(ዝነኞች በመጨረሻ ሰዓታቸው)
· “እየተሸነፍኩ ነው”
   ፍራንክ ሲናትራ
· “ብዕር ለመያዝ አቅም ቢኖረኝ ኖሮ፣መሞት እንዴት ቀላልና አስደሳች ነገር እንደሆነ እፅፍ ነበር”
  ዶ/ር ዊሊያም ሃንተር
· “የምሻው ገነት መግባት ሳይሆን ሲኦል መግባት ነው፡፡ በሲኦል የጳጳሳት፣ የነገስታትና የልኡላን ጓደኞች ይኖሩኛል፡፡ በገነት ግን የኔ ቢጤዎች፣ መነኩሴዎችና ሐዋርያት ብቻ ናቸው ያሉት”
  ኒኮሎ ማኪያቬሊ (የፍሎሬንቲን ዲፕሎማትና የፖለቲካ ፈላስፋ)
· “ሞቼአለሁ ወይም ሰዓቴ ቆሟል”
  ግሮቾ ማርክስ
· “እነዚህን መነኮሳት ከአጠገቤ ዞር አድርጉልኝ”
  ኖርማን ዳግላስ
· “ነገ ይዞ የሚመጣውን አላውቅም”
  ፈርናንዶ ፔሶ (የፖርቹጊዝ ገጣሚ)
· “ከእርስዎ ጋር ለምን አወራለሁ? አሁን ከአለቃዎት ጋር ስነጋገር ነበር”
  ዊልሰን ሚዝነር (ለቄስ የተናገረው)
  (ፀሐፌ ተውኔትና የስክሪፕት ፀሐፊ)
· “ተጣልተን እንደነበር አላውቅም”
    ሔነሪ ዴቪድ ቶሪዎ (ከእግዚአብሄር ጋር ሰላም እንዲፈጥር ሲጠየቅ)
  (አሜሪካዊ ደራሲ፣ ገጣሚ፣ ፈላስፋና የታሪክ ምሁር)
· “ሁሉንም ሰው ይቅር ብያለው፡፡ ሁሉም ሰው እኔንም ይቅር እንዲለኝ እፀልያለሁ። አሁን የሚፈሰው ደሜ ለሜክሲኮ ሰላምን ያሰፍንላታል፡፡ ሜክሲኮ ለዘላለም ትኑር፤ ነፃነት ለዘላለም ይኑር”
  ማክሲሚሊያን (የሜክሲኮ ንጉስ)
· “ዝናቡ ይሰማችኋል? ዝናቡ ይሰማችኋል?”
(አውሮፕላኗ ከመከስከሱ ከደቂቃዎች በፊት)
  ጄሲካ ዱብሮፍ

 ነፍሰ ጡርነቷን የሚያሳየው ፎቶ በተወዳጅነት ክብረወሰን ይዟል

     ታዋቂዋ ድምጻዊት ቢዮንሴ ኖውልስ፣ ነፍሰ ጡር መሆኗን ለአድናቂዎቿ በማብሰር ባለፈው ረቡዕ በኢንስታግራም ድረ-ገጽ በኩል ያሰራጨቻቸውን አነጋጋሪና ከፍተኛ ተወዳጅነት ያተረፉ ፎቶ ግራፎች ያነሳው ትውልደ ኢትዮጵያዊው የፎቶ ግራፍ ባለሙያ አወል ርዝቁ፣ አለማቀፍ ዝናን ያተረፈ የመገናኛ ብዙሃን መነጋገሪያ ሆኗል፡፡
ቢዮንሴ ከባለቤቷ ጄይዚ መንታ ልጆችን በማርገዟ የተሰማትን ደስታ በመግለጽ፣ በኢንስታግራም ያሰራጨቻቸው እርግዝናዋን የሚያሳዩ ፎቶግራፎች እጅግ በሚገርም ፍጥነት የአለምን ትኩረት የሳቡ ሲሆን፣ አንደኛው ፎቶ በአንድ ቀን ጊዜ ውስጥ ከ8.2 ሚሊዮን በላይ ‹‹ላይክ›› በማግኘት በኢንስታግራም ታሪክ ከፍተኛውን ተወዳጅነት በማትረፍ አዲስ ክብረ ወሰን ማስመዝገቡን የአለም የድንቃ ድንቆች መዝገብ ተቋም አስታውቋል፡፡
ያልተመዱትና እርግዝናዋን በግላጭ የሚያሳዩት ፎቶግራፎች አለማቀፍ መነጋገሪያ መሆናቸውን ተከትሎ፣ ፎቶግራፎችን ያነሳው ትውልደ ኢትዮጵያዊ ፎቶ ግራፈር አወል ርዝቁ ከፍተኛ ዝናን ያተረፈ ሲሆን፣ ታላላቅ የአለማችን መገናኛ ብዙሃንም እሱንና ለአመታት የዘለቀውን የስነ-ጥበብ ታሪኩን በተመለከተ በስፋት በመዘገብ ላይ ናቸው፡፡
በአዲስ አበባ የተወለደውና በአሜሪካ ያደገው የ28 አመቱ አወል ርዝቁ፤ በዋናነት የፎቶግራፍ ባለሙያ ቢሆንም፣ ተቀማጭነቱን በሎሳንጀለስ በማድረግ በርካታ ስራዎችን በመስራት ላይ የሚገኝ ሰአሊ፣ ቀራጺና የአጫጭር ፊልሞች አዘጋጅ መሆኑን የዘገበው ቢቢሲ፣ ከአሜሪካው ኮፐር ዩኒየን ኮሌጅ እ.ኤ.አ በ2010 በፋይን አርትስ የመጀመሪያ ዲግሪውን መቀበሉንና እ.ኤ.አ በ2014 ከታዋቂው የል ዩኒቨርሲቲ በፋይን አርትስ ሁለተኛ ዲግሪውን ማግኘቱንም አስታውሷል፡፡
