ኢትዮጵያ በተያዘው በጀት ዓመት ከ50 ሚ. በላይ የሃገር ውስጥ ጎብኚዎችን እንደምትጠብቅ የቱሪዝም ሚኒስቴር ገለጸ፡፡

ዘርፉ ለኢኮኖሚው አቅም መሆን እንዲችል ሁሉንም በማሳተፍ እንደሚሠራ፤ የቱሪዝም ሚኒስትር ሰላማዊት ካሣ በሚኒስቴር መሥሪያ ቤቱ የ2017 በጀት ዓመት አፈጻጸምና የ2018 በጀት ዓመት እቅድ ላይ ውይይት ሲካሄድ መናገራቸው ተዘግቧል፡፡

የ2017 በጀት ዓመት 1.3 ሚሊዮን የውጭ ሀገር ቱሪስቶች ሀገሪቱን እንደጎበኙ የተጠቆመ ሲሆን፤ ከ48 ሚሊዮን በላይ የሀገር ውስጥ ቱሪስቶች ጉብኝት አድርገዋል ተብሏል፡፡

በተጨማሪም፣ 228 ኢንቨስተሮችን ወደ ዘርፉ መሳብ እንደተቻለና በ “ቪዚት ኢትዮጵያ” የዲጂታል አሠራር የቱሪዝም ሀብትን የማስተዋወቅ ሥራ መከናወኑን ስፑትኒክ የሚኒስቴር መ/ቤቱን መረጃ ጠቅሶ ዘግቧል፡፡

በበጀት ዓመቱ የሰላም ሁኔታና የሎጀስቲክስ ጉድለት እንዲሁም የሆቴል ደረጃ ምደባ በወቅቱ አለመቅረቡ በተግዳሮነት ተጠቅሰዋል፡፡

• ኢትዮጵያ የአፍሪካ መሪ እየሆነች ነው!!

- ጠቅላይ ሚኒስትር ዐቢይ አህመድ የአፄ ምኒልክ ቤተ መንግስትንና ብሔራዊ ቤተ መንግስትን በማደስ ከዚህ ቀደም የተደበቀ የህዝብ ንብረትን ለህዝብ ክፍት አድርገዋል። የኬንያው ፕሬዚዳንት ዊሊያም ሩቶ የተናገሩትን እነሆ...

- ጠ/ሚኒስትር አብይ አህመድ የወንዞች ዳር ልማትን ሲጀምሩ፣ የኬንያው ፕሬዚዳንት ዊሊያም ሩቶ አርአያቸውን ተከትለው የወንዞች ዳር ልማት አስጀምረዋል...

- ጠ/ሚኒስትር አብይ አህመድ የኮሪደር ልማትን ከጀመሩ በኋላ የኬንያ፣ የሶማሊያ፣ የደቡብ አፍሪካና የጋና ፕሬዚዳንቶች እንዲሁ አድርገዋል...

-ጠቅላይ ሚኒስትር አብይ አህመድ አረንጓዴ አሻራቸውን በጀመሩበት ወቅት የኬንያ፣ የሩዋንዳ፣ የኡጋንዳና የናይጄሪያ ፕሬዚዳንቶች ይህንኑ መንገድ ተከትለዋል...

- ጠቅላይ ሚኒስትር አብይ አህመድ የኢትዮጵያ ሳይንስ ሙዚየም ሲገነቡ፣ ቻይና የሳይንስ ሙዚየም ዲዛይን በማድረግ እንድትረዳው ያልጠየቀ አፍሪካዊ መሪ አልነበረም። ምንም እንኳን እስካሁን የተሳካለት አንድም የአፍሪካ መሪ ባይኖርም...

- ጠቅላይ ሚኒስትር አብይ አህመድ የስንዴ እርሻ ጀመሩ፤ ከዚያ በኋላ የስንዴ እርሻ ያልጀመረ አፍሪካዊ መሪ የለም። እስካሁን ውጤት ያስመዘገበ የአፍሪካ መሪ ባይኖርም..

