Saturday, 16 April 2016 10:52

ማራኪ አንቀጽ

Written by 
Rate this item
(22 votes)

    ባለብዙ ቀለምዋ ሕይወት ብዙ ጠብታዎች አሏት - እንደ ሻማ ቀልጠው ብርሃናቸው ካበቃ በኋላ በዘመን ሰም ተወልውለው የሚቀመጡ። … ብርሃን የአንድ ጊዜ ፍንደቃ፣ ጨለማም የአንድ ጊዜ ድብርት ይሁን እንጂ በሰው ልጅ ልብ ውስጥ የመቆየትና እየተፍለቀለቁ ወይም እየሰቀቁ የመኖር ዐቅማቸው ብዙ ነው። ሕይወት በአንድ ትከሻ ጎመን የነሰነሰ ጎጆ፣ በሌላው ደግሞ ጮማ የተንተራሰ ቪላ አዝላ ስትሄድ በዚያ መንገዳገድ ውስጥ  ለሚያልፈው አዳም በልቡ  የምትጽፋቸው ውሎች አሉ። … ውበትና ፉንጋነት!
እኔም በልጅ ልብ የሚኖሩ … በወጣትነት ዘመን እንደ እሳተ ገሞራ እየተንፈቀፈቁ የሚወጡ ግንፍል ስሜቶች የሚታፈኑበትን፣ ማኅበረ-ፖለቲካዊ፣ … ማኅበረ-ባህላዊና ማኅበረ-ታሪካዊ ቀውሶች የነበሩበትን ትውልድና ምጡን፣ ደመና የዋጠው ድምፁንና ሣቁን፣ ደረቅ ሳሉንና አልደርቅ ያለ እንባውን ለማሰብና ለማስታወስ ነፍሴ ግድ ብላኛለች። ምናልባትም ታላቁ አሜሪካዊ ደራሲ፣መምህርና ሃያሲ ራልፍ ዋልዶ ኤመርሰን -በእግሮቻችን እንሄዳለን፤በእጆቻችን እንሰራለን፤የአእምሯችንን እንናገራለን” እንደሚል ውስጤ ያለውን ማውጣት ግድ ብሎኛል፡፡  
… ከፊል ዘመነኞቼን ያሰብኩበት ብሔራዊ ውትድርናና የብላቴውን የከፍተኛ ትምህርት ተማሪዎችን ሕይወትና የሀገሪቱን ምስቅልቅል፣ … በሌላ በኩል ደግሞ የቀዳሚዎቹን ዘመነኞች ጡንቻማ ፍልሚያ ወላፈን ከሕፃናት ሕይወት ጋር እጅ ለእጅ ለማጨባበጥና ለማስታወስ ፈዛዛ ምስሎች በትንሷ ኪሴ ወሽቄያለሁ። የማላውቀውን ዘመን ነፋስ ስሜት በሩቁ እንጂ እጄን በመስደድ እልፍኙን አልደፈርኩም።
… ግን ደግሞ የክብር ዘውድ ሊደፋባቸው የሚገባ ጭንቅላቶች ላይ የተጎነጎነውን የሾህ አክሊል አለማሰብ አልተቻለኝምና ጥላሸት በለበሰው የትዝታ ፋኖሴ ትንሽ ጭላንጭል ለኩሻለሁ።
ከሁሉ  ይልቅ አበባነት ውስጥ ያሉ ትንንሽ የሕይወት እንጎቻዎች በትንሷ ምጣድ ላይ ተጋግረው፣ በመዓዛቸው ድንበር ዐልፈው እንዲመጡ፣ አጥር ዘልለው እንዲያፏጩ … ቅጥሩን ዝቅ አድርጌላቸዋለሁ ብዬ አምናለሁ። … በዚህም በጾታዊ ፍቅር የሚንከባለሉ ከረሜላ ልቦች … ሰማይ የሚቧጭሩ ሀገራዊ ምኞቶች … ክንፍ ሳያወጡ በእንቁላልነታቸው እቅፍ ሥር ለባከኑ ሕልሞች … እንባ ያነቃቸው ሣቆች በታሪኩ ተራራ ላይ እንደ ሰንደቅ  ተተክለዋል።
(ከደረጀ በላይነህ “የደመና ሳቆች” የተሰኘ አዲስ ረዥም ልብወለድ መግቢያ ላይ የተቀነጨበ)

Read 5317 times