Administrator

Administrator

ከዕለታት አንድ ቀን የተራቡ ጅቦች በየገደላ ገደሉ እየተዘዋወሩ የሚበላ ነገር ሲፈልጉ አንድ እጅግ ግዙፍ ዝሆን አዘቅት የሆነ ገደል ውስጥ ወድቆ ሞቶ አዩ።
አንደኛው ጅብ፤
“ጎበዝ ምን ትጠብቃላችሁ፤ እንግባና እንሸክሽከው እንጂ!” አለ።
ሁለተኛው፤
“ምን ጥርጥር አለው። ገብተን እንዘልዝለው እንጂ!”
ሦስተኛው፤
“ላሜ ወለደች ማለት ይሄ’ኮ ነው!”
ከሞላ ጎደል ሁሉም በሀሳቡ ተስማምተው ድጋፋቸውን ገለጡ።
ከሁሉም ወጣት የሆነው አንድ ጅብ ግን ተቃወመ።
“ምክንያትህን አስረዳ?” ተባለ።
ወጣቱ ጅብም፤
“እርግጥ ነው ስለራበን ገብተን መብላታችን ትክክል ይሆናል። ሆኖም ሙዙን ስታይ መዘዙንም እይ የሚባል ተረት አለ። ከበላን በኋላ ሆዳችን ሲሞላ ከዚህ አዘቅት ገደል እንዴት ሽቅብ ለመውጣት እንችላለን የሚለውንም አስቡ” አላቸው።
አንደኛው ለመብላት የቸኮለ ጅብ፤
“ኧረ ቶሎ እንግባ፤ እንብላና እዚያው ዘዴ እንፈልጋለን” አለ።
ሁሉም ተስማሙና እየተንደረደሩ ገቡ። ያ ወጣት ጅብም ምርጫ ሲያጣ ከወገኖቹ እንዳይለይ ብሎ አብሮ ገባ።
ያን ግዙፍ ዝሆን ቡጭቅጭቅ አድርገው ነጩት። ተቀራመቱት።
ሆዳቸው ሞላ! ጠገቡ።
ቀና ብለው የገደሉን አፋፍ ሲያዩት ለመውጣት የማይመች አቀበት ነው።
“ቀስ ብለን ነገ ከነገ ወዲያ ዘዴ እንፈልጋለን። የተራረፈውን አጥንት እየቆረጣጠምን እናስብበታለን” ተባባሉ፤ ተስማሙ!  
ቀናቱ አንድ ሁለት እያሉ ሲገፉ ረሀብ መጣ። ደክሟቸው ተኙ። እኩለ ሌሊት እንዳለፈ አንዱ የነቃ ጅብ ጎኑ ያለውን ጅብ ቀስቅሶ፤ “በረሀብ ከምንሞት በጣም ያንቀላፋውን ጅብ ለምን ቅርጭጭ አናደርገውም?”
“እውነት ነው! እውነት ነው!” ብለው ተመሳጥረው ያንን እንቅልፋም ጅብ ሰፈሩበት! በየሌሊቱ ትርዒቱ ተደጋጋሚ ሆነ።
በመጨረሻ ሁለት ብቻ ቀሩ።
እየተፋጠጡ ማደር ሆነ።
በመካያው ግን አንደኛው ደከመና እንቅልፍ ጣለው። የነቃው የተኛውን በልቶ ለጥቂት ቀናት ነብስ ዘራ።
ሆኖም በመጨረሻ እንቅልፍ ጣለው። በዚያው እንደተዝለፈለፈ አንድያውን አሸለበ! ህይወቱ አለፈ።
***
ጅብ መቼም ጅብ ነው። አበው ሲተርቱ “ከጅብ ጅማት የተሰራ ክራር ቅኝቱ ´ልብላው ልብላው”´ ነው ይላሉ። አገራችን ኢትዮጵያ የጅብ ደሀ ሆና አታውቅም። የቀን ጅብም የሰው ጅብም፣ ነባር ጅብም መጤ ጅብም አስተናግዳለች። ያም ሆኖ አስፈጻሚና ክትትል አድራጊ አጥታ ነው እንጂ ዕቅዶችም አላጣችም!
ወጣትና አዋቂ ልጆችም አሏት። ከጥንት ከዘመነ-ስካውት ጀምሮ፣ የወጣት ወንዶች ክርስቲያናዊ ማህበር (ወወክማ) የወጣት ሴቶች ክርስቲያናዊ ማህበር (ወሴክማ) ውሎ አድሮም፣ አኢወማ (የአብዮታዊት ኢትዮጵያ ወጣት ማህበር) እና የአብዮታዊት ኢትዮጵያ ወጣት ሴቶች ማህበር (አኢሴማ) በወቅቱ የነበረው ትኩስ ኃይል ማሰባሰቢያ ነበሩ። በዚህ ላይ የተደራጁት የፖለቲካ ፓርቲዎች የየራሳቸው የወጣት ክንፍ ነበራቸውና የወጣቱን ጉልበት ይዘዋል። አሰልፈውታል። በየፊናቸው ኢትዮጵያን የተወሰነ ርቀት አስኪደዋል። የተወሰነ ርቀትም የኋሊት አንደርድረዋታል። የብዙ ልጆቿ ደምም ፈስሶባታል። ከባባድ መስዋዕትነት ተከፍሎላታል! “ጉዟችን ረጅም ትግላችን መራራ” ተብሎላታል። መራራ ከሆነ አጠር ይበል እንጂ ለምን ረጅም ይሆናል? ተብሎም ተሹፎባታል። ይህ ሁሉ ታልፎ ሲያበቃ ዛሬ ደግሞ አዲስ ጦርነት፣ አዲስ መፈናቀል፣ አዲስ ስደት እንዳመረቀዘ ቁስል እየደገመን ነው! የአንድ አገር ልጆች ደም እየፈሰሰ ነው።
“እንደካራ ማራ፣ እንደ ጭናክሶን
ሰሜንም ደማቅ እሳት አሳየን!”
ብለን ዘምረን ያቀጣጠልነው እሳት በተለያየ አቅጣጫ እያዳረሰ ይገኛል። መላና መፍትሄ ያጣው ህዝብ በከንቱ ህይወቱን መገበሩ ያሳዝናል። የተባበሩት መንግስታት፣ የአፍሪካ ህብረት፣ ወዘተ ከጀርባ የሚጭሩትን እሳት ከፊት ለፊት እናጠፋለን በሚል እንደተለመደው ድርድር…ድርድር እያሉ ተደርድረው፤ ጉብ - ቂጥ ይላሉ፡፡ መንግስታችንም ያው እንደተለመደው እጁን ተጠምዝዞ መፈራረሙን ይያያዘዋል። የማይነጥፍ የፖለቲካ አዙሪት! ለዘመናት የማይዘጋ በር! አገራችንም ዕቃውን እንዳላወጣ  ቤት ለቃቂ፤
“እንኳን ቤትና የለኝም አጥር?
እደጅ አድራለሁ ኮከብ ስቆጥር”
እያለች መዝፈኗን ትቀጥላለች! መታከትን የማያውቅ ረዥም ሙሾ!
ዕርቅና ድርድር የወቅቱ አንገብጋቢ ጥያቄ መሆኑ የማያጠያይቅ መሆኑ ግልጽና ይፋ የወጣ ጉዳይ ሆኗል። ጊዜ የማይፈታው ጉዳይ የለም! እያንዳንዱ ቀን አንዳንድ ለውጥ ማርገዙ እየታየ ነው። ይህም በጎ ምልክት ነው! ቶሎ-ተናኝ (Volatile) በሆነው የኢትዮጵያ ፖለቲካ፤ ያሁኑ መልካም ጅምር ይመስላልና፣ ወጣቱ ትውልድ ልቡና ውስጥ እንዲሰርጽ ተስፋ እናደርጋለንና፡-
“ዕቅድህ የ1 ዓመት ከሆነ (ጤፍ) ሩዝ ዝራ
ዕቅድህ የ5 ዓመት ከሆነ ባሕር ዛፍ ትከል
ዕቅድህ የዘላለም ከሆነ ልጅህን አስተምር”
የምንለው ለዚህ ነው!!