ምንጭ፡- Great Africa

ግድቡ ዓለም አቀፍ ሕግን የጣሰ ነው ሲሉ ከሰዋል

ግብፅና ሱዳን ኢትዮጵያ የገነባችው ታላቁ የሕዳሴ ግድብ በምሥራቅ የናይልተፋሰስ አገራት ላይ ዘላቂ ስጋት ደቅኗል አሉ።

ኢትዮጵያ የግድቡን ግንባታ አጠናቅቃ ለምረቃ እየተዘጋጀች ባለችብት ጊዜ፣ የሁለቱ አገራት የውጭ ጉዳይና የመስኖ ሚኒስትሮች በካይሮ ተገናኝተው ከመከሩ በኋላ ባወጡት መግለጫ ነው ስጋታቸውን የገለጹት።

ሚኒስትሮቹ ትላንት ረቡዕ በጋራ ባወጡት መግለጫ፤ ግድቡ "በዓለም አቀፍ ሕግ መሠረት በምሥራቅ ናይል ተፋሰስ መረጋጋት ላይ ቀጣይነት ያለው ስጋት" መደቀኑን አመልክተዋል።

የሁለቱ አገራት ሚኒስትሮች በካይሮ ባደረጉት በዚህ ስብሰባ ላይ፣ ግድቡ ዓለም አቀፍ ሕግን የጣሰና በታችኛው ተፋሰስ አገራት ላይ ከፍተኛ ስጋት የሚፈጥር መሆኑን አስታውቀዋል።

ኢትዮጵያ ግድቡን በውሃ ለመሙላት የወሰደችውን የተናጠል እርምጃ የተቃወሙት አገራቱ፤ የውሃ ደኅንነታቸው ጉዳይ አንድና የማይነጣጠል መሆኑን መግለጻቸውን ቢቢሲ ዘግቧል።

አክለውም፤ "ኢትዮጵያ ትብብርን ዳግም ለማጠናከር በምሥራቃዊ የናይል ተፋሰስ አገራት ላይ የምትከተለውን ፖሊሲ መቀየር አለባት" ብለዋል።

ግብፅና ሱዳን በዚህ መግለጫቸው፣ ሌሎች የናይል ተፋሰስ አገራትን ተሳትፎ ውድቅ አድርገው፣ ጉዳዩ በኢትዮጵያ፣ በግብፅና ሱዳን መካከል ብቻ መታየት እንዳለበት አስታውቀዋል።

የኢትዮጵያ ውሃና ኢነርጂ ሚኒስትር አቶ ሀብታሙ ኢተፋ ከቀናት በፊት ከቢቢሲ አፍሪካ ጋር ባደረጉት ቃለ ምልልስ፣ ኢትዮጵያ በሕዳሴ ግድብ ዙሪያ ለመነጋገር አሁንም ዝግጁ መሆኗን አስታውቀዋል። ነገር ግን ግብፅና ሱዳን የግድቡን ውሃ ሙሌትና ቀጣይ ሥራን በሚመለከት የቅኝ ግዛት ዘመን ስምምነትን መሠረት በማድረግ፣ ኢትዮጵያ አስገዳጅ ስምምነት እንድትፈርም ይፈልጋሉ ብለዋል።

በኢትዮጵያ በኩል ግን ይህ ተቀባይነት የሌለው መሆኑንና ሁሉንም የተፋሰሱ አገራትን ተጠቃሚ የሚያደርግ ስምምነት እንዲደረስ እንደምትፈልግ ሚኒስትሩ ገልጸዋል፡፡

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…

ነገ የሚከበረውን የመውሊድ በዓል አስመልክቶ የኢትዮጵያ እስልምና ጉዳዮች ጠቅላይ ምክር ቤት ሥራ አስፈፃሚ አባልና የወጣቶችና ሴቶች ዘርፍ ተጠሪ ሼህ አብድልሃሚድ አህመድ፤ መውሊድ ሲከበር የአካባቢን ሰላም በማስጠበቅና የተቸገሩ ወገኖችን በመርዳት ሊሆን እንደሚገባ ገልፀዋል፡፡

የታላቁ አንዋር መስጊድ ኢማም ሼህ ጠሃ መሐመድ ሃሩን በበኩላቸው፤ " ነቢዩ መሐመድ ለዓለም ሰላምና ለሰው ልጆች እዝነት የተላኩና የሰሩ በመሆናቸው ሙስሊሙ ማህበረሰቡ አርዓያነታቸውን ሊከተል ይገባል" ብለዋል።

በመውሊድ በዓል አከባበር ወቅት የተለያዩ ዝግጅቶች እንደሚካሄዱና በዓሉ የእስልምና አስተምህሮን ለእምነቱ ተከታዮች ለማስረፅ እንደሚረዳም ገልጸዋል፡፡