ኒውዮርክ በሚገኘው ሚዩዚየም ኦፍ ሞደርን አርት እና በሌሎች የአሜሪካ ሙዚየሞችና ጋለሪዎች የፎቶግራፍና ሌሎች የስነ-ጥበብ ስራዎቹን በግልና በተናጠል በኢግዚቢሽን መልክ ለተመልካቾች ያቀረበው አወል፤ ከዚህ በፊትም ቢዮንሴን ጨምሮ የተለያዩ የአለማችን ታዋቂ ድምጻውያንን አስገራሚ ፎቶግራፎች በማንሳት ይታወቃል፡፡
በአነጋጋሪ ፎቶ ግራፎች የታጀበው የቢዮንሴ የእርግዝና ዜና በትዊተር ድረገጽ በከፍተኛ ፍጥነት የተሰራጨ ሲሆን፣ ረቡዕ ዕለት ብቻ በየደቂቃው በአማካይ 17 ሺህ ጊዜ ስለጉዳዩ ትዊት መደረጉንና የትዊተር ተከታዮቿ ቁጥርም በከፍተኛ ሁኔታ በማደግ 93.1 ሚሊዮን መድረሱን ሲኔት ድረገጽ ዘግቧል፡፡
እ.ኤ.አ በ2008 በትዳር የተሳሰሩት ታዋቂዎቹ የዓለማችን ዝነኛ ድምጻውያን ቢዮንሴ እና ጄይ ዚ፣ ከሶስት አመታት በኋላ የመጀመሪያ ልጃቸውን ብሉ ኢቪን ወልደው ለመሳም በቅተዋል፡፡

 ከዕለታት አንድ ቀን አንድ አባት የመሞቻው ቀን በመቃረቡ የንብረቱን ውርስ ለልጆቹ ለመስጠት፤ ሦስቱን ልጆቹን ወደ አልጋው ጠራቸው፡፡ ከዚያም፤
‹‹ከእናንተ መካከል በጣም ብስልና ብልህ ለሆነው ልጅ ርስቴን፣ ሀብቴንና ንብረቴን ላወርስ እፈልጋለሁ፡፡ እጅግ ብልሁን ልጅ የምለየው፤ ለምጠይቀው ጥያቄ የተሻለውን መልስ ለሚመልስልኝ ነው፡፡ ትስማማላችሁ?›› አለ፡፡
ሦስቱም በአንድ ድምፅ፣ ‹‹አዎን፡፡ እንስማማለን›› አሉ፡፡
‹‹እንግዲያው ጥያቄዬን ስሙ፡፡ ይሄን ያለንበትን ቤት ባንድ ጊዜ ግጥም አድርጎ የሚሞላ ቀላል ነገር ፈልጋችሁ፣ በ3 ቀን ውስጥ አምጡ››
ልጆቹ ጥያቄውን እያሰላሰሉ ወጡ፡፡
በሦስተኛው ቀን፤ ሶስቱም የሚመስላቸውን መልስ ይዘው መጡ፡፡ የመጀመሪያው ልጅ፤ ‹‹አባቴ ሆይ! በጣም ቀላል ግን በቀላሉ ይሄን ቤት የሚሞላ ነገር ብዬ ያሰብኩት ጥጥ ነው፡፡ ጥጥ ለመሸከም አይከብድም፡፡ ቤታችንን ግን ዳር እስከ ዳር ይሞላዋል›› አለ፡፡
ሁለተኛው ልጅ ቀጠለ፡-
‹‹አባቴ ሆይ! ለእኔ የመጣልኝ ሀሳብ፤ ቀላል ሆኖ ይሄን ቤት በቀላሉ የሚሞላ ጭድ ነው፡፡ ለሸክም አይከብድም፤ ግን ከጥግ እስከ ጥግ ቤታችንን ይሞላዋል›› አለ፡፡
ሦስተኛውና የመጨረሻ ትንሹ ልጅ ተነሳና፤
‹‹አባቴ ሆይ! ወንድሞቼ ያሉት ልክ ሊሆን ይችላል፡፡ ግን ዳር እስከ ዳር አንድም ክፍተት ሳይኖረው ላይሞላው ይችላል፡፡ እኔ ያመጣሁት ሀሳብ ግን ምንም ጥርጥር የለውም፤ ቤቱን በደንብ ይሞላዋል! ይኸውም፤ ይቺ አንዲት ሻማ ናት! ይቺ ሻማ ስትበራ  እየቀለጠች ቤቱን ብርሃን በብርሃን ታደርገዋለች፡፡ ይዤ ለመምጣት ግን ኪሴ ውስጥ ማስቀመጥ ብቻ ነው ያስፈለገኝ፡፡ ወንድሞቼ ራሳቸው ይፍረዱ›› ብሎ ተቀመጠ፡፡
አባት፤
‹‹እህስ? ወንድሞቹ ምን ትላላችሁ?›› ብለው ጥያቄውን ለሌሎች አጋሩ፡፡
ሁለቱም ታላላቅ ወንድሞች ለትንሹ ወንድማቸው ፈረዱና፤ ‹‹ከዚህ የተሻለ ጥበብ የተሞላ መልስ የለም!›› ብለው አፀደቁለት፡፡
*    *    *
ዕውነት የሆነን ነገር አምኖ መቀበልን የመሰለ ነገር የለም፡፡ ትንሹ ወንድማቸው ያቀረበውን ሀሳብ ታላላቆቹ መቀበላቸው እጅግ ትልቅ ትምህርት ይሰጠናል! መሸነፍን ሳይፈሩ የተሻለውን ሀሳብ ማፅደቅ!!