ባለፈው ሰኞ በመንግስትና በሕወሓት ወታደራዊ አመራሮች መካከል በናይሮቢ የተጀመረው ንግግር ረቡዕ ይጠናቀቃል ተብሎ ቢጠበቅም ወደ ህትመት እስከገባንበት ሰዓት ድረስ አልተጠናቀቅም። ውይይቱ ዛሬ ይጠናቀቃል ተብሎ ይጠበቃል።
በዚህ የናይቢው ንግግር የሁለቱ ወገኖች ወታደራዊ አዛዦች፣ የህወሓት ሃይሎች ትጥቅ በሚፈቱበት ዝርዝር ሁኔታ ላይ የተወያዩ ሲሆን ሌሎች ታጣቂዎች የኤርትራና የአማራ ክልል ከትግራይ የሚወጡበት ጊዜ ግን አሳሳቢ መሆኑን አሶሼትድ ፕሬስ ምንጮችን ጠቅሶ ዘግቧል።
በደቡብ አፍሪካው የሰላም ንግግር፤ የህውሓት ሃይሎች በ30 ቀናት ውስጥ ትጥቅ እንደሚፈቱ ስምምነት ላይ መደረሱ ይታወቃል። በዚህ ንግግር ለውይይት ከሚቀርቡ ጉዳዮች መካከል እንደ ኢንተርኔት፣ ቴሌኮም፣ መብራና ባንክ ያሉ አገልግሎቶችን ወደነበሩበት መመለስ  እንዲሁም የሰብአዊ እርዳታ አቅርቦቶችን ማስጀመር ይገኙበታል።  በትግራይ  መሰረታዊ መድኃኒቶች ማለቃቸውን የጠቆመው የተባበሩት መንግስታት፤ ወደ ክልሉ ሰብአዊ እርዳታ ለማድረስ ከአጋሮቻችን ጋር እየተጠባበቅን ነው ብሏል።
ይህ በዚህ እንዳለ የኢትዮጵያ መንግስት ዋና ተደራዳሪና የጠቅላይ ሚኒስትሩ የብሔራዊ ደህንነት አማካሪው አምባሳደር ሬድዋን ሁሴን፤ ሰብአዊ እርዳታዎች ወደ ክልሉ በስፋት መጓዝ መጀመራቸውንና 35 የምግብ ሸቀጦችንና 3 መድኃኒትና የህክምና መገልገያ ቁሳቁሶችን የጫኑ መኪኖች ሽሬ መግባታቸውን ገልጸዋል። አምባሳደሩ በዚሁ የቲውተር መልዕክታቸው ላይ እንዳሰፈሩት የኢትዮጵያ መከላከያ ሰራዊት 70 በመቶውን የትግራይ ክልል መቆጣጠሩንና ለሰብአዊ እርዳታ የአውሮፕላን በረራዎች ዳግም መፈቀዳቸውን ገልጸዋል። የመንግስት ኮሚዩኒኬሽን አገልግሎት ቢሮ በበኩሉ፤ በትግራይ የተለያዩ አካባቢዎች የምግብ እርዳታ እየቀረበ ነው ብሏል።
የፕሪቶሪያውን የሰላም ስምምነት ተከትሎ ምንም አስተያየት ከመስጠት ተቆጥበው የሰነበቱት የዓለም ጤና ድርጅት ዋና ዳይሬክተር ዶ/ር ቴዎድሮስ አድሃኖም፤ ሰሞኑን ለሪፖርተሮች በሰጡት ምግብና መድኃኒት ወደክልሉ እየገባ አይደለም ማለታቸውን ተከትሎ፣ የመንግስት ኮሚዩኒኬሽን አገልግሎት ዴኤታዋ ሰላማዊት ካሳ እንደተናገሩት፤ በትግራይ የተለያዩ አካባቢዎች የምግብ እርዳታ እየቀረበ እንደሆነ አመልክተው በሽሬ፣ ሽራሮ፣ አክሱም፣ አዲሃጋላይ፣ አዲቃሮ፣ ሰለክላካና አዲነብሪ ከተሞች 108 ሺ ለሚሆኑ ወገኖች 16 ሺ 100 ኩንታል ስንዴና ከ65,000 ኩንታል በላይ አልሚ ምግቦች እንዲከፋፈሉ ተደርጓል። በራያ አላማጣና ኮረም ከ43,200 በላይ ኩንታል ስንዴና ከ7,300 ኩንታል በላይ አልሚ ምግብ 287 ሺ ለሚሆኑ ዜጎች ተዳርሷል ተብሏል።