በዓሉ ነገ ሐሙስ በመላው ኢትዮጵያ የሚከበር ሲሆን፤ በአዲስ አበባም በታላቁ አንዋር መስጊድ በልዩ ልዩ ዝግጅቶች እንደሚከበርም ተጠቁሟል፡፡

"ለምንወዳት ሀገራችን ማገልገል ትልቅ እርካታ የሚሰጥ ነገር ነው"

የኢትዮጵያ ብሔራዊ ባንክ 10ኛው ገዥ የሆኑት አቶ ማሞ ምህረቱ፣ ከኃላፊነታቸው በገዛ ፈቃዳቸው መልቀቃቸውን አስታወቁ፡፡

አቶ ማሞ ምህረቱ፣ ለሰባት ዓመታት ያገለገሉበትን የመንግሥት የሥራ ኃላፊነት መልቀቃቸውን በዛሬው ዕለት በይፋዊ የኤክስ ገጻቸው ላይ ባሰፈሩት መልዕክት አስታውቀዋል፡፡

"ከ7 ዓመታት የሕዝብ አገልግሎት በኋላ ሌሎች ሥራዎችን ለማከናወን ከመንግሥት ኃላፊነት ለመልቀቅ ወስኛለሁ" ያሉት አቶ ማሞ፤ "ለምንወዳት ሀገራችን ማገልገል ትልቅ እርካታ የሚሰጥ ነገር ነው" ብለዋል፡፡

በተለይም ጠቅላይ ሚኒስትር ዐቢይ አሕመድ በመሩት የቤት-አስተዳደር ኢኮኖሚ ማሻሻያ ፕሮግራም ውስጥ በመስራታቸው እንዲሁም፤ የኢትዮጵያ ብሔራዊ ባንክን በገዥነት በመምራታቸው ከፍተኛ እርካታ ማግኘታቸውን በመግለጽ፣ ለጠቅላይ ሚኒስትሩ አመራርም ምስጋናቸውን አቅርበዋል።

አክለውም፤ "የኢትዮጵያ ብሔራዊ ባንክ ገዥ እንደመሆኔ፣ በሀገሪቱ ውስጥ ከ50 ዓመታት ወዲህ ትልቁ የሚባለውን የኢኮኖሚ ማሻሻያ መርቻለሁ" ብሏል፡፡

"በእነዚህ ማሻሻያዎች ምክንያት የውጭ ምንዛሪ ከሦስት እጥፍ በላይ ጨምሯል፤ ይህም በአንድ ዓመት ጊዜ ውስጥ በታሪክ ከፍተኛ ደረጃ ላይ ደርሷል" ያሉት አቶ ማሞ፤ የዋጋ ግሽበት በሰባት ዓመታት ውስጥ ዝቅተኛ ደረጃ ላይ መድረሱን እንዲሁም የዲጂታል ክፍያዎች ከ10 እጥፍ በላይ መጨመራቸውን አስረድተዋል፡፡

አክለውም፤ "የብሔራዊ ባንክ ቡድንና የሥራ ባልደረቦቻችን ወደር ለሌለው ሙያዊ ብቃትና ከራስ ወዳድነት ነፃ የሆነ የሥራ ሥነ ምግባር ምስጋና ይግባውና፤ በዘመናዊ የገንዘብ ፖሊሲ ማዕቀፍ ወደ ገበያ ተኮር የምንዛሪ ተመን ሥርዓት በመሸጋገር የባንኩን የራስ ገዝ አስተዳደር በአዲስ ሕግ እንዲቋቋም አግዘናል" ብለዋል፡፡

የፋይናንስ ዘርፉ በከፍተኛ ሁኔታ ተጠናክሮ በመስፋፋቱ ከ5 ትሪሊየን በላይ ሀብት መድረሱን በመግለጽ፤ እነዚህና ሌሎችም የመንግሥት ታሪካዊ ክንዋኔዎች አስደናቂ መሆናቸውንም ተናግረዋል።

አቶ ማሞ በመጨረሻም፤ "ዛሬ ብሔራዊ ባንክን ለቅቄ ስወጣ የዘመናዊ ማዕከላዊ ባንክ ዓላማና ራዕይ ሊደረስበት እንደሚችል እርግጠኛ በመሆን ነው" ሲሉ መልዕክታቸውን ቋጭተዋል፡፡