አስተዋይና ብርሃናማ ትውልድ ለአገር መድህን ይሆናል፡፡ ማናቸውም ችግር ሲፈጠር መፍትሔውን ለመፍጠር ይተጋል፡፡ መከራ በቀላሉ አይረታውም፡፡ ከህይወት ይማራል፡፡ ከትምህርት ቤት ያገኘውን ዕውቀት መሬት ላይ ይተገብራል። እንዲህ ያለውን ትውልድ ለመጎናፀፍ ገና ብዙ መንገድ ይቀረናል፡፡ ያም ሆኖ ጨለምተኛ ሆነን አናስበውም፡፡ በሂደት ይወለዳል፡፡ በሂደት ያድጋል፡፡ አንድ ቀን ባለፀጋ ያደርገናል፡፡
ሁልጊዜ አገርን ሊታደጉ የሚችበት በመጀመሪያ ጥቂቶች ናቸው እያደር ብዙሃን ይሆናል፡፡ ይህ እንዲሆን ግን መንገዱ አልጋ በአልጋ አይደለም፡፡ መስዋዕትነትን ይጠይቃል፡፡ ከባድ ድካምንና ታከተኝ ሰለቸኝ ሳይሉ መሥራትን የግድ ይላል፡፡ ሃምሳ ዓመት የፈጀውን የንጉሡን ዘመን የተማሪዎች እንቅስቃሴ ማስተዋል ነው፡፡
የምንታገለው ከአድርባይነት ጋር ነው፡፡ የምንታገለው ከሥራ  አጥነት ጋር ነው። የምንታገለው ከሥርዓተ አልበኝነት ጋር ነው፡፡ የምንታገለው ከምንደኝነት ጋር ነው።  የምንታገለው ከግብረገብ አልባነት ጋር ነው፡፡ የምንታገለው ከጅምላ ድህነት ጋር ነው፡፡ ትግሉ ዘርፈ ብዙ እንደመሆኑ ዘርፈ ብዙ ጥንካሬን ይጠይቃል፡፡ የአሁኑ ትውልድ እንደ ወጣት ረዥም መንገድ መሄድ ይጠበቅበታል፡፡ ከጠባብነት እስከ ትምህክተኝነት ድረስ የተንሰራፋውን ችግር በዋዛ ማሸነፍ አይቻልም፡፡ ውስብስብም ነው፡፡ በዚህ ላይ ፀረ ዲሞክራሲነትና ሙስና እንዲሁም ኢ -ፍትሐዊነት ሲተከልበት ምን ያህል ሥር የሰደደ መከራ እንዳለብን እንገነዘባለን፡፡ ፅናት ይፈልጋል፡፡ ደፋር እርምጃ ይጠይቃል፡፡ ጥልቅ ዕውቀት ይሻል፡፡
ጉዟችን ወዴት ነው? ብሎ መጠየቅ ተገቢ ነው፡፡ የግንባታ አፈፃፀም ማነስ በሰፊው ይሰማል፡፡ የተለያዩ የመንግሥት ተቋማት እርስ በርስ አለመናበብ አንዳንዴም መወዛገብም ይሰማል፡፡ የመካከለኛና አነስተኛ ኢንዱስትሪዎች ዕድገት ዝቅተኛ መሆን ይነገራል፡፡ መመሪያዎች ይቀረፃሉ እንጂ ተግባራዊነታቸው ደብዛዛ ነው፡፡ ሌላው ቀርቶ የቆሻሻ ማጠራቀሚያዎች እንኳ በአቅል አልተሠሩም፡፡ በቂ ቦታም አጥተዋል። የከተማ ነዋሪውም በአግባቡ አይጠቀምባቸውም፡፡ በአጠቃላይ ከወሬ ያለፈ ሥራ የለም እየተባለ ነው፡፡ ጥልቅ ተሐድሶው ጥልቅ ዐይን ያስፈልጋዋል፡፡ ከአንገት በላይ የሆነ ነገር ፍሬው አመርቂ አይሆንም፡፡ ብዙ የሥራ ሰዓት ባክኖበታልና ውጤቱ በጥኑ መገምገም ይኖርበታል፡፡ በተለያዩ የሥራ መስኮች ላይ የምናየው ያው ቤት ያፈራውን ነው፡፡ የአገር አቅም የፈቀደውን ነው የምናየው፡፡ ‹‹እናትህ የላከችህን ሳይሆን ገበያው የሰጠህን ነው  የምታገኘው›› የሚባለው ለዚህ ነው፡፡ ገበያው እንዲጠናከርና እንዲሰፋ ማድረግ የእኛው ፋንታ ነው፡፡

