጾታ አለም አቀፍ ድርጅት ጥናት የኢትዮጵያ ተወካይና ተመራማሪ ማኔጂንግ ዳይሬክተር ዶክተር ወርቅነህ አበበ፤ በትግራይ ክልል ከጦርነቱ አስቀድሞ የልጅነት እርግዝናን ለመግታት የግንዛቤ ስራዎች ሲሰሩ መቆየታቸውን ተናግረዋል።

አክለውም፤ ከጦርነቱ በፊትና በኋላ እነዚህ ሁኔታዎች በመቆማቸው፣ በክልሉ እንደ አዲስ በልጅነት የሚከሰት እርግዝና መንሰራፋቱን አስረድተዋል፡፡

ወላጆች ጥቃቱን ለመከላከል በሚል ልጆቻቸውን ለ-ያለእድሜ ጋብቻ እየዳረጉ መሆኑን ባቀረቡት የጥናት ሪፖርት አመላክተዋል፡፡

ችግሩ በተመሳሳይ በኦሮሚያ ክልል ምሥራቅ ሃረርጌ፣ በአማራ ክልል ደቡብ ጎንደር ዞን ደብረታቦር፣ በአፋርና ሶማሊያም አሳሳቢ መሆኑን ጠቁመዋል ሲል ሃራምቤ ሬዲዮ ዘግቧል፡፡

በሀገረ ስኮትላንድ የሀበሻ ምግብ ቤት የከፈተችው ወይዘሮ ሙና፤ የኢትጵያን ምግቦች በማስተዋወቅ ዝናን አትርፋለች፡፡

በራሷ ሼፍ ሙና የተመሰረተው ምግብ ቤቱ በሀገራችን በብዛት የተለመደውና የኢትዮጵያውያን መለያ የሆነው በየአይነቱ፣ ጥብስ፣ ክትፎ፣ ዶሮ ወጥ፣ ጥሬ ስጋ፣ ዱለትና ሽሮ የመሳሰሉ ምግቦች የሚገኝበት ሬስቶራንት ነው፡፡

ከኢትዮጵያ ተጉዘው ወደ ስኮትላንድ ጎራ የሚሉ ኢትዮጵያውያንን እንዲሁም የኢትዮጵያን ምግብ የለመዱ የሀገሬው ስኮትላንዳውያንን ሞቅ ባለ መስተንግዶ ለዓመታት አገልግሎት ሲሰጥ ቆይቷል፡፡

ወይዘሮ ሙና ከምግብ ቤትና የንግድ ስራዎቿ ባለፈ የኢትዮጵያን ምግቦች በተመረጡ አደባባዮች ይዛ በመውጣት ማስተዋወቋ ደግሞ ሬስቶራንቷን በውጭ ሀገር ከተከፈቱ የሀበሻ ምግብ ቤቶች የተለየ ያደርገዋል፡፡

አንዳንዴ ምግቦችን በነፃ በማቅረብና በማስተዋወቅ እንዲሁም ምግቦች ላይ ልዩ የዋጋ ቅናሽ በማድረግ የኢትዮጵያውያን ምግቦች በስኮትላንድ እንዲታወቁና እንዲለመዱ ማድረግ ችላለች፡፡

ብዙ ጊዜ ምግቦቿን በዋና ዋና ጎዳናዎች ላይ ይዛ በመውጣት እየተመገበች ሌሎችም እንዲመገቡ የምታደርገው የኢትዮጵያ ምግብ አምባሳደሯ ሼፍ ሙና፤ መንገደኞችን ምግቡን በነፃ በማቅመስ ታለማምዳለች፡፡

በዚህም በርካታ ኢትዮጵያውያንና ትውልደ አትዮጵያውያን እንዲሁም የስኮትላንድ ዜጎች ኢትዮጵያና ምግቦቿን እንዲያውቁ ማድረግ ችላለች፡፡

በዚህ ብቻ ሳታበቃ የኢትዮጵያውያን ብሔር ብሔረሰቦች ባህል፣ ወግ፣ ቋንቋ፣ ጭፈራና የአለባበስ ዘዴ በማስተዋወቅ ለሀገሯ የአምባሳደርነት ሚናዋን እየተወጣች ትገኛለች፡፡

ግለሰቧ የኢትዮጵያን ምግቦች ለማስተዋወቅ በምታደርገው ጥረትም በስኮትላንድ ባይት በተባለው ጋዜጣ እንዲሁም ኢድንበርግ በተባለው የስነ ምግብ ድረ ገፅ ላይ አርዕስት መሆን ችላለች፡፡

-WMCC-

ቴሌግራም ቻናልችንን በመቀላቀል የአዲስ አድማስን መረጃ ይከታተሉ…