  የኮቪድ ወረርሽኝ፣ ድርቅ፣ ጦርነትና ግጭት በሴቶችና ሕፃናት መሰረታዊ መብቶች ላይ ከፍተኛ ጫና ማሳደራቸው ተጠቁሟል

        የኢትዮጵያ ሰብአዊ መብቶች ኮሚሽን (ኢሰመኮ)፤ ከመስከረም 2014 ዓ.ም. እስከ ነሐሴ 2014 ዓ.ም. ያለውን ጊዜ የሚሸፍን የሴቶችና የሕፃናት ሰብአዊ መብቶች ሁኔታ ዓመታዊ ሪፖርቱን ሰሞኑን ይፋ አድርጓል።
ይህ ባለ 36 ገጽ ዓመታዊ የሴቶችና የሕፃናት መብቶች የዘርፍ ሪፖርት፣ ኢሰመኮ ሐምሌ 1 ቀን 2014 ዓ.ም. ይፋ ካደረገው አጠቃላይ የኢትዮጵያ ዓመታዊ የሰብአዊ መብቶች ሁኔታ ሪፖርት በተጨማሪነት በተለይ የሴቶችና የሕፃናት ሰብአዊ መብቶች አያያዝ ላይ በዝርዝር በማተኮር ኮሚሽኑ የለያቸውን አበረታች እመርታዎች፣ ዋና ዋና አሳሳቢ ጉዳዮችና ምክረ-ሃሳቦችን አካቷል። ኮሚሽኑ ሪፖርቱን ያዘጋጀው ባከናወናቸው ክትትሎች፣ ምርመራዎችና የመስክ ምልከታዎች፣ ባስተናገዳቸው የግለሰቦች አቤቱታዎች፣ የሕግና የፖሊሲ ግምገማዎች፣ ጥናቶችና ምክክሮች፣ የግንዛቤ ማስጨበጫ መድረኮች እንዲሁም የውትወታና ሌሎች ሥራዎቹ ላይ በመመስረት መሆኑን ጠቁሟል።
የሴቶችና የሕፃናት ሰብአዊ መብቶችን ከማስጠበቅና ከማስፋፋት አንፃር በሕግ ረገድ የታዩ ክፍተቶች፣ የሴቶችና የሕፃናት ከጥቃትና ከብዝበዛ የመጠበቅ፣ ፍትሕና ውጤታማ መፍትሔ የማግኘት፣ ሕዝባዊ ተሳትፎ የማድረግ፣ በፍትሕ ሥርዓት ውስጥ ያለው አያያዝ፣ የቤተሰብ መብቶች እንዲሁም የሴት ሠራተኞች ሁኔታ ሪፖርቱ ትኩረት ያደረገባቸው ርዕሰ ጉዳዮች ናቸው ተብሏል።
በኢትዮጵያ በተከሰቱት ሰው ሠራሽና ተፈጥሯዊ ችግሮች ምክንያት ሕፃናት ከመንግሥት፣ ከማኅበረሰብና ከቤተሰብ ማግኘት ያለባቸው ጥበቃ በመጓደሉ ለተደራራቢ የመብቶች ጥሰት መጋለጣቸውና ሴቶች በተፈጸሙባቸው ጾታዊ መድሎዎችና ጥቃቶች ምክንያት መሰረታዊ መብቶቻቸውን የሚጥሱ፣ ነጻነቶቻቸውን የሚገድቡ እንዲሁም ሰብአዊ ክብራቸውን የሚያጎድፉ በደሎች እንደደረሱባቸው በሪፖርቱ ተገልጿል። በተጨማሪም በብሔራዊ የሕግ ማዕቀፍ ውስጥም ለሕፃናትና ለሴቶች ሰብአዊ መብቶች በቂ የሕግ ከለላ በመስጠት ረገድ የተለያዩ ክፍተቶች መስተዋላቸው ተጠቅሷል።
በኢትዮጵያ የሰሜኑ ክፍል በተነሳው ጦርነትና ቀጥሎም በየመሀሉ ማገርሸቱ በሴቶችና በሕፃናት ላይ መጠነ-ሰፊ ጥቃቶች፤ በአንዳንድ ሁኔታዎች ለጦርነት ዓላማ ስልታዊ በሆነ መልኩ ጭምርም መፈጸማቸውም ተዘግቧል። ይሁን እንጂ ለተፈጸሙ ጥቃቶች ውጤታማ ፍትሕና መፍትሔ የሚያስገኝ የወንጀልና የፍትሐ-ብሔር የሕግ ማዕቀፍ አለመኖር፣ ዓለም አቀፍ መመዘኛዎችን ያሟላ የወንጀል ምርመራና የክስ አመሰራረት መጓደል በሪፖርቱ ከተዘረዘሩት ዋና ዋና አሳሳቢ ጉዳዮች መካከል ይጠቀሳሉ። በሌላም በኩል በተለያዩ የሀገሪቱ ክፍሎች በሶማሌ፣ በአፋር፣ በኦሮሚያ፣ በጋምቤላ፣ በቤኒሻንጉል ጉሙዝ፣ በደቡብ ብሔሮች ብሔረሰቦች እና ሕዝቦች ክልሎች በተለያየ ወቅት በተነሱ ግጭቶችም ሴቶችና ሕፃናት ለተለያዩ የሰብአዊ መብቶች ጥሰቶች መጋለጣቸው በሪፖርቱ ተጠቅሷል።
ከፍተኛ ቁጥር ያላቸው ሴቶችና ሕፃናት ከመኖሪያቸው መፈናቀላቸው፣ በተፈናቃይ መጠለያ ጣቢያዎች ውስጥም ለጾታዊ ጥቃቶችና ጎጂ ልማዳዊ ድርጊቶች ተጋላጭ መሆናቸውና ልዩ ፍላጎታቸውን መሰረት ያደረጉ የሰብአዊ ድጋፎች አለማግኘታቸው ተደራራቢ የመብቶች ጥሰትን አስከትሏል ተብሏል። በሀገሪቱ በተከሰቱ የኮቪድ ወረርሽኝ፣ ድርቅ፣ ጦርነትና ግጭት ሳቢያ የትምህርትና የጤና አገልግሎቶች በመቋረጣቸው፣ ወይም የተለያዩ ገደቦች መኖራቸው በሴቶችና ሕፃናት ትምህርትና ጤና የማግኘት መሰረታዊ መብቶች ላይ ከፍተኛ ጫና ማሳደራቸውን ኮሚሽኑ ገልጿል።