  • ድርጊቱን ያጋለጡት፣ “የሥራ ዋስትናችን ለስጋት ተጋልጧል” እያሉ ነው
                      • የማጸደቂያ ‘ስጦታው’ በሌሎችም አድባራት የተለመደ መሆኑ ተጠቁሟል

      በአዲስ አበባ ሀገረ ስብከት፣ የደብረ ተኣምራት ጻድቃኔ ቅድስት ማርያም ቤተ ክርስቲያን ካህናትና ሠራተኞች፤ ለተፈቀደላቸው የደመወዝ ጭማሬ ማጽደቂያ በሚል፣ ለሀገረ ስብከቱ ዋና ሥራ አስኪያጅ እና ለሒሳብና በጀት ዋና ክፍሉ ሓላፊ በስጦታ ለመክፈል፣ የተጠየቁትን የ50 ሺሕ ብር ጉቦ(የሁለት ወራት ጭማሬ) ማጋለጣቸውን ተከትሎ፤ ገንዘቡ እንዲመለስላቸው ታዘዘ፡፡
የደብሩ አስተዳዳሪ፣ ዋና ጸሐፊ፣ ሒሳብ ሹም፣ ቁጥጥርና የገንዘብ ቤት ሓላፊ፤ “ደመወዙን ከአዲስ አበባ ሀገረ ስብከት አጸድቀን ያመጣነው የስጦታና የማጸደቂያ ገንዘብ ከፍለን በመሆኑ የታኅሣሥና የኅዳር ወር ጭማሬያችሁን 50 ሺሕ ብር ለእኛ ትለቁልናላችሁ፤” እንዳሏቸው አቤቱታ አቅራቢዎቹ ገልጸዋል፡፡
“ለምን እንለቅላችኋለን?” ብለው መጠየቃቸውን የጠቀሱት አቤቱታ አቅራቢዎቹ፣ “እንዲህ ዓይነቱ ነገር በሌሎችም አብያተ ክርስቲያናት የተለመደና የሚደረግ መሆኑን ታውቃላችሁ፤ ይህ ብር ካልተከፈለ ደመወዙ ሊጸድቅ አይችልም፤” በማለት ሓላፊዎቹ እንደመለሱላቸው አስረድተዋል፡፡
አቤቱታ አቅራቢዎቹም፣ በወቅቱ የሓላፊዎቹን ምላሽ በአንድ ድምፅ ቢቃወሙም፣ የኅዳር ወር ጭማሬያቸው ብር 25ሺሕ፣ ለሥራ አስኪያጁ መ/ር ጎይትኦም ያይኑ እና ለሒሳብና በጀት ዋና ክፍሉ ሓላፊ አቶ ገብረ ሕይወት አስገዶም ስጦታ ተቀንሶ በባንክ መከፈሉን አስታውቀዋል፡፡ በተመሳሳይም፣ የታኅሣሥ ወሩ ብር 25ሺሕ ሊቆረጥባቸው በመታሰቡ፣ በቀጥታ ደብሩ ለሚገኝበት የኮልፌ ቀራንዮ ክፍለ ከተማ፣ ቤተ ክህነት ጽ/ቤት ማመልከታቸውን አስረድተዋል፡፡
የክፍለ ከተማው ቤተ ክህነትም፣ አቤቱታውን ተቀብሎ በመደባቸው ልኡካኑ በማጣራት ድርጊቱ ሕገ ወጥ መሆኑን ገልጾ፤ ከሠራተኞቹ የደመወዝ ጭማሬ ላይ በስጦታ የተወሰደባቸው ገንዘብ፣ ለሁሉም ካህናትና ሠራተኞች ከጥር 1 ቀን 2009 ዓ.ም ጀምሮ ተመላሽ እንዲሆንና የአፈጻጸሙ ሪፖርት እንዲገለጽለት የደብሩን አስተዳደር አሳስቧል፤ ደብሩም በሕግ አግባብ እንዲመራ የክፍለ ከተማው ጽ/ቤት አሳስቧል፡፡ ይህም ሆኖ፣ “ድርጊቱን በማጋለጣችን ከሥራ ለማዘዋወርና ለማገድ፣ የሀገረ ስብከቱ ዋና ሥራ አስኪያጅ መ/ር ጎይትኦም ይይኑ ደብሩ ድረስ በመምጣት ከጽ/ቤቱ ሓላፊዎች ጋር በመሆን መክረውብናል፤” ያሉት ካህናቱና ሠራተኞቹ፣ “ቀጣይ የሥራ ዋስትናችንም ለስጋት ተጋልጧል፤”  ሲሉ ባለፈው ማክሰኞ ለጠቅላይ ቤተ ክህነት በጻፉት አቤቱታ አመልክተዋል፡፡
ለተፈጸመባቸው በደል አስቸኳይ መፍትሔ እንዲሰጣቸው የተማፀኑ ሲሆን፤ በደብሩ ሓላፊዎች የተፈጸመው የሙስና ወንጀል የቤተ ክርስቲያንን ክብር የሚነካ በመሆኑ እንዲጣራና ጥፋተኞችም ለሕግ እንዲቀርቡ በአቤቱታቸው ጠይቀዋል፡፡

  ‹‹ወታደሩን በምን ያህል መጠን እናጠናክረው? ለእናት አገራችን በአስቸኳይ አንድንደርስ፣ ይሄ ቀዳዳ ሳይከፈት…ነገር ግን በሕግ አንበይናለን፤ እናስፈፅማለን እንላለን…ገና ጦር ሜዳ ሄዶ ጠላቱን አይቶ መግደሉን ወይም መሞቱን ሳያውቅ ከመኪና ላይ በራሱ እየወረደ የሚሞት ወጣት ነው ያለው፡፡ ምንድን ነው ይሄ? ከኢትዮጵያ ነው እንዴ የበቀለው?...››
አሉ አሉ ጓድ ፕሬዚዳንት መንግሥቱ ኃ/ማርያም፡፡
ከፍርሃታችን አለማፈራችን፡፡
ከእሳቸው በላይ እኔ አርሬአለሁ፡፡ ‹‹ምንድን ነው ይሄ ታለ? ከኢትዮጵያ ነው አንዴ የበቀለው?›› ብያለሁ፡፡ እሳቸው አጣለሁ ብለው ከሰጉት በላይ እኔ ሰግቻለሁ፡፡ ‹‹ፍቅራችንን በምን ያህል መጠን እናጠናክረው? ለሲፈን በአስቸኳይ እንድንደርስ፣ ይሄ ቀዳዳ ሳይከፈት…›› ብያለሁ፡፡
የቱ ቀዳዳ? መንግሥቱ እኛን የሚፈልጉን እንደ ጋሽ ሩፌ ጭቃ፣ ቀዳዳ ለመድፈን ነው እንዴ? እያነሱ ሊመርጉን፤ ትንሽ ሽንቁር ላይ ልክክ ስንል ‹‹ለእናት ሀገሩ አኩሪ መስዋዕትነት ከፍሎ…›› እንባላለን እንደ አባቴ፤ አይ ወንድ!
እነ ሸክና እኔ ቤት ሦስት ቀን አደሩ፡፡ ሽክና በእናቱ ሀገሩ እጅግ አድርጎ ተበሳጨ፤ በተለይ የጠጅ አቅርቦት ከተቋረጠ የኢትዮጵያን የሶስት ሺህ አመት ነፃነት ይገፍፋል፡፡
‹‹ተገዝተናል!›› ይላል ቀበኛ ያኘከው ጨርቅ በመሰለ ፊቱ ላይ ብስጭት እያስነበበ፡፡
ፈርተን የተሸሸግን ቢሆንም አንዳንዶች ይሄንን ሀሳብ በጀግንነት ይዋጋሉ፡፡
‹‹አሲዙ፣ እኔ እረታችኋለሁ›› ይላል ሸክና፡፡
ጨዋታ ሞቅ ሲል ሴቶቹ አብዮት ጠባቂ ከሚጠብቁበት ከዋርድያ ነቅለው ይመጣሉ፡፡
‹‹አንተ ምን ታሲዛለህ?›› ምንም እንደሌለው ያወቁ፡፡
‹‹እስክሞት ቀጥቅጡኝ›› ይላል፡፡
ሽክናን ለመምታት ሰበብ የሚፈልገው ሳኮ የመጀመሪያዋን ሃያ አምስት ሳንቲም ይጥላል፡፡
‹‹ይኸው፣ እዩ ደሞ!››
‹‹እንምርህም ግን››
‹‹አትማሩኝ››
‹‹ከሁለተኛ ፎቅ እንደመዝለል ይቆጠራል››
‹‹ንፋስ ይወስደዋላ››
ሣቅ!!