በተጨማሪም፣ ሴቶችና ሕፃናት ለሕገ-ወጥ የሰዎች ዝውውርና ለብዝበዛ መጋለጥ፣ በኢንዱስትሪ ፓርኮች የሚሠሩ ሴት ሠራተኞች መሰረታዊ መብቶች ጥሰቶች መቀጠልና በእነዚህ የመብቶች ጥሰት ረገድ የቁጥጥርና የተጠያቂነት መላላት ሌላው አሳሳቢ ጉዳይ መሆኑ ነው በሪፖርቱ የተጠቆመው።
በሕዝባዊ ጉዳዮች ላይ ከመሳተፍ መብት ጋር በተያያዘም፣ ሕፃናት በማናቸውም ጉዳይ ላይ ሃሳባቸውን በነፃ የመግለጽና በሚመለከታቸው ጉዳዮች ላይ ተሳትፎ የማድረግ መብታቸውን ለመተግበር የሚያስችል ሕግ አለመኖር፤ ሴቶችም በምርጫና በፖለቲካ ውስጥ ውጤታማ ተሳትፎ እንዳያደርጉ የአመለካከት ችግሮችና ጾታን መሰረት ያደረጉ ጥቃቶች እክል መፍጠራቸው፤ እንዲሁም በሰላም ግንባታና በሀገራዊ ምክክር እና ሌሎች የሕዝባዊ ውይይት መዋቅሮች ውስጥም ጾታዊ አካታችነት በእጅጉ ውስን በመሆኑ፣ የሴቶች ተሳትፎ ተገድቧል ብሏል፤ ሪፖርቱ።
ከወንጀል ጉዳይ ጋር በተያያዘ በፍትሕ ሥርዓት ውስጥ የሚያልፉ ልጆች አያያዝ ከሕፃናት ፍትሕ መርሆዎችና መመዘኛዎች ውጪ መሆን፣ በወንጀል ተጠርጥረው የታሰሩ ሴቶች ሁኔታ ከመሰረታዊ የሴት እስረኞች አያያዝ መስፈርቶች ጋር አለመጣጣም፣ ከእናቶቻቸው ጋር በእስር ቤት የሚቆዩ ሕፃናት ትምህርትና አማራጭ እንክብካቤ የማግኘት መብቶች መጓደል፣ በወንጀል ፍትሕ አስተዳደር ሥርዓት ውስጥ ያሉ ክፍተቶች በሪፖርቱ ከተለዩ ጉድለቶች መካከል ናቸው። ከዓለም አቀፍ የሰብአዊ መብቶች መስፈርቶች ጋር በተጣጣመ ሁኔታ ለሕፃናት ነፃና ለሁሉ ተደራሽ የሆነ የልደት ምዝገባ አሠራር በሀገር አቀፍ ደረጃ በሕግ አለመደንገጉ እንዲሁም በተወሰኑ ክልሎች ደግሞ የቤተሰብ ሕግ አለመውጣቱ ከተስተዋሉት የሕግ ክፍተቶች መካከል ተጠቃሽ ናቸው።
በተለያዩ የሀገሪቱ ክፍሎች የደኅንነት ሥጋቶች መቀጠላቸው የሴቶችንና ሕፃናትን ሁኔታ በሚፈለገው ቅርበት እና ፍጥነት ለመከታተል እንዳይቻል እንቅፋት የፈጠረ መሆኑ፣ በእነዚህ አካባቢዎች የሚሠሩ የሲቪል ማኅበራትና አጋሮች አቅምም መዳከሙና በኮሚሽኑ የሚሰጡ ምክረ ሃሳቦችን ተግባራዊ ከማድረግ አኳያ በቅንጅት ለመሥራት የሚያስችል ጠንካራ የጋራ መድረክ አለመኖር ፈታኝ ሁኔታ መፍጠሩም ተጠቁሟል።
የኢሰመኮ የሴቶችና የሕፃናት መብቶች ኮሚሽነር መስከረም ገስጥ፣ የሴቶችንና የሕፃናት መብቶችን በተመለከተ ኮሚሽኑ ባከናወናቸው ክትትሎች፣ ምክክሮችና የተለያዩ ክንውኖች ትብብር በማድረግና ግብዓት በመስጠት ኃላፊነታቸውን ለተወጡ መንግሥታዊም ሆነ መንግሥታዊ ያልሆኑ አካላት ምስጋናቸውን አቅርበው፣ በኢትዮጵያ ለሚገኙ ሕፃናትና ሴቶች ከግጭት፣ ከጥቃትና ከመድልዎ ነፃ የሆነ፤ ዘላቂ ሰላምና እኩልነት የሰፈነበት ሕይወትን እውን ለማድረግ በሪፖርቱ የተካተቱትን ምክረ-ሃሳቦች በመፈጸምና በማስፈጸም የተቀናጀ ጥረትና ርብርብ እንዲያደርጉ አሳስበዋል።
ኮሚሽነር መስከረም አክለውም፤ “ሰብአዊ መብቶችን ማክበር፣ ማስጠበቅና ማሟላት የመንግሥት ዋነኛ ግዴታ በመሆኑ የሕግ ማዕቀፎችን፣ ተቋማትንና አሠራሮችን በማሻሻል፣ ፍትሕን ተደራሽ በማድረግ፣ በግጭቶች የወደሙ የትምህርትና የጤና ተቋማትንና ሌሎች መሰረተ-ልማቶችን መልሶ በመገንባትና ለተጎጂዎች ሁለንተናዊ ተሐድሶን በማመቻቸት የሕፃናትንና የሴቶችን ሰብአዊ መብቶች የማሻሻል ኃላፊነቱን መወጣት አለበት። በተጨማሪም መንግሥታዊ ያልሆኑ ድርጅቶች፣ ዓለም አቀፉ ማኅበረሰብ፣ እንዲሁም ሌሎች ባለድርሻ አካላትና ጠቅላላ ማህበረሰቡ በሰብአዊ መብቶች ማዕቀፍ በተቀመጠው አግባብ በሀገሪቱ የሴቶችና የሕፃናት መብቶች አፈጻጸምን በማረጋገጥ ረገድ የበኩላቸውን ድርሻ እንዲወጡ ጥሪ አቀርባለሁ” ብለዋል።