ሽክና ለውርርድ የቀረበውን ፍራንክ አይቶ ‹‹‹ለዚችማ ብዬ ውርርዴን አላበላሽም›› አለ፡፡
እልህ የያዛቸው ጨመሩ፡፡
‹‹አሁን ይቻላል! ስምንት ብርሌ ጠጅ በቂ ነው።››
‹‹በውርርዱ ካላሸነፍክ ተመላሽ ነው አትጠጣ››
‹‹ለሱ ግድ የለም፡፡›› አለና ቀጠለ፡፡ ‹‹እዚህ ሰፈር ያሉትን ስሞች ስነግራችሁ መዝግቡ››
‹‹እሺ›› መዝጋቢ ተመደበ
‹‹ሩፌ›› አለ
‹‹ሩፌ›› ተመዘገበ
‹‹ዎሌ፣ መዘገባችሁ? ቸሩ፣ ዶሪ፣ ሳኒ፣ መዘገባችሁ? ድገሙልኝ፤››
‹‹ሩፌ›› ሲሉ
‹‹ሩፍ ከሚለው እንግሊዘኛ ነው የተገኘው፡፡ ጣሪያዬ ማለት ነው››
‹‹ዎሌ››
‹‹ዎል ከሚለው እንግሊዝ ቃል የተገኘ ነው ወለሌ››
‹‹ቸሩ››
‹‹ቸር ወንበር ነው፡፡ ወንበሬ››
‹‹ዶሪ››
‹‹ዶር፤ በሪሁን ማለት ነው››
‹‹ሳኒ››
‹‹ሰን፣ ፀሀይ አይደል ፀሐዬ ማለት ነው፡፡ ስለዚህ ኢትዮጵያ የእንግሊዝ ቅኝ ተገዢ እንደነበረች በዚህ ይታወቃል፡፡››
የሚስቀው ሳቀ፤ የሚናደደው ተከራከረ፡፡
‹‹በእንግሊዝ ቀኝ አልተገዛንም ካለች እንደ እኔ በማስረጃ ተከራከሩ››
‹‹ነው እንዴ? አንተ? እንግሊዝ ገዝታናለች?›› አለ ሳኮ፡፡ ‹‹ወይኔ የሙዜን አሰበሉኝ፣ ምን አሰዋሻቸው? ወይኔ የሻሜታዬን…››
ሽክና ጠጁን በሴቶቹ አስላከ፡፡
በሁካታ መካከል እናቴ ትመጣና አንዴ በግልምጫ ታነሳናለች፡፡ ‹‹እኔ እዚህ ነፍስና ስጋዬ ይቦጨቃል እናንተ ታወካላችሁ? እንዴት ያሉ ሀሳብ የለሾች!
ቻይና ስለእሷ የተጀመረው ወሬ እንዳይቀጥል ብቻ ለጥበቃ የተቀመጠች ይመስላል፡፡ ለመሳቅ ትሞክርና ሽክና ሲያያት ትኮሳተራለች፡፡ ያ ማር ነጋዴ ማን ይሆን? ከእኔ የባሰ ሳይፈርድበት አልቀረም፡፡ ማር የነካካ እጁን ወደኋላ አድርጎ ይሄኔ…
ምንጭ ፡- ‹‹በፍቅር ስም›› መፅሀፍ የተቀነጨበ
በደራሲ ዓለማየሁ ገላጋይ ከተፃፈው

ትውልደ ኢትዮጵያዊቷ ሩት ነጋ ለምርጥ መሪ ተዋናይነት ታጭታለች

     ጋለሪያ ቶሞካ ለ22ኛ ጊዜ በሚያካሂደው የስዕል ትርኢት፤ “ነፃና ንፁህ” በሚል ርዕስ የሰዓሊ ይስሃቅ ሳህሌን የሥዕል ስራዎች ለእይታ አቀረበ፡፡የሥዕል ትርኢቱ በትናንትናው እለት የተከፈተ ሲሆን የህፃናትን አለምና ህይወት የሚገልፁ የተለያዩ ስዕሎች የተካተቱበት ነው ተብሏል፡፡ “እንደ ህፃናቱ አሳሳል በወፍራም መስመራት የተሰመሩ፤ በሰፋፊ ዝርግና ደማቅ ህብረ ቀለማት የተቀቡ ነፃ፣ ንፁህና የዋህ ኪነ ቅቦች ናቸው” ብለዋል ሰዓሊ እሸቱ ጥሩነህ፤ ስለ ሰዓሊው ሥራዎች ባሰፈሩት አስተያየት፡፡ “በህፃናት ዓለም ውስጥ መገኘት፣ ያንን ዓለም መተንተን፣ በህፃናት ህሊና ውስጥ የሚፈሱ ቀለማትን ማጫወት ደስ ይለኛል” የሚለው ሰአሊው፤ ከልጅነቱ ጀምሮ በኪነ ሥዕል ሙያ ራሱን ያዳበረ መሆኑ በሥዕል ትርኢቱ መግለጫ መፅሄት ላይ ተጠቁሟል።
ሰዓሊው ከዚህ ቀደም በፈረንሳይ የባህል ማዕከል፣ በብሄራዊ ሙዚየም፣ በብሄራዊ ቴአትርና በአስኒ ቤተ ሥዕል ስራዎቹን ለዕይታ ማቅረቡ ታውቋል፡፡ “ነፃና ንፁህ”፤ ለሁለት ወራት ለተመልካች ክፍት ሆኖ ይቆያል ተብሏል፡፡ ጋለሪያ ቶሞካ የሚገኘው ሳር ቤት ካናዳ ኤምባሲ ፊት ለፊት ነው፡፡

ከ14 በላይ መፃህፍት አሳትመዋል
     ቼምበር ማተሚያ ቤትን የመሰረቱትና በኢትዮጵያና በአፍሪካ ታሪኮች ላይ ያተኮሩ መፃህፍትን የፃፉት እንዲሁም ለትምህርት የሚሆኑ በአማርኛና በእንግሊዝኛ ቋንቋዎች የተፃፉ ከ14 በላይ መፃህፍትን ያሳተሙት አቶ
አስፋው ተፈራ በ88 ዓመታቸው ከዚህ ዓለም በሞት ተለዩ፡፡ በኢትዮጵያ መፅሐፍ ቅዱስ ማህበር በፕሬዚዳንትነት፣ በአዲስ አበባና በምስራቅ አፍሪካ ላይንስ ክለብ በፕሬዚዳንትነት እንዲሁም በኢትዮጵያ ደራሲያን ማህበር በተለያዩ የኃላፊነት ደረጃዎች ያገለገሉት አቶ አስፋው፤ ከህልፈታቸው በፊት 10 የሚደርሱ መፃህፍትን ለህትመት እያዘጋጁ እንደነበር ታውቋል፡፡ በብሔራዊ ዩኔስኮ በድርሰት ክፍል ኃላፊነት፣ በአዲስ አበባ ዩኒቨርሲቲ ኮሌጅ በህዝብ
አስተዳደር ምርምርና ክፍል ጥናት፣ እንዲሁም በውጪ ጉዳይ ሚኒስቴር፣ በናይጄሪያ  በኢትዮጵያ  ኤምባሲ በዲፕሎማትነት የሰሩት አቶ አስፋው፤ የኢምፔሪያል ሆቴል መስራችና ባለቤትም ነበሩ፡፡ አቶ አስፋው ተፈራ ባደረባቸው ህመም በአገር ውስጥና በውጪ አገር ህክምናቸውን ሲከታተሉ ቆይተው፣ ሰኞ ጥር 15 ቀን 2009 ዓ.ም ያረፉ ሲሆን የቀብራቸው ሥነ ሥርዓትም ባለፈው ረቡዕ በአማኑኤል ቤተክርስቲያን ተፈፅሟል፡፡ አቶ አስፋው ተፈራ ባለትዳርና የ5 ልጆች አባት ነበሩ፡፡

- ድሃ ሆነህ ብትወለድ ጥፋቱ ያንተ አይደለም፤ ድሃ ሆነህ ብትሞት ግን ጥፋቱ ያንተ ነው፡፡
    ቢል ጌትስ
- ሁሉንም እንቁላሎች በአንድ ቅርጫት ውስጥ አትክተት፡፡
     ዋረን በፌ
- ለገንዘብ አትስራ፤ገንዘብን ላንተ እንዲሰራልህ አድርገው፡፡
     ሮበርት ኪዩሳኪ
- በእውቀት ላይ የሚፈስ መዋዕለ ንዋይ ምርጥ ወለድ ይከፍላል፡፡
     ቤንጃሚን ፍራንክሊን
- ትምህርት የዕድል መወጣጫ መሰላል ብቻ አይደለም፤ የመጪው ጊዜአችን ኢንቨስትመንትም ጭምር ነው፡፡
     ኢድ ማርኬይ
- ኢንቨስተር ለመሆን የተሻለ ነገ እንደሚመጣ የምታምን መሆን አለብህ፡፡
     ቤንጃሚን ግራሃም
- ድሃ ሰው በሚሰጥህ ምክር ገንዘብህን ኢንቨስት አታድርግ፡፡
     የስፔናውያን አባባል
- ገንዘቤ በሙሉ ያለው በቁጠባ ሂሳብ ውስጥ ነው፡፡ አባቴ የአክሲዮን ገበያን ምናልባት 75 ጊዜ ያህል አስረድቶኛል፡፡ አሁንም ግን አልገባኝም፡፡
     ጆን ሙላኔይ
- በአክሲዮን ገበያ ላይ ኢንቨስት ማድረግን እየነቀፍኩ አይደለም፤ እኔ ኢንቨስተር ነኝ፡፡
     ግሬስ ናፖሊታኖ
- የሳምንቱን የዕረፍት ቀናት አልወዳቸውም፤ ምክንያቱም የአክሲዮን ገበያ የለም፡፡
     ሬኔ ሪቭኪን

 አዲሱ የአሜሪካ ፕሬዚዳንት ዶናልድ ትራምፕ፣ ባለፈው የአገሪቱ ምርጫ፣ ከመራጮች ምዝገባ ጋር በተያያዘ የማጭበርበር ድርጊት መፈጸሙ እንዲጣራ የሚያደርግ ትዕዛዝ እንደሚሰጡ አስታውቀዋል፡፡