 ታዋቂው የኦሮምኛ ዜማ አቀንቃኙ ክቡር ዶክተር ዓሊ ቢራ ባደረበት ህመም ህክምና ሲከታተል ቆይቶ፣ ከዚህ ዓለም በሞት መለየቱን የመንግስት መገናኛ ብዙኃን ዘግበዋል፡፡

 ጠ/ሚኒስትር ዐቢይ አህመድ ባስተላለፉት የሃዘን መልዕክት፤"የአንጋፋው ድምጻዊ ዓሊ ቢራ ኅልፈት ለኢትዮጵያ ጉዳት ነው። በዜማዎቹ ኅብረትን፣ ጽናትንና ባህልን አቀንቅኗል። ለብዙዎችም አርአያ ሆኗል። ላደረከው ሁሉ ኢትዮጵያ ታመሰግንሃለች።" ብለዋል፡፡

 አርቲስት ዓሊ ቢራ በ1954 ዓ.ም የኦሮምኛ ሙዚቃን ለማስተዋወቅ ዓላማ ያደረገ የባህላዊ ሙዚቃ ቡድን “አፍረን ቀሎ”ን በመቀላቀል ነበር፣ የሙዚቃ ስራውን የጀመረው። አርቲስቱ ከኦሮምኛ በተጨማሪ፣ በሶማሊኛ፣ አፋርኛ፡ ሐረሪ፣ አማርኛና አረብኛ ቋንቋዎች በርካታ ዘፈኖችን ተጫውቷል።

 ዝግጅት ክፍሉ በክቡር ዶክተር አሊ ቢራ ህልፈት የተሰማውን ጥልቅ ሃዘን እየገለጸ፤ፈጣሪ ለቤተሰቦቹ ወዳጆቹና አድናቂዎቹ መጽናናትን ይመኛል፡፡