ትራምፕ ባለፈው ማክሰኞ በትዊተር ገጻቸው ላይ ባስተላለፉት መልዕክት፤ በሁለት ግዛቶች በመራጭነት የተመዘገቡ አሉ፣ ህጋዊ ያልሆኑ መራጮች ተመዝግበዋል፣ በህይወት የሌሉ ሰዎች ድምጽ ለመስጠት ተመዝግበዋል የሚሉትን ጨምሮ ከመራጮች ጋር በተያያዘ ተፈጽመዋል የተባሉ መጭበርበሮችን እንዲጣራ እንደሚያደርጉ ገልጸዋል። በምርመራው የተገኘውን ውጤት መሰረት በማድረግም፣ የአገሪቱን የምርጫ ድምጽ አሰጣጥ ስርዓት የምናስተካክል ይሆናል ብለዋል ትራምፕ፡፡
ትራምፕ ተፈጽሟል የተባለውን መጭበርበር አጣራለሁ ይበሉ እንጂ፣ የመንግስት ባለስልጣናትና የምርጫ ሃላፊዎች በምርጫው ሂደት መጭበርበር መፈጸሙን የሚያመለክቱ ምንም አይነት ተጨባጭ ማስረጃዎች አለመቅረባቸውን ሲናገሩ መቆየታቸውን ሮይተርስ ዘግቧል፡፡
ፕሬዚዳንቱ ይህን መግለጫ ያወጡት ባለፈው ማክሰኞ በተደረገው የዋይት ሃውስ ጋዜጣዊ መግለጫ ላይ ቃል አቀባዩ ሻን ስፓይሰር፤” በሚሊዮኖች የሚቆጠሩ ህገወጥ ስደተኞች በምርጫው ድምጻቸውን ሰጥተዋል” ብለው መናገራቸውን ተከትሎ እንደሆነ ዘገባው ገልጧል፡፡
ቢቢሲ በበኩሉ፤ ትራምፕ የምርጫው ሰሞን ጀምሮ መጭበርበር መፈጸሙን በትዊተር ገጻቸው ላይ ባስተላለፏቸው መልዕክቶች ሲገልጹና “በምርጫው አምስት ሚሊዮን ያህል ህገ-ወጥ መራጮች ለሄላሪ ድምጻቸውን ሰጥተዋል” የሚል ክስ ሲያቀርቡ እንደነበር አስታውሶ፣ ይህን ክሳቸውን የሚደግፍ ምንም አይነት ማረጋገጫ አለማቅረባቸውን ዘግቧል፡፡

   ኢትዮጵያ በሙስና ከ176 የአለማችን አገራት 68ኛ ደረጃን ይዛለች

     ላለፉት ዘጠኝ ተከታታይ አመታት በሙስና ክፉኛ በመዘፈቅ አለምን ስትመራ የዘለቀቺው ሶማሊያ፣ በተጠናቀቀው የፈረንጆች አመት 2016ም ቀዳሚነቷን ማስጠበቋን ትራንስፓረንሲ ኢንተርናሽናል የተባለው አለማቀፍ ተቋም አስታውቋል፡፡
ትራንስፓረንሲ ኢንተርናሽናል ባለፈው ረቡዕ ይፋ ባደረገው የአመቱ የዓለማችን የሙስና ሁኔታ ሪፖርት፣ ኢትዮጵያ ጥናቱ ከተሰራባቸው የአለማችን 176 አገራት በሙስና 68ኛ ደረጃ ላይ መቀመጧንም ጠቁሟል፡፡
ተቋሙ በአለማችን ከፍተኛ ሙስና የተንሰራፋባቸው አገራት በሚል ባወጣው ዝርዝር ውስጥ፡- ደቡብ ሱዳንና ሰሜን ኮርያ ሁለተኛና ሶስተኛ ደረጃ ያገኙ ሲሆን  ሶርያ፣ የመን፣ ሱዳን፣ ሊቢያ፣ አፍጋኒስታን፣ ጊኒ ቢሳኦ እና ቬንዙዌላ በቅደም ተከተል እስከ አስረኛ ያለውን ደረጃ መያዛቸው ተነግሯል፡፡
ጥናቱ ከተሰራባቸው የዓለማችን 176 አገራት መካከል ዴንማርክና ኒውዚላንድ እጅግ አነስተኛው ሙስና የሚታይባቸው ቀዳሚዎቹ አገራት ናቸው ያለው የተቋሙ ሪፖርት፤ ፊንላንድና ስዊድን በሁለተኛና በሶስተኛነት መቀመጣቸውን ገልጧል። አነስተኛ ሙስና ያለባቸው የአለማችን አገራት ተብለው የተዘረዘሩት ቀሪዎቹ አገራት ደግሞ፣ ስዊዘርላንድ፣ ኖርዌይ፣ ሲንጋፖር፣ ኒዘርላንድስ፣ ካናዳና ጀርመን ናቸው፡፡
ሙስና መጠንና ስፋቱ ይለያይ እንጂ በሁሉም የአለማችን አገራት እንደሚታይ ያስታወሰው ትራንስፓረንሲ ኢንተርናሽናል፤ በርካታ የአለማችን አገራት ከአንድ አመት በፊት ከነበረው ጋር ሲነጻጸር፣ በ2016 መሻሻል ከማሳየት ይልቅ የባሰ ሙስና ውስጥ ተዘፍቀው ተገኝተዋል ተብሏል፡፡