   ከሶሻል ሚዲያ በጨረፍታ

   “እየሰማን ያለነው የሰላም መልእክት ሳይሆን ተከታታይ ማስጠንቀቂያዎችን ነው። ነገር ግን በርካታ የፖለቲካ ምስቅልቅሎችን ማለፍ እንደቻለች ኩሩ አፍሪካዊት ሀገር [የተባበሩት መንግሥታት] አባል ሀገራትን አንድ ነገር ማስታወስ እፈልጋለሁ።
በርካታ ችግሮቻችንን ተጋፍጠን እንዳለፍናቸው ሁሉ፣ ዛሬም የገጠሙንን ችግሮች በእርግጠኝነት እንሻገራቸዋለን። በአንዳንድ ኃያላን ሀገሮች ዐይን ፊት ልክ በሁለተኛው የዓለም ጦርነት ወቅት እንደሆነው [ኢትዮጵያውያን] ዐቅመቢስ መስለን እንታይ ይሆናል።
ክቡር ሊቀ መንበር፤ ...
አንድ ነገር ግን ላረጋግጥልዎት እወዳለሁ።
የውስጣችን መንፈስ ጽኑ ነው! ... የውስጣዊ መንፈሳችን ጥንካሬ ኢትዮጵያዊ ሆኖ ለመቆም ብቻ ሳይሆን ሰላማዊ ለመሆን እና ተግዳሮቶቻችንን ለመፍታትም ጭምር ነው።
የ120 ሚሊዮን ሕዝባችንን ዕድል ለ200 ኤክስፐርቶች ልንተወው አንችልም።
ይህንን ብዬ፤ ... ሁልጊዜም ቢሆን በጎ ሀሳብ ያላቸውን ተሳታፊዎች በደስታ የምንቀበል ሲሆን ሊያወግዙን እና ለሞት አሳልፈው ሊሰጡን ቀድመው የወሰኑትን ግን “የሚያደርጉትን አያውቁምና ይቅር ይበላቸው” እላለሁ።
ስለዚህ እንደ [ኢትዮጽያ] መንግሥት ላረጋግጥላችሁ የምፈልገው፤ ሁሉም የሰብአዊ መብት ጥሰት ላይ የተሳተፉትን ተጠያቂ እናደርጋቸዋለን።  ይህንንም የምናደርገው የተወሰኑ ድርጅቶችን ወይንም ኤክስፐርቶችን ለማስደሰት ሳይሆን ለራሳችን መርህ ስንል ነው። ዘላቂ ሰላም መስፈን የሚችለው በሁሉም አካባቢዎች ለተሠሩ ወንጀሎች ተጠያቂነት እና ፍትሕ ሲሰፍን ብቻ መሆኑን እንረዳለን። ነገር ግን ይህ በሀገሪቱ ባለቤትነት መመራት አለበት።
አመሠግናለሁ፤ ክቡር ሊቀ መንበር፡፡”

Saturday, 05 November 2022 11:41

ከሶሻል ሚዲያ በጨረፍታ

 “በሀገሬ ተስፋ አልቆርጥም የምለው ለዚህ ነው!”

      ምስጋናና ክብር ለኢትዮጵያ ሀገራችን ለተዋደቃችሁ የሀገር መከላከያ ሰራዊት አባላት!
ምስጋናና ክብር ለአማራ ፋኖ፣ ልዩ ሀይልና ሚሊሻ አባላት!
ምስጋናና ክብር ለአፋር ሚሊሻና ልዩ ሀይል አባላት!
ምስጋናና ክብር በዲፕሎማሲው ጦርነት ከምእራባውያን ጋር ለታገላችሁ በሙሉ!
ልክ የዛሬ ሁለት አመት ነው የኢትዮጵያውያንን ተስፋ ያጨለመ ዜና የሰማነው፤ በሰሜን እዝ ላይ የደረሰው ጭፍጨፋና የትህነግ የጦርነት ክተት፡፡ ዛሬ በሁለት አመቱ ደግሞ ያ ተስፋችን ላይ ብርሀን ፈንጥቋል፡፡ በእርግጥ ትህነግ ወደ ድርድር የገባው በጦርነት ተሸንፎ በመሆኑ፣ ይህ ነው የሚባል ተጽእኖ እንደማያሳድር ግልጽ ነበር።  ይሁን እንጂ የአሜሪካና የአውሮፓ ህብረት ትህነግ ላይ ነፍስ ለመዝራት በኢትዮጵያ ላይ ያሳደሩት ጫናና በተደጋጋሚ የሚያወጡት መግለጫ ሲታይ፣ ትህነግ እንዲህ በቀላሉ ትጥቁን ለመፍታትና እራሱን ለማክሰም ይስማማል ተብሎ አልተጠበቀም፡፡ ይህ ድል የመላው ኢትዮጵያውያን ድል ነው፤ ሽንፈቱ ደግሞ የምእራባውያን፡፡ በቅርቡ ምእራባውያን በዚህ መጠን ዘምተው የተሸነፉበት ግንባር ያለ አይመስለኝም፡፡
የኢትዮጵያ መንግስት በአንድ ጊዜ በሶስት ጦር ሜዳዎች ድል አድርጓል፤ (1) በምድር ላይ ባለው ጦርነት (2) በዲፕሎማሲ፣ (3) በፓን አፍሪካኒዝም፡፡ ይህ ለሀገራችን ትልቅ ሀይል ነው፡፡ በሸኔና በሌሎች ታጣቂዎች ላይ በአጭር ጊዜ ተመሳሳይ ድል ማስመዝገብና ጅምሩ ያማረውን የእርሻ ምርት በስፋት ማስቀጠል ከተቻለ፣ የሀገራችንን የሰላምና የእድገት ተስፋ የተሟላና እውን ማድረግ ይቻላል፡፡ . . . ምንጊዜም ኢትዮጵያ ተስፋ አላት!
(በድሉ ዋቅጅራ)

Saturday, 05 November 2022 11:39

ከሶሻል ሚዲያ በጨረፍታ


                    “ጨለማው እየነጋ ነው !”

         ምስጋና ኢትዮጵያ በፅናት እንድትቆም እራሳቸውን አሳልፈው ለሰጡት፣ ለታገሉትና የሰላም ስምምነቱን ላስቻሉት ሁሉ:: ዘላቂ ሰላም ለማምጣት፣ አገራችንን ለመገንባትና በጦርነቱ የተጎዱትን ለመርዳት እንትጋ!! ጨለማው እየነጋ ነው::
(በአሜሪካ የኢትዮጵያ አምባሳደር፣ ዶክተር ኢንጂነር ስለሺ በቀለ)

Saturday, 05 November 2022 11:38

“አሸናፊዋ ኢትዮጵያ ናት!!”

 የሰላም ስምምነቱ ህገ መንግስታዊ ስርአቱንና ብሄራዊ ጥቅማችንን ባስከበረ መልኩ በተሳካ ሁኔታ ተጠናቋል። ስምምነቱ መንግስት ካስቀመጠው አቅጣጫ ጋር የተጣጣመ፣ የመላ ህዝባችንን ፍላጎት የሚያሟላ፣ ዘላቂ ሰላምን የሚያረጋግጥና የትግራይን ህዝብ መሠረታዊ ችግሮች የሚፈታ ነው። ወደዚህ ድል የደረስነው መላው የፀጥታና የደህንነት ሃይሎቻችን በከፈሉት መስዋእትነትና በመሬት ላይ ባስመዘገቡት ድል፣ ህዝባችን አንድ ሆኖ በመቆሙና መንግስት ሰላምን ለማረጋገጥ ባሳየው ቁርጠኝነት ነው። ድሉ የመላ ኢትዮጵያውያን ድል ነው! አሸናፊዋ ኢትዮጵያ ናት!
(የመንግሥት ኮሙኒኬሽን ሚኒስትር ዶ/ር ለገሠ ቱሉ)

ሀገር እንጠብቅ ህዝብን እናገልግል ያሉ፣ ቀን ገበሬ ማታ ደግሞ ጠባቂ ሆነው ለሃያ አመታት ደከመኝ ሰለቸኝ ሳይሉ የኖሩ፣ ሃሩሩ አቃጠለኝ በቃኝ፣ ብርዱ አቆረፈደኝ ይቅርብኝ ሳይሉ፣ ሌትና ቀን፣ በጋና ክረምት፣ ቆላና ደጋ እያሉ ስለሀገር መስዋዕትነት የከፈሉ፣ ስለህዝብ የተንገላቱ፣ ስለኢትዮጵያ የደከሙ የሰሜን እዝ አባላት በሰው ልጅ ታሪክ ታይቶም ተሰምቶ በማይታወቅ ሁኔታ ባልጠበቁት አካል፣ ባልጠረጠሩት መንገድ፣ ባልገመቱት ሰዓት እንኳን ለወንድም፣ እንኳን ለአንድ ሀገር ልጅ ለጠላት እንኳን በሚሰቀጥጥ መልኩ የተጨፈጨፉበት ሁለተኛ አመት ነው!
ጥቅምት 24 ቀን 2013 ዓ.ም በኢትዮጵያ ታሪክ ጥቁር ቀን ነው፤ ኢትዮጵያውያን በሙሉ ያነቡበት ቀን፡፡ ይህ ቀን ምስኪን ወንዶችና ሴቶች ልጆቻችን በተኙበት የታረዱበት ቀን ነው፣ ይህ ቀን የታሪክ ጠባሳው ለዘላለም የሚኖር ቀን ነው። ይህንን ቀን ስናስታውስ በተኙበት የታረዱት ሀገር ጠባቂዎች፣ አስክሬናቸው ላይ በሲኖትራክ በጭካኔ የተነዳባቸው ወታደሮች፣ የሀገሬ ልጅ ያሉት ሲጨክንባቸው እራቁታቸውን ወደ ጎረቤት ሀገር ያመለጡ የሰራዊቱ አባላት የሚታወሱበት ቀን ነው።
ዛሬ ላይ የእነርሱ መስዋዕትነት ሀገርን አቅንቷል፣ የከፈሉት ዋጋ ለተቀረነው ለኛ የታሪክ ባላደራ እንድንሆን አድርጎናል። ሀገር እንድትቀጥል እነሱ ምክንያት ሆነዋል።
ዛሬ መላ ኢትዮጵያዊ ወገኖቼን ቆሜ አንድ ነገር እጠይቃችኋለሁ። ከዛሬ በኋላ እስከ ጥቅምት 24 ያሉትን ቀናት በዛ ጥቁር ጭለማ ቀን ሰብል ሲሰበስቡ ውለው በውድቅት ሌሊት የተጨፈጨፉትን ውድ ልጆቻችንን እንድናስታውስ አደራ እላለሁ።
ውድ ኢትዮጵያውያን፤ የነርሱ መስዋዕትነት ዛሬ ለኛ የመኖር ዋስትና መቀጠል ምክንያት ሆኗልና፡፡
ጥቅምት 24፡ መቼም አንረሳውም!
መስዋዕትነታችሁ አገርን አቁሟል!
(ሰለሞን አሰፋ)

 ከእለታት አንድ ቀን አንድ አዛውንት አባት  ለልጃቸው የሚከተለውን የቻይናዎች በሳል ምክር ለገሱት።
1. እቅድህ የዓመት ከሆነ እሩዝ ዝራ
2. እቅድህ የ5 ዓመት ከሆነ ባህርዛፍ ትከል
3. እቅድህ የዘለዓለም ከሆነ ልጅህን አስተምር
ያ ልጅ ይህን መሰረታዊ እውነት ይዞ አደገ። አዋቂ በሆነም ሰዓት  ለልጆቹ ሶስቱን ትምህርት አስተማረ። ልጆቹ ግን በእያንዳንዱ ጉዳይ ላይ ጥያቄ ከማንሳት ወደ ኋላ አላሉም።
 አንደኛው ልጅ፤ “አባቴ ሆይ፤ ከሩዝ ይልቅ ጤፍ አይሻልምን?” ብሎ ጠየቀው።
አባትም፤ “ጤፍ የአገርህ፣ ሩዝ የሌላ ሀገር ነው፤ ሆኖም ወሳኙ ጉዳይህ ዘር መዝራት ነው።”
ልጅ፡- “አባቴ ሆይ፤ ባህርዛፍ ብዙ ሃብት ንብረት ነው ብዬ እቀበል ዘንድ ትመኝልኛለህን? ባህር ዛፍ የእኔ ነው ብዬ እንድወስደው እንደምን ወደድክ?”
አባት፡- “እውነት ነው ልጄ ባህር ዛፍንም ከውጪ አምጥተን ማጽደቅና መትከላችን ይታወቃል። ሆኖም የኛ ምድር እንዲፈቅደው አድርገን አላሳደግነውም፤ ዛሬ እንደ ሀብታችን አድርገን ኮርተንበታል” አሉት።
ልጅ፡- “አባቴ ሆይ፤ ሶስተኛው ምክርህ ከቀደሙት ሁለት ምክሮችህ በምን ይበልጣል?”
አባት፡- “ልጄ ሆይ፤ ምክር ተበላልጦ አያውቅም፤ ምክር ሁሉ እንደየ ወቅቱ ጠቃሚ ይሆናል። ዋናው ነገር የአንተ ወቅትንና ጊዜን ማወቅ ነው። ለማንኛውም ሶስተኛው ምክሬ ምንጊዜው እወቅ የሚል ነው፤ እወቅ ስልህ ተማር ማለቴ ነው። የማንኛውም ነገር ቁልፍ ትምህርት ነው። አንተ በተማርክ ቁጥር ሀገርህ በአንድ የተማረ ሰው ታድጋለች። ምኞትህ የበለጸገች ሀገር እንድትኖርህ ይሁን። አባቶቻችን ትምህርትህን ይግለጥልህ ብለው የሚመርቁህ ለዚህ ነበር። አሁንም የእኔ ምርቃት ትምህርትህን ይግለጥልህ የሚለው የሆነው ለዚህ ነው።”
ልጅ፡- “አባቴ ስለትምህርት የነገሩኝን ተረድቻለሁ። ትምህርቱን ተምሬ ግን ምን ጥቅም ላይ እንደማውለው ገና አልገባኝም” ሲል ጠየቃቸው።
አባት፡- “ልጄ ሆይ፤ አንዱ የትምህርት ጥቅም ከባላንጣህ ጋር መደራደሪያ ስልትን ማወቅ እንድትችል ዘዴ መፍጠሩ ነው። ስታሸንፍ አለመደንፋት፣ ስትሸነፍ አንገት አለመድፋት እንድትችል የሚያደርግህ ትምህርት ነው” ሲሉ አስረዱት ይባላል።
***
ድርድር ለአንድ ሀገር ያለው ፖለቲካዊና ዲፕሎማሲያዊ ጠቀሜታ እጅግ ትልቅ ነው። ዋነኛው ቁምነገር ግን የሃይል ሚዛንን ማወቅ ነው። ድርድር ከኢኮኖሚዊ ጠቀሜታ ጋርም ውስጣዊ ትስስር አለው። ማንኛውም ከውጭ ሀገርም ሆነ ሀገር ውስጥ ካሉ ፖለቲካዊ ሃይሎች ጋር መንግስት የሚያደርገው ድርድር፤ ጥብቅ ጥናትና ግንዛቤ ማድረግ ያሻዋል የምንለው ለዚህ ነው!
በሀገራችን አያሌ ጦርነቶች ተደርገዋል፣ ብዙ ደም ፈሷል፣ ብዙ የህዝብ መስዋዕትነት ተከፍሏል። ለዚህ ውድ ዋጋ መንግስትም ከተጠያቂነት አያመልጥም። ከብዙ አገሮች ቀዳሚ የነበረችው አገራችን ኋላቀር እንድትሆን ካደረጓት ምክንያቶች አንዱ ጦርነት ነው። ጦርነት ከፖለቲካዊ ጠቀሜታው ይልቅ ኢኮኖሚያዊ ጉዳቱ ያይላል። በትንሹ ለማየት ለጦርነት ዝግጅት እየተባለ “በእናት አገር ጥሪ” ስም የተከፈለው መስዋዕትነት ብቻ እንኳን ምን ያህል የአገሪቱን ህብለ ሰረሰር እንደሰበረው ለማየት የምንጃር ባላገር የተናገረውን ማውጠንጠን ይበቃል፡-
“እናትና አባቴን በጊዜ ቀብሬ
መንግስት እጦራለሁ አንጀቴን አስሬ!”
እዚህ ላይ የጥንቱን ጠቅላይ ሚኒስትር መለስን አነጋገር ዛሬ ለማስታወስ ስሞክር የበለጠ ሁኔታውን ለማየት ያድለናል። እንዲህ ነበር ያሉት፡
“የሰሜኑ ክፍለ ሀገራችን  ማንኳኳት የማይለየው በር ነው”
ዛሬም ላይ ቆመን ብናየው፤ የአባባሉ እውነታ ህያው መሆኑን መገንዘብ አያዳግተንም!
የሁልጊዜ ዜማችን፣ የሁልጊዜ ሙሾአችን “ጦርነት” ብቻ መሆኑ እጅግ ያሳዝናል። ከጦርነት ማግስት ስደት፣ ረሃብ፣ መፈናቀል፣ ድንኳንና መርዶ እንጂ የተረፈን ነገር አልነበረም። ያቃተን “ጦርነት ይውደም” ብለን መፈክር ማስገር ነው። አሁንስ “ጦርነት ይውደም” እንበል፤ መንግስትም ይህንን መፈክር ይስማ።
“ስናሸንፍ ከመደንፋት፣ ስንሸነፍ አንገት ከመድፋት” አባዜ ፈጣሪ ይጠብቀን!

Page 8 of 632